1,000 கடிதங்கள், 20 ஆண்டுகள்: பாடப் புத்தகங்களில் அரிவாள் செல் இரத்த சோகைக்கு இடம் தேடும் போராட்டம்

Rupsa Chakraborty

இரண்டு தசாப்தங்களாக, மகாராஷ்டிராவின் பழங்குடியினர் ஆதிக்கம் செலுத்தும் கட்சிரோலி மாவட்டத்தில் பணிபுரியும் ஒரு மருத்துவர்,  பரம்பரைக் கோளாறான அரிவாள் செல் இரத்த சோகை (சிக்கிள் செல் அனீமியா) குறித்து விழிப்புணர்வை ஏற்படுத்த, அது குறித்த தகவல்களை பள்ளி மற்றும் கல்லூரி பாடத்திட்டத்தில் சேர்க்க வேண்டும் என்று வலியுறுத்தி, 15 மாநிலங்களில் உள்ள அதிகாரிகளுக்கு 1,000 க்கும் மேற்பட்ட கடிதங்கள் மற்றும் மின்னஞ்சல்களை எழுதியுள்ளார்.

மத்திய அமைச்சர் நிதின் கட்கரி, இந்தியா முழுவதும் உள்ள அனைத்து உயர்கல்வி நிறுவனங்களையும் மனிதர்களை பலவீனமான நிலைக்கு கொண்டுச் செல்லும் அரிவாள் செல் இரத்த சோகை (Sickle cell Anemia) குறித்து பாடத்திட்டத்தில் ஒரு அத்தியாயம் சேர்க்க வேண்டும் என்று பல்கலைக்கழக மானியக் குழுவை (யு.ஜி.சி) கேட்டுக் கொண்டபோது டாக்டர் ரமேஷ் காட்ரேவின் முயற்சிகள் பலனளித்தன.

இதையும் படியுங்கள்: தகுதி, தூய்மை குறித்த சாதியவாத பார்வைகளை அம்பேத்கர் எழுத்துக்களால் எதிர்க்க வேண்டும் – ஜார்க்கண்ட் கருத்தரங்கம்

மார்ச் 28 அன்று, யு.ஜி.சி.,யின் (UGC) செயலாளர் மணீஷ் ஜோஷி, அனைத்து பல்கலைக்கழகங்கள் மற்றும் கல்லூரிகளுக்கு "பரம்பரை அரிவாள் செல் இரத்த சோகை, அதற்கான காரணம், சிகிச்சை, பரம்பரை முறை, சோதனை முறைகள் மற்றும் தடுப்பு முறைகள் ஆகியவற்றை உள்ளடக்கிய பாடங்களை தொடர்புடைய பாடத்திட்டங்களில் சேர்க்க பரிசீலிக்க வேண்டும்" என்று கடிதம் எழுதினார்.

"நான் 15 மாநிலங்களில் உள்ள அதிகாரிகளுக்கு 1,000 மின்னஞ்சல்கள் மற்றும் கடிதங்களை எழுதினேன், இந்த நோய் பற்றிய தகவல்களை பாடத்திட்டத்தில் சேர்க்குமாறு கேட்டுக் கொண்டேன். கடந்த இரண்டு தசாப்தங்களாக கட்சிரோலி மாவட்டத்தில் கிட்டத்தட்ட 20,000 நோயாளிகளுக்கு நான் சிகிச்சை அளித்துள்ளேன். இந்த நோயாளிகளுக்கு சிகிச்சையளிக்கும் போது, ​​பலர் இந்த இரத்தக் கோளாறு இருப்பது கண்டறியப்படாமலேயே பலியாவதை நான் உணர்ந்தேன், ”என்று டாக்டர் ரமேஷ் காட்ரே தி இந்தியன் எக்ஸ்பிரஸிடம் கூறினார்.

அரிவாள் செல் இரத்த சோகை என்பது ஒரு மரபணு கோளாறு ஆகும், இதில் ஆக்ஸிஜன் குறைபாடு காரணமாக சிவப்பு இரத்த அணுக்கள் ஓவல் வடிவமாக மாறும்.

