நாட்டின் மிக உயர்ந்த மேஸ்ட்ரோவை அவமதிப்பதா? இதுதான் ஜனநாயகமா? பாஜக தலைவர் ஜே.பி. நட்டா திமுகவுக்கு கேள்வி

பிரதமர் நரேந்திர மோடியையும் அம்பேத்கரையும் ஒப்பிட்டு ஒரு புத்தகத்துக்கு முன்னுரை வழங்கியுள்ள இசையமைப்பாளர் இளையராஜாவை பலரும் சமூக ஊடகங்களில் கடுமையாக தாக்கி வரும் நிலையில், விருப்பமில்லாத கருத்து தெரிவித்தார் என்பதற்காக நாட்டின் மிக உயர்ந்த மேஸ்ட்ரோவை அவமதிப்பதா? இதுதான் ஜனநாயகமா? என பாஜக தலைவர் ஜே.பி.நட்டா திமுகவுக்கு கேள்வி எழுப்பியுள்ளார்.

பாஜக தேசியத் தலைவர் ஜே.பி. நட்டா வெளியிட்டுள்ள அறிக்கையில் கூறியிருப்பதாவது: “இந்தியாவின் வளர்ச்சி ஒரு முக்கியமான கட்டத்தில் இருக்கிறது. ‘ஆசாதி கா அம்ரித் மஹோத்சவ்’ அல்லது நாடு சுதந்திரம் அடைந்து 75 ஆண்டுகள் நிறைவு விழாவை நாம் கொண்டாடும் நேரம் இது. 2047ல் சுதந்திரம் அடைந்த நூறாவது ஆண்டு சுதந்திர விழாவைக் கொண்டாடும் போது, நம் தேசம் எப்படி இருக்க வேண்டும் என்று நாம் அனைவரும் நினைக்கிறோம் என்பதை முன்கூட்டியே சிந்தித்து திட்டமிட வேண்டிய தருணம் இது.

உலக நாடுகளின் பார்வை இந்தியாவை நோக்கி இருக்கும் காலகட்டம் இது. 135 கோடி மக்களைக் கொண்ட நமது தேசம், கோவிட் 19க்கு எதிரான உலகத்தின் போராட்டத்தில் பாதிப்பு இருக்கும் என்று கருதப்பட்டது, அதற்குப் பதிலாக உலகத்தின் மருந்தகமாக அங்கீகரிக்கப்பட்டு மதிக்கப்படுகிறது. நமது பொருளாதாரம் வெளிப்படையாக இருக்கிறடு என்று பார்க்கப்படுகிறது. சமீபத்திய சீர்திருத்தங்கள் முழுவதும் பொருளாதார செழுமையை அதிகரித்துள்ளது. அதே நேரத்தில், வறுமை மிக வேகமாக ஒழிக்கப்படுகிறது.

இந்திய அரசிய கடந்த 8 ஆண்டுகளில் விரைவாக மாற்றம் அடைந்துள்ளது. முயற்சி செய்து பரிசோதிகப்பட்ட வாக்கு வங்கி அரசியல், பிரிவினை அரசியல் மற்றும் தேர்வு அரசியல் ஆகியவற்றின் தூசி படிந்த மற்றும் துருப்பிடித்த அணுகுமுறை இனி வேலை செய்யாது.

பிரதம மந்திரி ஸ்ரீ நரேந்திர மோடியின் தலைமையின் கீழ் ஒவ்வொரு இந்தியனும் அதிகாரம் பெற்று, எதிர்பாராத விதமாக மேலும் உயர சிறகுகளைப் பெறுகிறான். வளர்ச்சி அரசியலை நோக்கிய இந்த உந்துதல், நிராகரிக்கப்பட்ட மற்றும் தோல்வியடைந்த கட்சிகளால் கடுமையாக எதிர்க்கப்படுகிறது. அவர்கள் மீண்டும் வாக்கு வங்கி அரசியலிலும் பிரிவினை அரசியலிலும் தஞ்சம் அடைந்துள்ளனர்.

இன்றைய இந்தியா அரசியலில் இரண்டு தனித்துவமான பாணிகளைக் கண்டிருக்கிறது - தேசிய ஜனநாயகக் கூட்டணியின் முயற்சிகள் மற்றும் ஒரு குழுவின் அற்ப அரசியல் ஆகியவை கடந்த சில நாட்களாக அவர்களின் ஆவேச வார்த்தைகளில் காணப்படுகிறது. மீண்டும் ஒரு கடிதத்தில் (அதுவும் காலமே சொல்லும்) அதில் அவர்கள் நம் தேசத்தின் மீது நேரடித் தாக்குதலை நடத்தி, கடின உழைப்பாளிகளான நமது குடிமக்கள் மீது அவநம்பிக்கையை ஏற்படுத்தியுள்ளார்கள்.

