![murder rep](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/lFxnchGDFg0FVdp7OBiZ.jpg)
தெலங்கானா தொடர் கொலை வழக்கு (புகைப்பட உதவி: அபிஷேக் மித்ரா)
தெலங்கானாவைச் சேர்ந்த ரமதி சத்தியநாராயணா ஒவ்வொரு நபருக்கும் வித்தியாசமான வேறு வேறு நபராக இருந்தார். அவரது மனைவி மற்றும் இரண்டு குழந்தைகளுக்கு, அவர் ஒரு குடும்ப மனிதராக இருந்தார். தெலங்கானாவின் நாகர்கர்னூல் மற்றும் வனபர்த்தி மாவட்டங்களில் உள்ள ரியல் எஸ்டேட் புரோக்கர்கள் அவரை ஒரு பகுதி நேர புரோக்கராக அறிந்திருந்தனர். இயற்கைக்கு அப்பாற்பட்டதை நம்புபவர்களுக்கு, அவர் ஒரு பரம்பரை மூலிகை மருத்துவர் மற்றும் புதையல் வேட்டையாடுபவர். நாகர்கர்னூல் மாவட்ட காவல்துறையைப் பொறுத்த வரையில், 47 வயது நிரம்பிய ரமதி சத்தியநாராயணா ஒரு தொடர் கொலைகாரன், நான்கு ஆண்டுகளில் மூன்று மாநிலங்களில் 11 பேரைக் கொன்றுள்ளான்.
ஆங்கிலத்தில் படிக்க: Confessions of a serial killer: How a ‘treasure-hunter’ killed 11 in 3 states
ஹைதராபாத்தைச் சேர்ந்த புதையல் வேட்டைக்காரர் கோவுலா வெங்கடேஷ் கொலை வழக்கில் டிசம்பர் 12 ஆம் தேதி சத்தியநாராயணனை போலீசார் கைது செய்தபோது, தங்கள் காவலில் இருந்த குட்டையான, மென்மையாக பேசும் நபரான சத்தியநாராயணா 2020 முதல் 10 பேரைக் கொன்றது அவர்களுக்குத் தெரியாது.
இதுகுறித்து நாகர்கர்னூல் காவல் துணைக் கண்காணிப்பாளர் (டி.எஸ்.பி) மோகன் குமார் கூறுகையில், “சத்தியநாராயணன் பாதிக்கப்பட்டவர்களின் முகத்தில் ஆசிட் ஊற்றி, அவர்களின் தலையை பாறாங்கற்களால் நசுக்க வல்லவர் என்பதை நம்புவது கடினம்,” என்று கூறினார்.
கொலையில் இருந்து இவ்வளவு நாள் எப்படி தப்பித்தார்? ஒரு போலீஸ் அதிகாரி கூறினார், "அவர் பாதிக்கப்பட்டவர்களின் நம்பிக்கையைப் பெற அவர்களின் ஆர்வமுள்ள பகுதியைப் பற்றி பேசுவார்... ரியல் எஸ்டேட், இயற்கைக்கு அப்பாற்பட்ட சக்தி, மறைக்கப்பட்ட பொக்கிஷங்கள், மூலிகை சிகிச்சைகள், அவர்கள் விரும்பும் எதையும் பற்றி பேசுவார். அவர் மிகவும் நம்பகமானவராகத் தோன்றினார், அவர்களின் முதல் சந்திப்பின் சில வாரங்கள் அல்லது மாதங்களுக்குள், பாதிக்கப்பட்டவர்கள் அவரை தனிமைப்படுத்தப்பட்ட இடத்தில் வழக்கம் இல்லாத நேரத்தில் கூட சந்திக்கத் தயங்க மாட்டார்கள்.”
தெலங்கானா மாநிலம் மகபூப்நகர் மண்டல் பகுதியில் உள்ள யெனுகொண்டா கிராமத்தைச் சேர்ந்த காய்கறி விற்பனையாளரான காஜா பாஷா (42) என்பவர் சத்தியநாராயணாவின் முதல் பலி.
