சகோதரர் மகன் ஆகாஷை அரசியல் வாரிசாக அறிவித்த மாயாவதி... உ.பி, உத்தரகாண்ட்-க்கு மட்டும் தலைமைப் பொறுப்பு

பகுஜன் சமாஜ் கட்சித் தலைவர் மாயாவதியின் இளைய சகோதரர் ஆனந்த் குமாரின் மகன் ஆகாஷ், ராஜஸ்தான், மத்தியப் பிரதேசம், தெலுங்கானா மற்றும் சத்தீஸ்கர் ஆகிய மாநிலங்களில் கட்சியின் தேர்தல் தயாரிப்பு பணிகளை மேற்பார்வையிட்டார்.

ஆங்கிலத்தில் படிக்க: BSP supremo Mayawati names nephew Akash Anand as political heir, keeps UP & Uttarakhand for herself

2024 மக்களவைத் தேர்தலுக்கான வியூகம் குறித்து ஆலோசிக்க நடைபெற்ற கட்சிக் கூட்டத்தில், பகுஜன் சமாஜ் கட்சித் தலைவர் மாயாவதி ஞாயிற்றுக்கிழமை தனது சகோதரரின் மகனான ஆகாஷ் ஆனந்த் தனது அரசியல் வாரிசாக இருப்பார் என்று கூறியதாக கட்சித் தலைவர்கள் தெரிவித்தனர். உத்தரபிரதேசம் மற்றும் உத்தரகாண்ட் தவிர அனைத்து மாநிலங்களிலும் கட்சியை வலுப்படுத்தும் பொறுப்பை மாயாவதி அவருக்கு வழங்கினார்.

இந்த கூட்டத்திற்குப் பிறகு லக்னோவில் உள்ள கட்சி அலுவலகத்திற்கு வெளியே செய்தியாளர்களிடம் பேசிய பகுஜன் சமாஜ் கட்சியின் ஷாஜகான்பூர் மாவட்டத் தலைவர் உதய்வீர் சிங், “நாங்கள் மக்களவைத் தேர்தலுக்குத் தயாராகிவிட்டோம். அவர் (மாயாவதி) எங்கள் பிராந்தியங்களில் வேலை செய்யத் தொடங்கச் சொன்னார்… அவருக்குப் பிறகு, அவர் (ஆகாஷ்) அவருடைய ‘உத்தரதிகாரி’ (வாரிசு) என்று பெஹன்ஜி கூறினார். மேலும், அவர் கட்சி பலவீனமாக உள்ள மாநிலங்களில் பணியாற்றுவார். உ.பி., உத்தரகாண்ட் தவிர மற்ற மாநிலங்களில் அவர் பணியாற்றுவார் என்று கூறினார்.

33 வயது ஆகாஷ் தற்போது பி.எஸ்.பி-யின் தேசிய ஒருங்கிணைப்பாளராக உள்ளார்.

“கட்சி பலவீனமாக உள்ள மாநிலங்களில் தேசிய ஒருங்கிணைப்பாளராக அவர் தொடர்ந்து பணியாற்றுவார். உ.பி மற்றும் உத்தரகண்டில் கட்சியை தொடர்ந்து வழிநடத்துவேன், மற்ற மாநிலங்களில் ஆகாஷ்ஜி கட்சியை வழிநடத்துவார் என்று மாயாவதி கூறினார்” என்று உதய்வீர் சிங் பின்னர் இந்தியன் எக்ஸ்பிரஸிடம் கூறினார்.

மாயாவதியின் அரசியல் வாரிசு ஆகாஷ் ஆனந்த் என்பதை பகுஜன் சமாஜ் கட்சி அதிகாரப்பூர்வமாக உறுதிப்படுத்தவில்லை அல்லது மறுக்கவில்லை என்றாலும், கட்சித் தலைவர்கள் பலர் ஞாயிற்றுக்கிழமை கூட்டத்தில் மாயாவதியின் அறிவிப்பை உறுதிப்படுத்தினர்.

