'பைர்காச்சி'- இன்னும் வளர்ச்சிக்காக காத்திருக்கும் பீகாரின் முதல் தலித் முதல்வரின் கிராமம்

பீகார் மாநிலத்தின் முதல் தலித் முதல்வரான, மூன்று முறை  முதல்வராக இருந்த போலா பாஸ்வான் சாஸ்திரியின் சொந்த கிராமமான பைர்காச்சியில் 2015 இல் கட்டப்பட்ட இரண்டு மாடி சமுதாயக் கூடம் மிகப்பெரிய கட்டிடமாகும்.

சாஸ்திரி தனது சிக்கன வாழ்க்கைக்கு பெயர் பெற்றவர், அவருடைய கிராமத்திலோ அல்லது வேறு எங்கும் தனக்கென ஒரு கூரை வீடு கட்டவில்லை. ஒரு காலத்தில் அவருடைய சிறிய மண் குடிசை இருந்த இடத்தில் சமுதாயக் கூடம் வந்தது.

 “இதுதான் போலா பாஸ்வான் சாஸ்திரியின் பெயரில் நமக்குக் கிடைத்தது. பொதுவாக அரசியல்வாதிகள் இங்கு வந்து கிராமத்தின் முன்னேற்றத்திற்காக வாக்குறுதிகளை வழங்கிவிட்டு பின்னர் மறந்து விடுவார்கள்.  நாங்கள் ஒரு அரசியல் அடையாளமாகப் பயன்படுத்தப்படுகிறோம், ”என்று ஒரு வயதான சுல்ஹாய் பாஸ்வான் கூறினார், அவர் மண்டபத்தின் மின்விசிறிக்கு அடியில் ஓய்வெடுத்துக் கொண்டிருந்தார்.

பூர்னியா மாவட்டத்தில் உள்ள கிரித்யானந்த் நகர் தொகுதிக்கு உட்பட்ட பைர்காச்சி கிராமத்தில், ஒவ்வொரு முறை திருமணம் உள்ளிட்ட முக்கிய நிகழ்வுகள் நடக்கும் போது சமுதாய கூடம் பயன்படுத்தப்படுகிறது. மற்ற நேரங்களில், கிராமவாசிகள் இளைப்பாறுவதற்கும் ஒன்றுகூடுவதற்கும் பயன்படுத்துகின்றனர்.

இது 2015 ஆம் ஆண்டு ஜேடி(யு) தலைவர் வசிஷ்ட நரேன் சிங்கின் எம்பி நிதி மற்றும் அவரது பதவிக்காலத்தில் பைர்காச்சிக்கு விஜயம் செய்த அப்போதைய முதல்வர் ஜிதன் ராம் மஞ்சியின் உதவியினால் கட்டப்பட்டது.

மண்டபத்தைத் தவிர, பைர்காச்சி பெரிய வளர்ச்சியைக் காணவில்லை என்று சுல்ஹாய் பாஸ்வான் கூறினார். “பைர்காச்சி மற்ற பீகார் கிராமத்தைப் போன்றது. முன்னாள் முதல்வர் லாலு பிரசாத் மற்றும் தற்போதைய முதல்வர் நிதிஷ் குமார் ஆகியோரின் கிராமங்கள் போல் இது ஒருபோதும் வளர்ச்சியடையவில்லை, ”என்று அவர் புலம்பினார்.

கிராமத்தில் வசிப்பவர்கள் பெரும்பாலும் பாஸ்வான்கள், தலித் சமூகம். இந்த கிராமத்தில் ஒரு ஆரம்ப பள்ளி மற்றும் கான்கிரீட் சாலை உள்ளது, இது முதல்வர் நிதிஷ் குமாரின் முதல் ஆட்சியின் போது (2005-2010) வந்தது.

இருப்பினும், கிராமத்தில் ஆரம்ப சுகாதார நிலையமும் இல்லை, வடிகால் அமைப்பும் இல்லை. இவை கிராமவாசிகளால் அடிக்கடி வரும் புகார்களில் இரண்டு.

பெரும்பாலான குடியிருப்பாளர்கள் நிலமற்றவர்கள் மற்றும் அன்றாடக் கூலித் தொழிலை நம்பியே பிழைப்பு நடத்துகின்றனர். கிராமத்தின் 40 சதவீத இளைஞர்கள் - 18 முதல் 30 வயது வரை - வேலைக்காக பீகாருக்கு வெளியே செல்கின்றனர்.

முன்னாள் முதல்வர் சாஸ்திரியின் குடும்பத்தைச் சேர்ந்த அஜய் குமார் பாஸ்வான், “கிராமத்தில் சுமார் 25 பட்டதாரிகள் உள்ளனர், கிட்டத்தட்ட ஒவ்வொரு குழந்தையும் பள்ளிக்குச் செல்கிறது. ஆனால் மழையின் போது தண்ணீர் தேங்கும்போது பள்ளி சோகமாக காட்சியளிக்கிறது. பள்ளியும் சுற்றுச்சுவர் அமைக்க பல ஆண்டுகளாக காத்திருக்கிறது,'' என்றார்.

வளர்ச்சியின்மை பற்றிய புகார்களுக்கு மத்தியிலும், பல குடியிருப்பாளர்கள் மையத்தின் இலவச ரேஷன் மற்றும் சுகாதார காப்பீட்டுத் திட்டங்களைப் பாராட்டினர். ஹர் கர் நல் கா ஜல் திட்டத்தின் கீழ் தண்ணீர் கிடைத்ததற்கு அவர்கள் மகிழ்ச்சியை வெளிப்படுத்தினர், மேலும் கிராமம் அனுபவிக்கும் தடையில்லா மின்சாரம் குறித்து முதல்வர் நிதிஷ் குமாரை பாராட்டினர்.

“மாதம் 4 கிலோ அரிசியும் 1 கிலோ கோதுமையும் கிடைக்கும். அரிசியின் தரம் மிகவும் நன்றாக உள்ளது. அப்பகுதியில் உள்ள ஏழை முஸ்லிம்கள் கூட இதன் மூலம் பயனடைந்து தேசிய ஜனநாயக கூட்டணி அரசைப் புகழ்ந்து பேசுகிறார்கள்” என்று சமூகக் கூடத்தில் ஓய்வெடுக்கும் போது, புட்டுல் தேவி கூறினார்.

இருப்பினும், கிராமத்தின் மிகவும் பிரபலமான மகனான போலா பாஸ்வான் சாஸ்திரியின் பாரம்பரியம் முன்னோக்கி கொண்டு செல்லப்படவில்லை என்ற உணர்வு உள்ளது.

பாஸ்வானும், முன்னாள் மத்திய அமைச்சருமான ராம்விலாஸ் பாஸ்வானும் கூட, இப்பகுதிக்கு அதிகம் செய்யவில்லை என்று குடியிருப்பாளர் சந்தன் பாஸ்வான் கூறினார். “சிராக் பாஸ்வான் 2021 இல் பைர்காச்சிக்கு வந்து ஒரு இரவைக் கழித்தார். ஆனால் அது வெறும் குறியீடுதான்” என்றார் சாந்தன்.

மாநிலத்தில் பரபரப்பான கூட்டணி அரசியலுக்கு மத்தியில், 1968 முதல் 1972 வரை மூன்று முறை பீகார் முதல்வராக பதவியேற்றார் போலா பாஸ்வான் சாஸ்திரி. அவரது முதல் பணி மார்ச் 22, 1968 இல் தொடங்கியது, அது அதே ஆண்டு ஜூன் 29 அன்று முடிவடைந்தது. அடுத்த முறை, ஜூன் 22, 1969 இல் - அவர் முதல்வர் ஆனார், அவரது பதவிக்காலம் 12 நாட்கள் மட்டுமே நீடித்தது.

அவரது மூன்றாவது பதவிக்காலம் அவரது மிக நீண்ட காலம் - ஜூன் 20, 1971 முதல் ஜனவரி 9, 1972 வரை.

இந்த காலகட்டத்தில், அவர் முங்கேரி லால் கமிஷனை அமைத்தார், இது 1976 இல் மற்ற பிற்படுத்தப்பட்ட வகுப்பினர் (OBC) மற்றும் மிகவும் பிற்படுத்தப்பட்ட வகுப்பினரை (EBC) முதல் முறையாக வகைப்படுத்தி அதன் அறிக்கையை சமர்ப்பித்தது.

Read in English: A far cry from Lalu and Nitish native villages, the village of Bihar’s first Dalit CM still waits for development

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“