'டீ' போடும் கேப்புல மொறு மொறுன்னு பக்கோடா... செம்ம ஹெல்தி!

ராகி பக்கோடா ஒரு சத்தான, சுவையான மாலை நேர சிற்றுண்டி. இதை வீட்டிலேயே எளிதாக செய்யலாம். அதிகம் எண்ணெய் குடிக்காத வகையில் இதை எப்படி சுவையாக செய்யலாம் என்று ஃபூடிதமிழா இன்ஸ்டா பக்கத்தில் கூறியிருப்பது பற்றி பார்ப்போம். இதை வாரத்தில் இரண்டு முறை பிள்ளைகளுக்கு செய்து கொடுக்கலாம் ராகி என்பதால் அதிக சத்தானதும் கூட. 

தேவையான பொருட்கள்:

ராகி மாவு (கேழ்வரகு மாவு): 1 கப்
கடலை மாவு: 1/4 கப்
அரிசி மாவு: 2 டேபிள்ஸ்பூன்
பெரிய வெங்காயம்: 1
பச்சை மிளகாய்: 1-2 
கறிவேப்பிலை
இஞ்சி பூண்டு விழுது: 1/2 டீஸ்பூன் 
சீரகம்: 1/2 டீஸ்பூன்
மஞ்சள் தூள்: 1/4 டீஸ்பூன்
மிளகாய் தூள்: 1/2 டீஸ்பூன்
உப்பு
எண்ணெய்

செய்முறை:

ஒரு அகலமான பாத்திரத்தில் ராகி மாவு, கடலை மாவு, அரிசி மாவு ஆகியவற்றைச் சேர்த்து நன்றாக கலக்கவும். இத்துடன் பொடியாக நறுக்கிய வெங்காயம், பச்சை மிளகாய், கறிவேப்பிலை, சீரகம், மஞ்சள் தூள், மிளகாய் தூள், இஞ்சி பூண்டு விழுது (விரும்பினால்) மற்றும் உப்பு சேர்த்து நன்றாக கலக்கவும்.

சிறிது சிறிதாக தண்ணீர் சேர்த்து, பக்கோடா மாவு பதத்திற்கு கெட்டியாக பிசையவும். மாவு மிகவும் நீர்த்துப் போகாமலும், அதே சமயம் மிகவும் கெட்டியாகவும் இல்லாமல் பார்த்துக்கொள்ளவும். (மாவு கெட்டியாக இருந்தால் பக்கோடா கடினமாகிவிடும், நீர்த்துப் போனால் எண்ணெய் அதிகமாக குடிக்கும்).

ஒரு கடாயில் பொரிப்பதற்கு தேவையான அளவு எண்ணெய் ஊற்றி சூடுபடுத்தவும். எண்ணெய் மிதமான சூட்டில் இருக்க வேண்டும். எண்ணெய் காய்ந்ததும், பிசைந்து வைத்துள்ள மாவை சிறு சிறு உருண்டைகளாகவோ அல்லது உதிரி உதிரியாகவோ எண்ணெயில் போட்டு பொரிக்கவும்.

பக்கோடாக்கள் பொன்னிறமாக மாறி, மொறுமொறுப்பானதும் எண்ணெயில் இருந்து எடுக்கவும். அதிகப்படியான எண்ணெயை உறிஞ்சுவதற்கு டிஷ்யூ பேப்பரில் வைக்கலாம். அவ்வளவுதான் சுவையான மற்றும் ஆரோக்கியமான ராகி பக்கோடா தயார். இதை சூடான தேநீர் அல்லது காபியுடன் மாலை நேர சிற்றுண்டியாக பரிமாறலாம்.

View this post on Instagram

A post shared by FoodieTamizha (@foodietamizha)