பகுஜன் சமாஜ் கட்சியின் உ.பி பிரிவு தலைவர் விஸ்வநாத் பால் கூறுகையில், “மரியாதைக்குரிய மாயாவதி ஜியின் வாரிசாக ஆகாஷ் ஆனந்தை தேர்வு செய்ததற்காக ஒட்டுமொத்த பகுஜன் சமாஜ் கட்சிக்கு வாழ்த்து தெரிவித்துள்ளது.

இந்த கூட்டத்தில் கலந்து கொண்ட பகுஜன் சமாஜ் கட்சி எம்.எல்.சி பீம்ராவ் அம்பேத்கர் பேசுகையில், “மாயாவதி ஜி தனது வாரிசாக ஆகாஷ் ஆனந்த் ஜியை அறிவித்துள்ளார். தனக்குப் பிறகு பகுஜன் சமாஜ் கட்சிக்கு அவர் மட்டுமே வாரிசு என்று கூறியுள்ளார்.” என்று தெரிவித்தார்.

ராஜஸ்தான், மத்தியப் பிரதேசம், தெலங்கானா, சத்தீஸ்கர் ஆகிய மாநிலங்களில் சமீபத்தில் நடந்த தேர்தலுக்கான கட்சியின் தேர்தலுக்கு தயாராகும் பணிகளை மாயாவதியின் இளைய சகோதரர் ஆனந்த் குமாரின் மகன் ஆகாஷ் கவனித்து வந்தார்.

பாதயாத்திரைகள் மற்றும் ஆர்ப்பாட்டங்களை ஏற்பாடு செய்யாமல் கட்சியின் வழக்கமான உத்தியில் இருந்து விலகி, ராஜஸ்தானில் ஆகஸ்ட் மாதம் 14 நாள் பாதயாத்திரைக்கு அவர் தலைமை தாங்கினார். அங்கு அவர் கடந்த ஆண்டு கட்சி விவகாரங்களுக்குப் பொறுப்பேற்றார். இருப்பினும், 2018-ல் 6 இடங்களை வென்ற அக்கட்சி சாதுல்பூர் மற்றும் பாரி ஆகிய இரண்டு தொகுதிகளை மட்டுமே கைப்பற்றி செயல்திறனைக் காட்டத் தவறிவிட்டது.

ம.பி., சத்தீஸ்கர், தெலங்கானாவில் நடந்த தேர்தல் பிரச்சாரங்களிலும் ஆகாஷ் முக்கிய பங்கு வகித்தார். ஜூன் மாதம், தலித்துகள், மத சிறுபான்மையினர், ஓ.பி.சி-கள் மற்றும் பழங்குடியினர் தொடர்பான பிரச்சனைகளில் தேர்தல் பிரச்சாரத்தைத் தயாரிக்கவும், தொடங்கவும் மாயாவதி அவரையும், மாநிலங்களவை எம்.பி ராம்ஜி கெளதமையும் இந்த மாநிலங்களுக்கான மத்திய ஒருங்கிணைப்பாளர்களாக நியமித்தார். ஆனால், இந்த மூன்று மாநிலங்களிலும் கட்சி ஒரு இடம்கூட வெற்றி பெறாமல் கணக்கைத் தொடங்கத் தவறிவிட்டது.

பல ஆண்டுகளாக மாயாவதியின் அரசியல் வாரிசாக அவர் முன்னிறுத்தப்பட்டாலும், ஆகாஷ் லண்டனில் எம்.பி.ஏ முடித்து இந்தியா திரும்பியதைத் தொடர்ந்து, செப்டம்பர் 2017-ல் பி.எஸ்.பி ஊழியர்களுக்கு அறிமுகமானார். அவர் டெல்லியில் பள்ளிப்படிப்பை முடித்திருந்தார்.

பி.எஸ்.பி கட்சித் தொண்டர்களுக்கு அவரது அறிமுகம் - அவரது அரசியல் வாழ்க்கையின் தொடக்கமாகக் கருதப்படுகிறது - ஒரு தேர்தலில் பி.எஸ்.பி 19 இடங்களுடன் மூன்றாவது இடத்தைப் பிடித்த தேர்தலில் மகத்தான வெற்றியுடன் மாநிலத்தில் பா.ஜ.க மீண்டும் ஆட்சிக்கு வந்த சில மாதங்களுக்குப் பிறகு வந்தது.

2019 லோக்சபா தேர்தலுக்கு முன்னதாக ஆகாஷ் அரசியல் ரீதியாக மிகவும் சுறுசுறுப்பாக இருந்தார். மேலும், தனது அத்தையை சமூக வலைதளமான எக்ஸ் பக்கத்திற்கு கொண்டு வந்த பெருமையைப் பெற்றார். தேர்தலுக்கு முன்னதாக, தேர்தல் ஆணையம் மாயாவதிக்கு 48 மணி நேரம் பிரச்சாரம் செய்ய தடை விதித்த ஒரு நாள் கழித்து, ஆகாஷ் மேடையில் ஏறி, ஆக்ராவில் தனது முதல் பேரணியில் உரையாற்றினார் - சமாஜ்வாடி கட்சி - பி.எஸ்.பி - ஆர்.எல்.டி கூட்டணிக்கு வாக்களிக்குமாறு மக்களை வலியுறுத்தினார் . எஸ்.பி தலைவர் அகிலேஷ் யாதவ் மற்றும் ஆர்.எல்.டி தலைவர் அஜித் சிங் மேடையில் அவருடன் இணைந்தனர்.

இந்த கூட்டணி தோல்வியடைந்த சில வாரங்களுக்குப் பிறகு, மாயாவதி, ஆகாஷை கட்சியின் தேசிய ஒருங்கிணைப்பாளராக நியமித்து, இளைஞர்களை, குறிப்பாக தலித் சமூகத்தைச் சேர்ந்தவர்களை சென்றடையுமாறு பணித்தார். அதன்பிறகு அவர் பல ஆண்டுகளாக அந்தஸ்தில் வளர்ந்தார், இப்போது மாயாவதியின் குடும்பத்தில் மிகவும் நம்பிக்கை அளிப்பவராகக் கருதப்படுகிறார்.

ஞாயிற்றுக்கிழமை நடைபெற்ற கூட்டத்திற்குப் பிறகு வெளியிடப்பட்ட பி.எஸ்.பி அறிக்கையில், ஆகாஷைப் பற்றி எதுவும் குறிப்பிடப்படவில்லை. தேர்தல் ஆதாயங்களுக்காக போட்டிக் கட்சிகளின் ஏமாற்று வேலை மற்றும் தவறான நாடகங்களை இருமடங்கு கடின உழைப்புடன் எதிர்கொள்ளுமாறு கட்சித் தொண்டர்கள் மற்றும் தலைவர்களுக்கு அவர் அறிவுறுத்தியதாக குறிப்பிடப்பட்டிருந்தது. 

“எதிர்க்கட்சிகள் நன்கொடைகள் மூலம் சேகரிக்கப்பட்ட கோடிக்கணக்கான ரூபாய்களை செலவழித்து தேர்தலை பாதிக்க முயற்சி செய்கின்றன. இதற்கிடையில், பகுஜன் சமாஜ் கட்சி தனது மக்கள் கஷ்டப்பட்டு சம்பாதித்த பணத்தை நம்பியிருக்கிறது, பெரிய தொழிலதிபர்கள் மற்றும் முதலாளிகளின் வழிகாட்டுதல்களைப் பின்பற்ற வேண்டியதில்லை என்பதற்காக அவர்களிடமிருந்து விலகி இருக்கிறது” என்று மாயாவதி கூறியதாக அறிக்கையில் குறிப்பிடப்பட்டுள்ளது.

மேலும், “எதிர்க்கட்சிகள் நிறைவேற்ற முடியாத வாக்குறுதிகளை அளித்து தேர்தல் நடத்தை விதிகளை மீறுகின்றன” என்றும் அவர் கூறியுள்ளார்.

இது தேர்தலைப் பாதிக்கிறது மற்றும் பல முனை சண்டையாக இருப்பதற்குப் பதிலாக, அது ஒருதலைப்பட்சமாக மாறுகிறது. பிறகு எப்படி பாரபட்சமற்ற, நியாயமான தேர்தல்கள் சாத்தியமாகும்? என்று மாயாவதி கேள்வி எழுப்பியுள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“