டி.எஸ்.பி குமார் கூறும்போது, “தனது நிலத்தில் மண்பாண்டத் துண்டுகள் இருப்பதைக் கண்டுபிடித்த காஜா பாஷா, தனது நிலத்தின் கீழ் புதையல் புதைக்கப்பட்டிருப்பதை நம்பினார். 2020 ஆம் ஆண்டின் தொடக்கத்தில் சத்யநாராயணாவை காஜா பாஷா சந்தித்தார். அடுத்த சில மாதங்களில் அவருடைய நம்பிக்கையைப் பெற்று, அந்த புதையலின் மதிப்பு ரூ.10 லட்சத்தை விட பல மடங்கு அதிகமாக இருக்கும் என்று சத்யநாராயணா அவரை நம்பவைத்தார். சத்யநாராயணா தனது கட்டணமாக, காஜா பாஷாவை தனது பெயரில் நிலத்தை பதிவு செய்யும்படி கேட்டுக் கொண்டார்.
நிலத்தை பதிவு செய்த பிறகு, அவர் காஜா பாஷாவைத் தவிர்க்கத் தொடங்கினார். கடுமையாக விரக்தியடைந்த காஜா பாஷா காவல்துறையை அணுகுவதாக மிரட்டியபோது, சத்தியநாராயணன் ஆகஸ்ட் 13, 2020 அன்று, புதையலைக் கண்டறிவதற்கான சடங்குகளைச் செய்வதற்கான "சரியான" நேரம் என்று கூறி காஜா பாஷாவை அழைத்ததாகக் கூறப்படுகிறது.
மறுநாள் காலையில், காஜா பாஷாவின் மைத்துனர் சைது அவரது வீட்டிற்குச் சென்று பார்த்தப்போது ஒரு பயங்கரம் காத்திருந்தது: காஜா பாஷாவின் உடல் சமையலறைக்கு அருகில், கற்பூரம், எலுமிச்சை, தேங்காய், ரோஜா இதழ்கள், எரிக்கப்பட்ட தூபக் குச்சிகள், மஞ்சள் போன்றவற்றைக் கொண்டு புதிதாக தோண்டப்பட்ட சிறிய குழிக்கு அருகில் கிடந்தது. சைது பின்னர் வீட்டின் வெவ்வேறு அறைகளில் மற்றவர்களின் உடல்களையும் கண்டுபிடித்தார், காஜா பாஷாவின் மனைவி அஸ்மா பேகம், 40; காஜா பாஷாவின் மாமியார் ஹசிரபாய், 65; மற்றும் காஜா பாஷாவின் மகள் அஸ்ரின் ஹசீனா, 11.
![](https://img-cdn.thepublive.com/filters:format(webp)/indian-express-tamil/media/post_attachments/047f234e-cf0.jpg)
பாதிக்கப்பட்டவர்கள் ஹசிராபாய், அஸ்மா பேகம், காஜா பாஷா மற்றும் அஸ்ரின் ஹசீனா. (சிறப்பு ஏற்பாடு)
இதுகுறித்து வனபர்த்தி போலீஸ் அதிகாரி ஒருவர் கூறுகையில், “பணப்பிரச்சனையால் குடும்பம் தற்கொலை செய்துகொண்டதாக முதல்கட்ட கருத்து நிலவியது. இருப்பினும், எலுமிச்சை மற்றும் பிற விஷயங்கள் அமானுஷ்ய நடைமுறைகளை சுட்டிக்காட்டின. விசாரணையில் ஹசிராபாய் மற்றும் காஜா பாஷா ஆகியோர் மறைத்து வைக்கப்பட்ட புதையல் மீது மோகம் கொண்டிருந்தது தெரியவந்தது.’’ எனினும் கொலையாளி பிடிபடவில்லை.
இந்த ஆண்டு டிசம்பர் 12-ம் தேதி கைது செய்யப்பட்ட பிறகு, சத்யநாராயணா, கொலையான நான்கு பேரையும் வெவ்வேறு அறைகளில் கண்களை மூடிக்கொண்டு உட்கார வைத்ததாக கூறினார். மேலும் இது தெய்வங்களின் பிரசாதம் என்று கூறி அவர்களுக்கு விஷம் கலந்த பாலை குடிக்க கொடுத்ததாக அவர் போலீசாரிடம் கூறியதாக கூறப்படுகிறது. குடும்பத்தினர் மூச்சு விடுவதை நிறுத்திய பிறகு, சத்தியநாராயணா வீட்டை விட்டு வெளியேறினார்.
