மொறு மொறு உளுந்து வடைக்கு கொஞ்சம் நெய்... சர்க்கரைக்கு எறும்பு வராமல் இருக்க கிராம்பு: ஈஸி கிச்சன் டிப்ஸ்

சமையல் என்பது வெறும் உணவு தயாரிப்பது மட்டுமல்ல, அது ஒரு கலை. சரியான நுட்பங்களுடன் சமைக்கும்போது, உணவின் சுவையும் தரமும் மேம்படும். இங்கே சில எளிய சமையல் குறிப்புகள்:

• மொறுமொறு சிப்ஸ்: உருளைக்கிழங்கு சிப்ஸ் தயாரிக்கும் முன், சீவிய துண்டுகளை மஞ்சள் மற்றும் உப்பு கலந்த நீரில் சிறிது நேரம் ஊற விடவும். பின்னர் தண்ணீரை வடித்து, ஒரு துணியால் துடைத்து எடுத்த பிறகு பொரித்தால், சிப்ஸ் பொன்னிறமாகவும் மொறுமொறுப்பாகவும் வரும்.
• பச்சை நிற காய்கறிகள்: பீன்ஸ், பட்டாணி போன்ற காய்கறிகளை சமைக்கும் போது, சிறிதளவு சர்க்கரை சேர்த்து வேக வைத்தால், அவற்றின் இயல்பான பளபளப்பான பச்சை நிறம் மாறாமல் இருக்கும்.
• காளான் சுத்தம் செய்யும் முறை: காளானை மென்மையாகக் கையாள வேண்டும். நனைந்த துணியாலோ அல்லது சுத்தமான பிரஷ்ஷாலோ மெதுவாகத் துடைத்து சுத்தம் செய்யலாம். குளிர்ந்த நீரில் விரைந்து கழுவி, உடனடியாகக் காய்ந்த துண்டால் துடைத்த பின்னரே சமையலுக்குப் பயன்படுத்த வேண்டும்.
• பாதாம் தோல் நீக்க: பாதாம் பருப்பின் தோலை எளிதாக நீக்க, அவற்றை 20 நிமிடங்கள் சுடுநீரில் ஊற வைத்தால் போதும். பின்பு தோலை சிரமமின்றி அகற்றலாம்.
• எறும்பு இல்லாத சர்க்கரை டப்பா: சர்க்கரை டப்பாவில் மூன்று அல்லது நான்கு கிராம்புத் துண்டுகளைப் போட்டு வைத்தால், எறும்புகள் சர்க்கரையின் பக்கம் வராது.
• தக்காளியின் தேர்வு: தக்காளி வாங்கும் போது அதன் பயன்பாட்டிற்கு ஏற்ப தேர்வு செய்யவும். சாலட்டுகளுக்கு சதைப்பற்றுள்ள தக்காளிகளும், ரசம் மற்றும் ஜூஸ்களுக்கு அதிக சாறுள்ள நன்கு பழுத்த தக்காளிகளும் சிறந்தவை.
• மிருதுவான தோசை: தோசை மாவு அரைக்கும் போது, சிறிதளவு வேகவைத்த சாதத்தை சேர்த்து அரைத்தால், தோசைகள் மிகவும் மிருதுவாகவும் சுவையாகவும் இருக்கும்.
• மிளகாய்த்தூள் பாதுகாப்பு: மிளகாய்த்தூள் நீண்ட நாட்கள் கெட்டுப்போகாமல் இருக்கவும், அதன் காரமும் மணமும் குறையாமல் இருக்கவும், அதில் ஒரு சிறு பெருங்காயக் கட்டியைப் போட்டு வைக்கலாம்.
• சுவையான வெஜிடபிள் கட்லெட்: வெஜிடபிள் கட்லெட் தயாரிக்கும் போது, சிறிதளவு துருவிய தேங்காய் சேர்ப்பது, கட்லெட்டின் சுவையை மேலும் அதிகரிக்கும்.
• ஆப்பம் உலராமல் இருக்க: ஆப்ப மாவு கலக்கும் போது ஒரு தேக்கரண்டி கோதுமை மாவு சேர்ப்பதால், ஆப்பம் சீக்கிரம் காய்ந்து போகாது.
• எண்ணெய் பிசுபிசுப்பு நீங்க: பளபளப்பான தரையில் எண்ணெய் கொட்டிவிட்டால், அந்த இடத்தில் சிறிதளவு அரிசி மாவு அல்லது வேறு ஏதேனும் தானிய மாவைத் தூவி, சிறிது நேரம் கழித்து ஒரு காகிதத்தால் துடைத்தால் எண்ணெய் பசையை எளிதாக நீக்கலாம்.
• மொறுமொறு உளுந்து வடை: உளுந்து வடைக்கு மாவு தயாரிக்கும் போது, அதில் சிறிதளவு நெய் சேர்த்தால் வடை மொறுமொறுப்பாக இருப்பதோடு, அதிக எண்ணெய் குடிக்காது.
• சுவையான உப்புமா: பாம்பே ரவையில் உப்புமா செய்யும் போது, இஞ்சி, பச்சை மிளகாய், பெரிய வெங்காயம், கறிவேப்பிலை போன்றவற்றை நெய்யில் வதக்கிச் செய்வது, மிதமான சூட்டில் உண்ணும்போது பிரமாதமான சுவையைத் தரும்.
• எண்ணெய் புகை வருவதைத் தடுக்க: சமையல் எண்ணெயை சூடாக்கும் போது சில சமயங்களில் புகை கிளம்பும். இதைத் தவிர்க்க, எண்ணெயில் ஒரு சிறிய துண்டு புளியைப் போட்டால் புகை வராது.