கூட்டணியில் விரிசல் முதல் நிர்வாகத்தில் இடைவெளி வரை... வளந்துவரும் சவால்களுக்கு மத்தியில் போராடும் ஸ்டாலின்

தமிழ்நாட்டில் சமீப ஆண்டுகளில் பல தேர்தல்களில் மகத்தான வெற்றிகளைப் பெற்ற போதிலும், மு.க. ஸ்டாலின் தலைமையிலான அரசு தற்போது தி.மு.க அமைப்பு மற்றும் கட்சி தலைமையிலான கூட்டணி முதல் மாநில நிர்வாகம் வரை பல்வேறு முனைகளில் அதிகரித்து வரும் சவால்களை எதிர்கொண்டு வருகிறது.

ஆங்கிலத்தில் படிக்க: Why CM Stalin is struggling amid growing challenges – alliance rifts to governance ‘gaps’

கடந்த வாரம், விழுப்புரத்தில் நடைபெற்ற கட்சியின் மாநில மாநாட்டின் போது, ​​சி.பி.எம் பேரணி நடத்துவதற்கு மாநில காவல்துறை அனுமதி மறுத்ததாகக் குற்றம் சாட்டி, முன்னாள் மாநில சி.பி.எம் செயலாளர் கே. பாலகிருஷ்ணன் தி.மு.க தலைமையிலான அரசாங்கத்தின் மீது கடுமையான தாக்குதலைத் தொடங்கியதைத் தொடர்ந்து ஆளும் கூட்டணிக்குள் சலசலப்பு வெடித்தது.

சி.பி.எம் மாநில மாநாட்டில் பேசிய கே. பாலகிருஷ்ணன், “முதலமைச்சர் மு.க. ஸ்டாலின், தமிழ்நாட்டில் அறிவிக்கப்படாத அவசரநிலையை அமல்படுத்தியுள்ளீர்களா?” என்று கேட்டார்.

கே. பாலகிருஷ்ணனின் கருத்துக்கள் அ.தி.மு.க, பா.ஜ.க உள்ளிட்ட எதிர்க்கட்சிகளுக்கு விமர்சனங்களை எடுத்துக் கொடுத்தது. இதைத் தொடர்ந்து தி.மு.க-வின் அதிகாரப்பூர்வ பத்திரிகையான முரசொலி, கட்சித் தலைவர் மற்றும் முதல்வர் ஸ்டாலினை அணுக முடிந்த போதிலும் அவரைத் தாக்கியதற்காக கே. பாலகிருஷ்ணனைக் கண்டித்து தலையங்க கட்டுரையை வெளியிட்டது.

இதைத் தொடர்ந்து, தி.மு.க மூத்த தலைவர் ஆ. ராசா, ஒரு நிகழ்ச்சியில், கம்யூனிஸ்ட் தலைவர்களைக் குறைகூறி, அதன் தலைவர்கள் "சுயநலவாதிகளாகவும் ஊழல்வாதிகளாகவும்" மாறியதால், கம்யூனிச சித்தாந்தம் வீழ்ச்சியடைந்ததாகக் கூறினார்.

உடனே ஆ.ராசாவைத் தாக்கி, கம்யூனிஸ்ட் தலைவர்கள் மீதான அவருடைய குற்றச்சாட்டுகள் "நியாயமற்றது மற்றும் ஆதாரமற்றது" என்று சி.பி.எம்-ன் புதிய மாநிலச் செயலாளர் பெ. சண்முகம் நிராகரித்தார். மாநிலத்தில் போராட்டங்களைக் கட்டுப்படுத்த தி.மு.க தலைமையிலான அரசாங்கம் மேற்கொண்டதாகக் கூறப்படும் முயற்சி குறித்த பாலகிருஷ்ணனின் விமர்சனத்தை பெ. சண்முகமும் எதிரொலித்தார்.

