scorecardresearch

காங்கிரஸ், எதிர்க்கட்சிகள் இணைந்து பா.ஜ.க-ஆர்.எஸ்.எஸ் சித்தாந்தத்தை தோற்கடிப்போம்: ராகுல் காந்தி

பா.ஜ.க அரசு வெறுப்பு, கோபம் மற்றும் பயத்தை பரப்புவதாகவும், இரு தொழிலதிபர்களுக்கு நன்மைகளை வழங்குவதற்காக செயல்படுவதாகவும் ராகுல் காந்தி குற்றச்சாட்டு

காங்கிரஸ், எதிர்க்கட்சிகள் இணைந்து பா.ஜ.க-ஆர்.எஸ்.எஸ் சித்தாந்தத்தை தோற்கடிப்போம்: ராகுல் காந்தி

Manoj C G , Abhinav Rajput

அடுத்த வாரம் நாடு தழுவிய பாரத் ஜோடோ (ஒற்றுமை இந்தியா) யாத்திரை தொடங்க உள்ளது, காங்கிரஸ் மூத்த தலைவர் ராகுல் காந்தி ஞாயிற்றுக்கிழமை, மக்களிடம் நேரடியாகச் செல்வதைத் தவிர காங்கிரஸ் கட்சிக்கு முன், வேறு வழியில்லை என்றார். நாடாளுமன்றத்தில் எதிர்க்கட்சிகளின் குரலை அரசாங்கம் நசுக்கி, இரண்டு தொழிலதிபர்கள் மூலம் ஊடகங்களைக் கட்டுப்படுத்தி, இந்திய நிறுவனங்களைத் தாக்கி அழுத்தம் கொடுத்ததே இதற்குக் காரணம் என்று காங்கிரஸ் தலைவர் கூறினார்.

தலைநகர் ராம்லீலா மைதானத்தில் நடைபெற்ற காங்கிரஸின் மெஹங்காய் பர் ஹல்லா போல் பேரணியில் உரையாற்றிய ராகுல் காந்தி, பழக்கமான ஸ்கிரிப்டைப் பின்பற்றி தனது பிரதான விஷயங்கள் குறித்து பேசினார். அவரது முந்தைய உரைகளை பிரதிபலிக்கும் வகையில், பா.ஜ.க அரசாங்கம் “வெறுப்பு, கோபம் மற்றும் பயத்தை” பரப்புவதாகக் குற்றம் சாட்டினார், “இரண்டு தொழிலதிபர்களுக்கு” நன்மைகளை வழங்குவதற்காக அரசாங்கம் செயல்படுவதாகக் குற்றம் சாட்டினார், மேலும் சி.பி.ஐ, அமலாக்கத்துறை மற்றும் வருமான வரித்துறை போன்ற ஏஜென்சிகள் பிரதமருக்கு எதிராக பேசுபவர்களை குறிவைக்க பயன்படுத்தப்படுவதாகக் கூறினார்.

இதையும் படியுங்கள்: டாடா சன்ஸ் முன்னாள் தலைவர் சைரஸ் மிஸ்திரி கார் விபத்தில் மரணம்

இது சித்தாந்தங்களுக்கு இடையிலான போர் என்று வாதிட்ட ராகுல் காந்தி, காங்கிரஸ் கட்சியும் மற்ற எதிர்க்கட்சிகளும் இணைந்து பா.ஜ.க மற்றும் ஆர்.எஸ்.எஸ் சித்தாந்தத்தை முறியடிப்போம் என்று குறிப்பிட்டார்.

“எங்களுக்கான எல்லா வழிகளையும் அரசாங்கம் அடைத்து விட்டது. பாராளுமன்றத்தின் பாதை எங்களுக்கு அடைக்கப்பட்டுள்ளது. காங்கிரஸ் கட்சியும், எதிர்க்கட்சிகளும் நாடாளுமன்றத்தில் பேச முடியாது. எங்கள் மைக்குகள் அணைக்கப்பட்டுள்ளன. சீனத் தாக்குதல், வேலையில்லாத் திண்டாட்டம் அல்லது விலைவாசி உயர்வு என எந்தப் பிரச்சினையிலும் நாம் பேச முடியாது. நமது நிறுவனங்களான ஊடகங்கள், தேர்தல் ஆணையம் அல்லது நீதித்துறை ஆகியவை தாக்குதலுக்கும் அழுத்தத்திற்கும் உள்ளாகின்றன. அதனால், எங்களுக்கு எல்லா வழிகளும் அடைக்கப்பட்டுள்ளன. ஒரே ஒரு பாதைதான் நமக்கு திறந்திருக்கிறது. மேலும் அந்த பாதையை நாங்கள் மிகவும் விரும்புகிறோம். மக்களிடம் நேரடியாகச் சென்று நாட்டைப் பற்றிய உண்மையைச் சொல்லுங்கள்” என்று ராகுல் காந்தி கூறினார்.

