என்.ஐ.ஏ. காவலில் தஹாவூா் ராணா: மும்பை பயங்கரவாதத் தாக்குதல் குறித்து துருவித் துருவி விசாரணை

26/11 மும்பை பயங்கரவாதத் தாக்குதல் சம்பவத்தின் முக்கிய குற்றவாளி தஹாவூர் ராணாவை அமெரிக்காவில் இருந்து இந்தியாவுக்கு நாடு கடத்திய தேசிய புலனாய்வு அமைப்பு (NIA), மும்பை தாக்குதலில் லஷ்கர்-இ-தொய்பாவின் டேவிட் கோல்மன் ஹெட்லியின் பங்கு குறித்து துருவித் துருவி விசாரணை நடத்தி வருகிறது.

தேசிய புலனாய்வு முகமை (என்.ஐ.ஏ) தலைமையகத்தில் தஹாவூா் ராணா 18 நாள் காவலில் வைக்கப்பட்டுள்ளாா். அவரிடம் என்.ஐ.ஏ விசாரணையை தொடங்கியது. இதையடுத்து, சட்ட ஒழுங்கு பிரச்னைகளைத் தடுக்கும் வகையில் என்ஐஏ தலைமையகத்தை சுற்றி துணை ராணுவப் படை மற்றும் போலீஸாா் குவிக்கப்பட்டு பலத்த பாதுகாப்பு ஏற்பாடுகள் மேற்கொள்ளப்பட்டுள்ளன. என்ஐஏ தலைமையகம் அமைந்துள்ள சாலையில் போக்குவரத்து முற்றிலும் தடை செய்யப்பட்டுள்ளது.

கடந்த 2008-ம் ஆண்டு, நவ.26-ம் தேதி, மகாராஷ்டிர மாநிலம் மும்பையில் நிகழ்த்தப்பட்ட பயங்கரவாத தாக்குதல் சம்பவத்தில் 166 போ் உயிரிழந்தனா். 238 போ் படுகாயமடைந்தனா். பாகிஸ்தானில் இருந்து கடல் வழியாக மும்பைக்குள் நுழைந்த பயங்கரவாதிகள் இந்த தாக்குதலை நடத்தினா். இதில் மூளையாகச் செயல்பட்டவா்களில் ஒருவரான பாகிஸ்தான்-அமெரிக்க பயங்கரவாதி டேவிட் ஹெட்லியின் நெருங்கிய நண்பா் தஹாவூா் ராணா.

கனடா குடியுரிமை பெற்ற பாகிஸ்தான் நபரான தஹாவூா் ராணாவுக்கு லஷ்கா்-ஏ-தொய்பா மற்றும் ஹா்கத்-அல்-ஜிஹாதி இஸ்லாமி உள்பட பாகிஸ்தானைச் சோ்ந்த பல்வேறு பயங்கரவாத அமைப்புகளுடன் தொடா்புள்ளது. அமெரிக்காவில் உள்ள லாஸ் ஏஞசலீஸ் சிறையில் அடைக்கப்பட்டிருந்த அவா் வியாழக்கிழமை இந்தியாவுக்கு நாடுகடத்தப்பட்டாா்.

வியாழக்கிழமை டெல்லிக்கு அழைத்து வரப்பட்டு நீதிமன்றத்தில் ஆஜர்படுத்தப்பட்ட ராணா, ஃபெடரல் பீரோ புலனாய்வு (FBI) மற்றும் இல்லினாய்ஸில் உள்ள வடக்கு மாவட்ட நீதிமன்றத்திற்கு அளிக்கப்பட்ட அவரது சொந்த சாட்சியத்தையும் எதிர்கொள்ள நேரிடும் என்று என்.ஐ.ஏ. வட்டாரங்கள்  தி இந்தியன் எக்ஸ்பிரஸ் ஸிடம் தெரிவித்தன.

"அந்த உண்மைகளின் அடிப்படையில் அவர் மீண்டும் விசாரணைக்கு உட்படுத்தப்படுவார். டேவிட் ஹெட்லியை அணுக என்.ஐ.ஏ-வுக்கு அனுமதி வழங்கப்பட்டது. எனவே, அந்த நிறுவனம் முதல்முறையாக அவரை விசாரிக்கிறது. FBI-க்கு அவர் வெளிப்படுத்தாத இந்தியா சார்ந்த கூடுதல் தகவல்களையோ (அ) விவரங்களையோ அவர் வெளிப்படுத்த முடியுமா என்பதைப் பார்ப்பதே இந்த முயற்சி" என்று ஒரு மூத்த பாதுகாப்பு நிறுவன அதிகாரி கூறினார்.