மக்களால் நிராகரிக்கப்பட்ட மற்றும் சோர்வடைந்த அரசியல் கட்சிகளுக்கு நான் நினைவூட்ட விரும்புகிறேன் - நீங்கள் எங்களுடைய வாக்கு வங்கி அரசியலைப் பற்றி பேசுவதால், ராஜஸ்தானின் கரோலில் நடந்த வெட்கக்கேட்டை ஏன் மறந்துவிட்டீர்கள்? இந்தப் பிரச்சினையில் உங்களை மௌனமாக இருக்கச் செய்யும் நிர்ப்பந்தங்கள் என்ன?

நவம்பர் 1966-ல், இந்தியாவில் பசுவதையைத் தடை செய்ய வேண்டும் என்ற கோரிக்கையுடன் டெல்லியை நோக்கி பேரணியாகச் சென்று நாடாளுமன்றத்திற்கு வெளியே அமர்ந்திருந்த இந்து சாதுக்கள் மீது அப்போதைய பிரதமர் இந்திரா காந்தி துப்பாக்கிச் சூடு நடத்தினார்.

குஜராத் 1969, மொரதாபாத் 1980, பிவாண்டி 1984, மீரட் 1987, 1980கள் வரை காஷ்மீர் பள்ளத்தாக்கில் இந்துக்களுக்கு எதிரான பல்வேறு சம்பவங்கள், 1989 பாகல்பூர், 1994 ஹுப்பாலி… என காங்கிரஸ் ஆட்சியில் நடந்த வகுப்புவாத வன்முறைகளின் பட்டியல் நீளமானது. 2013ல் முசாபர்நகர் கலவரம் அல்லது 2012ல் அசாம் கலவரம் எந்த அரசாங்கத்தின் கீழ் நடந்தது?

மிகக் கொடூரமான வகுப்புவாத வன்முறை மசோதாவைக் கொண்டுவந்ததோடு, கூடுதல் அரசியலமைப்பு தேசிய ஆலோசனை கவுன்சிலால் கட்டுப்படுத்தப்பட்டது ஐக்கிய முற்போக்கு கூட்டணி (யு.பி.ஏ) அரசுதான் என்பதை அனைவருக்கும் நினைவூட்டுகிறேன். இது யு.பி.ஏ தரநிலைகளின்படி கூட புதிய வாக்கு வங்கி அரசியலை முன்னிறுத்தியது.

அதேபோல், தலித் மற்றும் பழங்குடியினருக்கு எதிரான மிகக் கொடூரமான படுகொலைகள் காங்கிரஸ் ஆட்சியில் நடந்துள்ளன. இதே காங்கிரஸ்தான் டாக்டர் அம்பேத்கரை நாடாளுமன்றத் தேர்தலில் தோற்கடிக்கச் செய்தது.

தமிழ்நாட்டில் ஆளும் கட்சியுடன் இணைந்திருக்கும் சக்திகள், இந்தியாவின் மிகப் பெரிய இசை மேஸ்ட்ரோக்களில் ஒருவரை, ஒரு அரசியல் கட்சிக்கும் அதன் கூட்டணிக் கட்சிகளுக்கும் விருப்பமில்லாத கருத்துக்களைக் கூறியதால் அவரை வாய்மொழியாகக் கொச்சைப்படுத்தி அவமானப்படுத்தி கல்லெறிகின்றனர். இது ஜனநாயகமா? ஒருவர் வெவ்வேறு கருத்துகளுடன் அனைவரும் மகிழ்ச்சியுடன் சேர்ந்து வாழலாம். ஆனால், ஏன் அவமானப்படுத்த வேண்டும்?

மேற்கு வங்கம் மற்றும் கேரளாவில் நடக்கும் வெட்கக்கேடான அரசியல் வன்முறைகளும், பாஜக தொண்டர்கள் பலர் கொல்லப்படுவதும் குறிவைகப்படும் நிகழ்வுகள் சில அரசியல் கட்சிகள் ஜனநாயகத்தை எப்படிப் பார்க்கின்றன என்பதைச் சுருக்கமாகச் சொல்கிறது.