“அவர்கள் மனதில் உள்ளதைக் கேட்டு ஆழமாகப் புரிந்து கொள்ளுங்கள். அதனால்தான் காங்கிரஸ் கட்சி பாரத் ஜோடோ யாத்திரையை மேற்கொள்கிறது. இது சித்தாந்தத்தின் போர். மேலும் காங்கிரஸ் கட்சியின் சித்தாந்தம் மற்றும் நமது அனைத்து எதிர்க்கட்சிகளும் ஒன்று சேர்ந்து பா.ஜ.க மற்றும் ஆர்.எஸ்.எஸ் கொள்கைகளை முறியடிப்போம்’’ என்று ராகுல் காந்தி கூறினார்.

மத்தியில் பா.ஜ.க ஆட்சிக்கு வந்ததில் இருந்தே வெறுப்பும் கோபமும் அதிகரித்து வருவதாக ராகுல் காந்தி கூறினார். “பயந்து” இருப்பவர்கள் வெறுப்பை அடைகிறார்கள் என்று அவர் கூறினார். “எனவே வெறுப்பு என்பது பயத்தின் மற்றொரு வடிவம்… இந்தியாவில் வெறுப்பு அதிகரித்து வருகிறது என்று நாம் கூறும்போது.. அதை வேறு விதமாகச் சொல்லலாம்… இந்தியாவில் பயம் அதிகரித்து வருகிறது. எதிர்கால பயம், விலைவாசி உயர்வு பயம், வேலையில்லா திண்டாட்டம்… அதனால்தான் இந்தியாவில் வெறுப்பு அதிகரித்து வருகிறது, வெறுப்பால் என்ன நடக்கிறது. வெறுப்பு மக்களைப் பிளவுபடுத்துகிறது, நாட்டையும் பலவீனப்படுத்துகிறது,” என்று கூறினார்.

“பா.ஜ.க மற்றும் ஆர்.எஸ்.எஸ் தலைவர்கள் நாட்டை பிளவுபடுத்தி, வேண்டுமென்றே அச்சச்சூழலை உருவாக்குகிறார்கள். அவர்கள் மக்களை பயமுறுத்துகிறார்கள், வெறுப்பை உருவாக்குகிறார்கள். எதற்காக செய்கிறார்கள், யாருக்காக செய்கிறார்கள்? இந்த வெறுப்பால் யாருக்கு லாபம்? இந்த வெறுப்பாலும் பயத்தாலும் ஏழைகள் பயனடைகிறார்களா? ஏழைகள், விவசாயிகள், தொழிலாளிகள் மற்றும் சிறு கடைக்காரர்களுக்கு நரேந்திர மோடி அரசு என்ன பயன் அளித்துள்ளது? இந்த வெறுப்பு மற்றும் பயத்தின் முழு பலனையும் இரண்டு தொழிலதிபர்கள் அறுவடை செய்து வருகின்றனர். மற்ற தொழிலதிபர்கள் கூட கடந்த எட்டு ஆண்டுகளில் தங்களுக்கு எந்த பலனும் கிடைக்கவில்லை என்று கூறுவார்கள்.”

“இரண்டு பேர் மட்டுமே பயனடைகிறார்கள். விமான நிலையம், துறைமுகம், சாலைகள்… எல்லாமே… செல்போன், எண்ணெய் என எல்லாமே இரண்டு பேர் கைகளுக்குப் போகிறது. ஊடகங்கள் நாட்டை பயமுறுத்துகின்றன, வெறுப்பை உருவாக்குகின்றன. மேலும் இந்த இரண்டு பேருக்கும் அனைத்து சலுகைகளையும் பா.ஜ.க தருகிறது,” என்று ராகுல் காந்தி கூறினார்.

