'அனைவருக்கும் சம உரிமை': வங்கதேச இந்து மக்களுக்கு முகமது யூனுஸ் உறுதி

வங்கதேசத்தில் ஏற்பட்ட தொடர் வன்முறையை அடுத்து, அந்நாட்டின் பிரதமர் ஷேக் ஹசீனா ஆகஸ்ட் 5ஆம் தேதி தனது பதவியை ராஜினாமா செய்துவிட்டு ராணுவ விமானம் மூலம் இந்தியாவிற்கு தப்பினார். இதையடுத்து வங்காளதேச ராணுவம் ஆட்சியை கைப்பற்றிய நிலையில், இடைக்கால அரசின் தலைவராக முகமது யூனுஸ் பதவியேற்றார்.

இந்நிலையில், நேற்று செவ்வாய்க்கிழமை தலைநகர் டாக்காவில் உள்ள இந்து மக்கள் வழிபாடு செய்யும் தாகேஸ்வரி கோவிலுக்கு முகமது யூனுஸ் விசிட் செய்தார். அப்போது அவர் இந்து சமூகத் தலைவர்களைச் சந்தித்து அனைவருக்கும் "நீதி" மற்றும் "சம உரிமைகள்" வழங்கப்படுவதை உறுதியளித்தார். இதுபற்றி அவர் பேசுகையில், “உரிமைகள் அனைவருக்கும் சமம். நாம் அனைவரும் ஒரே உரிமை கொண்ட மக்கள். 

ஆங்கிலத்தில் படிக்கவும்: Express in Dhaka: Reaching out to Bangla Hindus, Muhammad Yunus visits temple, underlines equal rights

எங்களுடன் எந்த வேறுபாடும் காட்டாதீர்கள். தயவுசெய்து எங்களுக்கு உதவுங்கள். பொறுமையைக் கடைப்பிடித்து பின்னர் தீர்ப்பளியுங்கள். எங்களால் என்ன செய்ய முடிந்தது மற்றும் செய்ய முடியவில்லை. அதில் நாங்கள் தோல்வியுற்றால், எங்களை விமர்சியுங்கள்” என்று முகமது யூனுஸ் சிறுபான்மை தலைவர்களை சந்தித்த பிறகு கூறினார். இந்துக்களும் பிற சிறுபான்மையினரும் தங்கள் பாதுகாப்பிற்கு பயப்படத் தேவையில்லை என்ற நிலையை நோக்கி நிர்வாகம் செயல்படும் என்றும் அவர் குறிப்பிட்டார். 

வங்கதேசத்தில் வசித்து வரும் சிறுபான்மை அமைப்புகளின் கூற்றுப்படி, ஆகஸ்ட் 5 அன்று ஹசீனா அரசு கவிழ்ந்ததில் இருந்து 50-க்கும் மேற்பட்ட மாவட்டங்களில் இந்து மக்கள் மீது குறைந்தது 205 தாக்குதல் சம்பவங்கள் நடந்துள்ளன என்றும், இதில் 5 பேர் உயிரிழந்துள்ளனர் என்றும் தெரிவித்துள்ளார்கள். 

ஆகஸ்ட் 8 அன்று, முகமது யூனுஸ் பதவியேற்றவுடன், பிரதமர் நரேந்திர மோடி தனது வாழ்த்துக்களை தெரிவித்து, "இந்துக்கள் மற்றும் பிற அனைத்து சிறுபான்மை சமூகங்களின் நலனையும் பாதுகாப்பையும்" உறுதிப்படுத்துமாறு வலியுறுத்தினார். வங்கதேசத்தில் உள்ள இந்துக்கள் மற்றும் பிற சிறுபான்மையினரின் பாதுகாப்பு குறித்த இந்த நேரடி குறிப்பு, டாக்காவில் உள்ள புதியவர்களிடமிருந்து டெல்லியின் எதிர்பார்ப்புகளை அடிக்கோடிட்டுக் காட்டுகிறது.