மகாராஷ்டிராவில், இரண்டு கேபினட் அமைச்சர்கள் ஊழல் குற்றச்சாட்டு, மிரட்டி பணம் பறித்தல் மற்றும் சமூக விரோத சக்திகளுடன் தொடர்பு என கடுமையான குற்றச்சாட்டுகளின் கீழ் கைது செய்யப்பட்டுள்ளனர். இந்தியாவின் நிதி மூலதனத்தை வைத்திருக்கும் ஒரு மாநிலத்தில், கேபினட் அமைச்சர்கள் இத்தகைய மிரட்டி பணம் பறிக்கும் போக்குகளைக் கொண்ட ஒரு உற்சாகமில்லாத கூட்டணியை வைத்திருப்பது அறிவு பூர்வமானதுதானா என்ற வகையில் நமக்கு கவலையாக இல்லையா?

இது என்னை அடுத்த விஷயத்துக்கு கொண்டுவருகிறது, தேர்ந்தெடுக்கப்பட்ட அரசியல் கட்சிகளின் வெட்கக்கேடான நடத்தைக்கான காரணம் நான் பகிர்ந்து கொண்ட சம்பவங்களின் மேலே உள்ள பட்டியலில் உள்ளது. வாக்கு வங்கி அரசியலை ஆதரிப்பவர்கள், இந்தக் கட்சிகள் தங்கள் கேடுகெட்ட செயல்கள் இறுதியாக அம்பலமாகிவிடுமோ என்று அஞ்சுகின்றனர். பல தசாப்தங்களாக அவர்கள் சாதாரண மக்களை கொடுமைப்படுத்திய சமூக விரோத கூறுகளை சுதந்திரமாக வளர்த்தனர். இப்போது இந்த கூறுகள் நாட்டின் சட்டங்களுக்கு உட்பட்டு வருவதால், இந்த கூறுகளுக்கு அடைக்கலம் கொடுத்த தரப்பினர் பீதியடைந்துள்ளனர், இது இந்த வினோதமான நடத்தைக்கு எடுத்துச் செல்கிறது.

சமீபத்தில் நடந்த சட்டசபை தேர்தல் முடிவுகள், வாக்கு வங்கி அரசியலில் ஈடுபடுபவர்களின் கண்களைத் திறக்கும் வகையில் அமைந்திருக்கிறது. தேர்தல் களத்தில் இந்தியாவின் மிகப்பெரிய மாநிலமான மேற்குக் கடற்கரையில் உள்ள ஒரு கடலோர மாநிலம், வடகிழக்கில் உள்ள ஒரு மாநிலம் மற்றும் ஒரு மலைப் பிரதேச மாநிலம் ஆகியவை பா.ஜ.க.வுக்கு அமோகமான வெற்றியை வழங்கியுள்ளன. பாஜகவின் வளர்ச்சி அரசியலுக்கு பெரும் வரவேற்பு அளிக்கப்பட்டு வரும் நிலையில், பாஜகவுகு ஆதரவான உணர்வை இந்தியா காண்கிறது. பல ஆண்டுகளுக்கு பிறகு, ஒரு தனி கட்சி ராஜ்யசபாவில் 100 உறுப்பினர்களின் எண்ணிக்கையைத் தாண்டிய கட்சி என பாஜக பெருமை பெற்றுள்ளது. உ.பி.யின் சட்ட மேலவையில் அறுதிப் பெரும்பான்மை பெற்ற முதல் கட்சியாகவும் பாஜக உருவெடுத்துள்ளது. பல தசாப்தங்களாக நாட்டை ஆண்ட கட்சிகள் எதற்காக தோல்வியடைந்தன என்பதை இப்போது வரலாற்றின் விளிம்பில் இருக்கும் எதிர்க்கட்சிகள் சுயபரிசோதனை செய்ய வேண்டும்.

இந்திய இளைஞர்கள் வாய்ப்புகளை விரும்புகிறார்கள், தடைகளை அல்ல. பிளவுகளை அல்ல. இந்திய இளைஞர்கள் வளர்ச்சியை விரும்புகிறார்கள். இன்று அனைத்து மதத்தினரும், அனைத்து வயதினரும், அனைத்து தரப்பு மக்களும் வறுமையை வென்று இந்தியாவை முன்னேற்றத்தின் புதிய உச்சங்களுக்கு கொண்டு செல்ல ஒன்றிணைந்துள்ள நிலையில், வளர்ச்சியின் அரசியலை நோக்கி பாதையை மாற்றிக்கொள்ள எதிர்க்கட்சிகளை நான் வலியுறுத்துகிறேன். இதற்கு நாம் நமது வருங்கால சந்ததியினருக்கு கடமைப்பட்டுள்ளோம்.” என்று பாஜக தேசியத் தலைவர் ஜே.பி.நட்டா தெரிவித்துள்ளார்.

"தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil"