தற்காலிக டி.ஜி.பி நியமனம் கூடாது; மாநில அரசுகளுக்கு உள்துறை அமைச்சகம் கடிதம்

தகுதியான அதிகாரிகள் இருந்தும், மாநில அரசுகள் முழுநேர காவல்துறைத் தலைவர்களை (டி.ஜி.பி) நியமிக்காத போக்கைப் பற்றி இந்தியன் எக்ஸ்பிரஸ் செய்தி வெளியிட்ட சில நாட்களுக்குப் பிறகு, உள்துறை அமைச்சகம் (MHA) "நியமனங்கள் இல்லாத" மாநிலங்களுக்கு அத்தகைய நியமனங்களில் உச்ச நீதிமன்றத்தின் உத்தரவுகளைப் பின்பற்றுமாறு கூறியுள்ளது.

ஆங்கிலத்தில் படிக்க: Avoid naming acting DGPs, follow Supreme Court’s guidelines: MHA to states

கடந்த வாரம் மத்திய உள்துறைச் செயலர் அலுவலகத்தில் இருந்து தற்காலிக டி.ஜி.பி.,களை காவல் துறைத் தலைவர்களாகக் கொண்ட ஏழு மாநிலங்களின் தலைமைச் செயலர்களுக்கு கடிதம் அனுப்பியதாக வட்டாரங்கள் தெரிவித்தன. இந்த மாநிலங்கள் உத்தரபிரதேசம், ஆந்திரா, தெலங்கானா, பஞ்சாப், உத்தரகாண்ட், ஒடிசா மற்றும் மேற்கு வங்காளம்.

பிரகாஷ் சிங் வழக்கில் டி.ஜி.பி.,களை நியமிப்பது குறித்த உச்ச நீதிமன்ற உத்தரவுகளை இந்தக் கடிதம் அடிக்கோடிட்டுக் காட்டுகிறது என்று இந்தியக் காவல் சேவையின் கேடர் கட்டுப்பாட்டு அதிகாரியான உள்துறை அமைச்சகத்தின் அதிகாரி ஒருவர் தெரிவித்தார். தற்காலிக அல்லது "செயல்படும் டி.ஜி.பி.,கள்" தவிர்க்கப்பட வேண்டும் மற்றும் விதிவிலக்கான சூழ்நிலைகளில் மட்டுமே நியமிக்கப்பட வேண்டும் என்று உச்ச நீதிமன்ற உத்தரவுகளை மேற்கோள் காட்டி மாநிலங்களுக்கு கடிதம் கூறியுள்ளதாக அந்த அதிகாரி கூறினார். இரண்டு ஆண்டுகள் பதவிக்காலம் கொண்ட முழுநேர டி.ஜி.பி.,களை நியமிப்பது குறித்து உச்ச நீதிமன்றத்தின் உத்தரவுகளை மாநிலங்கள் பின்பற்ற வேண்டும் என்று கடிதத்தில் கூறப்பட்டுள்ளது.

“டி.ஜி.பி.,களை நியமனம் செய்வதில் உச்ச நீதிமன்ற வழிகாட்டுதல்கள் மற்றும் யூனியன் பப்ளிக் சர்வீஸ் கமிஷன் வழிகாட்டுதல்களைப் பின்பற்ற வேண்டும் என்று நியமனம் செய்யாத மாநிலங்களுக்கு நாங்கள் தொடர்ந்து நினைவூட்டுகிறோம். அதே நடவடிக்கையின் ஒரு பகுதியாக இந்த கடிதம் அனுப்பப்பட்டுள்ளது” என்று உள்துறை அமைச்சகத்தின் மூத்த அதிகாரி ஒருவர் தெரிவித்தார்.

இதேபோன்ற கடிதம் ஜம்மு காஷ்மீர் நிர்வாகத்திற்கும் அனுப்பப்பட்டுள்ளதா என்று கேட்டதற்கு, உச்ச நீதிமன்ற உத்தரவுகள் மாநிலங்களுக்குப் பொருந்தும் என்றும் யூனியன் பிரதேசங்களுக்குப் பொருந்தாது என்றும் அதிகாரி ஒருவர் கூறினார்.

பிப்ரவரி 1 அன்று, தி இந்தியன் எக்ஸ்பிரஸ் மேலே குறிப்பிட்டுள்ள ஏழு மாநிலங்கள் மற்றும் ஜம்மு & காஷ்மீரில் முழுநேர டி.ஜி.பி இல்லாததை சுட்டிக்காட்டியது. தற்காலிக டி.ஜி.பி. நியமனங்கள் பொதுவாக காவல்துறைத் தலைவர் பதவியின் கூடுதல் பொறுப்பை வேறு சில பொறுப்பை வகிக்கும் மாநிலத்தில் உள்ள ஒரு டி.ஜி-ரேங்க் அதிகாரியிடம் ஒப்படைப்பதன் மூலம் செய்யப்படுகிறது.

இத்தகைய நடவடிக்கை பிரகாஷ் சிங் வழக்கில் டி.ஜி.பி நியமனம் தொடர்பான உச்ச நீதிமன்ற வழிகாட்டுதல்களையும், யு.பி.எஸ்.சி வழங்கிய வழிகாட்டுதல்களையும் மீறுவதாகும். விதிவிலக்கான சூழ்நிலைகளைத் தவிர்த்து, காவல்துறைத் தலைவர்களின் தற்காலிக அல்லது செயல்படும் நியமனங்கள் எதுவும் செய்யப்படக்கூடாது என்று உச்ச நீதிமன்றம் கூறியுள்ளது. தற்போதைய டி.ஜி.பி ஓய்வு பெறுவதற்கு ஆறு மாதங்களுக்கு முன்னர், குறைந்தபட்சம் மூன்று மூத்த அதிகாரிகளுடன் தகுதியான அதிகாரிகளின் பட்டியலை மாநிலங்கள் ஆணையத்திற்கு அனுப்ப வேண்டும் என்று UPSC வழிகாட்டுதல்கள் கூறுகின்றன.

இருப்பினும், இந்த மாநிலங்களின் நிர்வாகத்தின் ஆதாரங்கள், பிரகாஷ் சிங் வழக்கில் உச்ச நீதிமன்ற தீர்ப்பில் "குறைபாடுகளை" சுட்டிக்காட்டின. மாநிலங்கள் அனுப்பும் பட்டியலிலிருந்து UPSC மூன்று மூத்த காவல்துறை அதிகாரிகளை தவறாமல் தேர்ந்தெடுக்கும் வகையிலும், அவர்களில் ஒருவரைத் தேர்ந்தெடுக்க வேண்டிய கட்டாயத்தில் மாநில அரசு இருப்பதாகவும் உச்ச நீதிமன்றம் உத்தரவு பிறப்பித்துள்ளதாக அந்த மாநில அரசுகள் கூறின. காவல்துறையை வழிநடத்த யார் மிகவும் பொருத்தமானவர் என்பதில் முதலமைச்சருக்கு சில விருப்பத் தேர்வு இருக்க வேண்டும். அரசாங்கத்தின் தேர்வு மூன்று மூத்த அதிகாரிகளில் இருக்க வேண்டிய அவசியமில்லை என்றும் அந்த மாநில அரசுகள் கூறின.

ஆந்திரப் பிரதேசம், தெலுங்கானா, உ.பி., மற்றும் பஞ்சாப் ஆகிய மாநிலங்களில் கிட்டத்தட்ட ஓராண்டுக்கும் மேலாக தற்காலிக டி.ஜி.பி.க்கள் இருந்த நிலையில், உத்தரகாண்ட், ஒடிசா மற்றும் மேற்கு வங்கம் மற்றும் ஜம்மு & காஷ்மீர் யூனியன் பிரதேசம் ஆகிய மூன்று மாநிலங்களும் சமீபத்தில் "தற்காலிக டி.ஜி.பி.,களை" நியமித்துள்ளன.

உத்தரபிரதேசத்தில் கடந்த 20 மாதங்களில் நான்கு டி.ஜி.பி.,கள் பதவி வகித்துள்ளனர். உத்தரபிரதேச அரசு ஜனவரி 31-ம் தேதி டைரக்டர் ஜெனரல் (சட்டம் மற்றும் ஒழுங்கு) பிரசாந்த் குமாரை அதன் தற்காலிக டி.ஜி.பி.,யாக நியமித்தது. அவர் தற்காலிக டி.ஜி.பி.,யாக இருந்த விஜய் குமாருக்கு பதிலாக நியமிக்கப்பட்டார். மாநிலத்தில் டி.ஜி.பி பதவிக்கான ஐ.பி.எஸ் அதிகாரிகளின் சீனியாரிட்டி பட்டியலில் பிரசாந்த் குமார் 17வது இடத்தில் உள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“