முகமது யூனுஸ் நேற்று செவ்வாய்க்கிழமை இந்து சமூகத்தினரிடம் ஆற்றிய உரையில், “எங்கள் ஜனநாயக அபிலாஷைகளில், நாம் முஸ்லிம்களாகவோ, இந்துக்களாகவோ, பௌத்தர்களாகவோ பார்க்கப்படாமல், மனிதர்களாகவே பார்க்கப்பட வேண்டும். நமது உரிமைகள் உறுதி செய்யப்பட வேண்டும். அனைத்து பிரச்சனைகளுக்கும் மூல காரணம் நிறுவன ஏற்பாடுகளின் சிதைவில் உள்ளது. அதனால்தான் இதுபோன்ற பிரச்சினைகள் எழுகின்றன. நிறுவன ஏற்பாடுகள் சரி செய்யப்பட வேண்டும். நாம் மனித உரிமைகளையும் பேச்சு சுதந்திரத்தையும் நிலைநாட்ட வேண்டும். அதுவே எங்களின் முதன்மையான இலக்கு. 

நீங்கள் மனிதர்கள், வங்கதேசத்தின் குடிமக்கள் என்று நீங்கள் கூறுகிறீர்கள், இது எனது அரசியலமைப்பு உரிமை, அதை நீங்கள் உறுதிப்படுத்த வேண்டும். நீங்கள் இதை மட்டும் கோருகிறீர்கள், வேறு ஒன்றும் இல்லை. நாம் அனைவரும் சமம் என்று கூறவே நான் இங்கு வந்துள்ளேன், இங்கு வேறுபாடுகளை உருவாக்க எந்த வாய்ப்பும் இல்லை. இந்து கோவில்கள், தேவாலயங்கள், பகோடாக்கள் அல்லது பிற மத நிறுவனங்கள் மீதான தாக்குதல்கள் குறித்த தகவல்களை மக்களுக்கு வழங்க இடைக்கால அரசாங்கம் ஹாட்லைன் ஒன்றை அமைத்துள்ளது." என்று அவர் கூறினார். 

"அனைவருக்கும் நீதி வழங்கப்படும்" என்றும், இந்துக்கள் மற்றும் பிற சிறுபான்மை சமூகங்கள் தங்கள் பாதுகாப்பு குறித்து அச்சம் கொள்ளத் தேவையில்லாத சூழ்நிலையை நோக்கி செயல்படுவேன் என்றும் முகமது யூனுஸ் உறுதியளித்ததாக இந்து சமூகத் தலைவர்கள் தெரிவித்தனர்.

வங்கதேச பூஜா உத்ஜபான் பரிஷத்தின் தலைவரும், இந்து சிறுபான்மைத் தலைவர்களில் ஒருவருமான பாசுதேப் தார் தி இந்தியன் எக்ஸ்பிரஸ்ஸிடம் பேசுகையில், "தாக்குதல்களை எதிர்கொண்ட சமூகத்தைச் சேர்ந்தவர்களுக்கு நிர்வாகம் நீதியை உறுதி செய்யும் என்றும், இந்துக்கள் வாழும் சூழலை உருவாக்குவதற்கு நிர்வாகம் செயல்படும். கோவில்கள், வணிக நிறுவனங்கள் மற்றும் வீடுகளுக்கு கூடுதல் பாதுகாப்பு தேவை இல்லை என்று முகமது யூனுஸ் தெரிவித்தார். 

இந்து ஸ்தாபனங்கள் மீதான தாக்குதல்கள் ஆகஸ்ட் 4 மாலை தொடங்கி, மறுநாள் தீவிரமடைந்தன. வங்கதேசத்தில் மொத்தமுள்ள 64 மாவட்டங்களில் 50-க்கும் மேற்பட்ட மாவட்டங்கள் பாதிக்கப்பட்டுள்ளதால், தாக்குதல்கள் பரவலாக நடந்தது. 

