காய்ச்சல், சளியை விரட்டும்... ஒருமுறை இந்த ரசம் குடிச்சுப் பாருங்க!

சளி, காய்ச்சல், மற்றும் இருமல் போன்ற உடல்நலக் குறைபாடுகள் வரும்போது நாம் நாடும் பாரம்பரிய மருத்துவ முறைகளில் முதன்மையானது தூதுவளை ரசம். எளிமையாக வீட்டில் தயாரிக்கக்கூடிய இந்த ரசம், அதன் மருத்துவ குணங்களால் மிகுந்த பயன் அளிக்கிறது. இது எவ்வாறு தயாரிக்கப்படுகிறது என்பது பற்றி நிதிமகேஷ் இன்ஸ்டா பக்கத்தில் கூறியிருப்பது பற்றி பார்ப்போம். 

தேவையான பொருட்கள்: 

தூதுவளை இலைகள் (10-12)
மல்லி விதை (1 ஸ்பூன்)
சீரகம் (1 ஸ்பூன்)
மிளகு (1 ஸ்பூன்)
பூண்டு (6 பல்)
காய்ந்த மிளகாய் (1)
தக்காளி (1)
புளி (1 எலுமிச்சை அளவு)
கடுகு
பெருங்காயம்
கறிவேப்பிலை
உப்பு
மஞ்சள் தூள்
கொத்தமல்லி இலைகள்

செய்முறை:

முதலில், சுமார் 10-12 தூதுவளை இலைகளை சேகரித்து நன்கு சுத்தம் செய்து கொள்ள வேண்டும். பின்னர், ஒரு கடாயில் சிறிதளவு எண்ணெய் விட்டு, ஒரு ஸ்பூன் மல்லி விதை, சீரகம், மிளகு, ஆறு பூண்டு பற்கள், மற்றும் ஒரு காய்ந்த மிளகாய் சேர்த்து நன்கு வறுக்க வேண்டும். வறுத்ததும், அதனுடன் சுத்தம் செய்த தூதுவளை இலைகளைச் சேர்த்து, அவை சற்று வாடும் வரை வதக்க வேண்டும்.

வதக்கிய இந்த கலவையை ஒரு மிக்ஸி ஜாரில் மாற்றி, அதனுடன் ஒரு தக்காளி சேர்த்து மையாக அரைத்து விழுதாக்கிக் கொள்ளவும். ரசத்திற்குத் தேவையான புளிக்கரைசலைத் தயாரிக்க, ஒரு எலுமிச்சை அளவு புளியை எடுத்து, தண்ணீரில் ஊறவைத்து கரைத்துக்கொள்ள வேண்டும்.

அடுத்ததாக, மற்றொரு பாத்திரத்தில் எண்ணெய் ஊற்றி, கடுகு, பெருங்காயம், மற்றும் கறிவேப்பிலை சேர்த்து தாளிக்கவும். தாளித்ததும், அரைத்து வைத்துள்ள தூதுவளை விழுதைச் சேர்த்து நன்றாக வதக்கவும். பின்னர், தேவையான அளவு உப்பு, மஞ்சள் தூள் மற்றும் புளிக்கரைசல் சேர்த்து கலக்கவும்.

View this post on Instagram

A post shared by Nithya Mahesh (@n_i_t_h_i_m_a_h_e_s_h)

ரசத்தின் பதம் சரியாக அமைய, தேவையான அளவு தண்ணீர் சேர்த்து, நுரை வரும் வரை மட்டுமே கொதிக்கவிட வேண்டும். முக்கியமாக, ரசம் கொதித்து விடக்கூடாது; பாத்திரத்தின் ஓரங்களில் சிறிய குமிழ்கள் தோன்றியதும் அடுப்பை அணைத்து விட வேண்டும். இறுதியாக, பொடியாக நறுக்கிய கொத்தமல்லி இலைகளைத் தூவி மூடி வைத்தால், சுவையான மற்றும் ஆரோக்கியமான தூதுவளை ரசம் தயாராகிவிடும். இந்த ரசத்தை சூடான சாதத்துடன் சேர்த்து சாப்பிடலாம். இது சளி மற்றும் காய்ச்சலுக்கு சிறந்த நிவாரணியாக இருப்பதுடன், உடலில் நோய் எதிர்ப்பு சக்தியையும் அதிகரிக்க உதவுகிறது.