ரூ.350 கோடி வங்கி மோசடி; சிக்கிய ஹைட்ரோ பவர் நிறுவனம்- டெல்லி, பெங்களூரு, சென்னை உட்பட 8 இடங்களில் இ.டி. ரெய்டு

ஹைத்ரோ பவர் வங்கி மோசடி வழக்கில், அமலாக்கத் துறையின் (ED) பல குழுக்கள், ரூ. 350 கோடி மதிப்பிலான மோசடி தொடர்பாக, புதன்கிழமை அன்று சென்னை, பெங்களூரு, டெல்லி மற்றும் NCR ஆகிய எட்டு இடங்களில் சோதனைகளை நடத்தி வருகின்றனர்.

மத்திய புலனாய்வுப் பிரிவு (CBI) HPCL மற்றும் அதன் விளம்பரதாரர்களுக்கு எதிராக பிப்ரவரி மாதத்தில் பதிவு செய்த வழக்கின் அடிப்படையில் அமலாக்கத் துறை தனது விசாரணையைத் தொடங்கியது.

"குற்றம் சாட்டப்பட்டவர்கள், HPCL மற்றும் அதன் இயக்குநர்களான அமுல் கப்ரானி மற்றும் அஜய் குமார் பிஷ்னோய் ஆகியோர், HPCL இன் தொடர்புடைய நிறுவனங்களுக்கு நிதியைத் திசைதிருப்பி, வங்கிகளுக்கு பெரும் இழப்பை ஏற்படுத்தியுள்ளனர்" என்று ஒரு ஆதாரம் தெரிவித்தது.

எந்தெந்த வங்கிகள் எவ்வளவு இழந்தன?

இந்த மோசடியால் பல வங்கிகள் கடுமையாகப் பாதிக்கப்பட்டுள்ளன. வங்கிகள் அளித்த புகார்களின்படி, ஒட்டுமொத்த இழப்பு ரூ. 346.08 கோடி. இதில் பஞ்சாப் நேஷனல் வங்கி மட்டும் ரூ. 168.07 கோடியையும், ஐசிஐசிஐ வங்கி ரூ. 77.81 கோடியையும், கோடக் மஹிந்திரா வங்கி ரூ. 44.49 கோடியையும், யூனியன் வங்கி ரூ. 55.71 கோடியையும் இழந்துள்ளன. இந்த மோசடி 2009 முதல் 2015 வரையிலான காலகட்டத்தில் நடந்திருப்பது விசாரணையில் தெரியவந்துள்ளது.

எப்படி நடந்தது இந்த மோசடி?

மின்தொடர்பு மற்றும் விநியோகத் துறையில் இயங்கி வந்த HPCL நிறுவனம், மின்பாதை அமைக்கும் திட்டங்களை மேற்கொண்டு வந்தது. பஞ்சாப் நேஷனல் வங்கி உள்ளிட்ட வங்கிகளிடமிருந்து சுமார் ரூ. 165.71 கோடி கடன் வசதிகளை இந்நிறுவனம் பெற்றுள்ளது.

கடன் தொகையைத் திருப்பிச் செலுத்த முடியாமல் நிறுவனம் திவாலான நிலையில், மார்ச் 31, 2015 அன்று செயல்படாத சொத்து (NPA) என அறிவிக்கப்பட்டது. கடந்த ஆண்டு ஜூன் 13 அன்று ரிசர்வ் வங்கியிடம் இது ஒரு மோசடி வழக்காகப் பதிவு செய்யப்பட்டது.

விசாரணையின் போது, தடயவியல் தணிக்கை அறிக்கையில், HPCL அவத் டிரான்ஸ்ஃபார்மர்ஸ் பிரைவேட் லிமிடெட், ஜிஇடி பவர் பிரைவேட் லிமிடெட், ரிவோலூஷன் இன்போகாம், டெக்ப்ரோஇன்ஜினியரிங் போன்ற தொடர்புடைய நிறுவனங்களுடன் போலியான வேலைகள், வசூலிக்கப்படாத வரவுகள் மற்றும் சுழற்சி பரிவர்த்தனைகள் மூலம் நிதியைத் திசைதிருப்பி இருப்பது தெரியவந்துள்ளது.

"பல பெரிய முன்பணங்கள் மற்றும் விற்பனை பில்கள் பல ஆண்டுகளாக வசூலிக்கப்படாமல் இருந்தன, இது உண்மையான வர்த்தக பரிவர்த்தனைகள் அல்ல என்பதைக் காட்டுகிறது. HPCL தொடர்புடைய நிறுவனங்களைப் பயன்படுத்தி நிதியைத் திசைதிருப்பி, சொத்துக்களை தவறாகப் பயன்படுத்தி, கடன் வழங்குபவர்களின் நலன்களை அழித்தது. இந்த மோசடி சம்பந்தப்பட்ட வங்கிகளுக்கு குறிப்பிடத்தக்க நிதி இழப்புகளை ஏற்படுத்தியுள்ளது, மேலும் கார்ப்பரேட் கடன் வழங்கும் நடைமுறைகளில் உள்ள நம்பிக்கையை சிதைத்துள்ளது. தொடர்புடைய தரப்பு பரிவர்த்தனைகள் மற்றும் நிதி முறைகேடுகள் மூலம் நிதியைத் திசைதிருப்பி இருப்பது வங்கிகளுக்கு பெரும் இழப்புகளை ஏற்படுத்தியுள்ளது" என்று அந்த ஆதாரம் தெரிவித்தது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.