பட்ஜெட் 2023-24: நடுத்தர வர்க்கம், பெண்கள், இளைஞர்கள்… பா.ஜ.க. ஆதரவு தளம் மீது கவனம்

ஏழைகள் மீது கவனம் செலுத்துவதால், நடுத்தர வர்க்கத்தினர் ஏமாற்றமடைந்திருப்பதைப் பற்றி கட்சித் தலைவர்கள் அச்சம் கொண்டிருந்தனர். ஏழைகள், நடுத்தர மக்கள், விவசாயிகள் உள்ளிட்ட லட்சிய சமுதாயத்தின் கனவுகளை இந்த பட்ஜெட் நிறைவேற்றுகிறது என்று பிரதமர் மோடி கூறியுள்ளார்.

நிதியமைச்சர் நிர்மலா சீதாராமனின் ஐந்தாவது பட்ஜெட், புதன்கிழமை தாக்கல் செய்யப்பட்டது. இந்த பட்ஜெட் சில பிரிவினருக்கு, குறிப்பாக நடுத்தர வர்க்கம் மற்றும் இளைஞர்களுக்கு சலுகைகளை வழங்குகிறது. வீடு மற்றும் கட்டுமானம் போன்ற வேலைகளை உருவாக்கும் துறைகளை புத்துயிர் அளிப்பதில் தெளிவான கவனம் செலுத்தப்படுகிறது.

சப்தரிஷி என சீதாராமன் குறிப்பிட்டுள்ள முன்னுரிமைகளில் உள்ளடக்கிய வளர்ச்சி, திறனை வெளிப்படுத்துதல், பசுமை வளர்ச்சி, இளைஞர் சக்தி, கடைசி எல்லையை அடைவது, நிதித்துறை மற்றும் உள்கட்டமைப்பு முதலீடு ஆகியவை அடங்கும்.

நரேந்திர மோடி அரசாங்கம் அடுத்த லோக்சபா தேர்தலுக்குச் செல்வதற்கு முன் கடைசியாக வந்துள்ள இந்த பட்ஜெட், பழங்குடியினர், இளைஞர்கள், பெண்கள் மற்றும் நடுத்தர வர்க்கத்தினருக்கான முக்கிய அறிவிப்புகளுடன், வரவிருக்கும் மாநிலத் தேர்தல்களிலும் தனது ஆதரவுத் தளத்தை இலக்காகக் கொண்டுள்ளது. நடுத்தர வர்க்கத்தினருக்கு புதிய வரி முறையின் கீழ் வருமான வரி அடுக்குகள் மறுசீரமைக்கப்பட்டுள்ளன. ஆண்டுக்கு ரூ. 5 லட்சத்தில் இருந்து ரூ.7 லட்சம் வரை வருமானம் பெறுபவர்களுக்கு வருமான வரி தள்ளுபடி செய்யப்படுகிறது.

கர்நாடகாவில் ஆட்சியை தக்கவைக்க பா.ஜ.க கடுமையான போராட்டத்திற்கு தயாராகி வரும் நிலையில், அந்த மாநிலத்திற்கு ரூ.5,300 கோடி மத்திய அரசின் உதவியை நிர்மலா சீதாராமன் அறிவித்தார். உண்மையில், அவர் தனது பட்ஜெட் உரையில் குறிப்பிட்டுள்ள ஒரே மாநிலம் கர்நாடகாதான். "வறட்சியால் பாதிக்கப்பட்டுள்ள கர்நாடகாவின் மத்திய பகுதியில், நிலையான சொட்டுநீர் பாசனம் மற்றும் குடிநீருக்காக மேல்நிலைத் தொட்டிகளை நிரப்ப, மேல் பத்ரா திட்டத்திற்கு ரூ. 5,300 கோடி மத்திய அரசின் நிதி உதவி வழங்கப்படும்” என்று நிர்மலா சீதாராமன் கூறினார். அப்போது எதிர்க்கட்சியினர் தேர்தல், கர்நாடகாத் தேர்தல் என்று கூச்சலிட்டனர்.