அதிக சம்பவங்கள் பதிவாகி வருவதால் 205 (தாக்குதல் சம்பவங்கள்) எண்ணிக்கை அதிகரிக்கும் என்று எதிர்பார்க்கப்படுகிறது. நாங்கள் பட்டியலை தொகுத்து வருகிறோம். பல இடங்களில், உள்ளூர் முஸ்லீம் குழுக்கள் டாக்காவில் உள்ள தாகேஸ்வரி கோயில் உட்பட சில கோயில்களைப் பாதுகாக்க முயற்சி எடுத்து வருகிறார்கள். இவை நேர்மறையான முன்னேற்றங்கள் மற்றும் அமைதியைப் பாதுகாக்க உதவுகிறது." என்று அவர் கூறினார். 

டாக்கா சில தாக்குதல்களைக் கண்டிருந்தாலும், பெரும்பாலானவை கிராமங்களிலும் உள்நாட்டிலும், குறிப்பாக எல்லைப் பகுதிகளில் நடந்துள்ளன. தாக்குதல்களுக்குப் பின்னால் உள்ள ஒரு முக்கிய காரணம், கடந்த வாரத்தில் காவல்துறை இல்லாதது ஆகும். பெரும்பாலான மாணவர்கள் போராட்டக்காரர்களின் பழிவாங்கலுக்குப் பயந்து காவல் நிலையங்களைக் கைவிட்டனர். விளைவு, பல வழக்குகளில் காவல்துறையின் எஃப்.ஐ.ஆர்-கள் அல்லது புகார்கள் எதுவும் பதிவு செய்யப்படவில்லை. மேலும் இந்து சமூகம் பாதுகாப்பற்ற நிலைக்குத் தள்ளப்பட்டது.

தாக்குதல்களின் அறிக்கைகள் 170 மில்லியன் மக்கள் வசிக்கும் நாட்டில், 8 சதவீதம் என்ற அளவில், மிகப்பெரிய சிறுபான்மையினராக உள்ள இந்து சமூகத்தினரிடையே பாதுகாப்பின்மை மற்றும் முன்னறிவிப்பு உணர்வை வலுப்படுத்தியுள்ளன. 2022 மக்கள் தொகை கணக்கெடுப்பின்படி, வங்கதேசத்தில் 91.04% பேர் முஸ்லிம்கள், மீதமுள்ள 9 சதவீதம் பேர் இந்துக்கள் (7.95%), பௌத்தர்கள் (0.61%), கிறிஸ்தவர்கள் (0.30%) மற்றும் பிற மதத்தினர் (0.12%) உள்ளனர்.

இந்த விவகாரத்தில் அரசியல் கோணமும் உள்ளது. தி இந்தியன் எக்ஸ்பிரஸிடம் பேசிய இந்து சிறுபான்மைத் தலைவர் ஒருவர், அவாமி லீக்குடன் அரசியல் ரீதியாக இணைந்திருப்பதற்காக பல இந்து குடும்பங்கள் குறிவைக்கப்பட்டதாக கூறினார். சட்டம் மற்றும் ஒழுங்கு இல்லாத நிலையில், மக்கள் வாய்ப்பு தேடியதால் சிலர் தாக்கப்பட்டனர். மேலும் வீடுகளில் கொள்ளையடித்து சென்றுள்ளனர். பழைய சொத்து தகராறு காரணமாகவும் சில சம்பவங்கள் நடந்தன.

அடுத்த சில வாரங்கள் மற்றும் மாதங்களில் நிலைமையை அவதானிக்கப் போவதாக சமூகத் தலைவர்கள் தெரிவித்தனர், ஏனெனில் அச்சம் மக்களை இந்தியாவிற்கு இடம்பெயர வழிவகுக்கும். "இது எதிர்காலத்தில் ஒரு உண்மையான சாத்தியம்," என்று இந்து தலைவர் கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“