தலாய்லாமா, அதானி முதல் ரஜினிகாந்த் வரை... அயோத்தி ராமர் சிலை பிரதிஷ்டை விழாவில் பங்கேற்பு

Ayodhya-temple: உத்தர பிரதேசத்தின் அயோத்தியில் பிரமாண்ட ராமர் கோவில் கட்ட கடந்த 2019-ம் ஆண்டு நவம்பர் 9-ம் தேதி உச்சநீதிமன்றம் அனுமதி அளித்தது.  இதனையடுத்து, கட்டுமான பணிகளை கவனிக்க ராமஜென்ம பூமி அறக்கட்டளை அமைக்கப்பட்டது. 2020-ம் ஆண்டு ஆகஸ்டு 5-ம் தேதி அயோத்தியில் ராமர் கோவில் கட்ட பூமி பூஜை நடந்தது. பிரதமர் மோடி கலந்து கொண்டு பூமி பூஜை நடத்தி வைத்து, அடிக்கல் நாட்டினார்.

ஆங்கிலத்தில் படிக்கவும்: Ram Temple idol consecration ceremony: From Dalai Lama to Rajinikanth to Adani, guest list to include people from all walks of life

கடவுள் ராமரின் சிலை வைக்கப்பட கூடிய கருவறையில் பணிகள் நிறைவடைய உள்ளன. இந்த சூழலில், ராமர் கோவிலின் உட்புறம் செதுக்கப்பட்ட அழகிய சிற்பங்கள் அடங்கிய புகைப்படங்களை ஸ்ரீராம ஜென்மபூமி தீர்த்த க்ஷேத்ரா அறக்கட்டளை சில தினங்களுக்கு முன் வெளியிட்டது. கடந்த அக்டோபரில், கோவிலின் தரை பகுதியில் விலையுயர்ந்த கற்களை கொண்டு பதித்து, அழகுப்படுத்திய பணிகள் அடங்கிய புகைப்படங்கள் பகிரப்பட்டு இருந்தன.

இந்நிலையில், ராமர் கோவிலின் கருவறையில் ராமர் சிலையை, வருகிற ஜனவரி 22-ம் தேதி நண்பகல் மற்றும் மதியம் 12.45 மணிக்கு இடையே நிறுவுவது என முடிவு செய்யப்பட்டு உள்ளது. இந்த நிகழ்ச்சியில் பங்கேற்க அனைத்து பிரிவுகளையும் சேர்ந்த 4 ஆயிரம் சாமியார்களுக்கு அழைப்பு விடப்பட்டு உள்ளது.

இதுதொடர்பாக ஸ்ரீராம ஜென்மபூமி தீர்த்த க்ஷேத்ரா பொது செயலாளர் சம்பத் ராய் பேசுகையில், "முரளி மனோகர் ஜோஷி மற்றும் எல்.கே. அத்வானி ஆகியோர் உடல்நலம் மற்றும் வயது தொடர்பான காரணங்களால் நிகழ்ச்சியில் கலந்து கொள்ள முடியாது. அவர்கள் இருவரும் குடும்பத்தில் மூத்தவர்கள். அவர்களுடைய வயதினை கவனத்தில் கொண்டு, நிகழ்ச்சிக்கு வரவேண்டாம் என கேட்டு கொள்ளப்பட்டது. இதனை அவர்கள் இருவரும் ஏற்று கொண்டனர்.

சிலை பிரதிஷ்டை நிகழ்ச்சிக்கான அனைத்து ஏற்பாடுகளும் வருகிற ஜனவரி 15-க்குள் நிறைவடைந்து விடும். அதன்பின் ஜனவரி 16-ம் தேதி பிரான் பிரதிஷ்தா பூஜை தொடங்கி தொடர்ந்து 22-ம் தேதி வரை நடைபெறும். 

இந்த நிகழ்ச்சியில் வெவ்வேறு பாரம்பரியங்களை சேர்ந்த 13 அகாராக்களின் 150 துறவிகள் மற்றும் சாமியார்கள் உள்ளிட்டோர் கலந்து கொள்ள உள்ளனர். 4 ஆயிரம் சாமியார்களுக்கு அழைப்பு விடப்பட்டு உள்ளது. இதுதவிர, 2,200 விருந்தினர்களுக்கு அழைப்பு விடப்பட்டு இருக்கிறது. காசி விஸ்வநாத், வைஷ்ணவதேவி போன்ற பெரிய கோவில்களின் தலைவர்கள், மதம் மற்றும் அரசியலமைப்பு மையங்களின் பிரதிநிதிகளும் அழைக்கப்பட்டு உள்ளனர்.

புத்த மத தலைவர் தலாய் லாமா, கேரளாவின் மாதா அமிர்தானந்தமயி, யோகா குரு பாபா ராம்தேவ், நடிகர்கள் ரஜினிகாந்த், அமிதாப் பச்சன்,  ராமானந்த் சாகரின் ராமாயணம் தொலைக்காட்சி தொடரில் ராமனாக நடித்த அருண் கோவில், நடிகை மாதுரி தீட்சித், திரை இயக்குநர் மதுர் பண்டார்கர், பாடலாசிரியர் பிரசூன் ஜோஷி, முன்னணி தொழிலதிபர்களான முகேஷ் அம்பானி, அனில் அம்பானி, கவுதம் அதானி, டாடா குழுமத்தின் நடராஜன் சந்திரசேகரன், எல்&டி குழுமத்தின் எஸ்.என் சுப்ரமணியன்,  பிரபல ஓவியர் வசுதேவ காமத், இஸ்ரோ இயக்குநர் நிலேஷ் தேசாய் மற்றும் பிற பிரபலங்களும் இந்நிகழ்ச்சியில் பங்கேற்பார்கள். 

விளையாட்டு பிரபலங்கள், விஞ்ஞானிகள், ஊடக நிறுவனங்கள் மற்றும் 1984 மற்றும் 1992 க்கு இடையில் செயலில் இருந்த மூத்த பத்திரிகையாளர்கள் அனைவரும் அழைக்கப்பட்டுள்ளனர்.

1992 ஆம் ஆண்டு அயோத்தியில் பணியமர்த்தப்பட்ட உ.பி காவல்துறையின் ஓய்வுபெற்ற அதிகாரிகள், அப்போதைய டிஐஜி உள்ளிட்டோரும் அழைக்கப்படுவார்கள். 25 ஆர்.எஸ்.எஸ் நிர்வாகிகளுக்கு மட்டுமே அழைப்பு விடுக்கப்பட்டுள்ளது. விஷ்வ ஹிந்து பரிஷத்தில் இருந்து 100 பேருக்கு மேல் அழைக்கப்படவில்லை. கட்டுமானப் பணியில் ஈடுபட்டுள்ள 10-15 சதவீத பணியாளர்களுக்கு அழைப்பிதழ் வழங்கப்படும்.

விருந்தினர்கள் தங்குவதற்காக அயோத்தியில் 3-க்கும் மேற்பட்ட இடங்களில் முறையான ஏற்பாடுகள் செய்யப்பட்டு உள்ளன. 600 அறைகள் தயாராக வைக்கப்பட்டு உள்ளன. 1,000 பேர் தங்குவதற்கு கரசேவக்புரத்திலும், மேலும் 850 பேருக்கு நிருத்ய கோபால் தாஸின் யோகா மற்றும் பிரக்ரதிக் மையத்திலும் தங்கும் வசதி செய்யப்பட்டுள்ளது. அயோத்தியில் வசிப்பவர்கள், கோயில்கள் மற்றும் ஆசிரமங்கள் வரும் விருந்தினர்களுக்கு தங்கும் வசதிகளை வழங்குவார்கள்.

பாக் பிஜௌசி என்று அழைக்கப்படும் தீர்த்தக்ஷேத்ர புரம் பகுதியில் 45 ஏக்கர் நிலப்பரப்பில் புதிதாக நிறுவப்பட்ட கூடார நகரத்தில் 12,000 பேர் தங்குவதற்கான தங்குமிடம் தயார் செய்யப்பட்டுள்ளது. தங்கும் அறைகள், போர்வைகள், போர்வைகள், கழிப்பறை வசதிகள் இருக்கும். இந்நிகழ்ச்சியில் பங்கேற்கும் 3,500 துறவிகளுக்கு மணிபர்வத் அருகே மற்றொரு தங்குமிடம் தயார் செய்யப்பட்டுள்ளது.

ஜனவரி 23-ந்தேதியில் இருந்து கடவுள் ராமரை மக்கள் தரிசனம் செய்யலாம். வடஇந்திய பாரம்பரியத்தின்படி, ஜனவரி 24-ம் தேதி முதல் 48 நாட்களுக்கு மண்டல பூஜை நடத்தப்படும்." என்றும் அவர் கூறியுள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“