பிரதம மந்திரி ஆவாஸ் யோஜனா திட்டத்திற்கான செலவீனத்தை 66 சதவீதம் அதிகரிப்பதற்கான அறிவிப்பு - சமீபத்திய சட்டமன்றத் தேர்தல்களில் பா.ஜ.க-வின் நன்மதிப்பையும் வாக்குகளையும் பெற்ற திட்டம் - ரூ. 79,000 கோடிக்கு மேல் ஒதுக்கியிருப்பது, மாநிலங்களில் அதன் தேர்தல் பிரச்சாரத்தில் பா.ஜ.க-வுக்கு உதவக்கூடும்.

மத்தியில் அதிகாரத்தைக் குவிப்பதன் மூலம் இந்தியாவின் கூட்டாட்சி கட்டமைப்பை மீறியதாக பா.ஜ.க அரசாங்கம் மீது குற்றம் சாட்டப்படும் நேரத்தில், மாநிலங்களின் கடன் வரம்புகளை தளர்த்துவதன் மூலம் அதிக நெகிழ்வுத்தன்மையுடன் ஒன்றிணைக்கும் முயற்சியும் மேற்கொள்ளப்பட்டுள்ளது. சீர்திருத்தங்கள், அத்துடன் அவற்றின் மூலதனச் செலவின வரம்புகளை அதிகரிப்பது, இவை ஒன்றாக சேர்ந்து பொருளாதாரத்தில் வளர்சியை ஏற்படுத்தும்.

இந்த பட்ஜெட் ஏழைகளுக்கு முன்னுரிமை அளிக்கிறது. இந்த பட்ஜெட் லட்சிய சமூகம், விவசாயிகள் மற்றும் நடுத்தர வர்க்கத்தினரின் கனவுகளை நிறைவேற்றும் என்று பிரதமர் மோடி, இந்த பட்ஜெட்டை முதலில் பாராட்டினார்.

“சுதந்திர அமிர்த கால முதல் பட்ஜெட், வளர்ந்த இந்தியாவைக் கட்டியெழுப்ப வலுவான அடித்தளத்தை உருவாக்கும். இது ஏழைகளுக்கு முன்னுரிமை அளிக்கிறது. ஏழை மக்கள், நடுத்தர மக்கள், விவசாயிகள் உள்ளிட்ட லட்சிய சமுதாயத்தின் கனவுகளை இந்த பட்ஜெட் நிறைவேற்றும். இந்த வரலாற்று சிறப்புமிக்க பட்ஜெட்டுக்காக நிர்மலா சீதாராமன் மற்றும் அவரது குழுவினரை வாழ்த்துகிறேன்,” என்று பிரதமர் மோடி தொலைக்காட்சியில் உரையாற்றினார்.

பா.ஜ.க தனது நடுத்தர வர்க்க ஆதரவுத் தளத்தைப் பாதுகாப்பதில் ஆர்வமாக இருப்பதால், பட்ஜெட்டில் வெளியிடப்படும் அறிவிப்புகள் நடுத்தர வர்க்கத்தினரை மகிழ்ச்சியடையச் செய்யும் என்று எதிர்பார்க்கப்படுகிறது. ஆனால் தனிநபர் வருமான வரி தள்ளுபடியின் காரணமாக எதிர்பார்க்கப்படும் நுகர்வு அதிகரிப்பு மூலம் பொருளாதாரத்திற்கு ஊக்கமளிக்கும். புதிய வரி விதிப்பின் கீழ், ரூ. 7 லட்சம் வரை ஆண்டு வருமானம் உள்ளவர்களுக்கு நிர்மலா சீதாராமன் வரி விலக்கு அளித்தார். ஆனால், பழைய வருமான வரி முறையின் கீழ் தொடர்பவர்களுக்கு எந்த நிவாரணமும் இல்லை என்று அறிவித்தார். இது ஏற்கனவே முதலீடுகள் மீதான வரி விலக்குகள் மற்றும் விலக்குகள் மற்றும் வீட்டு வாடகை போன்ற செலவுகளை அனுமதிக்கிறது. தனிநபர் வருமான வரி குறித்த அறிவிப்பு முதன்மையாக நமது கடின உழைப்பாளி நடுத்தர வர்க்கத்தினருக்கு பயனளிக்கும் என்று நிர்மலா சீதாராமன் கூறினார்.