உலக சுகாதார அமைப்பு (WHO) அரிவாள் செல் இரத்த சோகையின் அதிக பாதிப்பு ஆப்பிரிக்காவில் உள்ளது என்று கூறுகிறது. மத்திய அரசின் கூற்றுப்படி, உலகில் இந்த நிலையில் இந்தியா இரண்டாவது அதிக பாதிப்புகளைக் கொண்டுள்ளது. ஒவ்வொரு ஆண்டும் பிறக்கும் 30,000 - 40,000 குழந்தைகள் இந்த நோயால் பாதிக்கப்படுகின்றனர். இந்த நிலை குறிப்பாக இந்தியாவின் பழங்குடி மக்களிடையே பரவலாக உள்ளது, அங்கு 86 குழந்தைகளில் ஒருவர் இந்த நிலையில் பாதிக்கப்படுகின்றனர். இந்த நோயால் அதிகம் பாதிக்கப்படும் 15 மாநிலங்களில், மகாராஷ்டிரா முதலிடத்தில் உள்ளது.

"முன்கூட்டிய நோயறிதல், வழக்கமான பின்தொடர்தல் மற்றும் பொருத்தமான மருத்துவ பராமரிப்பு இல்லாத நிலையில், அரிவாள் செல் இரத்த சோகை பெரும்பாலும் குணப்படுத்த முடியாததாகவும் உயிருக்கு ஆபத்தான நோயாகவும் உள்ளது. பொதுவாக மருத்துவ சேவை எளிதாக கிடைக்காத, குறிப்பாக மிகவும் ஏழை, கிராமப்புற, தொலைதூர மற்றும் பட்டியல் சாதி மற்றும் பழங்குடியின சமூகங்களுக்கு இந்த நோய் ஆபத்தானதாக உள்ளது,” என்று டாக்டர் ரமேஷ் காட்ரே கூறினார்.

பாடத்திட்டத்தில் இந்தக் கோளாறு குறித்த தகவல்களைச் சேர்ப்பது இந்தியாவின் தொலைதூரப் பகுதியில் உள்ள பள்ளிக்குச் செல்லும் குழந்தைகளால் கூட அதன் அறிகுறிகளை அடையாளம் காண முடியும் என்பதை உறுதி செய்யும் என்று டாக்டர் ரமேஷ் காட்ரே கூறினார்.

“அரிவாள் செல் இரத்த சோகை குறித்த தேசிய தரவு எதுவும் இல்லை. இந்த நோயுடன் தொடர்புடைய வாழ்க்கைத் தரம் மற்றும் இறப்பு பற்றிய ஆய்வுகள் மிகக் குறைவு. குறைந்த மற்றும் நடுத்தர வருமானம் உள்ள நாடுகளில் 60-70 சதவீத குழந்தைகள் அரிவாள் செல் அனீமியாவால் இறப்பதாக WHO புள்ளிவிவரங்கள் தெரிவிக்கின்றன," என்று டாக்டர் ரமேஷ் காட்ரே கூறினார்.

கடந்த டிசம்பரில், தி இந்தியன் எக்ஸ்பிரஸ், இந்தியாவில் இரத்தக் கோளாறு மற்றும் அது தொடர்புடைய இறப்புகள் குறித்த தரவுகள் இல்லை என்று செய்தி வெளியிட்டது.

2021 டிசம்பரில் அமைச்சர் நிதின் கட்கரியுடனான சந்திப்பிற்குப் பிறகு, இந்த கோளாறு குறித்து இளைஞர்கள், சமூகங்கள் மற்றும் மருத்துவப் பயிற்சியாளர்களுக்கு கல்வி கற்பிப்பதன் முக்கியத்துவத்தை கோடிட்டுக் காட்டி அவருக்கு ஒரு கடிதம் எழுதியதாக டாக்டர் ரமேஷ் காட்ரே கூறினார். அமைச்சர் தனது பரிந்துரையை இந்திய மருத்துவ ஆராய்ச்சி கவுன்சிலுக்கு (ICMR) அனுப்பினார்.

