சம்பாய் சோரன் ராஜினாமா; மீண்டும் ஜார்க்கண்ட் முதல்வராக பதவியேற்கிறார் ஹேமந்த் சோரன்

ஜார்க்கண்ட் முதலமைச்சர் சம்பாய் சோரன் புதன்கிழமை பதவியில் இருந்து விலகினார். அவருக்கு முன்பு முதலமைச்சராக இருந்த ஜார்கண்ட் முக்தி மோர்ச்சா (ஜே.எம்.எம்) செயல் தலைவர் ஹேமந்த் சோரன் மீண்டும் முதலமைச்சராக வருவதற்கு வழி வகுத்துள்ளார்.

ஆங்கிலத்தில் படிக்க: Hemant Soren set to return as Jharkhand CM as Champai Soren steps down

சம்பாய் சோரன் புதன்கிழமை மாலை ஆளுநர் சி.பி. ராதாகிருஷ்ணனை சந்தித்து தனது ராஜினாமா கடிதத்தை அளித்தார். அதன் பிறகு ஹேமந்த் சோரன் ஆட்சி அமைக்க தனது கோரிக்கையை சமர்ப்பித்தார். முந்தைய நாள், ஆளும் கூட்டணியின் 45 எம்.எல்.ஏ.க்கள் முன்னாள் முதலமைச்சர் ஹேமந்த் சோரனைத் தங்கள் தலைவராகத் தேர்ந்தெடுத்தனர். மேலும், அக்கட்சியின் உள்விவகாரங்களின்படி, சுமூகமான அதிகாரப் பரிமாற்றத்திற்காக சம்பாய் பதவி விலகும்படி சமாதானப்படுத்தினர்.

இருப்பினும், மாற்று ஏற்பாடுகள் செய்யப்படும் வரை சம்பாய் தனது பதவியை தக்க வைத்துக் கொள்ளுமாறு ஆளுநர் கேட்டுக் கொண்டார். பதவியேற்பு விழா தேதியை சி.பி. ராதாகிருஷ்ணன் முடிவு செய்வார்.

ஹேமந்த் சோரன் சட்டப்பேரவைக் கட்சித் தலைவராக மீண்டும் தேர்ந்தெடுக்கப்பட்ட கூட்டத்தில் கலந்து கொண்ட வட்டாரம் கூறுகையில், “எந்தவொரு நிலையற்ற தன்மையையும் தவிர்க்கவே சம்பாய் சோரன் முதலமைச்சராக்கப்பட்டார். மேலும், 2019 தேர்தலில் பெரும்பான்மையைப் பெற்ற ஹேமந்த் தலைமையிலான மகா கூட்டணிக்கு மக்கள் ஆணை கிடைத்தது. இருப்பினும், சம்பாய் சோரன் தரப்பில் ஆரம்பத்தில் தயக்கம் இருந்தது. ஏதேனும், சிக்கல் ஏற்பட்டால் அரசாங்கத்தில் சில உறுதியற்ற தன்மையைக் காரணம் காட்டி, சம்பாய் பின்னர் சமாதானப்படுத்தப்பட்டார். சிறிது தயக்கத்திற்குப் பிறகு அவர் தனது பதவியை விட்டுக்கொடுக்கத் தயாராகிவிட்டார்.

ஹேமந்த் சோரன் புதன்கிழமை மாலை ஆளுநர் சிபி ராதாகிருஷ்ணனை சந்தித்தார்.

சுமூகமான ஆட்சி மாற்றத்திற்குப் பிறகு, ஹேமந்த் சோரன் எஞ்சியிருக்கும் வாக்குறுதிகளை நிறைவேற்ற முயற்சிப்பார் என்றும், வரும் சட்டமன்றத் தேர்தலுக்கு அதுவே பொதுமக்களிடம் தனது களத்தை உருவாக்கும் என்றும் வட்டாரங்கள் தெரிவிக்கின்றன. பிரச்சாரப் பாதையில், ஜே.எம்.எம் தலைவர்  “பொய் வழக்கில் 5 மாதங்கள் சிறையில் அடைக்கப்பட்டார், அவர் முதல்வர் பதவியை விட்டு வெளியேற வேண்டிய கட்டாயம் ஏற்பட்டது” என்பது பற்றியும் பேசுவார் என்று ஜே.எம்.எம் கட்சியினர் தெரிவித்தனர்.

ஹேமந்த் கைது செய்யப்பட்ட 5 மாதங்களுக்குப் பிறகு ஜூன் 28-ம் தேதி ஜாமீன் பெற்றார். ஜார்கண்ட் உயர் நீதிமன்றம் ராஞ்சியில் நிலம் தொடர்பாக அவருக்கு எதிராகக் கொண்டுவரப்பட்ட பணமோசடி குற்றத்தில் அவர் குற்றவாளி அல்ல என்று நம்புவதற்கு காரணங்கள் இருப்பதாகக் கூறியது. பல ஜே.எம்.எம் உறுப்பினர்களுக்கு, அவர்களின் கட்சித் தலைவருக்கு ஜாமீன் அளிக்கப்பட்டது ஆச்சரியமாக இருந்தது.

சிறையிலிருந்து வெளியே வந்த பிறகு தனது முதல் உரையில், ஜே.எம்.எம் செயல் தலைவர், சட்டமன்றத் தேர்தல்கள் முன்கூட்டியே அறிவிக்கப்படலாம் என்று தனக்குத் தகவல் கிடைத்திருப்பதாகவும் அதற்கு தான் தயாராக இருப்பதாகவும் கட்சி நிர்வாகிகளிடம் கூறினார்.

ஜார்க்கண்ட் மாநில பா.ஜ.க தலைவர் பாபுலால் மராண்டி, குடும்ப அரசியலுக்கு ஆதரவாக ஜே.எம்.எம் மீது தாக்குதல் நடத்தினார். மேலும், ஹேமந்த் சோரன் குடும்பத்திற்கு வெளியே உள்ள பழங்குடித் தலைவர்கள்  ‘காம் சலாவ்’ (தற்காலிகத் தேர்வுகள்) மட்டுமே” என்று கூறினார். ஹேமந்த் சோரன் குடும்பத்தினர் தங்கள் விருப்பப்படி அவற்றைப் பயன்படுத்துவார்கள் என்றும்,    ‘பாலில் ஈ போல’ அவற்றை நிராகரிப்பார்கள் என்றும் அவர் கூறினார். ஆளும் கட்சியில் உள்ள மற்ற பழங்குடியின தலைவர்களுக்கு இந்த அத்தியாயத்தில் பாடம் கற்க இருப்பதாக மராண்டி கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“