இந்திய ராணுவம் பதிலடி: ஆப்ரேஷன் சிந்தூரில் 100க்கும் மேற்பட்ட பயங்கரவாதிகள் உயிரிழப்பு - முப்படை தளபதிகள் தகவல்

லெப்டினன்ட் ஜெனரல் ராஜீவ் காய், ஏர் மார்ஷல் ஏ.கே. பார்தி மற்றும் வைஸ் அட்மிரல் ஏ.என். பிரமோத் ஆகியோர் தலைமையில் இந்திய ராணுவத்தின் நடவடிக்கைகள் குறித்து விளக்கம் அளிக்கப்பட்டது. அது தொடர்பான செய்தியாளர் சந்திப்பில் பல்வேறு தகவல்கள் அளிக்கப்பட்டன. அதன்படி, துரிதமான மற்றும் திட்டமிட்ட ராணுவ நடவடிக்கையின் விளைவாக 100க்கும் மேற்பட்ட பயங்கரவாதிகள் மற்றும் 35-40 பாகிஸ்தான் ராணுவ வீரர்கள் கொல்லப்பட்டதாக தெரிவித்தனர். இது தவிர இந்திய ராணுவத்தினரும் இதில் உயிரிழந்ததாக அறிவிக்கப்பட்டது. மேலும், இதில் அளிக்கப்பட்ட சில முக்கிய தகவல்களை இந்தக் குறிப்பில் பார்க்கலாம்.

01. 100-க்கும் மேற்பட்ட பயங்கரவாதிகள் கொல்லப்பட்டனர், 9 தளங்களில் தாக்குதல்

மே 7 முதல் மே 10 வரை, இந்திய ஆயுதப் படைகள், பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் (PoK) அமைந்துள்ள 21 இலக்கு பயங்கரவாத முகாம்களில், ஒன்பது முகாம்களை துல்லியமான வான் மற்றும் பீரங்கித் தாக்குதல்கள் மூலம் தாக்கின. லெப்டினன்ட் ஜெனரல் ராஜீவ் காய் கூறுகையில், "அந்த ஒன்பது பயங்கரவாத மையங்களில் நடத்தப்பட்ட தாக்குதல்களில் 100க்கும் மேற்பட்ட பயங்கரவாதிகள் கொல்லப்பட்டனர்" என்றார்.

02. ஐசி-814 கடத்தல்காரர்கள், புல்வாமா சம்பவத்தில் ஈடுபட்டவர்கள் மீது தாக்குதல் 

கொல்லப்பட்ட பயங்கரவாதிகளில் யூசுப் அசார் (ஐசி-814 இந்தியன் ஏர்லைன்ஸ் விமானக் கடத்தலுடன் தொடர்புடையவர்), அப்துல் மாலிக் ராஃப் மற்றும் முடாசிர் அகமது ஆகியோர் அடங்குவர். இவர்கள் 2019 புல்வாமா தாக்குதல் உட்பட இந்தியாவுக்கு எதிரான கடந்த கால முக்கிய பயங்கரவாத நடவடிக்கைகளில் ஈடுபட்டனர் என்று கூறப்படுகிறது.

03 எல்லைக் கட்டுப்பாட்டு கோடு அருகே 35-40 பாகிஸ்தான் வீரர்கள் உயிரிழப்பு

லெப்டினன்ட் ஜெனரல் ராஜீவ் காய் கூற்றுப்படி, மே 7 முதல் மே 10 வரை சுமார் 35 - 40 பாகிஸ்தான் ராணுவ வீரர்கள் கொல்லப்பட்டனர் என்று தெரிவிக்கப்பட்டுள்ளது. இவை எல்லைக் கட்டுப்பாட்டு கோடு (LoC) அருகே நடந்த கடுமையான எல்லை தாண்டிய பீரங்கிச் சண்டைகளின் போது நிகழ்ந்தன.

04. 5 இந்திய வீரர்கள் உயிரிழப்பு

ஆப்ரேஷன் சிந்தூர் நடவடிக்கையின் போது இந்தியா, ஐந்து ராணுவ வீரர்களை இழந்தது. வான்வழி சண்டைகளின் போது இந்திய விமானப்படை விமானங்கள் அல்லது வீரர்கள் யாரும் இழக்கப்படவில்லை. மேலும், அனைத்து ஐ.ஏ.எஃப் விமானிகளும் பத்திரமாக திரும்பினர்.

05. பல பாகிஸ்தான் விமானங்களை வீழ்த்திய ஐ.ஏ.எஃப் 

இந்திய விமானப்படை (IAF) வான்வழி மோதல்களின் போது, பல பாகிஸ்தான் போர் விமானங்களை வெற்றிகரமாக வீழ்த்தியதாக ஏர் மார்ஷல் ஏ.கே. பார்தி தெரிவித்தார். அழிக்கப்பட்ட விமானங்களின் சரியான எண்ணிக்கை வெளியிடப்படவில்லை என்றாலும், ஐ.ஏ.எஃப் நடவடிக்கை முழுவதும் வான் ஆதிக்கத்தை நிலை நாட்டியது.