“தொலைக்காட்சி இரண்டு தொழிலதிபர்களுக்கு சொந்தமானது, செய்தித்தாள் இரண்டு தொழிலதிபர்களுக்கு சொந்தமானது… மேலும் இந்த இரண்டு தொழிலதிபர்களும் மோடிக்காக 24 மணிநேரமும் உழைக்கிறார்கள், மோடி இந்த இரண்டு தொழிலதிபர்களுக்காக 24 மணிநேரமும் உழைக்கிறார்… (நாட்டின் ஒட்டுமொத்த செல்வம் இந்த இரு தொழிலதிபர்களின் கைகளில் உள்ளது) ஒரு பக்கம் அவர்கள் ஊடகங்களைக் கட்டுப்படுத்துகிறார்கள், மறுபுறம் அவர்கள் பிரதமரைக் கட்டுப்படுத்துகிறார்கள். நரேந்திர மோடி பிரதமர்… ஆனால் என்னால் சொல்ல முடியும்… அந்த இரு தொழிலதிபர்களின் ஆதரவு இல்லாமல் மோடி பிரதமராக இருக்க முடியாது. ஊடகங்களின் ஆதரவு இல்லாமல் மோடி பிரதமராக இருக்க முடியாது,” என்று ராகுல் காந்தி கூறினார்.

பாரம்பரியமாக வேலை வாய்ப்புகளை உருவாக்கி வந்த சிறு மற்றும் நடுத்தர நிறுவனங்களின் முதுகை அரசாங்கம் உடைத்துள்ளதால், நாடு விரும்பினாலும் இப்போது வேலைகளை உருவாக்க முடியாது என்று காங்கிரஸ் தலைவர் ராகுல் காந்தி கூறினார். மேலும், வேலையில்லா திண்டாட்டம் இன்னும் அதிகரிக்கும் என்றும் அவர் கூறினார்.

எரிபொருள் மற்றும் உணவுப் பொருட்களின் விலை உயர்வு குறித்து மத்திய அரசை ராகுல் காந்தி கடுமையாக சாடினார். 2014 முதல் தற்போது வரையிலான பெட்ரோலியம் விலைகள் மற்றும் சில அத்தியாவசிய உணவுப் பொருட்களின் விலைகளை ஒப்பிடும் புள்ளிவிவரங்களை ராகுல் காந்தி வெளியிட்டார். மேலும், “ஒருபுறம் நீங்கள் வேலையில்லாத் திண்டாட்டத்தால் பாதிக்கப்பட்டுள்ளீர்கள், மறுபுறம் விலைவாசி உயர்வால் நீங்கள் பாதிக்கப்படுகிறீர்கள்… இந்தியாவில் இதுபோன்ற விலைவாசி உயர்வைக் கண்டதில்லை. கடந்த 70 ஆண்டுகளில் காங்கிரஸ் என்ன செய்தது என்று மோடி கூறுகிறார்… 70 ஆண்டுகளில் இவ்வளவு அதிக விலையை நாட்டிற்கு காங்கிரஸ் கொடுக்கவில்லை,” என்று ராகுல் காந்தி கூறினார்.

“சாமானியர்கள் பெரும் சிரமங்களை எதிர்கொள்கின்றனர், எதிர்க்கட்சிகள் இந்த பிரச்சனைகளை பாராளுமன்றத்தில் எழுப்ப நினைக்கும் போது… மோடியும் அவரது அரசும் எதிர்க்கட்சிகளை பாராளுமன்றத்தில் பேச அனுமதிக்கவில்லை… ஊடகங்கள்.. அவர்களின் வேலை மக்கள் பிரச்சனைகளை முன்னிலைப்படுத்துவது, ஆனால் அவர்கள் தங்கள் வேலையைச் செய்வதில்லை… ஊடகங்கள் அந்த இரு தொழிலதிபர்களுடையது.. முழு ஊடகமும் அவர்களின் கைகளில் உள்ளது… அப்படியானால் (நாம்) உண்மையைப் பார்ப்பது மற்றும் கேட்பது எப்படி… மக்களுக்கு எல்லாம் தெரியும், ”என்று ராகுல் காந்தி கூறினார்.

நேஷனல் ஹெரால்டு வழக்கில் தனக்கு இருந்ததாகக் கூறப்படும் பங்கு தொடர்பாக அமலாக்க இயக்குனரகத்தில் ஐந்து நாட்களாக எதிர்கொண்ட கேள்விகள் குறித்தும் ராகுல் காந்தி பேசினார்.

“நான் 55 மணி நேரம் அமலாக்கத்துறையால் உட்கார வைக்கப்பட்டேன். ஆனால் நரேந்திர மோடிக்கு நான் ஒன்றைச் சொல்ல விரும்புகிறேன். உங்கள் அமலாக்கத்துறைக்கு நான் பயப்படவில்லை. அது எனக்கு முக்கியமில்லை. நீங்கள் அதை 55 மணி நேரம், 100 மணி நேரம், 200 மணி நேரம், 500 மணி நேரம், 5 ஆண்டுகள் எடுத்துக் கொள்ளுங்கள்… இது எனக்கு முக்கியமில்லை. நமது நாட்டின் ஆன்மாவாக விளங்கும் நமது அரசியலமைப்புச் சட்டத்தைப் பாதுகாக்கவும், காப்பாற்றவும் ஒவ்வொரு இந்தியனும் முன்வர வேண்டும்… அதைச் செய்யாவிட்டால், இன்று நாம் எழுந்து நிற்கவில்லை என்றால்… நாடு நிலைக்காது,” என்று ராகுல் காந்தி கூறினார்.

“இந்த நாடு அரசியலமைப்பு, நாடு மக்களின் குரல், நாடு மக்களின் எதிர்காலம்.. இந்த நாடு இரண்டு தொழிலதிபர்களுக்கு சொந்தமானது அல்ல… இந்த நாடு ஏழைகளின் நாடு. இன்று, இரண்டு இந்தியாக்கள் உள்ளன. தொழிலாளர்கள், ஏழைகள், விவசாயிகள் மற்றும் வேலையற்ற இளைஞர்களை கொண்ட ஒன்று. அந்த நாட்டில்…யாரும் கனவு காண முடியாது…உங்களுக்கு வேலை கிடைக்காது… உங்கள் குழந்தைகளை கல்லூரி மற்றும் பல்கலைகழகங்களுக்கு அனுப்ப முடியாது… உழைத்தாலும் எதுவும் கிடைக்காது. மற்றுமொரு இந்தியா உள்ளது… 10-15 தொழிலதிபர்களைக் கொண்ட இந்தியா… இங்கு நீங்கள் கனவு காண சுதந்திரமாக இருக்கிறீர்கள்… நீங்கள் எதை வேண்டுமானாலும் பெறுவீர்கள். இந்த இரு நாடுகளுக்கும் இடையேதான் சண்டை” என்று ராகுல் காந்தி கூறினார்.

”நாட்டைப் பிரித்து, குறிப்பிட்ட சிலருக்கு அனைத்து நன்மைகளையும் வழங்குவது மோடியின் சித்தாந்தம். நாடு அனைவருக்கும் சொந்தமானது என்பதே எங்கள் சித்தாந்தம். மேலும் தங்களின் ரத்தத்தையும் வியர்வையும் கொடுக்கும் மக்கள்… இதன் பலன் வெறும் இரண்டு தொழிலதிபர்களுக்கு போய்விடக்கூடாது.. பலன் விவசாயிகள், ஏழை தொழிலாளர்கள் மற்றும் வேலையில்லா இளைஞர்களுக்குச் சேர வேண்டும். அதுதான் வித்தியாசம்,” என்று ராகுல் காந்தி கூறினார்.

ஐக்கிய முற்போக்குக் கூட்டணி அரசு 27 கோடி மக்களை வறுமையில் இருந்து மீட்டுள்ளது என்று வாதிட்ட ராகுல் காந்தி, கடந்த 8 ஆண்டுகளில் மோடி அரசு அவர்களில் 23 கோடி பேரை மீண்டும் வறுமையில் தள்ளியுள்ளது என்று கூறினார். மேலும், புதிய இந்தியா, முன்னேற்றம், மேக் இன் இந்தியா. இந்தியா மாறிவிட்டது என்று மோடி கூறுகிறார். மோடி இந்தியாவை திரும்ப அழைத்து வருகிறார். அவர் வெறுப்பையும் பயத்தையும் பரப்புகிறார், அது இந்தியாவுக்கு பயனளிக்காது. அது இந்தியாவின் எதிரிகளுக்கு பலன் தரும்.. சீனாவுக்கும் பாகிஸ்தானுக்கும் பலன் தரும்.. இந்தியாவில் எவ்வளவு வெறுப்பு, கோபம், பயம் அதிகரிக்கிறதோ… அந்த அளவுக்கு இந்தியா பலவீனமடையும். மேலும் மோடி கடந்த எட்டு ஆண்டுகளில் இந்தியாவை பலவீனப்படுத்தியுள்ளார்,” என்றும் ராகுல் காந்தி கூறினார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil

Stay updated with the latest news headlines and all the latest India news download Indian Express Tamil App.

Web Title: Congress rally defeat bjp rss ideology rahul gandhi