‘நாட்டு நலனுக்காக நிறைய குழந்தைகளைப் பெற்றுக்கொள்ளுங்கள்’ - சந்திரபாபு நாயுடு சட்டம் இயற்ற திட்டம்

தென் மாநிலங்களில், குறிப்பாக ஆந்திரப் பிரதேசத்தில் வயதானவர்களின் மக்கள் தொகை குறித்து கவலை தெரிவித்த முதல்வர் என். சந்திரபாபு நாயுடு, தம்பதிகள் நிறைய குழந்தைகளைப் பெற்றுக்கொள்ள வேண்டும் என்று வலியுறுத்தினார்.

ஆங்கிலத்தில் படிக்க: ‘Have more children for the benefit of the nation’: Chandrababu Naidu plans legislation to boost young population in Andhra

இரண்டு குழந்தைகளுக்கு மேல் உள்ளவர்களை மட்டுமே உள்ளூராட்சி மன்றத் தேர்தலில் போட்டியிட தகுதியுடையவர்களாக மாற்றுவதற்கான சட்டத்தை கொண்டு வர தமது அரசாங்கம் திட்டமிட்டுள்ளதாகவும் அவர் கூறினார்.

“நிறைய குழந்தைகளைக் கொண்ட குடும்பங்களுக்கு ஊக்கத்தொகைகளை வழங்க நாங்கள் யோசித்து வருகிறோம். மேலும், குழந்தைகளைப் பெற தம்பதிகளை ஊக்குவிக்கிறோம். இரண்டு குழந்தைகளுக்கு மேல் உள்ளவர்கள் உள்ளாட்சித் தேர்தலில் போட்டியிடக் கூடாது என்ற முந்தைய சட்டத்தை ரத்து செய்துள்ளோம். இரண்டு குழந்தைகளுக்கு மேல் உள்ளவர்கள் மட்டுமே போட்டியிடும் வகையில் புதிய சட்டத்தை கொண்டு வருவோம்” என, கடந்த அரசாங்கத்தில் நிறுத்தப்பட்ட அமராவதி கட்டுமானப் பணிகளை மீண்டும் துவக்கி வைத்து சந்திரபாபு நாயுடு சனிக்கிழமை கூறினார்.

நாட்டின் பல்வேறு பகுதிகளுக்கும் வெளிநாடுகளுக்கும் இளைய தலைமுறையினர் இடம்பெயர்ந்ததால் பல மாவட்டங்களில் கிராமங்களில் முதியோர்கள் மட்டுமே உள்ளனர் என்று முதல்வர் கூறினார். இந்தியாவின் சராசரி மக்கள்தொகை வளர்ச்சி 1950-களில் 6.2 சதவீதத்தில் இருந்து 2021-ல் 2.1 ஆக குறைந்துள்ளது என்றும், ஆந்திராவில் இந்த எண்ணிக்கை 1.6 சதவீதமாக குறைந்துள்ளது என்றும் அவர் குறிப்பிட்டார்.

“நாம் ஏற்கனவே பற்றாக்குறையில் இருக்கிறோம். இரண்டுக்கும் குறைவான குழந்தைகளைப் பெற்றுக்கொள்வது இளம் மக்கள்தொகையின் விரைவான வீழ்ச்சிக்கு வழிவகுக்கிறது. இரண்டு குழந்தைகளுக்கு மேல் பெற்றால் நிலையான மக்கள்தொகையை உறுதி செய்ய முடியும்” என்று கூறினார்.

ஜப்பான், சீனா மற்றும் ஐரோப்பிய நாடுகளின் உதாரணங்களையும் அவர் சுட்டிக்காட்டினார். “எங்களுக்கு 2047 வரை மட்டுமே மக்கள்தொகை நன்மை உள்ளது. 2047-க்குப் பிறகு, ஆந்திரப் பிரதேசத்தில் இளைஞர்களைவிட வயதானவர்கள் அதிகமாக இருப்பார்கள். இது ஏற்கனவே ஜப்பான், சீனா மற்றும் ஐரோப்பாவின் பல நாடுகளில் நடக்கிறது. அதிக குழந்தைகளைப் பெறுவதும் உங்கள் பொறுப்பு. நீங்கள் அதை உங்களுக்காக செய்யவில்லை, இது தேசத்தின் நலனுக்காகவும், இது சமூகத்திற்கும் ஒரு சேவையாகும்” என்று சந்திரபாபு நாயுடு கூறினார்.

கடந்த காலங்களில் இதேபோன்ற கவலைகளை அவர் வெளிப்படுத்தினார், ஆந்திரப் பிரதேசத்தின் மக்கள்தொகையின் சராசரி வயது தற்போது 32 ஆக உள்ளது, 2047-க்குள் அது 40 ஆக இருக்கும்.

இரண்டு குழந்தைகளுக்கு மேல் உள்ளவர்கள் உள்ளாட்சித் தேர்தலில் போட்டியிடக் கூடாது என்ற விதியை ஆகஸ்ட் 7-ம் தேதி மாநில அமைச்சரவை ரத்து செய்தது.

“நான் ஒரு காலத்தில் மக்கள்தொகைக் கட்டுப்பாட்டிற்கு ஆதரவாக இருந்தேன். இரண்டு குழந்தைகளுக்கு மேல் பெற்றவர்கள் தேர்தலில் போட்டியிடுவதைத் தடுக்கும் சட்டத்தைக் கொண்டுவந்தேன்... பெரும் மக்கள் தொகையால் தண்ணீர், நிலம் மற்றும் பிற வளங்கள் பற்றாக்குறை ஏற்படும் என்று நான் பயந்தேன். நான் சொல்வதைக் கேட்டு 10 ஆண்டுகளில் ஆந்திராவில் மக்கள் தொகையைக் குறைத்தீர்கள். இப்போது, ​​​​நம் மாநிலத்தில் போதுமான இளைஞர்கள் இல்லை என்று நான் பயப்படுகிறேன்” என்று சந்திரபாபு நாயுடு சனிக்கிழமை கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“