"பாதிக்கப்பட்டவர்களிடம் ரகசியமாக சத்தியம் வாங்கும் அவரது திறன் இத்தனை ஆண்டுகளில் சந்தேகத்தைத் தவிர்க்க உதவியது. அவரைப் பற்றி யாரிடமாவது கூறினால், புதையலைக் கண்டுபிடிப்பதற்கான வாய்ப்புகள் கணிசமாகக் குறையும் என்று அவர் அவர்களிடம் கூறுவார்,” என்று விசாரணையை மேற்பார்வையிட்ட ஜோகுலாம்பா கட்வால் மண்டல டி.ஐ.ஜி எல்.எஸ் சவுகான் கூறினார்.
நவம்பர் 18, 2022 அன்று வனபட்லா கிராமத்தில் விவசாயத் தொழிலாளியான வஸ்ரலா லிங்கசாமி (50) உடல் கண்டுபிடிக்கப்பட்டபோது சத்தியநாராயணா முதன்முதலில் நாகர்கர்னூல் காவல்துறையின் ரேடாரில் வந்தார். காவல்துறையின் கூற்றுப்படி, லிங்கசாமி தனது நிலத்திற்கு ஈடாக புதையலைக் கண்டுபிடிக்க சத்தியநாராயணாவைத் தொடர்பு கொண்டார். நவம்பர் 17, 2022 அன்று, அவர் லிங்கசாமியை தனிமைப்படுத்தப்பட்ட இடத்திற்கு அழைத்துச் சென்று பெரிய கல்லால் தலையில் அடித்துக் கொன்றதாகக் கூறப்படுகிறது.
![](https://img-cdn.thepublive.com/filters:format(webp)/indian-express-tamil/media/post_attachments/3a307440-537.jpg)
சத்யநாராயணா கைது செய்யப்பட்ட பிறகு. (எக்ஸ்பிரஸ்)
டி.எஸ்.பி குமார் கூறும்போது, “சத்தியநாராயணனை விசாரணைக்காக அழைத்து வந்தோம், ஆனால் லிங்கசாமியை தெரியாது என்று மறுத்தார். அவர்கள் ஒன்றாக சந்தித்துக் கொண்டதாக எங்களுக்குத் தகவல் கிடைத்தாலும், ஆதாரம் இல்லாததால் அவரை விடுவிக்க வேண்டியதாயிற்று’’ என்றார்.
புதையல் தேடும் வெறியில் இருந்த கல் வெட்டும் தொழிலாளியான கோவுல வெங்கடேஷைக் கொன்றதுதான் கடைசியில் சத்தியநாராயணாவின் கைதுக்கு வழிவகுத்தது. “வெங்கடேஷின் மனைவி கோவுல லக்ஷ்மி தனது போலீஸ் புகாரில் சத்யநாராயணாவை சந்தேக நபராகக் குறிப்பிட்டுள்ளார். முந்தைய பாதிக்கப்பட்டவர்களைப் போலல்லாமல், வெங்கடேஷ் தனது இரண்டு நண்பர்களுடன் (பி சிவா மற்றும் பி தேவேந்தர்) நாகர்கர்னூலில் உள்ள ஒரு ரியல் எஸ்டேட் வியாபாரி சத்தியநாராயணா யாதவை ஒரு நில ஒப்பந்தத்திற்காக சந்திக்கப் போவதாக தனது மனைவியிடம் கூறினார். அவரின் மனைவி சத்யநாராயணாவின் தொலைபேசி எண்ணைக் கூட குறித்துக் கொண்டார்,'' என்று சப்-இன்ஸ்பெக்டர் பி மகேந்தர் கூறினார்.
‘புதையல்’ கண்டுபிடிப்பதற்காக சத்தியநாராயணனிடம் கட்டணம் செலுத்துவதற்காக வெங்கடேஷ் ஆகஸ்ட் மாதம் ரூ.10 லட்சம் கடன் வாங்கினார். வெங்கடேஷ் அவரை வற்புறுத்தத் தொடங்கியபோது, சத்யநாராயணா செப்டம்பர் மாதம் கொல்லப்பூரில் உள்ள ஒரு இடத்திற்கு அழைத்துச் சென்று, "புதையலைக் கண்டுபிடிக்க மூன்று கர்ப்பிணிப் பெண்களை பலி கொடுக்க வேண்டும்" என்று கூறினார்.