கடந்த சில ஆண்டுகளாக ஏழைகளுக்கு ஆதரவான நலத்திட்டங்கள் மற்றும் முன்முயற்சிகளில் அரசாங்கம் கவனம் செலுத்துவது நடுத்தர வர்க்கத்தினரை ஏமாற்றமடையச் செய்துள்ளது என்று கட்சிக்குள் கருத்துக்கள் இருப்பதாக பா.ஜ.க வட்டாரங்கள் தெரிவித்தன. “பணவீக்கம் மற்றும் வேலையில்லா திண்டாட்டம் இந்தப் பிரிவை சீர்குலைத்துள்ளன. நடுத்தர வர்க்கத்தினரின் கவலைகளை நாம் தீர்க்க வேண்டும் என்று கட்சியின் பெரும் பகுதியினரின் கோரிக்கை உள்ளது. பிற்படுத்தப்பட்ட சாதிகள் மீது கட்சி அதிக கவனம் செலுத்துகிறது. நடுத்தர வர்க்கத்தை மேலும் புறக்கணிக்க முடியாது என்று அவர்கள் கருதுகின்றனர். ஏற்கனவே, இமாச்சலப் பிரதேசம் போன்ற மாநிலங்களில், நடுத்தர மக்களின் கோபத்துக்கு ஆளாகியுள்ளோம். நடுத்தர வர்க்கத்தினரின் கைகளில் அதிக பணம் கிடைத்தால், அது பொருளாதாரம் செழிக்க உதவும்” என்று பா.ஜ.க எம்.பி. ஒருவர் கூறினார்.

தென் மாநிலங்களில் பாஜக தனது தேர்தல் நடவடிக்கையை விரிவுபடுத்த முயற்சிக்கும் நேரத்தில் நடுத்தர வர்க்கத்தின் மீதான பா.ஜ.க-வின் பிடியைத் தக்கவைத்துக்கொள்வது முக்கியமானது என்று அவர் கூறினார்.

பழங்குடியினர் மீதான பாஜகவின் சமீபத்திய ஆர்வம் இந்த பட்ஜெட்டிலும் பிரதிபலிக்கிறது. “குறிப்பாக பாதிக்கப்படக்கூடிய பழங்குடி குழுக்களின் (PVTGs) சமூக-பொருளாதார நிலைமைகளை மேம்படுத்த, நாங்கள் பிரதான் மந்திரியின் குறிப்பாக பாதிக்கப்படக்கூடிய பழங்குடி குழுக்களின் மேம்பாட்டு இயக்கத்தை தொடங்குவோம். இது பாதுகாப்பான வீடுகள், சுத்தமான குடிநீர் மற்றும் சுகாதாரம், கல்வி, சுகாதாரம் மற்றும் ஊட்டச்சத்துக்கான சிறந்த முறையில் கிடைக்கச் செய்வது, சாலை மற்றும் தொலைத்தொடர்பு இணைப்பு மற்றும் நிலையான வாழ்வாதார வாய்ப்புகள் போன்ற அடிப்படை வசதிகளுடன் குறிப்பாக பாதிக்கப்படக்கூடிய பழங்குடி குழுக்களின் குடும்பங்கள் மற்றும் குடியிருப்புகளை நிறைவு செய்யும்” என்று அவர் கூறினார். பழங்குடியினரை இலக்காகக் கொண்ட வளர்ச்சித் திட்டத்திற்கு ரூ.15,000 கோடி கிடைத்துள்ளது.