காவல்துறையின் அத்துமீறல் மற்றும் நிர்வாகக் குறைபாடுகள் போன்ற பல சம்பவங்களால் ஸ்டாலின் அரசு பாதிக்கப்பட்டுள்ளது, இவை "ஆட்சியில் முறையான இடைவெளிகளை" காட்டிக் கொடுத்ததாகக் கூறப்படுகிறது.

விழுப்புரம் (மே 2023) மற்றும் கள்ளக்குறிச்சி (ஜூன் 2024) ஆகிய இடங்களில் நடந்த சட்டவிரோத மதுபானம் குடித்து, சுமார் 70 பேர் உயிரிழந்தனர். 2022-ம் ஆண்டு பள்ளி மாணவர் ஒருவர் இறந்ததைத் தொடர்ந்து கள்ளக்குறிச்சி பேருந்து எரிப்பு சம்பவம் போன்ற பல பெரிய வன்முறை சம்பவங்களை மாநிலம் சந்தித்தது. கடந்த ஆண்டு சென்னையில், மாநில பகுஜன் சமாஜ் கட்சித் தலைவர் கே.ஆம்ஸ்ட்ராங் கொலை செய்யப்பட்டார். பின்னர், அண்ணா பல்கலைக்கழகத்தில் ஒரு மாணவி மீது பாலியல் வன்கொடுமை செய்யப்பட்டதாகக் கூறப்படும் சம்பவம் தொடர்பாக மாநிலத்தில் கடும் கோபம் நிலவியது. அதில் எஃப்.ஐ.ஆர்-ன் மொழி மற்றும் எஃப்.ஐ.ஆர் கசிவு பொதுமக்களையும் நீதித்துறையையும் கோபப்படுத்தியது.

ஆம்ஸ்ட்ராங் கொலை வழக்கு மற்றும் அண்ணா பல்கலைக்கழக பாலியல் வன்கொடுமை சம்பவம் ஆகிய இரண்டிலும் குற்றவாளிகளை போலீசார் விரைவாக கைது செய்த போதிலும், சென்னை காவல்துறை ஆணையர் ஏ. அருண்,  “ரவுடிகளுக்கு பிரியும் மொழியில் கற்றுக்கொடுப்போம்” என்று கூறியது சர்ச்சையை அதிகரித்ததாகக் கூறப்படுகிறது.

சென்னை பல்கலைக்கழகத்தின் முன்னாள் அரசியல் அறிவியல் பேராசிரியர் ராமு மணிவண்ணன், கள்ளச்சாராய உயிரிழப்புகளை "நிர்வாக ரீதியான தோல்வியின் பிரச்னை" என்று கூறினார்.  “இதை ஆளும் கட்சியிலிருந்து (தி.மு.க) பிரிக்கலாம். நிர்வாக ஊழல் இந்த துயரத்தை இவ்வளவு பெரிய அளவில் ஏற்படுத்தியது” என்று அவர் கூறினார்.  “ஆனால், ஒரு வருடம் கழித்து அதே சோகம் மீண்டும் நிகழும்போது, ​​அது அரசாங்கத்தின் தடுப்பு நடவடிக்கைகளில் கடுமையான குறைபாடுகளைக் குறிக்கிறது” என்று கூறினார்.

சென்னை காவல்துறைத் தலைவர் தொடர்பான சர்ச்சை குறித்து மணிவண்ணன் கூறியதாவது: “அவரது வரம்புக்கு அப்பால் பேசுவதற்கு யார் அனுமதித்தது? சட்டத்தின் கீழ் குற்றத்தை கையாள்வது உங்கள் வேலை. வேறு சில மொழியைப் பயன்படுத்துவதைப் பற்றி பெருமை கொள்ள வேண்டிய அவசியமில்லை. உள்துறை அமைச்சர் அத்தகைய அதிகாரிகளைக் கையாள வேண்டும், அரசியல் விளக்கங்களை வழங்க வேண்டும். குற்றம் சாட்டப்பட்டவர் உடனடியாக கைது செய்யப்பட்ட பிறகும், காவல்துறைக்கு அரசியல் விளக்கங்கள் இல்லாதது அண்ணா பல்கலைக்கழக வழக்கை அரசாங்கத்திற்கு எதிராக மாற்றியது.” என்று கூறினார்.

திருச்சி காவல் கண்காணிப்பாளர் வி. வருண் குமார் சமீபத்தில் செய்தியாளர் சந்திப்பில், நாம் தமிழர் கட்சி தலைவர் சீமான் தனக்கு எதிராக அவதூறான கருத்துக்களை தெரிவித்ததாகவும் அதற்கு அவர் பகிரங்கமாக மன்னிப்பு கேட்க வேண்டும் என்றும் கோரியதைத் தொடர்ந்து மற்றொரு சர்ச்சை வெடித்தது. இது வார்த்தைப் போரை ஏற்படுத்தியது. “சீமான் அல்லது அவரது கட்சி உறுப்பினர்கள் மீது சட்ட நடவடிக்கை எடுக்க வருணுக்கு உரிமை உண்டு. ஆனால், ஒரு பத்திரிகையாளர் சந்திப்பில் மற்றொரு அரசியல்வாதிக்கு எதிராக ஒரு அரசியல்வாதியைப் போல நீண்ட நேரம் பேச அவரை யார் அனுமதித்தார்கள்? இது காவல்துறைக்குள் ஒரு மோசமான முன்னுதாரணத்தை அமைக்கிறது, மேலும், அரசாங்கத்திற்கு பின்னடைவை ஏற்படுத்துகிறது. வருண் அல்லது அருண் போன்ற அதிகாரிகளை கட்டுப்படுத்த எந்த மேற்பார்வையும் இல்லை”என்று உள்துறை அமைச்சகத்தின் மூத்த அதிகாரி ஒருவர் கூறினார்.

கே.பொன்முடி போன்ற சில திமுக அமைச்சர்கள், நிகழ்வுகளில் "அவமானகரமான மொழியை"ப் பயன்படுத்தி அரசாங்கத்தின் நற்பெயரை "குறைத்ததாக" குற்றம் சாட்டப்படுகிறார்கள். "பயம் இல்லை. ஏதாவது தவறு நடந்தால், யாரும் பொறுப்பேற்க வேண்டியதில்லை. அதனால்தான், பல தவிர்க்கக்கூடிய துயரங்களையும் சர்ச்சைகளையும் தடுக்க நாம் தவறிவிடுகிறோம்” என்று ஒரு மூத்த அரசு செயலாளர் கூறினார்.

தி.மு.க எம்.எல்.ஏ சௌந்தரபாண்டியன் சமீபத்தில் சமூக ஊடகங்களில் பொது நிகழ்வுகளில் தன்னை "ஒதுக்கி" வைத்ததற்காகவும், உள்கட்சி அதிருப்தியை வெளிப்படுத்தி கட்சியை விமர்சித்தார்.

தூத்துக்குடியில் ஸ்டெர்லைட் எதிர்ப்பு போராட்டக்காரர்கள் மீது 2018-ம் ஆண்டு காவல்துறை துப்பாக்கிச் சூடு நடத்தியது போன்ற தீர்க்கப்படாத பிரச்னைகளை அரசாங்கத்திற்குள் உள்ள பலர் சுட்டிக்காட்டுகின்றனர். 2021 முதல் தி.மு.க ஆட்சியில் இருந்தபோதிலும், எந்த அதிகாரியும் இதற்கு பொறுப்பேற்கவில்லை.

திருநெல்வேலி அருகே உள்ள அம்பாசமுத்திரத்தில் 2023-ம் ஆண்டு ஒரு ஐ.பி.எஸ் அதிகாரி பலரின் பற்களை பிடுங்கியதாகக் கூறப்படும் காவல் சித்திரவதை சம்பவத்திற்கு அரசாங்கத்தின் "அக்கறையற்ற" பதில், சில அரசாங்க அதிகாரிகளால் "முதல்வர் ஸ்டாலினின் திருத்த நடவடிக்கைகளைச் செயல்படுத்த இயலாமையின் வழக்குகள்" என்றும் மேற்கோள் காட்டப்பட்டுள்ளது, இது "தவறான அதிகாரிகள் அல்லது கட்சி உறுப்பினர்களை பொறுப்பற்ற முறையில் செயல்படத் தூண்டியுள்ளது" என்று அவர்கள் மேலும் கூறுகின்றனர்.

பல தலைவர்களும் பார்வையாளர்களும் ஸ்டாலினின் "அணுகல் தன்மை மற்றும் பச்சாதாபம்" அவரது தனித்துவமான குணங்கள் என்று ஒப்புக்கொள்கிறார்கள். இருப்பினும், ஒரு தி.மு.க எம்.பி.,  “ஒரு முதல்வர் மிகவும் நல்லவராக மட்டும் இருப்பதால், ஆட்சியில் உள்ள முறையான இடைவெளிகளைக் குறைக்க முடியாது. முதல்வர் நிர்வாகத்தின் செயல்பாடுகளை வேகப்படுத்த வேண்டும்” என்று கூறினார்.

“எதிர்க்கட்சித் தலைவராக இருந்தபோது ஸ்டாலின், முதல்வர் ஸ்டாலினை விட வலிமையானவர். ஆனால், முதல்வர் ஸ்டாலின், மறைந்த தந்தை, முன்னாள் முதல்வர் கருணாநிதியை விட தாராள மனப்பான்மை கொண்டவர். அவர் எளிதில் அணுகக்கூடியவர், மனிதநேயம் கொண்டவர். இருப்பினும், ஒரு சிலரைத் தவிர, அவரது குணங்களைக் கொண்ட அமைச்சர்கள் அல்லது அதிகாரிகள் குழு அவரிடம் இல்லை.” என்று மணிவண்ணன் கூறினார்.

இருப்பினும், கருணாநிதியின் கீழ், திமுக தலைமையில் நெருக்கடி மேலாளர்கள் மற்றும் அனுபவம் வாய்ந்த பேச்சுவார்த்தையாளர்கள் இருந்தனர். அவர்கள் பிரச்னைகள் வளருவதற்கு முன்பே அவற்றைத் தணித்தனர். ஸ்டாலின் ஆட்சியில் இதுபோன்ற ஒரு "இடைநிலையில் செயல்படுபவர்கள்" இல்லை, இது அவரது மகன் உதயநிதி துணை முதல்வரானதன் மூலம் "மோசமடைந்துள்ளது" என்று ஒரு தி.மு.க விமர்சகர் கூறினார்.

போராட்டங்கள் இருந்தபோதிலும், மாநிலத்தில் பலவீனமான மற்றும் துண்டு துண்டான எதிர்க்கட்சியால் தி.மு.க பயனடைந்துள்ளது. இருப்பினும், தி.மு.க இப்போது வெளிப்படையாக தங்கள் அதிருப்தியை வெளிப்படுத்தும் வி.சி.க மற்றும் சி.பி.எம் போன்ற கூட்டணி கட்சிகளிடமிருந்து அதிக அளவில் கோபத்தை எதிர்கொள்கிறது.

“மு.க. ஸ்டாலின் கூட்டணிக் கட்சிகளின் நலனுக்கு முன்னுரிமை அளித்தார், உள்கட்சி எதிர்ப்பையும் மீறி 2024-ல் தி.மு.க-வின் கோட்டையான திண்டுக்கல் தொகுதியை சி.பி.எம்-க்கு விட்டுக்கொடுத்தார். ஆனாலும், சி.பி.எம் மற்றும் வி.சி.க போன்ற கூட்டணிக் கட்சிகள் அரசாங்கத்தை பகிரங்கமாகத் தாக்குகின்றன. தி.மு.க-விற்கும் கட்சி தலைமையிலான கூட்டணிக்கும் உள்ள உள் முரண்பாடு அரசாங்கத்திற்கு தீங்கு விளைவிக்கும்” என்று ஒரு மூத்த தி.மு.க தலைவர் கூறினார்.