இதனால் அதிர்ச்சியடைந்த வெங்கடேஷ் ஹைதராபாத் தப்பிச் சென்று சத்தியநாராயணாவிடம் பணத்தைத் திரும்பக் கேட்டதாக போலீஸார் தெரிவித்தனர். நவம்பர் 1ஆம் தேதி சத்தியநாராயணா, வெங்கடேஷை வேறு புதையல் இருப்பதாகக் கூறி நாகர்குர்னூலுக்கு வரவழைத்ததாகக் கூறப்படுகிறது. இருப்பிட சடங்குகளின் ஒரு பகுதியாக ஐந்து நாட்களுக்கு மறைந்து இருப்பேன் என வெங்கடேசிடம் தெரிவித்துள்ளார்.
![](https://img-cdn.thepublive.com/filters:format(webp)/indian-express-tamil/media/post_attachments/3a0c8837-aa6.jpg)
ஜி வெங்கடேஷ் ஹைதராபாத்தில் புதையல் தேடுபவர். (சிறப்பு ஏற்பாடு)
இதுகுறித்து நாகர்கர்னூல் சர்க்கிள் இன்ஸ்பெக்டர் டி விஷ்ணுவர்தன் ரெட்டி கூறுகையில், "நவம்பர் 4-ம் தேதி வெங்கடேஷ் சத்யநாராயணாவைச் சந்தித்தார். சம்பவ இடத்திற்கு செல்லும் முன் வெங்கடேஷை தனது போனை அணைக்கும்படி கூறியுள்ளார். அங்கு சத்தியநாராயணா அவருக்கு விஷம் கலந்த பாலை பிரசாதமாக வழங்கினார். வெங்கடேஷ் மயங்கி விழுந்த பிறகு, ஜலால்பூர் கிராமத்தின் புறநகரில் உள்ள வெறிச்சோடிய குன்றுக்கு காரில் கொண்டுச் சென்றுள்ளார். சற்றும் விழிப்புணர்வு இல்லாத வெங்கடேசனை சட்டையைக் கழற்றிவிட்டு, கண்களை மூடிக்கொண்டு உட்காரச் சொன்னார். வெங்கடேஷை வாயைத் திறக்கச் சொல்லி, முகம் முழுவதும் ஆசிட்டை ஊற்றினார். வீடு திரும்பும் முன் வெங்கடேஷின் சட்டை, பணப்பை மற்றும் அடையாள அட்டைகளை வெவ்வேறு இடங்களில் வீசியுள்ளார்.
கணவனை தொடர்பு கொள்ள முடியாததால், சத்யநாராயணாவுக்கு போன் செய்தார் வெங்கடேஷ் மனைவி லக்ஷ்மி, இதனால் முதலில் ஆச்சரியமடைந்தாலும் தெரியாதது போல் காட்டிக் கொண்டுள்ளார். வெங்கடேஷின் நண்பர்கள் சத்தியநாராயணாவின் வீட்டைக் கண்டுபிடித்த பிறகு, நவம்பர் 26 அன்று லக்ஷ்மி, அவரது மாமா இ கொண்டலையா மற்றும் நண்பர்கள் இருவரும் அவரை சந்திக்கச் சென்றனர்.
கொண்டலையா தி இந்தியன் எக்ஸ்பிரஸ்ஸிடம், “வெங்கடேஷை தனக்குத் தெரியாது என்று அவர் கூறினார். வெங்கடேஷ் பயன்படுத்திய மற்றொரு போனில் இருந்து வந்த அழைப்புகளையும், சத்யநாராயணாவுக்கு ரூ.6.50 லட்சம் பணப் பரிமாற்றம் செய்ததாகக் காட்டும் மின் ரசீதையும் அவரிடம் காட்டியபோது, அவரது பதில்கள் மிகவும் தெளிவற்றதாக இருந்தது. ஏதோ தவறு இருப்பதாக உணர்ந்த நாங்கள், போலீசில் புகார் செய்தோம். எங்கள் மோசமான அச்சங்கள் இறுதியில் உண்மையாகின.” என்று கூறினார்.
சத்தியநாராயணாவின் மற்ற பாதிக்கப்பட்டவர்களில் ஒரு தந்தை-மகள் (பீம் ராம் ரெட்டி, 70, நாகர்கர்னூல் மாவட்டத்தில் உள்ள திகலப்பள்ளி கிராமத்தைச் சேர்ந்த விவசாயி மற்றும் ஹைதராபாத்தில் வசித்து வந்த அவரது மகள் திருப்பத்தம்மா, 42); நாகர்கர்னூல் மண்டலம் எண்டபெட்லா கிராமத்தைச் சேர்ந்த விவசாயத் தொழிலாளி முகமது சலீம் பாஷா, 38; கொல்லப்பூர் மண்டலம் முக்கிடிகுண்டம் கிராமத்தைச் சேர்ந்த விவசாயி அரேப்பள்ளி சீனிவாசலு, 52; கல்வகுர்த்தி மண்டல் திம்மராசிப்பள்ளி கிராமத்தைச் சேர்ந்தவர் சம்பாதி ஸ்ரீதர் ரெட்டி, 43. மற்றும் ரமதி சத்தியநாராயண யாதவ். அவர்கள் அனைவரும் சத்தியநாராயணனின் புதையல் வேட்டையாடும் வாக்குறுதியில் விழுந்ததாக போலீசார் தெரிவித்தனர்.
![](https://img-cdn.thepublive.com/filters:format(webp)/indian-express-tamil/media/post_attachments/f4b8b154-5fb.jpg)
ஆந்திர மாநிலம் அனந்தபூர் மாவட்டத்தில் உள்ள வெறிச்சோடிய தாபாவின் குளியலறையில் 70 வயதான பீம் ராம் ரெட்டியின் உடல் கண்டெடுக்கப்பட்டது. (எக்ஸ்பிரஸ்)
ஆனால் சாதாரண புரோக்கரான சத்தியநாராயணனால் எப்படி பலரை ஏமாற்ற முடிந்தது?
அதிகாரி ஒருவர் கூறும்போது, “புதையல் வேட்டை என்பது ஒரு அடிமைத்தனம் மற்றும் ஆவேசம் என்று சத்தியநாராயணன் எங்களிடம் கூறினார். அதிகம் படிக்கவில்லை என்றாலும், அந்த ஆவேசத்தைப் பயன்படுத்திக் கொள்ளும் அளவுக்கு புத்திசாலியாக இருந்தார்”
நாகர்கர்னூல், கொல்லப்பூர் மற்றும் கல்வகுர்த்தி ஆகிய இடங்களில் கொலைகள் நடந்தாலும் யாரும் புள்ளிகளை இணைக்காதது குறித்து அதிகாரி ஒருவர் கூறுகையில், “சத்தியநாராயணன் பாதிக்கப்பட்டவர்களிடம் ரகசியமாக வைத்திருக்க சத்தியம் வாங்கிக் கொள்வார். அதனால்தான் அவரது வாக்குமூலத்திற்கு முன் யாரும் தொடர்பு கொள்ளவில்லை. அவர் வெவ்வேறு சிம் கார்டுகளையும் பயன்படுத்தினார்.”
டி.ஐ.ஜி சௌஹான் கூறுகையில், “சத்தியநாராயணனைச் சுற்றி மூலிகைகள், பெரும்பாலும் போலி மற்றும் தூபக் குச்சிகள் இருக்கும், ஏனெனில் அவர் ஏமாற்றப்பட்டவர்களிடம் பணம் செலுத்தும்படி சமாதானப்படுத்தினார். புதையலை எவ்வாறு கண்டுபிடிப்பது என்பது குறித்த துப்புகளைக் கொடுத்ததாகக் கூறி, பல்வேறு தெய்வங்களின் பெயர்களை அவர் அழைப்பார். அவர் பாதிக்கப்பட்டவர்களை சரியான நாள் வரை காத்திருக்கச் சொல்வார்.”
சர்க்கிள் இன்ஸ்பெக்டர் ரெட்டி மேலும் கூறுகையில், “பொதுவாக அவர்கள் கொலை செய்யப்பட்ட நாளே சரியான நாள்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.