06. பாகிஸ்தானின் அனைத்து அச்சுறுத்தல்களும் முறியடிக்கப்பட்டன

மே 7 முதல் மே 10 வரை, இந்திய இராணுவ மற்றும் பொதுமக்கள் பகுதிகளை குறிவைத்து பல UAV மற்றும் ட்ரோன் ஊடுருவல்களை பாகிஸ்தான் நடத்தியது. இருப்பினும், இந்திய வான் பாதுகாப்பு அமைப்புகள் கிட்டத்தட்ட அனைத்து அச்சுறுத்தல்களையும் இடைமறித்து முறியடித்தன. இதனால் சேதம் கட்டுப்படுத்தப்பட்டது. 

07. பாகிஸ்தானின் ரேடார் அமைப்புகள் மீது ஐ.ஏ.எஃப் பதிலடி தாக்குதல்

பாகிஸ்தானின் ரேடார் அமைப்புகள், விமான தளங்கள் மற்றும் கட்டளை மையங்கள் மீது இந்திய ஆயுதப் படைகள் பதிலடி தாக்குதல்களை நடத்தின. லாகூர், குஜ்ரன்வாலா, சக்லாலா மற்றும் பி.ஏ.எஃப் ரஃபிகி விமான தளம் ஆகிய இடங்களில் உள்ள பாகிஸ்தான் இராணுவ வசதிகள் உறுதிப்படுத்தப்பட்ட இலக்குகளும் இதில் அடங்கும். 

08. ஐ.என்.எஸ் செயல்பாடுகள்

வைஸ் அட்மிரல் ஏ.என். பிரமோத் கூறுகையில், "ஏப்ரல் 22 அன்று ஜம்மு காஷ்மீரில் உள்ள பஹல்காமில் பாகிஸ்தான் ஆதரவு பயங்கரவாதிகளால் அப்பாவி சுற்றுலாப் பயணிகள் மீது நடத்தப்பட்ட கோழைத்தனமான தாக்குதல்களுக்குப் பின்னர், இந்திய கடற்படையின் கேரியர் போர் குழு, மேற்பரப்புப் படைகள், நீர்மூழ்கிக் கப்பல்கள் மற்றும் விமான சொத்துக்கள் முழு போர் தயார்நிலையுடன் உடனடியாக கடலில் நிலை நிறுத்தப்பட்டன" என தெரிவித்தார்.

09. பாகிஸ்தான் ஒப்பந்தத்தை மீறினால் ராணுவ தளபதிகளுக்கு முழு அதிகாரம்

மே 10 அன்று, இந்திய மற்றும் பாகிஸ்தான் ராணுவ நடவடிக்கைகளின் இயக்குநர்கள் ஜெனரல்களுக்கு (DGMOs) இடையிலான ஹாட்லைன் பேச்சுவார்த்தையைத் தொடர்ந்து, பரஸ்பர போர் நிறுத்த உடன்பாடு எட்டப்பட்டது. இருப்பினும், பாகிஸ்தான் கூடுதல் பீரங்கித் தாக்குதல்கள் மற்றும் ட்ரோன் தாக்குதல்களை நடத்தியதன் மூலம் சில மணி நேரங்களுக்குள் உடன்படிக்கையை மீறியது. இது மேலும் அளவீடு செய்யப்பட்ட எதிர் நடவடிக்கைகளுக்கு வழிவகுத்தது. இந்த சூழலில் பாகிஸ்தானின் எந்தவொரு மீறலுக்கும் பதிலடி கொடுப்பதற்காக முப்படையின் தளபதிகளுக்கு முழு அதிகாரம் வழங்கப்பட்டது. இந்நிலையில், மே 12-ஆம் தேதி அடுத்தகட்ட பேச்சுவார்த்தை நடத்தப்பட இருக்கிறது.

10. கடந்த சில நாட்களின் நடவடிக்கைகள் 'போருக்கு குறைவானதல்ல': டி.ஜி.எம்.ஓ லெப்டினன்ட் ஜெனரல் காய்

"கடந்த 3-4 நாட்களாக நடந்து வரும் நடவடிக்கைகள் போருக்கு குறைவானதல்ல. சாதாரண சூழ்நிலையில், இரு நாடுகளின் விமானப்படைகளும் வானில் பறந்து ஒருவரையொருவர் தாக்குவதில்லை" என்று லெப்டினன்ட் ஜெனரல் காய் கூறினார்.