2009-ல் சிகாகோவில் அமெரிக்க அதிகாரிகளால் கைது செய்யப்பட்ட ராணா, எஃப்.பி.ஐ.ஆல் விரிவான விசாரணைக்கு உட்படுத்தப்பட்டார். இல்லினாய்ஸில் உள்ள வடக்கு மாவட்ட நீதிமன்றம், இந்தியாவில் பயங்கரவாதத்திற்கு பொருள் உதவி செய்ததற்காகவும், டென்மார்க்கில் பயங்கரவாதத்திற்கு பொருள் உதவி வழங்க சதி செய்ததற்காகவும், லஷ்கர்-இ-தொய்பாவிற்கு பொருள் உதவி செய்ததற்காகவும் அவர் மீது வழக்குத் தொடர்ந்தது. 

"அவர் குற்றவாளி என நிரூபிக்கப்படும் அளவுக்கு ஆதாரங்களுடன் வழக்கை தயாரிப்பது என்.ஐ.ஏ.வின் வேலை. 26/11 தாக்குதல்கள் மற்றும் இந்தியாவைத் தாக்கும் LeT-யின் பெரிய சதித் திட்டம் குறித்து எங்களுக்கு எங்கள் சொந்தக் கண்ணோட்டம் உள்ளது. அவரிடமிருந்து கூடுதல் தகவல்களைப் பெற முடியும் என்று நாங்கள் நம்புகிறோம்," என்று மற்றொரு அதிகாரி கூறினார்.

மும்பைத் தாக்குதலுக்கு சில நாட்களுக்கு முன்பு, ராணா நவம்பர் 13 முதல்  21, 2008 வரை இந்தியாவில் இருந்தார் என்பது அமெரிக்கா மற்றும் FBI வழக்கு ஆவணங்களில் ஹெட்லியின் சாட்சியத்தில் இருந்து தெரியவந்தது. இந்தியாவில் தங்கியிருந்த காலத்தில், ராணாவும் அவரது மனைவியும் ஹாப்பூர், டெல்லி, ஆக்ரா, கொச்சி, அகமதாபாத் மற்றும் மும்பை உள்ளிட்ட பல இடங்களுக்குச் சென்றனர்.

"பயங்கரவாத ஆட்சேர்ப்புக்காகவே தான் இந்திய பயணத்தை மேற்கொண்டதாக அவர் அமெரிக்க அதிகாரிகளிடம் கூறினார். இந்த உண்மையை நாம் சரிபார்க்க வேண்டும். அவர் வேறு எந்த இடங்களுக்குச் சென்றார், அங்கு என்ன செய்தார் என்பதையும் நாம் கண்டுபிடிக்க வேண்டும். அவர் ஆட்சேர்ப்புக்காக இங்கு வந்திருந்தால், அவர் யாரைத் தொடர்பு கொண்டார் என்பது குறித்து விசாரணை நடத்தப்பட உள்ளது," என்று NIA அதிகாரி கூறினார். ஹெட்லிக்கு (அ) இந்தியாவில் எல்.இ.டி.யின் பிற நடவடிக்கைகளுக்கு ராணா என்ன வகையான நிதி உதவியை வழங்கினார் என்பதையும் என்.ஐ.ஏ. விசாரிக்கிறது.

"வேறு பயங்கரவாதத் தாக்குதல்கள் திட்டமிடப்பட்டிருந்தனவா? என்பதையும் நாம் கண்டுபிடிக்க வேண்டும். ராணாவின் உதவியுடன் மற்றும் பாகிஸ்தானில் அவரது மேலாளர்களின் அறிவுறுத்தல்களின்பேரில், ஹெட்லி இந்தியாவில் உள்ள பல முக்கியத்துவம் வாய்ந்த இடங்களை உளவு பார்த்தார். இதில் தேசிய பாதுகாப்பு கல்லூரி, பாபா அணு ஆராய்ச்சி மையம், இந்தியா முழுவதும் உள்ள சபாத் வீடுகள், பாதுகாப்பு நிறுவல்கள் மற்றும் இந்து வழிபாட்டுத் தலங்கள் ஆகியவை அடங்கும்," என்று என்.ஐ.ஏ. அதிகாரி கூறினார்.

பாகிஸ்தான் ராணுவ மருத்துவப் படையில் பணியாற்றிய ராணா, பாகிஸ்தான் ஐ.எஸ்.ஐ. உடனான தொடர்புகள் மற்றும் 26/11 தாக்குதலைத் திட்டமிட்டதில் அதன் அதிகாரிகளின் பங்கு குறித்தும் விசாரிக்கப்படுவார். அவர் சதித்திட்டம் தீட்டிய மேஜர் இக்பால், மேஜர் சமீர் அலி, லஷ்கர் இ தொய்பா இயக்கத்தைச் சேர்ந்த அப்துர் ரெஹ்மான் மற்றும் சஜித் மிர் ஆகியோருடன் தொடர்பில் இருந்தார்.