அதானி மின் ஒப்பந்தங்களை ரத்து செய்வது கடினம்; விநியோகம் பாதிக்கப்படும்; ஆந்திர முதல்வரின் மகன் நாரா லோகேஷ்

Sreenivas Janyala

அதானி குழுமத்திடம் இருந்து மின்சாரம் வாங்குவதற்காக ஒய்.எஸ் ஜெகன் மோகன் ரெட்டி அரசு சோலார் எனர்ஜி கார்ப்பரேஷன் ஆஃப் இந்தியாவுடன் (SECI) செய்து கொண்ட மின் கொள்முதல் ஒப்பந்தங்களை (PPAs) ஆந்திரப் பிரதேசத்தில் தெலுங்கு தேசம் கட்சி தலைமையிலான தேசிய ஜனநாயக கூட்டணி (NDA) அரசாங்கம் ஆய்வு செய்தாலும், அவற்றை ரத்து செய்வது "கடினமானது" என்றும் மின்சார விநியோகத்தை சீர்குலைக்கும் என்பதால் அரசு "அவசரமாக" செயல்படாது என்றும் ஆந்திர கல்வி, தகவல் தொழில்நுட்பம் மற்றும் மின்னணுவியல் துறை அமைச்சர் நாரா லோகேஷ் இந்தியன் எக்ஸ்பிரஸிடம் தெரிவித்தார்.

ஆங்கிலத்தில் படிக்க: Scrapping Adani power agreements ‘difficult’ because of ‘legal issues’, ‘supply disruption’ concerns, Andhra CM Naidu’s son Nara Lokesh says

"லாபகரமான சூரிய ஆற்றல் விநியோக ஒப்பந்தங்களை" பெறுவதற்காக இந்திய அரசாங்க அதிகாரிகளுக்கு லஞ்சம் கொடுத்த குற்றச்சாட்டுகள் தொடர்பாக அமெரிக்காவில் கெளதம் அதானியின் மீதான குற்றச்சாட்டின் பின்னணியில் இந்த நடவடிக்கை வருகிறது.

செவ்வாயன்று தி இந்தியன் எக்ஸ்பிரஸ்ஸிடம் பேசிய முதல்வர் என்.சந்திரபாபு நாயுடுவின் மகன் நாரா லோகேஷ், “மின்சார கொள்முதல் ஒப்பந்தங்களின்படி விதிமுறைகள் மற்றும் நிபந்தனைகள் மற்றும் கொள்முதல் விலைகளை நாங்கள் ஆராய்ந்து வந்தாலும், அவற்றை ரத்து செய்வது மிகவும் கடினம் என்பது உங்களுக்குத் தெரியும். நிறைய சட்ட சிக்கல்கள் உள்ளன. நாம் அவசரமாக செயல்பட்டால், அது மின்சார விநியோகத்தில் இடையூறு விளைவிக்கும், அதை நாங்கள் விரும்பவில்லை. இது ஒரு நீண்ட செயல்முறை ஆகும். எதையாவது ரத்து செய்ய முடிவெடுப்பதற்கு முன் எல்லாவற்றையும் சரிபார்த்து மதிப்பீடு செய்ய வேண்டும்,” என்று கூறினார்.

2021 ஆம் ஆண்டில் முதலில் ஆட்சேபனைகளை எழுப்பிய ஆந்திரப் பிரதேச சட்டமன்ற பொதுக் கணக்குக் குழுவின் தலைவராக இருந்த தற்போதைய மாநில நிதியமைச்சர் பயாவுலா கேசவ், ஜெகன் ஆட்சியின் போது செய்யப்பட்ட கோப்புகள் மற்றும் மின்சார கொள்முதல் ஒப்பந்தங்களை தனது துறை ஆய்வு செய்து வருவதாகக் கூறிய சில மணிநேரங்களுக்குப் பிறகு நாரா லோகேஷின் கருத்துக்கள் வந்துள்ளன.

தி இந்தியன் எக்ஸ்பிரஸிடம் தொடர்பு கொண்டபோது, “நாங்கள் பிரச்சினையின் அனைத்து நிபந்தனைகளையும் பரிமாணங்களையும் பார்த்து வருகிறோம். எல்லாவற்றையும் ஆராய்ந்த பிறகு நாங்கள் முடிவு எடுப்போம் என்று கேசவ் கூறினார். 

மின்சார கொள்முதல் ஒப்பந்தங்கள் தொடர்பாக நிதித் துறை அல்லது எரிசக்தித் துறை அதிகாரிகளின் எதிர்மறையான கருத்துகள் அல்லது கருத்து வேறுபாடுகள் எதுவும் இதுவரை கண்டறியப்படவில்லை என்று அதிகாரிகள் தெரிவித்தனர்.

ஒய்.எஸ்.ஆர்.சி.பி அரசாங்கத்தின் போது மின்சார கொள்முதல் ஒப்பந்தங்களுக்கு அதிகாரப்பூர்வ எதிர்ப்பு இல்லை என்றும் நாரா லோகேஷ் கூறினார். "மின்சார கொள்முதல் ஒப்பந்தங்களுக்கு எதிராக பதிவு எதுவும் இல்லை," என்று நாரா லோகேஷ் கூறினார்.

நவம்பர் 5, 2021 அன்று, அமராவதியில் உள்ள ஆந்திர சட்டசபைக்கு வெளியே பேசிய கேசவ், நாட்டில் உள்ள அனைத்து மாநிலங்களும் விலை அதிகம் என்று கருதி மறுத்துவிட்ட நிலையில், அதானி சோலார் நிறுவனத்திடம் இருந்து 7,000 மெகாவாட் மின்சாரத்தை யூனிட் ஒன்றுக்கு ரூ.2.49க்கு வாங்க ஜெகன் அரசு முடிவு செய்தது ஏன் என்று கேள்வி எழுப்பியிருந்தார். 

அதானி சோலார் நிறுவனத்தின் வாய்ப்பை ஏறக்குறைய இரண்டு ஆண்டுகளாக வேறு எந்த மாநிலமும் ஏற்கவில்லை என்று குற்றம் சாட்டிய கேசவ், ஆனால் ஆந்திர அரசு முறையான மதிப்பீடு இல்லாமல் சந்தேகத்திற்குரிய ஒப்பந்தத்திற்குச் சென்றதாக கூறினார்.

ஒய்.எஸ்.ஆர்.சி.பி தலைவரும் முன்னாள் ஆலோசகருமான (பொது விவகாரங்கள்) சஜ்ஜலா ராமகிருஷ்ண ரெட்டி, ஒய்.எஸ்.ஆர்.சி.பி அரசாங்கம் இலவச வேளாண் மின் திட்டத்தின் கீழ் மாநிலத்தில் உள்ள 18 லட்சத்திற்கும் மேற்பட்ட விவசாயிகளுக்கு சூரிய ஒளி மின்சாரத்தை இலவசமாக வழங்குவதற்காக வாங்கியது என்று கூறினார்.

தெலுங்கு தேசம் கட்சியின் கேசவ் மற்றும் சி.பி.ஐ மாநில செயலாளர் கே ராமகிருஷ்ணா ஆகியோரும் மின்சார கொள்முதல் ஒப்பந்தங்களுக்கு எதிராக ஆந்திர உயர்நீதிமன்றத்தில் மனு தாக்கல் செய்தனர். இருப்பினும், ஒய்.எஸ்.ஆர்.சி.பி அரசாங்கமும் எரிசக்தி மற்றும் நிதித்துறை அதிகாரிகளும் மாநில அரசாங்கத்தின் முடிவுகளை கடுமையாக ஆதரித்தனர்.

பதிவுகளின்படி, ஜெகன் அரசாங்கத்தில் எரிசக்தி செயலாளராக இருந்த நகுலபள்ளி ஸ்ரீகாந்த், நவம்பர் 2021 இல், மற்றவர்கள் அதிக விலையை மேற்கோள் காட்டுவதால், எஸ்.இ.சி.ஐ இலிருந்து மின்சாரம் வாங்குவது மிகவும் நன்மை பயக்கும் என்று கூறினார். அப்போது, யூனிட் ஒன்றுக்கு ரூ.4.36க்கு மின்சாரம் கொள்முதல் செய்து 18.37 லட்சம் விவசாயிகளுக்கு அரசு இலவசமாக வழங்கி வருகிறது என்று அவர் கூறினார். எஸ்.இ.சி.ஐ ஆல் முன்மொழியப்பட்ட கட்டணங்கள் நாட்டிலேயே மிகக் குறைவானவை என்று நகுலபள்ளி ஸ்ரீகாந்த் ஆந்திர உயர் நீதிமன்றத்தில் தனது அறிக்கையில் தெரிவித்தார். எஸ்.இ.சி.ஐ மூலம் மின்சாரம் வாங்குவதன் மூலம், மாநிலம் 2,260 கோடி ரூபாயை சேமிக்க முடியும் என்றும் அவர் கூறினார்.

அமெரிக்க நீதிமன்ற குற்றச்சாட்டின்படி, அதானி, “சோலார் எனர்ஜி கார்ப்பரேஷன் ஆஃப் இந்தியா மற்றும் ஆந்திர மாநில மின்சார விநியோக நிறுவனங்களுக்கு இடையேயான மின் விநியோக ஒப்பந்தங்கள் செயல்படுத்தப்படுவதை முன்னெடுப்பதற்காக, அதானி, ஆகஸ்ட் 7, 2021 அல்லது செப்டம்பர் 12, 2021 அன்று அல்லது அதற்கு அருகில் நவம்பர் 20, 2021 அன்று, ஆந்திராவில் உள்ள வெளிநாட்டு அதிகாரி 1ஐ தனிப்பட்ட முறையில் சந்தித்தார்.” குற்றப்பத்திரிகையின்படி, "வெளிநாட்டு அதிகாரி 1", "மே 2019 முதல் ஜூன் 2024 வரை ஆந்திரப் பிரதேசத்தின் உயர் பதவியில் இருந்தவர்".

குற்றப்பத்திரிகையில் வெளிநாட்டு அதிகாரி 1 யார் என்று குறிப்பிடப்படவில்லை என்றாலும், பாதுகாப்பு பரிவர்த்தனை கமிஷன் தாக்கல் செய்த ஆவணம், ஆகஸ்ட் 2021 இல், அதானி “ஆந்திரப் பிரதேச முதலமைச்சரை தனிப்பட்ட முறையில் சந்தித்தார்…” என்று கூறுகிறது, மே 2019 மற்றும் ஜூன் 2024 க்கு இடையில் ஜெகன் முதல்வராக இருந்தார்.

இதற்கு பதிலளித்த ஒய்.எஸ்.ஆர்.சி.பி, ஆந்திரா மின் விநியோக நிறுவனங்களுக்கும் அதானி குழுமத்துக்கும் இடையே நேரடி ஒப்பந்தம் இல்லை என்று கூறியது. நவம்பர் 11, 2021 அன்று அதன் உத்தரவின் மூலம் ஆந்திரப் பிரதேச மின்சார ஒழுங்குமுறை ஆணையம்) மற்றும் மத்திய மின்சார ஒழுங்குமுறை ஆணையம்) மூலம் மின்சார கொள்முதல் ஒப்பந்தங்கள் அங்கீகரிக்கப்பட்டுள்ளன என்பதையும் கட்சி சுட்டிக்காட்டியது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“