ராகுல் காந்தி குற்றச்சாட்டுக்குப் பின் வாக்காளர் நீக்கத்துக்கு ஆதார் ஓ.டி.பி கட்டாயம்: தேர்தல் ஆணையம் நடவடிக்கை

தேர்தல் ஆணையம் (EC) தனது ECINet போர்டல் மற்றும் செயலியில் புதிய இ-கையொப்பம் (e-sign) அம்சத்தை அறிமுகப்படுத்தியுள்ளது. வாக்காளர்களாகப் பதிவு செய்ய அல்லது வாக்காளர் பட்டியலில் இருந்து பெயரை நீக்க/திருத்தம் செய்ய விண்ணப்பிப்பவர்கள், இனிமேல் தங்களது ஆதாருடன் இணைக்கப்பட்ட தொலைபேசி எண்களைப் பயன்படுத்தி அடையாளத்தைச் சரிபார்க்க வேண்டியது கட்டாயமாகும்.

கர்நாடகாவில் 2023 சட்டமன்றத் தேர்தலுக்கு முன்னதாக ஆலந்து (Aland) தொகுதியில் ஆன்லைன் மூலம் வாக்காளர் நீக்கப் படிவங்கள் தவறாகப் பயன்படுத்தப்பட்டதாக எதிர்க்கட்சித் தலைவர் ராகுல் காந்தி குற்றம் சாட்டி ஒரு வாரத்திற்குள் தேர்தல் ஆணையம் இந்த நடவடிக்கை எடுத்து உள்ளது. இதற்கு முன்பு, விண்ணப்பதாரர்கள் ஏற்கனவே உள்ள வாக்காளர் அடையாள அட்டை (EPIC) எண்ணுடன் ஒரு தொலைபேசி எண்ணை இணைத்த பிறகு, படிவங்களைச் சமர்ப்பிக்க முடிந்தது. அந்த விவரங்கள் விண்ணப்பதாரருக்குச் சொந்தமானதா என்பதற்கான சரிபார்ப்பு எதுவும் செய்யப்படவில்லை. இந்த ‘இ-கையொப்பம்’ அம்சம் செவ்வாய்க்கிழமை அன்று (Tuesday) ECINet போர்ட்டலில் படிவங்களை சமர்ப்பிக்கும் போது காணப்பட்டது.

புதிய வாக்காளராகப் பதிவு செய்வதற்கான படிவம் 6, வாக்காளர் பட்டியலில் இருந்து பெயரை நீக்க/சேர்க்க எதிர்ப்பு தெரிவிப்பதற்கான படிவம் 7, பதிவுகளில் திருத்தம் செய்வதற்கான படிவம் 8 ஆகியவற்றைச் சமர்ப்பிக்கும் விண்ணப்பதாரர்கள் இப்போது 'இ-கையொப்பம்' தேவையை நிறைவேற்ற வேண்டும்.

இந்த செய்தியை ஆங்கிலத்தில் படிக்க

விண்ணப்பதாரர் படிவத்தை நிரப்பிய பிறகு, மின்னணு மற்றும் தகவல் தொழில்நுட்ப அமைச்சகத்தின் கீழ் செயல்படும் CDAC (Centre for Development of Advanced Computing) மூலம் இயக்கப்படும் 'இ-கையொப்பம்' தளத்திற்கு (External e-sign portal) அனுப்பப்படுவார். CDAC போர்ட்டலில், விண்ணப்பதாரர் தனது ஆதார் எண்ணை உள்ளிட்டு, ஆதார் ஓடிபி உருவாக்க வேண்டும். இந்த ஓடிபி ஆனது ஆதார் எண்ணுடன் இணைக்கப்பட்ட தொலைபேசி எண்ணுக்கு அனுப்பப்படும். விண்ணப்பதாரர் ஆதார் அடிப்படையிலான அங்கீகாரத்திற்குச் சம்மதம் தெரிவித்து, சரிபார்ப்பை முடிக்க வேண்டும். இது முடிந்த பின்னரே, விண்ணப்பதாரர் படிவத்தைச் சமர்ப்பிக்க ECINet போர்ட்டலுக்குத் திருப்பி விடப்படுவார்.

விண்ணப்பதாரர் பயன்படுத்தும் வாக்காளர் அட்டையின் பெயரும், ஆதார் அட்டையின் பெயரும் ஒரே மாதிரியாக இருக்க வேண்டும் என்றும், அவர் பயன்படுத்தும் மொபைல் எண்ணும் ஆதாருடன் இணைக்கப்பட்டிருக்க வேண்டும் என்றும் இந்த போர்ட்டல் எச்சரிக்கிறது.

ராகுல் காந்தி செப்.18 அன்று அளித்த பேட்டியில், ஆலந்து தொகுதியில் சுமார் 6,000 வாக்காளர்களின் பெயர்களை நீக்க சிலர் ஆன்லைன் மூலம் முயற்சித்ததாகவும், பெரும்பாலான சந்தர்ப்பங்களில் உண்மையான வாக்காளர்களின் அடையாளங்கள் தவறாகப் பயன்படுத்தப்பட்டதாகவும் கூறினார். ஆனால், இந்த புதிய 'இ-கையொப்பம்' அம்சத்தால், ஆலந்தில் நடந்தது போன்ற மோசடிகளுக்கான வாய்ப்பு பெருமளவில் குறையும் என்று வட்டாரங்கள் தெரிவிக்கின்றன.

ராகுல் காந்தியின் குற்றச்சாட்டுகளுக்குப் பதிலளித்த தேர்தல் ஆணையம், "பொதுமக்கள் எவரும் ஆன்லைன் மூலம் எந்த வாக்கையும் நீக்க முடியாது, ராகுல் காந்தி தவறாகப் புரிந்துகொண்டது போல் இல்லை" என்று ஒரு அறிக்கையில் கூறியிருந்தது.

ஆலந்தில் நீக்கக் கோரப்பட்ட 6,018 பெயர்களில் 24 விண்ணப்பங்கள் மட்டுமே சரியானவை என்றும், மீதமுள்ள 5,994 பெயர்கள் நீக்கப்படாமல் உள்ளன என்றும் EC தெரிவித்தது. மேலும், இந்த விவகாரம் குறித்து 2023 பிப்ரவரியில் தேர்தல் ஆணையமே FIR பதிவு செய்து விசாரித்து வருவதாகவும் குறிப்பிட்டது.