சிறைக்கு சென்ற அமைச்சர்கள்; பாஜகவில் சேர அழுத்தம்: அரவிந்த் கெஜ்ரிவால் குற்றச்சாட்டு

டெல்லி முதலமைச்சர் அரவிந்த் கெஜ்ரிவால் ஞாயிற்றுக்கிழமை, தங்கள் கட்சியில் சேருமாறு பாஜக அழுத்தம் கொடுப்பதாக குற்றஞ்சாட்டினார்.

மேலும், “டெல்லி அரசு பள்ளிகள் கட்டுவது, மக்களுக்கு இலவச சிகிச்சை அளிப்பது போன்ற வளர்ச்சி பணிகளில் கவனம் செலுத்துகிறது.

தாம் சிறைக்கு அனுப்பப்பட்டாலும் இந்தப் பணிகள் நிற்காது” என அறிக்கை வெளியிட்டுள்ளார். அதில், "நாங்கள் தங்கள் கட்சியில் சேர வேண்டும் என்று பாஜக விரும்புகிறது. ஆனால் நாங்கள் தலைவணங்க மாட்டோம்.

பள்ளிகளை கட்டியதால் மனிஷ் சிசோடியா சிறையில் அடைக்கப்பட்டார். சத்யேந்தர் ஜெயின் மொஹல்லா கிளினிக்குகளை கட்டியதால் சிறைக்கு அனுப்பப்பட்டார்.

ஆம் ஆத்மி கட்சித் தலைவர்களுக்கு எதிராக அமலாக்க இயக்குநரகம் (இடி) மற்றும் மத்திய புலனாய்வுப் பிரிவு (சிபிஐ) உள்ளிட்ட பல்வேறு மத்திய அமைப்புகள் களமிறங்கியுள்ளன” எனத் தெரிவிக்கப்பட்டுள்ளது.

மேலும், அந்த அறிக்கையில், “ஆனால் நீங்கள் முதல்வர் கெஜ்ரிவாலை சிறையில் அடைத்தாலும், பள்ளிகள் மற்றும் மொஹல்லா கிளினிக்குகள் கட்டும் (நடந்து வரும்) பணிகள் மற்றும் டெல்லி மக்களுக்கு இலவச சிகிச்சை அளிப்பது நிறுத்தப்படாது” எனத் தெரிவிக்கப்பட்டுள்ளது.

கெஜ்ரிவாலின் கூற்றுகளுக்கு பதிலளித்த பாஜக டெல்லி தலைவர் வீரேந்திர சச்தேவா, டெல்லி மக்களை திசைதிருப்பும் மற்றும் தவறாக வழிநடத்தும் முயற்சி என்றார்.

“அரவிந்த் கெஜ்ரிவால் புலனாய்வு அமைப்புகளின் விசாரணைகளுக்கு பயப்படுகிறார், அதனால்தான் அவர் பொய் சொல்கிறார். அவர் டெல்லி மக்களை திசைதிருப்பவும் ஏமாற்றவும் விரும்புகிறார், அதனால்தான் அவர் ஒருபோதும் நடக்காத விஷயங்களைப் பற்றி கனவு காண்கிறார்” என்றார்.

இதற்கிடையில், தில்லி முதல்வர் அரவிந்த் கெஜ்ரிவால் ஐந்தாவது முறையாக அமலாக்க இயக்குனரகத்தின் சம்மனைத் தவிர்த்த ஒரு நாளுக்குப் பிறகு, அவருக்கு எதிராக ED சனிக்கிழமை புதுடெல்லி நீதிமன்றத்தில் புகார் அளித்தது.

பிப்ரவரி 7 ஆம் தேதி இந்த வழக்கை விசாரிக்கும் கூடுதல் தலைமை பெருநகர மாஜிஸ்திரேட் திவ்யா மல்ஹோத்ரா முன் ED தனது சமர்ப்பிப்புகளை அளித்தது.

ஆம் ஆத்மி அரசாங்கத்தின் இப்போது நீக்கப்பட்ட கலால் கொள்கை தொடர்பான வழக்கில் கெஜ்ரிவாலை விசாரிக்க ED முயன்றபோது, டெல்லி முதல்வர் சம்மனை "சட்டவிரோதம்" என்று அழைத்தார். சம்மனைக் கேள்விக்குட்படுத்திய அவர், இந்த வழக்கில் குற்றம் சாட்டப்பட்டவர் என்று குறிப்பிடப்படவில்லை என்று கூறியுள்ளார்.

இதற்கிடையில், பாஜக எம்எல்ஏக்களை வேட்டையாட முயற்சிப்பதாக ஆம் ஆத்மி கட்சி (ஆம் ஆத்மி) தலைவர் கூறியது தொடர்பாக அவருக்கு நோட்டீஸ் வழங்க டெல்லி காவல்துறை குற்றப்பிரிவுக் குழு ஞாயிற்றுக்கிழமை காலை மீண்டும் அமைச்சர் அதிஷியின் வீட்டுக்குச் சென்றது.

அவர் வீட்டில் இல்லாததால் அவரது வீட்டுக்கு வெளியே போலீசார் காத்திருந்தனர். இதற்கிடையில், கல்வி, பொதுப்பணித்துறை, கலாச்சாரம் மற்றும் சுற்றுலா துறைகளை வைத்திருக்கும் அதிஷி, தன் சார்பாக காவல்துறையினரிடம் இருந்து ஏதேனும் அறிவிப்பைப் பெறுமாறு தனது முகாம் அலுவலக உறுப்பினர்களிடம் கூறினார்.

ஆங்கிலத்தில் வாசிக்க : BJP wants us to join their party but we won’t bow down: Delhi CM Arvind Kejriwal

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“