சொகுசு கார்கள், ஓ.டி.பி, போலி ஐ.டி, இன்வாய்ஸ்கள்; ரூ.5300 கோடி ஜி.எஸ்.டி மோசடியை கண்டறிந்தது எப்படி?

Aanchal Magazine

அடிக்கடி ஃபோன் நம்பர்களை மாற்றுவது, பகலில் மாநில எல்லைகளை கடக்க மஸரடிஸ் (Maseratis) மற்றும் பி.எம்.டபுள்யூ (BMW) உட்பட உயர்தர சொகுசு கார்களைப் பயன்படுத்துதல், பின்னர் இரவில் போலி அடையாளங்களுடன் உயர்மட்ட ஹோட்டல்களில் தங்குதல், இவை டெல்லி-நொய்டா-லக்னோ பெல்ட்டில் ஆறு மாதங்களுக்கும் மேலாக அதிகாரிகளால் கண்டறியப்படாமல் செயல்பட்ட விரிவான மூன்றடுக்கு வரி ஏய்ப்பு சதியின் பின்னணியில் இருந்ததாகக் கூறப்படும் கிங்பின்களின் (மூளையாகச் செயல்பட்டவர்கள்) செயல்பாட்டின் ஒரு பகுதியாக இருந்தன.

ஆங்கிலத்தில் படிக்க: Fancy cars, OTPs, stolen IDs and fudged invoices: Tracking the trail behind Rs 5,300-crore GST fraud

தீங்கற்ற சில பயன்பாடுகளின் காரணமாக சதி இறுதியாக அவிழ்க்கப்பட்டது: டோல் பூத்களில் உருவாக்கப்பட்ட பாஸ்டாக் (FASTag) குறுஞ்செய்திகள் மற்றும் சொமாட்டோ (Zomato) மற்றும் ஸ்விக்கி (Swiggy) போன்ற உணவு விநியோக பயன்பாடுகளிலிருந்து ஒரு முறை கடவுச்சொற்கள் (OTPகள்). சரக்கு மற்றும் சேவை வரி (ஜி.எஸ்.டி - GST) முறையின் கீழ் கண்டுபிடிக்கப்பட்ட மிகப்பெரிய ஏய்ப்பு மோசடிகளில் ஒன்றாக மாறியிருக்கும் சந்தேகத்திற்குரிய முறைகேடாளர்களின் இருப்பிடங்களை கண்டறிய சட்ட அமலாக்க அதிகாரிகள் இந்த டிராக்கர்களைப் பயன்படுத்தியுள்ளனர்.

12 மாதங்களுக்கு முன்பு, நொய்டாவைச் சேர்ந்த ஒரு நபர் தனது பெயரில் அடையாளத் திருட்டு மற்றும் போலி ஜி.எஸ்.டி பதிவுகள் உள்ளதாகப் புகாரளித்ததைத் தொடர்ந்து, 12 மாதங்களுக்கு முன்பு சதித்திட்டத்தின் முறியடிப்பு தொடங்கியது, அதைத் தொடர்ந்து உள்ளூர் போலீசார் மே 2023 இல் விசாரிக்கத் தொடங்கினர்.

இதுவரை 41 பேர் கைது செய்யப்பட்டு, சுமார் 2,660 மோசடியாகப் பதிவுசெய்யப்பட்ட நிறுவனங்களைக் கண்டறிந்து, சுமார் 15,300 கோடி ரூபாய் பில்களைப் பயன்படுத்தி 5,300 கோடி ரூபாய் மதிப்புள்ள போலி உள்ளீட்டு வரிக் கடன் (ITC) மூலம், ஜி.எஸ்.டி.,யின் கீழ் மிகப்பெரிய மோசடிகளில் ஒன்றாக இந்த வழக்கு இப்போது பதிவு செய்யப்பட்டுள்ளது.

"அடையாள ஆவணங்களை தவறாகப் பயன்படுத்தியதற்காகவும், போலி நிறுவனங்கள் மற்றும் ஜி.எஸ்.டி.ஐ.என்.,களை (ஜி.எஸ்.டி அடையாள எண்கள்) உருவாக்குவதற்காகவும் நொய்டா போலீசார் ஒரு மோசடியை கண்டறிந்தனர் மற்றும் ஜி.எஸ்.டி நுண்ணறிவு இயக்குநரகத்துடன் (டி.ஜி.ஜி.ஐ - DGGI) தரவைப் பகிர்ந்து கொண்டனர். பின்னர், இந்த ஆபத்தான மொபைல் எண்கள், ஆதார் மற்றும் பான் எண்களுடன் இணைக்கப்பட்டுள்ள பிற ஜி.எஸ்.டி.ஐ.என்.,களைக் கண்டறிய, நிதிப் புலனாய்வுப் பிரிவுடன் (எஃப்.ஐ.யு) தரவு பகிரப்பட்டது. சுமார் 13,000-14,000 ஜி.எஸ்.டி.ஐ.என்.,கள் இணைக்கப்பட்டிருப்பது கண்டறியப்பட்டது. சில இரட்டை எண்ணிக்கையும் இருந்தது, மேலும் உள் பகுப்பாய்விற்குப் பிறகு, சுமார் 8,000 சுயாதீனமான, அடையாளம் காணக்கூடிய மற்றும் அபாயகரமான ஜி.எஸ்.டி.ஐ.என்.,கள் இருப்பது கண்டறியப்பட்டது. இந்த சரிபார்ப்பு பணி கடந்த 8-9 மாதங்களாக நடைபெற்று வருகிறது” என்று மூத்த அதிகாரி ஒருவர் இந்தியன் எக்ஸ்பிரஸிடம் தெரிவித்தார்.

6,200 க்கும் மேற்பட்ட ஜி.எஸ்.டி.ஐ.என்.,கள் சரிபார்க்கப்பட்டுள்ளன, அவற்றில் 40 சதவீதம் ரத்து செய்யப்பட்டுள்ளன அல்லது இடைநிறுத்தப்பட்டுள்ளன, என்று அந்த அதிகாரி தெரிவித்தார். இந்த நிகழ்வுகளில் பெரும்பாலானவற்றில், போலி ஐ.டி.,கள் உள்ளன, பொருட்கள் அல்லது சேவைகளின் உண்மையான விநியோகம் இல்லை, போலி ஐ.டி.சி.,யைப் பெறுவதற்காக உருவாக்கப்பட்ட பில்கள் மற்றும் இன்வாய்ஸ்களில் போலி முகவரி பயன்படுத்தப்பட்டுள்ளது, ஐ.டி.சி என்பது உற்பத்தி/சேவைச் சங்கிலியில் சேர்க்கப்பட்ட மதிப்பின் மீது ஏற்கனவே செலுத்தப்பட்ட வரிக்காக அரசாங்கத்தால் செலுத்தப்பட்ட பணத்தைத் திரும்பப் பெறுவதாகும்.

இந்த மாத தொடக்கத்தில் நொய்டா காவல்துறையின் புதிய கைதுகள் மூன்று அடுக்கு வரி ஏய்ப்பின் கடைசி அடுக்கை ஒன்றாக இணைக்க அதிகாரிகளுக்கு உதவியது: முதலாவது அடையாள திருட்டு மற்றும் போலி ஆவணங்களுடன் போலி ஜி.எஸ்.டி பதிவுகள் தொடர்பானது; இரண்டாவது அடுக்கு போலி பில்லிங் சம்பந்தப்பட்டது; மற்றும் மூன்றாவது அடுக்கு ஜி.எஸ்.டி.,யின் கீழ் போலி பில்களைப் பயன்படுத்தி மோசடியான உள்ளீட்டு வரிக் கிரெடிட்டைப் பாதுகாப்பதுடன் இணைக்கப்பட்டது.

நொய்டா காவல்துறை கடந்த ஆண்டு 6 லட்சத்துக்கும் அதிகமானோரின் பான் கார்டு தரவுகளை வைத்திருந்ததற்காகவும், போலி ஜி.எஸ்.டி பதிவுகளை உருவாக்கியதற்காகவும் 18 பேரை கைது செய்தது. தேசிய பாதுகாப்பு தாக்கங்களுடன் தொடர்புடைய அடையாள ஆவணங்களை தவறாக பயன்படுத்தியதற்காக கைது செய்யப்பட்ட எவருக்கும் இதுவரை ஜாமீன் கிடைக்கவில்லை.

ரஜோரி கார்டனை தளமாகக் கொண்ட பால் உற்பத்தியாளர் குட்ஹெல்த் இண்டஸ்ட்ரீஸின் நிறுவனர் சஞ்சய் திங்ரா மற்றும் அவரது மனைவி மற்றும் மகனுடன் கடந்த வாரம் போலீசாரால் கைது செய்யப்பட்டுள்ளனர். சஞ்சய் திங்ரா கடந்த 4-5 ஆண்டுகளாக போலி பில்களைப் பயன்படுத்தியதாகக் கூறப்படுகிறது. இந்த ஆண்டு மார்ச் மாத தொடக்கத்தில், போலி ஆவணங்களைப் பயன்படுத்தி போலி ஐ.டி.சி.,யைப் பெற்றதாக ஹரியானாவைச் சேர்ந்த தொழிலதிபர்கள் அஜய் சர்மா மற்றும் சஞ்சய் ஜிண்டால் ஆகியோரை நொய்டா போலீஸார் கைது செய்தனர். அவர்கள் மீது ஐ.பி.சி பிரிவுகள் 420 (ஏமாற்றுதல்), 467, 468 மற்றும் 471 (அனைத்தும் போலியானது), 120 பி (குற்றச் சதி) ஆகியவற்றின் கீழ் வழக்குப் பதிவு செய்யப்பட்டது.

அடிக்கடி இடத்தை மாற்றும் தொழிலதிபர்கள் தங்கள் மொபைல் எண்களை மாற்றிக்கொண்டே இருப்பார்கள், பெரும்பாலான நேரங்களில் அவற்றை அணைத்து வைத்துவிட்டு, டெலிவரி ஆப்ஸிலிருந்து ஓ.டி.பி.,களைப் பெற மட்டுமே அவற்றை ஆன் செய்வார்கள். இதுதான் அவர்களை கண்டுபிடிக்க போலீசாருக்கு உதவியது.

காவல்துறைக்கு முன்பாக, டி.ஜி.ஜி.ஐ அதிகாரிகளும் இந்த வணிகர்களை கடந்த ஆண்டு கைது செய்தனர். ஆனால், 60 நாள் காவலுக்குப் பிறகு, ஜி.எஸ்.டி சட்டத்தின் கீழ் ஜாமீன் பெற்றனர். அவர்கள் அடிக்கடி தங்கள் இருப்பிடங்களை மாற்றியதால், தொழில்நுட்பம் மற்றும் தரவு பகுப்பாய்வுகளைப் பயன்படுத்துவது காவல்துறைக்கு அவசியமானது.

"அவர்கள் மொபைல் எண்களை மாற்றிக்கொண்டே இருப்பார்கள், அவற்றில் சில அவர்களின் ஊழியர்களின் பெயரில் வாங்கப்பட்டன. ஐந்து முதல் ஆறு மணி நேரத்திற்குப் பிறகு சந்தேகிக்கப்படும் இடத்தில், எந்தெந்த மொபைல் எண்கள் இயக்கப்பட்டன என்பது போன்ற தரவை நாங்கள் பகுப்பாய்வு செய்தோம். சில நேரங்களில் அவர்கள் ஓ.டி.பி.,க்களைப் பெறுவதற்காக மட்டுமே தங்கள் மொபைல் போன்களை ஆன் செய்வார்கள், அது சந்தேகத்திற்குரிய நம்பர் என்று எங்களுக்குத் தெரியும். அவர்களின் ஐ.பி முகவரி எங்களுக்குத் தெரிந்ததால், இணைய சேவை வழங்குநர்களைத் தொடர்புகொண்டு மோடம் கண்டுபிடிக்கப்பட்டது,” என்று நொய்டா காவல்துறை துணை ஆணையர் (குற்றம்) சக்தி மோகன் அவஸ்தி தி இந்தியன் எக்ஸ்பிரஸிடம் தெரிவித்தார்.

பகலில் டெல்லி-நொய்டா-லக்னோ வழித்தடத்தில் இந்த தொழிலதிபர்கள் பயன்படுத்தும் உயர்தர சொகுசு கார்களைக் கண்காணிக்க ஃபாஸ்டேக் உதவியது, மாலைக்குள் அவர்கள் போலி அடையாளங்களுடன் நன்கு அறியப்பட்ட ஹோட்டல்களில் தங்குவார்கள், என்று சக்தி மோகன் அவஸ்தி கூறினார்.

"இந்த வழக்கில் மிகவும் கடினமான கைதுகளில் இதுவும் ஒன்றாகும். இதன் மூலம் தற்போது மூன்று அடுக்கு போலி மற்றும் மோசடி வழக்குகளில் தொடர்புடையவர்களை கைது செய்துள்ளோம். இப்போது கைது செய்யப்படுவதற்கு வெகு சிலரே எஞ்சியுள்ளனர்,'' என்று சக்தி மோகன் அவஸ்தி கூறினார்.

கடந்த ஆண்டு, டி.ஜி.ஜி.ஐ இந்த மூன்று தொழிலதிபர்கள் மீதும் ஐ.டி.சி.,யை தவறாகப் பயன்படுத்தியதற்காக தனித்தனியாக வழக்குப் பதிவு செய்தது. நொய்டா காவல்துறை போலி நிறுவனங்களின் விவரங்களைப் பகிர்ந்த பிறகு, டி.ஜி.ஜி.ஐ போலி நிறுவனங்கள் தாக்கல் செய்த வருமானத்தின் அடிப்படையில் ஏற்றுமதிப் பொருட்கள் மற்றும் கடன்களைப் பற்றிய அதன் உள் பகுப்பாய்வை செய்தது. யோயோ டிரேடர்ஸ் என்ற நிறுவனம் ஏ.கே.எஸ் டிரேடர்ஸுக்கு ரூ. 7.8 கோடி மதிப்புள்ள போலி ஐ.டி.சி.,யை அனுப்பியது, அதன் பிறகு ரூ.7.8 கோடி மதிப்புள்ள முழு வரிக் கடனையும் குட்ஹெல்த் இண்டஸ்ட்ரீஸுக்கு வழங்கியது.

ஒன்பது சப்ளையர் நிறுவனங்களின் முக்கிய வணிகம், இந்த நிறுவனங்கள் வழங்கிய விலைப்பட்டியல்களில் ஐ.டி.சி ரூ. 68.15 கோடியுடன் தொடர்புடையதாக இல்லை என்பதையும் டி.ஜி.ஜி.ஐ கண்டறிந்தது.

643 இ-வே பில்களில் சரக்குகளை கொண்டு செல்ல பயன்படுத்தப்பட்டதாக குறிப்பிடப்பட்டுள்ள, ஐந்து வாகனங்களின் உரிமையாளர்களின் வாக்குமூலங்கள், அவர்கள் தங்கள் வாகனங்களை வழங்கவில்லை என மறுத்துள்ளனர்.

அதைத் தொடர்ந்து, 9 போலி நிறுவனங்களிடம் இருந்து ரூ.68.15 கோடி அளவுக்கு போலி ஐ.டி.சி.,யைப் பெற்றதற்காக, 2017 ஆம் ஆண்டு சி.ஜி.எஸ்.டி (மத்திய ஜி.எஸ்.டி) சட்டத்தின் 132(1)(சி) பிரிவின் கீழ் ஜி.எஸ்.டி அதிகாரிகளால் ஜூன் 8, 2023 அன்று சஞ்சய் திங்ரா கைது செய்யப்பட்டார்.

தனித்தனியாக, ஜிண்டால் மற்றும் ஷர்மா 85 போலி நிறுவனங்களின் நெட்வொர்க் மூலம் ரூ. 282.82 கோடி மதிப்புள்ள போலி ஐ.டி.சி.,யை அனுப்பிய குற்றத்திற்காக, ஜூலை 2023 இல் டி.ஜி.ஜி.ஐ.,யால் கைது செய்யப்பட்டனர். ஜி.எஸ்.டி அதிகாரிகளால் 32 வங்கிக் கணக்குகள் இணைக்கப்பட்டு, அவர்களின் போலி நிறுவனங்களின் ஐ.டி.சி லெட்ஜரில் ரூ.9.61 கோடி முடக்கப்பட்டுள்ளதாக அதிகாரிகள் தெரிவித்தனர். மேலும், 85 போலி நிறுவனங்களில் 19 செயல்படும் நிறுவனங்கள் ரத்து செய்யப்பட்டன.

தரவு பகுப்பாய்வு இந்த மோசடி மன்னர்களை அடைய அதிகாரிகளுக்கு உதவியிருந்தாலும், மீட்பு விகிதம் குறைவாக இருப்பதாக அதிகாரிகள் ஒப்புக்கொள்கிறார்கள். "பல வணிகங்கள் போலியான ஐ.டி.சி.,யை தங்கள் உண்மையான வணிகத்துடன் கலக்கின்றன... அவர்கள் பெறும் மொத்த வரிக் கடன் தொகையில் 30% இணைக்கப்பட்ட நிறுவனங்களின் நெட்வொர்க் மூலம் போலியாக இருக்கும். நாங்கள் கடைசி அடுக்கை அடையும் நேரத்தில், அந்த நெட்வொர்க்கில் கடன் விநியோகிக்கப்படுகிறது, இதனால், மீட்பு விகிதம் மோசமாக உள்ளது,” என்று மேலே குறிப்பிடப்பட்ட அதிகாரி கூறினார்.

இது அதிகாரப்பூர்வ தரவுகளில் பிரதிபலிக்கிறது. நொய்டா வழக்கைத் தொடர்ந்து, ரூ.5,224.18 கோடி மோசடி ஐ.டி.சி கண்டுபிடிக்கப்பட்டது, அதில் இதுவரை ரூ.240.09 கோடி மட்டுமே முடக்கப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“