தொண்டைக்கு இதம்... டேஸ்ட்டுக்கு அடிமை கூட ஆகுவிங்க; இந்தக் குழம்பு அம்புட்டு ருசி!

சளி, இருமல் போன்ற உடல்நலக் கோளாறுகளுக்கு நிவாரணம் அளிக்கும் வகையில், நம் பாரம்பரிய உணவுகளில் ஒன்று சுக்கு மிளகு குழம்பு. அதன் சுவைக்கும், ஆரோக்கியத்திற்கும் பல மருத்துவ குணங்கள் உண்டு. எனவே பிள்ளைகளுக்கு வீட்டில் சளி பிடிக்கும்போது இதை செய்து கொடுங்கள். இதனை எப்படி செய்வது என்று உஷாஃபுட் ஸ்பாட் இன்ஸ்டாகிராம் பக்கத்தில் கூறியிருப்பது பற்றி பார்ப்போம்.

தேவையான பொருட்கள்:

பூண்டு: 10 பற்கள்
தனியா: அரை ஸ்பூன்
மிளகு: அரை ஸ்பூன்
சுக்கு: அரை ஸ்பூன்
சீரகம்: அரை ஸ்பூன்
வெந்தயம்: ஒரு சிட்டிகை
கடலை எண்ணெய்: 4 தேக்கரண்டி
கடுகு: ஒரு ஸ்பூன்
சீரகம்: அரை ஸ்பூன்
உளுத்தம் பருப்பு: ஒரு ஸ்பூன்
வெங்காயம்: ஒன்று (பெரியது)
கறிவேப்பிலை: சிறிதளவு
தக்காளி: மூன்று
மஞ்சள் தூள்: அரை ஸ்பூன்
உப்பு: தேவையான அளவு
குழம்பு மிளகாய் தூள்: ஒரு தேக்கரண்டி
புளி: 50 கிராம் (கரைசல்)
தண்ணீர்: அரை கிளாஸ்
வெல்லம்: ஒரு துண்டு

செய்முறை:

பூண்டு, தனியா, மிளகு, சுக்கு, சீரகம் மற்றும் வெந்தயம் ஆகியவற்றை வறுத்து நன்கு அரைத்துக் கொள்ளவும். ஒரு கடாயில் எண்ணெய் ஊற்றி சூடானதும் கடுகு, சீரகம், உளுத்தம் பருப்பு, வெங்காயம், கறிவேப்பிலை மற்றும் தக்காளி சேர்த்து வதக்கவும். இவை அனைத்தும் பச்சை வாசம் நீங்கும் வரை நன்றாக வதங்க வேண்டும். 

மஞ்சள் தூள் மற்றும் உப்பு சேர்த்து நன்கு வதக்கவும். மிளகாய் தூள் சேர்த்து, இரண்டு நிமிடம் குறைந்த தீயில் வதக்கவும். அரை கிளாஸ் தண்ணீர் மற்றும் புளிக் கரைசலை சேர்த்து கொதிக்க விடவும். காரத்திற்கு ஏற்ப மிளகாய்த்தூள் சேர்த்து கொள்ளலாம்.

அரைத்து வைத்த மசாலா கலவையை சேர்த்து நன்கு கலக்கவும். எண்ணெய் பிரிந்து வந்ததும், வெல்லம் சேர்த்து நன்கு கலக்கவும். சுவையான சுக்கு மிளகு குழம்பு தயார். நெய் சேர்த்துப் பரிமாறினால் சுவை கூடுதலாக இருக்கும். சளி, இருமல் போன்ற உடல்நலக் கோளாறுகளுக்கு நிவாரணம் அளிக்கும் வகையில், நம் பாரம்பரிய உணவுகளில் ஒன்று சுக்கு மிளகு குழம்பு. இதனை மழைக்காலங்களில் வீட்டில் அடிக்கடி செய்து பிள்ளைகளுக்கு கொடுங்கள் சுவையாக இருக்கும்.