நீர்ச்சத்து அதிகம்... இந்த சட்னியை இப்பவே ட்ரை பண்ணுங்க!

சட்னிகளில் பல வகைகள் இருந்தாலும், ஆரோக்கியத்தையும் சுவையையும் ஒருங்கே தரும் அல்டிமேட் ரெசிபி முள்ளங்கி சட்னி, கொழுப்பைக் குறைக்க உதவுவதுடன், செரிமானப் பிரச்னைகளையும் சரிசெய்யும். உங்கள் வீட்டில் செய்து பாருங்கள், ஆனால் இதில் முள்ளங்கி இருக்கிறது என்று மட்டும் சொல்லாதீர்கள்.

தேவையான பொருட்கள்:

எண்ணெய், கடுகு, உளுந்து, கறிவேப்பிலை, மல்லி, சீரகம், பூண்டு 3 பல், வரமிளகாய் 4-5, வெங்காயம் (சிறிதளவு), துருவிய முள்ளங்கி, புளி, கொத்தமல்லி (சிறிதளவு), காஷ்மீரி மிளகாய்த்தூள் 1 டீஸ்பூன், பெருங்காயத்தூள், உப்பு (தேவைக்கேற்ப)

செய்முறை:

ஒரு கடாயில் சிறிது எண்ணெய் சேர்த்து, கடுகு, உளுந்து, கறிவேப்பிலை, மல்லி, சீரகம், 3 பல் பூண்டு, 4 முதல் 5 வரமிளகாய் ஆகியவற்றைச் சேர்க்கவும். சிறிது வெங்காயம் சேர்த்து நன்கு வதக்கவும். பின்னர், துருவி வைத்துள்ள முள்ளங்கியைச் சேர்த்து வதக்கவும். பெரிய எலுமிச்சை பழ அளவு புளியையும், சிறிது கொத்தமல்லியையும் சேர்க்கவும். வதங்கிக்கொண்டிருக்கும்போதே, ஒரு டீஸ்பூன் காஷ்மீரி மிளகாய்த்தூள் மற்றும் பெருங்காயத்தூள் சேர்த்து நன்கு கிளறவும். இதில் உள்ள ஈரப்பதம் எல்லாம் குறைந்து, தொக்கு பதத்திற்கு வரும் வரை வதக்க வேண்டும். இந்த கலவையை ஆறவைத்து, சிறிது தண்ணீர் சேர்த்து நன்கு பேஸ்ட்டாக அரைத்துக்கொள்ளவும். இறுதியாக, தாளிப்புக்கு கடுகு, உளுந்து, சிறிது காய்ந்த மிளகாய் மற்றும் கறிவேப்பிலை சேர்த்து, அரைத்த சட்னியில் கொட்டவும். 

இந்த முள்ளங்கி சட்னி உங்கள் கொழுப்பைக் குறைக்கவும், செரிமான அமைப்பை மேம்படுத்தவும் உதவும். முள்ளங்கியில் உள்ள சத்துக்கள் உடலுக்கு மிகவும் நன்மை பயக்கும். இந்த அல்டிமேட் சட்னியை உங்கள் வீட்டில் செய்து பார்த்து, அதன் சுவையையும் ஆரோக்கிய நன்மைகளை அனுபவியுங்கள். முள்ளங்கி இருக்கிறது என்று சொல்லாமல் பரிமாறி, உங்கள் குடும்பத்தினரின் ரியாக்‌ஷன்களைப் பாருங்கள்!