மீண்டும் ஆட்சி அமைப்போம் என்ற நம்பிக்கை; 100 நாள் செயல் திட்டத்தை உருவாக்கிய மத்திய அமைச்சரவை

Harikishan Sharma

லோக்சபா தேர்தல் அட்டவணை அறிவிக்கப்படுவதற்கு முன், புதுதில்லியில் கடைசியாகக் கூடிய மத்திய அமைச்சர்கள் குழு, தொடர்ந்து மூன்றாவது முறையாக ஆளும் கூட்டணி மீண்டும் ஆட்சிக்கு வரும் என்ற நம்பிக்கையில், தேர்தலுக்குப் பிறகு புதிய அரசால் செயல்படுத்தப்படும் 100 நாள் செயல் திட்டம் குறித்து ஆலோசித்தது.

ஆங்கிலத்தில் படிக்க: Confident of return, Council of Ministers readies 100-day action plan after Lok Sabha polls

பிரதமர் நரேந்திர மோடி தலைமையில் நடைபெற்ற மத்திய அமைச்சர்கள் குழுவின் நாள் முழுவதும் நடைபெற்ற கூட்டத்தில், விக்சித் பாரத் 2047க்கான தொலைநோக்கு ஆவணம் மற்றும் அடுத்த ஐந்தாண்டுகளுக்கான விரிவான செயல் திட்டம் குறித்து செயலர்கள் விளக்கமளித்தனர்.

இந்த விளக்கக்காட்சிகளில், விக்சித் பாரதத்துக்கான பிரதமரின் தொலைநோக்குப் பார்வை கோடிட்டுக் காட்டப்பட்டது, இதில் பூஜ்ஜிய வறுமை, ஒவ்வொரு இளைஞருக்கும் திறமை மற்றும் 100 சதவீத நலத்திட்டங்கள் ஆகியவை அடங்கும் என்று அடிக்கோடிட்டுக் காட்டியது.

"தேர்தலின் போது நாட்டின் எதிர்கால வரைபடத்தை தயாரிப்பதில் உழைக்க வேண்டும்... நீங்கள் விடுமுறையில் இருப்பதாக நினைக்காதீர்கள், வேலையில் இறங்குங்கள்" என்று உயர் அதிகாரிகளிடம் மோடி கூறியுள்ளார்.

”விக்சித் பாரத் திட்டமானது இரண்டு ஆண்டுகளுக்கும் மேலான தீவிர தயாரிப்பின் விளைவாகும். இது அனைத்து அமைச்சகங்கள் மற்றும் மாநில அரசுகள், கல்வியாளர்கள், தொழில் அமைப்புகள், சிவில் சமூகம், அறிவியல் அமைப்புகள் மற்றும் அவர்களின் யோசனைகள், பரிந்துரைகள் மற்றும் உள்ளீடுகளை பெற இளைஞர்களை அணிதிரட்டல் ஆகியவற்றுடன் பரந்த அளவிலான ஆலோசனைகளை உள்ளடக்கிய ஒரு முழு-அரசாங்க அணுகுமுறையையும் உள்ளடக்கியது. 2700க்கும் மேற்பட்ட கூட்டங்கள், பட்டறைகள் மற்றும் கருத்தரங்குகள் பல்வேறு நிலைகளில் நடத்தப்பட்டன. 20 லட்சத்துக்கும் அதிகமான இளைஞர்களின் ஆலோசனைகள் பெறப்பட்டன” என்று வட்டாரங்கள் தெரிவித்தன.

விக்சித் பாரத் திட்ட வரைபடம், "தெளிவாக வெளிப்படுத்தப்பட்ட தேசிய பார்வை, அபிலாஷைகள், இலக்குகள் மற்றும் செயல் புள்ளிகளுடன் கூடிய விரிவான வரைபடத்தைக் கொண்டுள்ளது" என்று ஆதாரங்கள் கூறுகின்றன.

இலக்குகளில் பொருளாதார வளர்ச்சி, நிலையான வளர்ச்சி இலக்குகள் (SDGs), எளிதாக வாழ்வது, எளிதாக வணிகம் செய்வது, உள்கட்டமைப்பு மற்றும் சமூக நலன் ஆகியவை அடங்கும்.

"உடனடி நடவடிக்கைகளுக்கான" 100 நாள் நிகழ்ச்சி நிரலும் மே மாதம் புதிய அரசாங்கம் உருவான பிறகு விரைவாக செயல்படுத்தப்படும் என்று அந்த வட்டாரங்கள் தெரிவித்தன.

இந்தியத் தேர்தல் ஆணையம் வரும் நாட்களில் மக்களவைத் தேர்தலுக்கான அட்டவணையை வெளியிடும் என்று எதிர்பார்க்கப்படும் நேரத்தில் அமைச்சரவை குழு அதன் கூட்டத்தை நடத்தியது, மேலும் கட்சிகள் தேர்தல் அறிக்கைகள், பிரச்சாரத் திட்டங்கள் மற்றும் வேட்பாளர் பட்டியல்களில் வேலை செய்து வருகின்றன.

மாநிலங்கள் மற்றும் யூனியன் பிரதேசங்களில் உள்ள 195 இடங்களுக்கான வேட்பாளர்களின் முதல் பட்டியலை பா.ஜ.க சனிக்கிழமை வெளியிட்டது.

ஏற்கனவே மாநிலங்களுக்கு சுற்றுப்பயணம் செய்து வரும் பிரதமர் மோடி, தெலுங்கானா, தமிழ்நாடு, ஒடிசா, மேற்கு வங்கம், பீகார் ஆகிய மாநிலங்களுக்கு மார்ச் 4-6 தேதிகளில் சுற்றுப்பயணம் மேற்கொள்ள உள்ளார்.

தெலுங்கானாவில், அடிலாபாத்தில், 56,000 கோடி ரூபாய் மதிப்பிலான திட்டங்களுக்கு, பிரதமர் துவக்கி வைத்து அடிக்கல் நாட்டுவார். சங்கரெட்டியில் ரூ.6,800 கோடி மதிப்பிலான திட்டப்பணிகளை தொடங்கி வைத்து அடிக்கல் நாட்டுகிறார்.

ஐதராபாத்தில், சிவில் ஏவியேஷன் ஆராய்ச்சி அமைப்பை (CARO) மோடி திறந்து வைக்கிறார். தமிழ்நாட்டில், கல்பாக்கத்தில் உள்ள உள்நாட்டு முன்மாதிரி வேகப் பெருக்கி அணு உலையின் மைய ஏற்றுதல் தொடக்கத்தை அவர் நேரில் காணவுள்ளார்.

ஒடிசாவில், சண்டிகோலேயில் ரூ.19,600 கோடி மதிப்பிலான பல வளர்ச்சித் திட்டங்களுக்கு மோடி அடிக்கல் நாட்டுகிறார்.

கொல்கத்தாவில் ரூ.15,400 கோடி மதிப்பிலான பல இணைப்புத் திட்டங்களுக்கும், பீகாரில் உள்ள பெட்டியாவில் ரூ.12,800 கோடி மதிப்பிலான உள்கட்டமைப்புத் திட்டங்களுக்கும் அவர் தொடக்கி வைத்து அடிக்கல் நாட்டுவார். அவர் முசாபர்பூர்-மோதிஹாரி எல்.பி.ஜி பைப்லைனையும் திறந்து வைப்பார் மற்றும் மோதிஹாரியில் உள்ள இந்தியன் ஆயில் எல்.பி.ஜி பாட்டில் ஆலை மற்றும் சேமிப்பு முனையத்தை நாட்டுக்கு அர்ப்பணிக்கிறார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“