வடகிழக்கு மாநிலங்களிலும், சத்தீஸ்கர், மத்தியப் பிரதேசம், ராஜஸ்தான் ஆகிய மாநிலங்களிலும் இந்த ஆண்டு இறுதியில் தேர்தல் நடைபெறவுள்ள பல தொகுதிகளில் பழங்குடி இன சமூகம் வெற்றிக்கான காரணியாக இருப்பதால், பழங்குடியினரின் ஆதரவுத் தளத்தை ஒருங்கிணைப்பதில் பா.ஜ.க கவனம் செலுத்தி வருகிறது.

பிரதமரும் கட்சியும் பெண் வாக்காளர்கள் - மாநிலத் தேர்தல்களில் பாஜகவை ஒரு அமைதியான வாக்கு வங்கியாக ஆதரித்ததாக மோடி கூறுகிறார் - ஒரு இலக்கு ஆதரவுத் தளம் ஒருங்கிணைக்கப்பட வேண்டும் என்பதற்கான சமிக்ஞைகளைக் கொடுத்துள்ளனர். ஏறக்குறைய 90 நிமிட பட்ஜெட் உரையில், சீதாராமன் பெண்களுக்கான அரசாங்கத்தின் முன்முயற்சிகளை வலியுறுத்தினார். நிதியமைச்சர் கூறியபடி, தீன்தயாள் அந்த்யோதயா யோஜனா தேசிய ஊரக வாழ்வாதார இயக்கம் கிராமப்புற பெண்களை 81 லட்சம் சுயஉதவி குழுக்களாக இணைத்து குறிப்பிடத்தக்க வெற்றியைப் பெற்றுள்ளது.

“பெரிய உற்பத்தி நிறுவனங்கள் அல்லது கூட்டுகளை உருவாக்குவதன் மூலம் இந்த குழுக்களுக்கு அடுத்த கட்ட பொருளாதார வலுவூட்டலை அடைய நாங்கள் உதவுவோம். ஒவ்வொன்றும் பல ஆயிரம் உறுப்பினர்களைக் கொண்டவை. தொழில் ரீதியாக நிர்வகிக்கப்படுகின்றன. அவர்களுக்கு மூலப்பொருட்களை வழங்குவதோடு, அவர்களின் தயாரிப்புகளின் சிறந்த வடிவமைப்பு, தரம், வர்த்தகம் மற்றும் சந்தைப்படுத்தல் ஆகியவற்றுடன் உதவி செய்யப்படும். மற்ற துணைக் கொள்கைகள் மூலம், யூனிகார்ன்களாக வளரும் ஸ்டார்ட்-அப் நிறுவனங்களைப் போலவே, அவர்களின் செயல்பாடுகளை அளவிடவும், பெரிய நுகர்வோர் சந்தைகளுக்குச் சேவை செய்யவும் அவை செயல்படுத்தப்படும்” என்று நிர்மலா சீதாராமன் கூறினார்.

பெண்களின் வாழ்க்கையை மேம்படுத்துவதற்கான அரசாங்கத்தின் முயற்சிகளை பிரதமரும் சுட்டிக்காட்டினார். “கிராமப்புற மற்றும் நகர்ப்புற பெண்களின் வாழ்க்கையை எளிதாக்குவதற்கு அரசாங்கம் பல நடவடிக்கைகளை எடுத்துள்ளது. மகளிர் சுயஉதவிக்குழுக்கள் பெண்களை மேலும் மேம்படுத்தும். குடும்பங்களில் பெண்களுக்கு அதிகாரம் அளிக்கும் வகையில் சிறப்பு சேமிப்பு திட்டம் தொடங்கப்படும்” என்று பிரதமர் மோடி கூறினார்.

