'மோடி ஆம் ஆத்மியை நசுக்கவே விரும்புகிறார்': அரவிந்த் கெஜ்ரிவால் பேச்சு

Arvind Kejriwal: டெல்லி மதுபானக் கொள்கையுடன் தொடர்புடைய பணமோசடி வழக்கில், டெல்லி முதலமைச்சரும் ஆம் ஆத்மி கட்சித் (ஏ.ஏ.பி) தலைவருமான அரவிந்த் கெஜ்ரிவால் அமலாக்கத்துறையினரால் கடந்த மார்ச் 21 ஆம் தேதி கைது செய்யப்பட்டார். அவர் டெல்லி திகார் சிறையில் நீதிமன்ற காவலில் இருந்த நிலையில், அவருக்கு நேற்று வெள்ளிக்கிழமை உச்சநீதிமன்றம் இடைக்கால ஜாமீன் வழங்கியது.

திகார் சிறையில் இருந்து வெளியேவந்த மறுநாள், இன்று சனிக்கிழமை முதல்வர் அரவிந்த் கெஜ்ரிவால் செய்தியாளர்களை சந்தித்துப் பேசினார். அப்போது அவர், மோடி ஆம் ஆத்மி கட்சியை நசுக்க விரும்புகிறார் என்றும், அவருக்கு ஒரு தேசம், ஒரே தலைவர் என்ற ஆபத்தான மிஷன் உள்ளது என்றும் அவர் தெரிவித்தார். 

ஆங்கிலத்தில் படிக்கவும்: Not Modi, but INDIA bloc will form govt after June 4, says Delhi CM, day after walking out of jail

டெல்லி  முதல்வர் அரவிந்த் கெஜ்ரிவால் செய்தியாளர் சந்திப்பில் பேசியது பின்வருமாறு:- 

மோடி எங்களை நசுக்க விரும்புகிறார். ஆம் ஆத்மி கட்சி மட்டுமே நாட்டிற்கு பிரகாசமான எதிர்காலத்தை கொடுக்கப் போகிறது என்பதும் அவருக்குத் தெரியும். 

அவர்கள் (பா.ஜ.க) என்னை சிறைக்கு அனுப்பினார்கள், ஊழலுக்கு எதிராகப் போராடுவதாக பிரதமர் கூறுகிறார். அவர்கள் (பா.ஜ.க) தங்கள் கட்சியில் உள்ள அனைத்து ஊழல்வாதிகளையும் வரவேற்றுள்ளனர். நீங்கள் ஊழலை எதிர்த்துப் போராட விரும்பினால், அரவிந்த் கெஜ்ரிவாலிடம் கற்றுக்கொள்ளுங்கள். 

மோடிக்கு மிகவும் ஆபத்தான மிஷன் உள்ளது. அதுதான் 'ஒரே நாடு ஒரே தலைவர்'. அனைத்து எதிர்க்கட்சித் தலைவர்களையும் சிறைக்கு அனுப்புவார்கள். மற்ற அனைத்து பா.ஜ.க தலைவர்களையும் நிர்வகிப்பார்கள், அவர்களை குறைத்து மதிப்பிடுவார்கள்.

தேர்தலில் வெற்றி பெற்றால், இன்னும் 2 மாதங்களில் உ.பி., முதல்வர் யோகி ஆதித்யநாத்தை மாற்றி விடுவார்கள். அவர்கள் தங்கள் கட்சியில் உள்ள அனைத்து பிரபலமான தலைவர்களின் அரசியல் வாழ்க்கையையும் முடிவுக்கு கொண்டுவர முயன்றுள்ளனர். வசுந்தரா ராஜே, சிவராஜ் சௌஹான் போன்றவர்கள் தான் அதற்கு சிறந்த உதாரணம். 

உங்கள் பிரதமர் யார்? என்று நான் பா.ஜ.க-விடம் கேட்க விரும்புகிறேன். வரும் செப்டம்பருடன் மோடிக்கு 75 வயதாகிறது. 75 வயது நிரம்பியவர்கள் ஓய்வு பெற வேண்டும் என்ற விதியை வகுத்தவரே அவர் தான். அதனால், அவர் அடுத்த ஆண்டு ஓய்வு பெற வேண்டும். எனவே, நான் பாஜகவிடம் கேட்கிறேன், உங்கள் பிரதமர் யார்?. 

மோடியின் உத்தரவாதத்தை யார் நிறைவேற்றுவார்கள்? அதை அமித் ஷா நிறைவேற்றுவாரா? நீங்கள் வாக்களிக்க வெளியே செல்லும்போது நினைவில் கொள்ளுங்கள், நீங்கள் அமித் ஷாவுக்கு வாக்களிக்கவில்லை, மோடிக்கு அல்ல.

ஜூன் 4-ம் தேதி பா.ஜ.க ஆட்சி அமைக்காது என்பது எனது கணிப்பு. பா.ஜ.க 220-230 இடங்களைப் பெறும் என்று எனது மதிப்பீடு கூறுகிறது. இந்திய கூட்டணி ஆட்சி அமைக்கும், ஆம் ஆத்மி அந்த அரசாங்கத்தில் அங்கம் வகிக்கும். டெல்லிக்கு முழு மாநில அந்தஸ்து வழங்குவோம். டெல்லிக்கு மக்களின் கவர்னர் இருப்பார், குஜராத்தைச் சேர்ந்தவர் அல்ல. 

நான் கைது செய்யப்பட்ட போது நான் ஏன் ராஜினாமா செய்யவில்லை? டெல்லியில் ஆம் ஆத்மி கட்சி வரலாறு காணாத வாக்கு வித்தியாசத்தில் வெற்றி பெற்றுள்ளது. அடுத்த 20 வருடங்களுக்கு கூட எங்களை தோற்கடிக்க முடியாது என்பது அவர்களுக்கு தெரியும். நான் ராஜினாமா செய்துவிட்டு ஆம் ஆத்மி அரசு கவிழும் என்று சதி செய்தார்கள். நான் ராஜினாமா செய்ய மாட்டேன், சிறையில் இருந்தே அரசை நடத்துவேன் என்று கூறினேன். ஹேமந்த் சோரன் கூட ராஜினாமா செய்திருக்கக் கூடாது.

இவ்வாறு அவர் கூறினார். 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“