கங்கனா ரனாவத்தின் ’எமர்ஜென்சி’ படத்திற்கு இன்னும் சென்சார் சான்றிதழ் வழங்கவில்லை – மத்திய அரசு

Ritika Chopra

நடிகையும், மண்டி தொகுதி மக்களவை உறுப்பினருமான கங்கனா ரனாவத்தின் எமர்ஜென்சி படத்திற்கு மத்திய திரைப்படத் தணிக்கை வாரியம் (CBFC) இன்னும் சான்றிதழ் வழங்கவில்லை என்று கூறிய கூடுதல் சொலிசிட்டர் ஜெனரல் (ASG) சத்யபால் ஜெயின், சீக்கிய சமூகம் உட்பட அனைத்து சமூகத்தினரின் உணர்வுகளையும் வாரியம் மனதில் வைத்திருக்கும் என்று கூறினார்.

ஆங்கிலத்தில் படிக்க: ASG: Censor board yet to clear Kangana’s film, will keep in mind sentiments of all

சென்சார் போர்டு ஆதாரங்களின்படி, “சம்பந்தப்பட்ட சிக்கலின் உணர்திறன்” அடிப்படையில், சான்றிதழ் வழங்க “அதிக நேரம் எடுக்கலாம்” என்று கூறப்படுவது, படத்தின் அனுமதி தாமதமாகலாம் மற்றும் செப்டம்பர் 6ஆம் தேதி படத்தின் வெளியீட்டுத் தேதியில் அது நடக்காமல் போகலாம் என்பதைக் குறிக்கிறது. “படத்தின் ரிலீஸ் தேதிக்கும் எங்களுக்கும் எந்த சம்பந்தமும் இல்லை. சான்றிதழை வழங்குவதற்கு முன், வெளியீட்டுத் தேதி அறிவிக்கப்பட்டுள்ளது,” என்று அடையாளம் வெளியிட விரும்பாத ஒரு அரசு அதிகாரி கூறினார்.

படத்தின் சான்றிதழை எதிர்த்து மொஹாலிவாசிகள் தாக்கல் செய்த மனுவை விசாரித்த பஞ்சாப் மற்றும் ஹரியானா உயர்நீதிமன்றத்தில் மத்திய அரசு மற்றும் சென்சார் போர்டு சார்பில் கூடுதல் சொலிசிட்டர் ஜெனரல் சத்யபால் ஜெயின் சனிக்கிழமை ஆஜரானார். சான்றிதழ் இன்னும் செயல்பாட்டில் இருப்பதாகவும், கவலைகள் உள்ள எவரும் வாரியத்திடம் தெரிவிக்கலாம் என்றும் நீதிமன்றத்தில் கூடுதல் சொலிசிட்டர் ஜெனரல் தெரிவித்தார். இந்த வழக்கு சனிக்கிழமை முடிவுக்கு வந்தது.

சத்யபால் ஜெயின் தி இந்தியன் எக்ஸ்பிரஸ்ஸிடம் கூறினார்: “தயாரிப்பாளர்கள் படத்தின் விண்ணப்பத்தை சென்சார் சான்றிதழுக்காக சமர்ப்பித்துள்ளனர், அது வாரியத்தின் பரிசீலனையில் உள்ளது. வாரியம் இன்னும் முடிவு எடுக்கவில்லை. அது இன்னும் பரிசீலனையில் உள்ளது. இறுதி முடிவை எடுக்கும்போது, சீக்கிய சமூகம் உட்பட அனைத்து சமூகத்தினரின் உணர்வுகளையும் மனதில் வைத்திருப்போம் என்று அனைவருக்கும் உறுதியளிக்க விரும்புகிறோம். அனைத்து பரிந்துரைகளும் பிரதிநிதித்துவங்களும் வரவேற்கப்படுகின்றன. நாங்கள் அதற்குத் திறந்திருக்கிறோம்.”

இந்த விவகாரத்தில் அரசு தனது நிலைப்பாட்டை தெளிவுபடுத்துவது இதுவே முதல் முறை. வெள்ளியன்று, முன்னாள் பிரதமர் இந்திரா காந்தியின் வாழ்க்கையை அடிப்படையாகக் கொண்ட தனது திரைப்படம் சென்சார் வாரியத்தால் அங்கீகரிக்கப்பட்ட நிலையில், சென்சார் போர்டுக்கு "அச்சுறுத்தல்கள்" காரணமாக அதன் சான்றிதழ் நிறுத்தப்பட்டதாக நடிகை கங்கனா ரனாவத் கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“