ஒரு முக்கிய ஆதரவுத் தளத்தை மனதில் கொண்ட மற்றொரு அறிவிப்பு பி.எம். விகாஸ் யோஜனா திட்டம் (பிரதான் மந்திரி விஸ்வகர்மா கவுஷல் சம்மன்) ஆகும். இது பல்வேறு பாரம்பரிய, திறமையான தொழில்களில் ஈடுபடும் மக்களுக்கு ஊக்கமளிக்கும் என்று எதிர்பார்க்கப்படுகிறது. பி.எம். விகாஸ் யோஜான ‘விஸ்வகர்மாக்களின்’ வாழ்வில் மிகப்பெரிய மாற்றத்தை ஏற்படுத்தும் என்று குறிப்பிட்ட பிரதமர், அவர்களுக்கு ஆதரவளிக்கும் திட்டங்கள் முதல்முறையாக பட்ஜெட்டில் இணைக்கப்பட்டுள்ளதாக கூறினார்.

“நாட்டிற்காக பாரம்பரியமாக தங்கள் கைகளால் உழைக்கின்றவர்கள் ‘விஸ்வகர்மாக்கள்’. அவர்கள் இந்த நாட்டை உருவாக்கியவர்கள். முதன்முறையாக, ‘விஸ்வகர்மாக்களுக்கு’ பயிற்சி மற்றும் ஆதரவு தொடர்பான திட்டம் அறிமுகப்படுத்தப்பட்டுள்ளது. அவர்களின் பயிற்சி, தொழில்நுட்பம், கடன் மற்றும் சந்தை ஆதரவுக்கான தயாரிப்புகள் செய்யப்பட்டுள்ளன. கோடிக்கணக்கான விஸ்வகர்மாக்களின் வாழ்வில் மிகப்பெரிய மாற்றத்தை ஏற்படுத்தும்” என்று பிரதமர் கூறினார்.

பா.ஜ.க எம்.பி-யும், முன்னாள் மத்திய அமைச்சருமான ஜெயந்த் சின்ஹா, பட்ஜெட் வேலையின்மை, பணவீக்கம் மற்றும் பொருளாதார வளர்ச்சியின் மந்தநிலை போன்ற பிரச்சினைகளுக்கு தீர்வு காண உறுதியான கொள்கைகளை வகுத்துள்ளது என்று கூறினார். “வேலையில்லாத் திண்டாட்டத்தைப் பொறுத்த வரையில், இந்த பட்ஜெட் வேலை வாய்ப்புகளை உருவாக்குவதை ஊக்குவிக்கும். 7.5 லட்சம் கோடி முதல் 10 லட்சம் கோடி வரை பெரிய முதலீடுகளை செய்து வருகிறோம். கூட்டுறவுத் துறை மற்றும் சிறு, குறு நடுத்தற தொழில்களையும் நாங்கள் ஊக்குவிக்கிறோம்” என்று சின்ஹா கூறினார்.

“உலகின் மிகப்பெரிய பொருளாதாரங்களுடன் போட்டியிடத் தயாராக இருக்கும். எதிர்காலத்திலும் போட்டியிடத் தயாராக இருக்கும் இந்தியாவைக் கட்டமைக்கும் பட்ஜெட் இது. உள்கட்டமைப்புக்கான ரூ. 13.5 லட்சம் கோடி ஒதுக்கீடு, பிரதமர் ஆவாஸ் யோஜனா போன்ற சமூகப் பாதுகாப்பில் கூடுதல் செலவு மற்றும் புதிய திறன் திட்டங்கள், 160 நர்சிங் கல்லூரிகள், வெளிநாடுகளில் வாய்ப்புகளுக்கான 30 ஸ்கில் இந்தியா சர்வதேச மையங்கள், மேலும் நம்பிக்கையை அதிகரிக்க, நீதிமன்றங்களை ரூ.7000 கோடி மூலம் டிஜிட்டல் மயமாக்குவது உட்பட, அரசாங்கத்தின் டிஜிட்டல் மயமாக்கலை விரைவுபடுத்தும் முயற்சிகள், இளம் இந்தியர்களுக்கான முயற்சிகள் ஆகும்.” என்று மத்திய அமைச்சர் ராஜீவ் சந்திரசேகர் கூறினார்.

"தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil"