அயோத்தி தீர்ப்புக்குப் பிறகு சகாக்களுடன் இரவு உணவு, ஒயின்; முன்னாள் தலைமை நீதிபதி ரஞ்சன் கோகோய்

நவம்பர் 9, 2019 அன்று ராம் ஜென்மபூமி-பாபர் மசூதி வழக்கில் ஒருமனதாக தீர்ப்பை வழங்கிய பிறகு, அப்போதைய இந்திய தலைமை நீதிபதி ரஞ்சன் கோகோய், பெஞ்சில் அங்கம் வகித்த தனது சகாக்களை ஹோட்டல் தாஜ் மான்சிங்கிற்கு இரவு உணவிற்கு அழைத்துச் சென்று அவர்களுக்கு சிறந்த ஒயினை ஆர்டர் செய்தார்.

2018 இல் நான்கு மூத்த நீதிபதிகள் நடத்திய செய்தியாளர் சந்திப்பு மற்றும் உச்ச நீதிமன்ற கொலீஜியம் அவரது பதவிக்காலத்தில் எடுக்கப்பட்ட முடிவுகளுக்கு எதிராக அவர் மீதான பாலியல் துன்புறுத்தல் குற்றச்சாட்டுகள் ஆகியவை தற்போது ராஜ்யசபா எம்.பி.யாக இருக்கும் கோகோய், ’நீதிபதிக்கான நீதி: ஒரு சுயசரிதை’ என்ற தலைப்பில் தனது சுயசரிதையில் வெளிச்சத்திற்கு கொண்டு வந்த அவரது வாழ்க்கை தொடர்பான பல முக்கிய சம்பவங்களில் முக்கியமான ஒன்றாகும்.

அயோத்தி தீர்ப்பை வழங்கிய மாலையில் “தீர்ப்புக்குப் பிறகு, பொதுச்செயலாளர் நீதிமன்ற எண் 1க்கு வெளியே உள்ள நீதிபதிகள் கேலரியில், அசோக சக்கரத்திற்கு கீழே புகைப்பட அமர்வை ஏற்பாடு செய்தார். மாலையில், நீதிபதிகளை இரவு உணவிற்கு தாஜ் மான்சிங் ஹோட்டலுக்கு அழைத்துச் சென்றேன். நாங்கள் சீன உணவுகளை சாப்பிட்டோம், அங்கு கிடைக்கும் சிறந்த ஒயின் பாட்டிலைப் பகிர்ந்து கொண்டோம். நான் மூத்தவனாக இருந்ததால் டேப்-ஐ தேர்ந்தெடுத்தேன். என கோகோய் எழுதியுள்ளார்.

அப்போதைய தலைமை நீதிபதி கோகோய் தலைமையிலான, அயோத்தி தீர்ப்பை வழங்கிய ஐந்து நீதிபதிகள் கொண்ட அரசியல் சாசன அமர்வு, பின்னர் தலைமை நீதிபதியாக நியமிக்கப்பட்ட எஸ்.ஏ.பாப்டே மற்றும் நீதிபதிகள் டி.ஒய்.சந்திரசூட், அசோக் பூஷன் மற்றும் எஸ்.அப்துல் நசீர் ஆகியோரையும் உள்ளடக்கியது.

மத்தியப் பிரதேச உயர் நீதிமன்றத்தின் தலைமை நீதிபதியாக நீதிபதி அகில் குரேஷியை நியமிக்கும் பரிந்துரையை வாபஸ் பெற கொலிஜியம் முடிவு செய்தது, அதற்குப் பதிலாக அவர் திரிபுரா உயர் நீதிமன்றத்தின் தலைமை நீதிபதியாக நியமிக்கப்பட்டார். இது "அரசியலமைப்பு அமைப்புகளுக்கு இடையிலான மோதலைத் தவிர்ப்பதற்காக" என கோகோய் எழுதியுள்ளார்.

“மே 10, 2019 அன்று, நீதிபதி குரேஷியை மத்தியப் பிரதேச உயர் நீதிமன்றத்தின் தலைமை நீதிபதியாக நியமிக்க கொலிஜியம் பரிந்துரைத்தது. ஆலோசனையின் செயல்பாட்டில், சட்ட அமைச்சர் 23 ஆகஸ்ட் 2019 தேதியிட்ட கடிதத்தில் நீதிபதியின் பரிந்துரைக்கு மத்திய அரசின் ஆட்சேபனையை தெரிவித்தார். நீதிபதி குரேஷி இயற்றிய சில நீதித்துறை உத்தரவுகளில் இருந்து வரும் எதிர்மறையான கருத்தை அடிப்படையாகக் கொண்டது இந்த ஆட்சேபனை. அரசாங்கத்தின் ஆட்சேபனை பொது களத்தில் வந்திருந்தால் அது யாருக்கும் எந்த நன்மையும் செய்திருக்காது, ”என்று முன்னாள் தலைமை நீதிபதி எழுதியுள்ளார்.

தற்செயலாக, நீதிபதி குரேஷி இந்த ஆண்டு செப்டம்பர் மாதம் திரிபுராவில் இருந்து ராஜஸ்தான் உயர் நீதிமன்ற தலைமை நீதிபதியாக மாற்றப்பட்டார். சுப்ரீம் கோர்ட் நீதிபதியாக அவர் பதவி உயர்வு பெற்ற விவகாரம், இரண்டு ஆண்டுகளுக்கும் மேலாக கொலிஜியத்தின் நடத்தையை கிட்டத்தட்ட முடக்கியது.

நீதிபதிகள் பிரதீப் நந்த்ராஜோக் மற்றும் ராஜேந்திர மேனன் ஆகிய இரு உயர் நீதிமன்ற நீதிபதிகளை உச்ச நீதிமன்ற நீதிபதிகளாக பரிந்துரைக்க கொலிஜியம் கொள்கை அடிப்படையில் முடிவு செய்ததாகவும் ஆனால் விவாதங்கள் பொதுமக்களுக்கு கசிந்ததால் அவை தொடரவில்லை என்றும் நீதிபதி கோகோய் தனது புத்தகத்தில் எழுதியுள்ளார்.

“கொலிஜியம் கூட்டத்தில் நாங்கள் ஒப்புக்கொண்ட போதிலும், நீதிபதிகள் நந்த்ரஜோக் மற்றும் ராஜேந்திர மேனன் ஆகியோரின் பெயர்கள் சட்ட அமைச்சருக்கு நடைமுறைப்படி அனுப்பப்படவில்லை. உண்மையில், சட்ட அமைச்சருக்கான கடிதம் இன்னும் தயாரிக்கப்படவில்லை. நீதிபதி (மதன்) லோகூருடன் பேசிய பிறகு, இந்த விஷயத்தை நிறுத்தி வைக்க முடிவு செய்தேன், ”என்று கோகோய் எழுதியுள்ளார். அப்போது உச்ச நீதிமன்றத்தின் இரண்டாவது மூத்த நீதிபதியாக நீதிபதி லோகூர் இருந்தார்.

"உச்சப்பட்ச குற்றச்சாட்டுகள் மற்றும் உண்மைக்கான எனது தேடுதல்" என்ற தலைப்பில், உச்ச நீதிமன்ற ஊழியர் ஒருவர் தனக்கு எதிராக சுமத்திய பாலியல் துன்புறுத்தல் குற்றச்சாட்டுகள் பற்றி கோகோய் எழுதியுள்ளார்.

குற்றச்சாட்டுகள் வெளிச்சத்திற்கு வந்தபோது, ​​நீதிபதி கோகோய் ஒரு சனிக்கிழமை (ஏப்ரல் 20, 2019) உச்ச நீதிமன்றத்தின் சிறப்பு அமர்வைக் கூட்டி, பெஞ்ச்க்கு தலைமை வகித்தார். எவ்வாறாயினும், அவர் பெஞ்சில் இருந்தபோதிலும், "மறு: நீதித்துறையின் சுதந்திரத்தை தொடும் பெரும் பொது முக்கியத்துவம் வாய்ந்த விவகாரம்" என்ற தலைப்பில் உள்ள உத்தரவில் கையெழுத்திட மறுத்துவிட்டார்.

புதன்கிழமை புத்தக வெளியீட்டு விழாவில் பேசிய கோகோய், அந்த பெஞ்சில் ஒரு பகுதியாக இருந்ததற்கு வருத்தம் தெரிவித்தார். “பின்னோக்கிப் பார்த்தால், நான் பெஞ்சில் நீதிபதியாக இருந்திருக்கக் கூடாது. நான் பெஞ்சில் இல்லாமல் இருந்திருந்தால் நன்றாக இருந்திருக்கலாம். நாம் அனைவரும் தவறு செய்கிறோம். அதை ஏற்றுக்கொள்வதில் எந்தத் தீங்கும் இல்லை, ”என்று அவர் அந்த நிகழ்வில் கூறினார்.

இருப்பினும், அவரது புத்தகத்தில், கோகோய் தனது செயல்களை வித்தியாசமாக வகைப்படுத்துகிறார். "சனிக்கிழமை இந்த திட்டமிடப்படாத விசாரணை, அதிகம் பேசப்பட்டது, இது மிகவும் குறுகியதாக இருந்தது. உண்மையில், விசாரணை எதுவும் இல்லை. இந்த குற்றச்சாட்டுகளுக்கு எனது ஆத்திரத்தை வெளிப்படுத்தியதுடன், தலைமை நீதிபதியின் செயல்பாட்டை சீர்குலைக்க சில அறியப்படாத தரப்பினரின் முயற்சியாக இது கருதப்பட்டது. விசாரணையின் முடிவில், மிகவும் தீங்கற்ற உத்தரவு பிறப்பிக்கப்பட்டது, ”என்று கோகோய் சுயசரிதையில் எழுதியுள்ளார்.

நீதிபதிகள் கோகோய், செல்லமேஸ்வர், மதன் லோகூர் மற்றும் குரியன் ஜோசப் ஆகியோரின் 2018 செய்தியாளர் சந்திப்பு பற்றி, இது சரியான விஷயம் என்று தான் நம்பினாலும், நான் ஒரு முழு பத்திரிகையாளர் சந்திப்பை "எதிர்பார்க்கவில்லை" ஒரு சில பத்திரிக்கையாளர்களுடனான சந்திப்பு என்று தான் நினைத்தேன் என கோகோய் புத்தகத்தில் எழுதியுள்ளார்.

“ஜனவரி 12, 2018 வெள்ளிக்கிழமை, இது ஒரு பலவிதமான நாள். இதர வேலைகள் முடிந்த உடனேயே, மதியம் 12 மணியளவில், நீதிபதி செல்லமேஸ்வர் இல்லத்திற்குச் சென்றேன். அங்கு நான் பார்த்தது என்னை அதிர்ச்சிக்குள்ளாக்கியது: பத்திரிகையாளர்கள் முழு வருகையுடன் இருந்தனர், சந்திப்பு நடைபெறும் இடமான அவரது வீட்டின் பின்புற புல்வெளியில் பல கேமராக்கள் அமைக்கப்பட்டன. வெளியே பல OB வேன்கள் இருந்தன,” என்று கோகோய் எழுதியுள்ளார்.

"நான் இதை எதிர்பார்க்கவில்லை; நீதியரசர் செல்லமேஸ்வரின் ‘பத்திரிகையாளர்களை சந்திப்போம்’ என்பதை நான் புரிந்துகொண்டது ஒரு சில/குறைவான பத்திரிக்கையாளர்களுடனான சந்திப்பு என்று தான். எப்படியிருந்தாலும், இப்போது வெளியேற வழி இல்லை. இது நான் பின்வாங்க விரும்பினேன் என்பதல்ல; நான் செய்தியாளர்களிடம் பேசுவதற்கு உறுதியளித்தேன், இன்று வரை, சூழ்நிலைகளின் அடிப்படையில், இது மிகவும் அசாதாரணமானது என்றாலும், அது சரியானது என்று நான் நம்புகிறேன், ”என்று முன்னாள் தலைமை நீதிபதி எழுதியுள்ளார்.

ராஜ்யசபாவிற்கு வேட்புமனுவை ஏற்றுக்கொண்டபோது, ​​கோகோய், "இந்திய ஜனாதிபதியால் நியமனம் செய்யப்பட்டதால், ஏற்றுக்கொள்வதற்கு முன் இருமுறை கூட யோசிக்கவில்லை" என்று எழுதியுள்ளார்.

“இந்தச் சலுகையை ஏற்பதில் தவறு இருப்பதாகவோ அல்லது ராஜ்யசபா சீட் என்பது ராம ஜென்மபூமி வழக்குகள் மற்றும் ரஃபேல் விவகாரத்தில் வழங்கப்பட்ட தீர்ப்புகளுக்கு சாதகமாக அமைந்தது என்ற கருத்துக்கள் உட்பட, இறுதியில் அது எதிர்மறையான கருத்துகளை வரவழைக்கும் என்றோ நான் நினைக்கவில்லை. என் கற்பனையில் கூட, மக்கள் தங்கள் ‘காட்சிகள்’ மற்றும் ‘எண்ணங்களை’ இப்படிப் பகிரங்கமாக ஒளிபரப்புவார்கள் என்று எனக்குத் தோன்றியிருந்தால், வேட்புமனுவை ஏற்றுக்கொள்வதற்கு முன்பு நான் இரண்டு முறை யோசித்திருப்பேன், ”என்று கோகோய் சுயசரிதையில் எழுதியுள்ளார்.

"தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil