கூட்டணியில் இணைய பா.ம.க நிபந்தனைகளை ஏற்ற பா.ஜ.க; வட தமிழகத்தில் காலடி எடுத்து வைக்கிறது

பல திருப்பங்கள் மற்றும் மாற்றங்களுக்குப் பிறகு, பாட்டாளி மக்கள் கட்சி (பா.ம.க) இறுதியாக பா.ஜ.க தலைமையிலான தேசிய ஜனநாயகக் கூட்டணியுடன் (என்.டி.ஏ) வரவிருக்கும் மக்களவைத் தேர்தலில் போட்டியிட முடிவு செய்துள்ளது.

ஆங்கிலத்தில் படிக்க: BJP agrees to PMK terms to reel party in, gets foot in the door in north Tamil Nadu

இறுதியாக கூட்டணிக்கு அழைப்பு விடுப்பதற்கு முன்பு, அ.தி.மு.க.வை விரும்பும் பா.ம.க நிறுவனர் எஸ். ராமதாஸுக்கும், பா.ஜ.க பக்கம் சாய்ந்த மகன் அன்புமணி ராமதாஸுக்கும் இடையில் பா.ம.க ஊசலாடியது. சில மாதங்களுக்கு முன்பு பா.ஜ.க.வுடனான கூட்டணியை அ.தி.மு.க முறித்துக் கொண்டது.

கூட்டணிப் பேச்சுவார்த்தையை இழுத்தடித்து பா.ம.க முடிவெடுக்காமல் இருந்தது சமூக வலைதளங்களில் கேலிக்குரிய விஷயமாக மாறியது. மூன்று நாட்களுக்கு முன்பு இந்தியன் எக்ஸ்பிரஸ்ஸிடம் ஒரு உயர்மட்ட பா.ஜ.க தலைவர் கூறினார்:  “நாங்கள் சோர்வாக இருக்கிறோம், அவர்கள் வரட்டும் அல்லது போகட்டும்.” என்று கூறினார்.

தமிழகத்தில் பா.ஜ.க.வின் தேர்தல் செயல்பாடு மற்றும் அதன் கூட்டணி கட்சிகளின் செயல்பாடுகளின் ஒப்பீடு. (எக்ஸ்பிரஸ்)

அ.தி.மு.க.வுக்கு முட்டுக்கட்டையாக இருப்பது பா.ம.க. கேட்ட 7 இடங்கள் (மாநிலத்தில் மொத்தம் உள்ள 39 இடங்களில்) என்பது உண்மைக்கு புறம்பானது என்று வட்டாரங்கள் தெரிவித்தன.

பா.ம.க.வின் ஆதரவுத்தளம் பெரும்பாலும் வட தமிழகத்தில் குவிந்துள்ள ஓ.பி.சி வன்னியர் சமூகத்தினர் மட்டுமே. 

தமிழகத்தில் அதன் கால்தடம் சிறியதாக இருக்கும் பா.ஜ.க, பா.ம.க-வுக்கு 10 இடங்களை வழங்கும் ஒப்பந்தத்தில் உறுதியாக இருப்பதாக கூறப்படுகிறது. அ.தி.மு.க ஆட்சியில் மத்திய சுகாதாரத்துறை அமைச்சராக இருந்த அன்புமணிக்கு, பெரும்பாலும் தருமபுரி தொகுதியில் வெற்றி பெற்றால், பா.ஜ.க.விடம் இருந்து கேபினட் பதவி வழங்கப்படும் என்ற வாக்குறுதியைப் பெற்றுள்ளதாக பா.ம.க வட்டாரங்கள் கூறுகின்றன.

இந்த முக்கிய சலுகை இறுதியில் பா.ம.க தொண்டர்களின் ஆட்சேபனைகளை முறியடித்தது. அவர்களில் பலர், தமிழ்நாட்டில் பா.ஜ.க.வின் வாய்ப்புகள் மீதான நிச்சயமற்ற தன்மையைக் கருத்தில் கொண்டு ஆரம்பத்தில் அ.தி.மு.க உடன் கூட்டணி அமைக்க ஆதரவாக இருந்தனர்.

சேலத்தில் செவ்வாய்க்கிழமை நடந்த பொதுக்கூட்டத்தில், பிரதமர் நரேந்திர மோடியுடன் பா.ம.க நிறுவனர் ராமதாஸ் மற்றும் அவருடைய மகனும் அக்கட்சியின் தலைவருமான அன்புமணி ராமதாஸ் இருவரும் மேடையைப் பகிர்ந்து கொண்டனர்.

தற்செயலாக, அன்புமணி ராமதாஸுக்கு எதிராக நீண்டகாலமாக நிலுவையில் உள்ள ஊழல் வழக்கு, சி.பி.ஐ-யால் விசாரிக்கப்பட்டு வருகிறது. இந்திய மருத்துவ கவுன்சில் மற்றும் உச்ச நீதிமன்றத்தால் நியமிக்கப்பட்ட குழு இதற்கு எதிராக பரிந்துரை செய்த போதிலும், இந்தூரில் உள்ள மருத்துவக் கல்லூரி சேர்க்கையைத் தொடர அனுமதிப்பதாக பா.ம.க தலைவர் குற்றம் சாட்டப்பட்டுள்ளது.

கோயம்புத்தூரைச் சேர்ந்த உயர்மட்ட ஆர்.எஸ்.எஸ் தலைவர் ஒருவர், பா.ஜ.க பா.ம.க.வுக்கு கணிசமான வளங்களுடன் தாராளமாக உதவுவதாக உறுதியளித்துள்ளது என்றார்.  “டெல்லி ஆரம்பத்தில் பா.ம.க-வின் கோரிக்கைகளுக்கு எதிராக இருந்தது... ஆனால், ஆனால் இறுதியில், வட தமிழகத்தில் ஒரு கூட்டாளியைப் பெறுவதற்கான வாய்ப்பு மற்ற கவலைகளை விட அதிகமாக இருந்தது. இது பா.ஜ.க கூட்டணிக்கு அழுத்தம் கொடுத்தது.” என்று ஆர்.எஸ்.எஸ். தலைவர் கூறினார். 

வட தமிழகத்தில் பா.ஜ.க ஓரளவே முன்னிலையில் உள்ளது. எனவே, பா.ம.க.வுக்கு 10 இடங்களை ஒதுக்குவது அக்கட்சிக்கு எளிதானது. “அம்மா மக்கள் முன்னேற்றக் கழகத்தின் (அ.ம.மு.க) டி.டி.வி தினகரன் மற்றும் தமிழ்நாடு மக்கள் முன்னேற்றக் கழகத்தின் (த.ம.மு.க) ஜான் பாண்டியன் போன்ற கூட்டணிக் கட்சிகளைத் தவிர, தெற்கு மற்றும் மேற்கு தமிழ்நாட்டில் எங்களுக்கு செல்வாக்கு உள்ளது. வடக்குப் பகுதி கேள்விக்குறியாகவே உள்ளது. இப்போது எங்களுக்கு ஒரு நல்ல கூட்டணி கட்சி இருக்கிறது” என்று பா.ஜ.க மூத்த தலைவர் ஒருவர் கூறினார்.

வட தமிழகத் தொகுதிகளைத் தவிர, தென் தமிழகத்தில் திண்டுக்கல் மற்றும் மாநிலத்தின் டெல்டா பகுதியில் உள்ள மயிலாடுதுறையில் பா.ஜ.க வெற்றிபெற பாமக உதவக்கூடும். சென்னை நகர்ப்புறத்தில் ஒரு இடத்தைப் பெற பா.ம.க அழுத்தம் கொடுக்கக்கூடும் என்று வட்டாரங்கள் தெரிவித்தன.

பா.ம.க.வைத் தவிர, பா.ஜ.க, அ.ம.மு.க.வுடன் கூட்டணி வைத்துள்ளது. அதுவும் கட்சியில் இருந்து நீக்கப்பட்ட அ.தி.மு.க தலைவர் ஓ.பன்னீர்செல்வத்தின் ஆதரவை உறுதி செய்கிறது; புதிய நீதி கட்சி; புதிய தமிழகம்; ஜி.கே வாசனின் தமிழ் மாநில காங்கிரஸ்; த.ம.மு.க மற்றும் தமிழ்நாட்டில் இந்திய ஜனநாயக கட்சி கூட்டணியில் உள்ளன. மறைந்த விஜயகாந்த்தின் தே.மு.தி.க.வுடனும் அக்கட்சி பேச்சுவார்த்தை நடத்தி வருகிறது.

பா.ம.க, அ.ம.மு.க மற்றும் தே.மு.தி.க ஆகிய அனைத்தும் கணிசமான வாக்குகளைப் பெற்ற கட்சிகள் ஆகும்.

அ.தி.மு.க-வுடன் கூட்டணி அமைக்க  ராமதாஸ் விரும்பியதாக ஒரு வட்டாரம் கூறியது: “தி.மு.க.வுடன் கூட்டணி வைப்பதில் பல தொண்டர்கள் அதிருப்தியில் இருந்தனர். இரண்டு பா.ம.க எம்.எல்.ஏ.க்களும் (5 எம்.எல்.ஏ.க்களில்) தங்கள் அதிருப்தியை கடுமையாக வெளிப்படுத்தினர். தி.மு.க அல்லது அ.தி.மு.க.வுடன் கூட்டணி வைப்பது மாநிலத்தில் வெற்றிக்கு சிறந்த உத்தரவாதம் என்றும், தேசிய ஜனநாயகக் கூட்டணியின் எந்த சலுகையும் தேர்தலுடன் முடிவுடன் முடிவடையும் என்பது அவர்களின் வாதமாக இருந்தது.

ஓ.பி.சி பிரிவினருக்கு இடஒதுக்கீடு கோரி ஆக்ரோஷமான போராட்டங்களால் முக்கியத்துவம் பெற்ற வன்னியர் சங்கக் குழுவில் இருந்து உருவான பா.ம.க.வை ராமதாஸ் 1989-ல் நிறுவினார். இறுதியாக, வன்னியர்கள் மிகவும் பிற்படுத்தப்பட்ட வகுப்பினராக இடஒதுக்கீடு பெற முடிந்தது. அவர்கள் கல்வி நிறுவனங்கள் மற்றும் அரசு வேலைகளில் 20% இடஒதுக்கீடு பெறுகின்றனர்.

இருப்பினும், மாநிலத்தில் சாதிக் கலவரங்களில் அடிக்கடி ஈடுபடும் வலுவான வன்னியர் சமூகத்தின் ஆதரவு இருந்தபோதிலும், தேர்தலில் பா.ம.க-வின் வெற்றி கலவையாக உள்ளது. இப்போது தி.மு.க மற்றும் அ.தி.மு.க, மற்றும் பா.ஜ.க ஆகிய இரு கட்சிகளுடனும் மாறி மாறி கூட்டணி அமைத்தது மற்றும் வன்னியர் உறுப்பினர்கள் சாதி வன்முறையில் ஈடுபட்டதன் காரணமாக அதன் தலித் விரோத நிலைப்பாடு ஆகியவை அனைத்தும் மாநிலத்தில் அக்கட்சியின் வளர்ச்சியைத் தடுத்து நிறுத்தியுள்ளன.

இப்போது, ​​ராமதாஸ் வயதாகும்போது, ​​பா.ம.க.வின் ஈர்ப்பை அதன் சாதி அடிப்படையிலான வேர்களுக்கு அப்பால் விரிவுபடுத்துவதை நோக்கமாகக் கொண்ட தனது வாக்குறுதியை - பலமுறை திரும்பத் திரும்பச் சொல்லியதை நிறைவேற்ற வேண்டிய பொறுப்பு அன்புமணியின் மீது உள்ளது.

இதற்கிடையில், ராமதாஸின் மூத்த மகள் காந்தியின் மகன் டாக்டர் சுகந்தன், மூன்றாவது ராமதாஸ் குடும்ப உறுப்பினர் தேர்தல் போட்டியில் நுழையப் போகிறார் என்ற சலசலப்பு அதிகரித்து வருகிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“