மார்ச் 24, 2022 அன்று, ICMR இன் அப்போதைய இயக்குநர் ஜெனரலாக இருந்த பேராசிரியர் பல்ராம் பார்கவா, UGC உட்பட 6 அரசு அமைப்புகளுக்கு இந்தப் பிரச்சினை குறித்து கடிதம் எழுதினார். “மாண்புமிகு சாலைப் போக்குவரத்து மற்றும் நெடுஞ்சாலைத் துறை அமைச்சர் ஸ்ரீ நிதின் கட்கரி, பள்ளிக் கல்வியின் பாடத்திட்டத்தில் அரிவாள் செல் இரத்த சோகை பற்றிய அத்தியாயத்தைச் சேர்க்கக் கோரி ஆரோக்யந்தம் சாஸ்தான் (என்.ஜி.ஓ-குர்கேடா) தலைவர் டாக்டர் ரமேஷ் காட்ரேயின் பரிந்துரைகள் குறித்து கடிதம் அனுப்பினார்…” என்று கடிதத்தில் குறிப்பிடப்பட்டு இருந்தது.

டாக்டர் ரமேஷ் காட்ரேவின் பரிந்துரைகளை பரிசீலிக்குமாறு கல்வித் துறையைக் கடிதம் கேட்டுக் கொண்டுள்ளது.

"பள்ளி மற்றும் உயர் கல்வி நிறுவனங்கள் உட்பட பல்வேறு சமூக மட்டங்களில், நன்கு வடிவமைக்கப்பட்ட கல்வித் திட்டமானது அரிவாள் செல் நோய் குறித்த விழிப்புணர்வுக்கு உதவியாக இருக்கும் என்ற அதே கருத்தை ICMR கொண்டுள்ளது" என்று ICMR கடிதத்தில் கூறப்பட்டுள்ளது.

2023-24 பட்ஜெட்டில், 2047 ஆம் ஆண்டிற்குள் நாட்டை அரிவாள் செல் இரத்த சோகை இல்லாத நாடாக மாற்றும் திட்டத்தை மத்திய அரசு அறிவித்தது. விழிப்புணர்வு ஏற்படுத்துதல், பாதிக்கப்பட்ட பழங்குடியினப் பகுதிகளில் உள்ள 0-40 வயதுக்குட்பட்ட சுமார் 7 கோடி பேரை பொதுவான திரையிடலுக்கு உட்படுத்துதல் மற்றும் மத்திய அமைச்சகங்கள் மற்றும் மாநில அரசுகளின் கூட்டு முயற்சிகள் மூலம் ஆலோசனை வழங்குதல் ஆகியவற்றில் இந்த மிஷன் கவனம் செலுத்துகிறது.

"2047 ஆம் ஆண்டிற்குள் இந்த நோயை அகற்ற விரும்பினால், இளைய தலைமுறையினரிடையே ஆரம்பகட்ட விழிப்புணர்வுக்கு நாம் கவனம் செலுத்த வேண்டும்" என்று டாக்டர் ரமேஷ் காட்ரே கூறினார்.

ஆயுட்காலம் கணிசமாகக் குறைவதற்கு வழிவகுக்கும் இந்த இரத்த சோகையின் நிலைகளைப் பற்றி பேசுகையில், அரிவாள் செல் இரத்த சோகையானது நாள்பட்ட இரத்த சோகை, கடுமையான வலி, உறுப்பு மாரடைப்பு மற்றும் நாள்பட்ட உறுப்பு சேதம் ஆகியவற்றால் வகைப்படுத்தப்படுகிறது. எலும்பு மஜ்ஜை மாற்று அறுவை சிகிச்சை இந்த நிலைக்கு அறியப்பட்ட ஒரே சிகிச்சையாகும், ஆனால் அது பழங்குடி சமூகங்களுக்கு எட்டவில்லை. ஒரு எளிய இரத்தப் பரிசோதனை மூலம் இந்தக் கோளாறைக் கண்டறியலாம், வயிற்றில் இருக்கும் குழந்தைக்கும் கூட. இதற்கான சிகிச்சைகள் நோயாளியின் வாழ்க்கைத் தரத்தை மேம்படுத்த உதவும், என்று டாக்டர் ரமேஷ் காட்ரே கூறினார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil