'மதச்சார்பின்மைக்கு சாவு மணி அடித்த ராமர் கோவில் திறப்பு': சி.பி.ஐ.எம் கடும் தாக்கு

Ayodhya Temple | CPIM: கேரள மாநிலம் திருவனந்தபுரத்தில் இந்திய கம்யூனிஸ்ட் கட்சியின் (மார்க்சிஸ்ட்) மத்தியக் குழு நடைபெற்றது. 3 நாள் நடந்த இக்கூட்டம் இன்றுடன் (செவ்வாய்க்கிழமை) நிறைவுபெற்றது. இந்நிலையில், இந்த கூட்டத்திற்குப் பிறகு வெளியிடப்பட்ட அறிக்கையில் சி.பி.ஐ.எம் கட்சி, அயோத்தி ராமர் கோவில் திறப்பு விழா, அரசு, நிர்வாகம் மற்றும் அரசியலில் இருந்து மதத்தைப் பிரிப்பதாக வரையறுக்கப்பட்ட மதச்சார்பின்மைக்கு சாவு மணியை அடித்துள்ளது என்று கடுமையாக சாடியுள்ளது. 

மேலும், ஒவ்வொரு தனிநபரின் தனிப்பட்ட விருப்பமான மத நம்பிக்கைகளை மதிக்கும் அதே வேளையில், ஜனவரி 22ல் நடந்த யோத்தி ராமர் கோவில் திறப்பு விழா நிகழ்ச்சி அரசியல் ஆதாயங்களுக்காக மட்டுமே நடத்தப்பட்டது என்றும், வழிபாட்டுத் தலங்கள் சட்டம் 1991, இப்போது "குளிர்சாதனக் கிடங்கில் வைக்கப்பட்டுள்ளதை" இது உணர்த்துகிறது என்றும் தெரிவித்துள்ளது. 

இதுதொடர்பாக சி.பி.ஐ.எம் கட்சி வெளியிட்டுள்ள அறிக்கையில், “ஜனவரி 22, 2024 அன்று அயோத்தியில் நடைபெற்ற கோவில் திறப்பு விழா மதச்சார்பின்மைக்கு சாவு மணியை அடித்துவிட்டது. முழு நிகழ்ச்சியும் பிரதமர், உ.பி., முதல்வர், உ.பி., கவர்னர் மற்றும் முழு அரசு நிர்வாகத்தையும் நேரடியாக உள்ளடக்கிய, அரசு நிதியுதவியுடன் கூடிய நிகழ்ச்சியாக இருந்தது.

இந்தியாவின் குடியரசுத் தலைவர் மற்றும் துணைக் குடியரசுத் தலைவர் இருவரும் பிரதமருக்கு வாழ்த்துச் செய்திகளை அனுப்பினர். அவர் 'உறுதியை மீட்டுக்கொண்டார் என்றும், இந்தியாவின் நாகரீகப் பாதையில் விதியுடன் முயற்சி செய்துள்ளார்' எனப் பலவிதங்களில் அவரைப் பாராட்டினர். முழு விழாவும் அடிப்படைக் கொள்கையை நேரடியாக மீறுவதாகும். உச்ச நீதிமன்றத்தால் மீண்டும் வலியுறுத்தப்பட்ட இந்திய அரசியலமைப்பின் கீழ் அரசுக்கு எந்த மத சார்பும் அல்லது விருப்பமும் இருக்கக்கூடாது.

ராமர் கோவில் கும்பாபிஷேக விழாவையொட்டி ஆர்.எஸ்.எஸ் மற்றும் பா.ஜ.க-வினர் நாடு தழுவிய அளவில் பெரும் பிரச்சாரத்தை மேற்கொண்டனர். நேரடி ஒளிபரப்பின் பொதுக் காட்சிகள் பல்வேறு இடங்களில் மாபெரும் திரைகளில் ஏற்பாடு செய்யப்பட்டிருந்தன. கல்வி நிறுவனங்கள் அன்றைய தினம் மூடப்பட்டன. ஊழியர்கள் பங்கேற்பதற்காக அனைத்து மத்திய அரசு அலுவலகங்களும் பிற்பகல் 2.30 மணி வரை மூடப்பட்டன.

ஒவ்வொரு மாநிலம் மற்றும் நாடாளுமன்றத் தொகுதியில் இருந்து கோவிலுக்கு மக்களைத் திரட்ட திட்டமிடப்பட்டுள்ளது. இது மார்ச் 2024 வரை, அதாவது தேர்தலுக்கு முந்தைய நாள் வரை இடைவெளியில் இருக்கும். அயோத்தியைத் தவிர அனைத்து மதத் தலங்களின் தன்மையும் அந்தஸ்தும் ஆகஸ்ட் 15, 1947 இல் இருந்ததைப் போலவே இருக்க வேண்டும் என்று கட்டளையிடும் வழிபாட்டுத் தலங்கள் சட்டம், 1991 - இப்போது குளிர்பதனக் கிடங்கில் வைக்கப்படும் என்பதையும் இந்நிகழ்வு உணர்த்துகிறது.

காசி மற்றும் மதுராவில் உள்ள விவகாரங்கள் மீண்டும் நீதித்துறை அனுசரணையுடன் வெளிவந்துள்ளன. அயோத்தி தீர்ப்புக்காக உச்ச நீதிமன்றத்திற்கு மோடி நன்றி தெரிவித்தார். ஒவ்வொரு தனிநபரின் தனிப்பட்ட விருப்பமான மத நம்பிக்கைகளுக்கு மதிப்பளிப்பதே அதன் கொள்கையாக இருந்து வருகிறது.

ஒவ்வொரு தனிநபரின் நம்பிக்கையையும் பின்பற்றுவதற்கான உரிமையை கட்சி உறுதியாக நிலைநிறுத்தியுள்ளது. ஆனால் அதே சமயம் மக்களின் மத நம்பிக்கையைத் தவறாகப் பயன்படுத்துவதற்கும், அரசியல் ஆதாயத்துக்காகவும் மதத்தை அரசுடன் இணைப்பதற்கும் ஒரு கருவியாக மாற்றும் முயற்சிகளை அது தொடர்ந்து எதிர்க்கிறது." என்று அதில் தெரிவிக்கப்பட்டுள்ளது. 

ஆங்கிலத்தில் படிக்கவும்: Ayodhya temple inauguration sounded ‘death knell’ for secularism: CPI(M)

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“