நாடாளுமன்ற இருக்கை ஒதுக்கீடு; காங்கிரஸ் மீது குற்றம் சாட்டும் இந்தியா கூட்டணி; என்.டி.ஏ கூட்டணி கட்சிகளும் அதிருப்தி

Liz Mathew

மக்களவையில் செவ்வாய்கிழமை கேள்வி நேரத்தின் போது, தெலுங்கு தேசம் கட்சியின் மூத்த எம்.பி மகுண்டா ஸ்ரீனிவாசுலு ரெட்டி தனக்கு எட்டாவது வரிசை இருக்கை ஒதுக்கப்பட்டது குறித்து அதிருப்தி தெரிவித்தார். பா.ஜ.க கூட்டணி கட்சியைச் சேர்ந்த ஒரு கட்சியின் உறுப்பினரான ரெட்டி, தனது குறையை உண்மையானது என்று உணர்ந்தார்: அவர் ஐந்தாவது முறை எம்.பி., மற்றும் கடந்த மக்களவையில் இரண்டாவது வரிசையில் அமர்ந்திருந்தார்.

ஆங்கிலத்தில் படிக்க: INDIA bloc parties blame Congress, NDA allies not happy either as Lok Sabha unveils new seating arrangement

சபாநாயகர் ஓம் பிர்லா, ரெட்டியின் புகார்களை பின்னர் ஒத்திவைக்குமாறு கூறினார். “எந்தவொரு உறுப்பினரும் சபையின் அரங்கில் பாராளுமன்றத்தின் வேலை ஏற்பாடுகள் குறித்து கேள்வி எழுப்பக்கூடாது. உங்களுக்கு ஏதேனும் பிரச்சினை அல்லது கவலைகள் இருந்தால், தயவு செய்து எனது அறையிலோ அல்லது பாராளுமன்ற விவகாரங்கள் துறை அமைச்சகத்திடமோ சென்று தெரிவிக்க வேண்டும். இந்த மரபு ஒரு விதியாக பின்பற்றப்படட்டும்” என்று பிர்லா கூறினார்.

இருப்பினும், ரெட்டியைப் போல அவர்கள் அதை பகிரங்கமாக வெளிப்படுத்தவில்லை என்றாலும், பல மூத்த எம்.பி.க்கள் மக்களவையில் புதிய இருக்கை ஏற்பாட்டால் அதிருப்தி அடைந்துள்ளனர். பல காங்கிரஸ் எம்.பி.க்கள் முன் வரிசைகளை ஒதுக்குவதில் "தர்க்கம் இல்லை" என்று கூறினர், அதே வேளையில் இந்தியா கூட்டணியில் உள்ள அதன் கூட்டணி கட்சிகள் மிகவும் விரும்பப்பட்ட "எட்டாவது தொகுதியில்" இருந்து தங்களை விலக்கி வைப்பதில் காங்கிரஸ் தலைமையின் ஆதிக்கத்தைப் பார்த்தார்கள், எட்டாவது தொகுதி என்பது சபாநாயகர் இருக்கையின் இடது பக்கம் உள்ள முதல் தொகுதியாகும்.

எதிர்க்கட்சித் தலைவர் ராகுல் காந்தியின் இருக்கை எட்டாவது தொகுதியில் உள்ளது (இடதுபுறத்தில், கருவூல பெஞ்ச்களில் பிரதமர் மற்றும் மூத்த அமைச்சர்கள், முதல் தொகுதியில் அமர்ந்துள்ளனர்), காங்கிரஸ் பொதுச் செயலாளரும் பொதுக் கணக்குக் குழுத் தலைவருமான கே.சி.வேணுகோபால், தி.மு.க தலைவர் டி.ஆர் பாலு ஆகியோருடன் இந்த தொகுதியின் இரண்டாவது வரிசையில், காங்கிரஸ் அல்லாத ஒரே எம்.பி., தி.மு.க.,வின் ஆ.ராசா. புதிதாக தேர்ந்தெடுக்கப்பட்ட வயநாடு எம்.பி பிரியங்கா காந்தி வத்ராவுக்கு அதே தொகுதியில் நான்காவது வரிசையில் இருக்கை ஒதுக்கப்பட்டுள்ளது. மக்களவையில் காங்கிரஸ் துணைத் தலைவர் கவுரவ் கோகோய் மற்றும் காங்கிரஸ் தலைமைக் கொறடா சுரேஷ் கொடிக்குன்னில் ஆகியோர் அடுத்த தொகுதியின் முன் வரிசையில் உள்ளனர்.

இருக்கை ஒதுக்கீடுகள் மீதான அதிருப்தியின் மையத்தில், அவை நடவடிக்கைகளின் நேரடி ஒளிபரப்பிற்கான கேமராக்களின் கவனம் உள்ளது. கருவூல பெஞ்சுகள் தவிர, கேமராக்கள் முக்கியமாக எதிர்க்கட்சித் தலைவர் அமர்ந்திருக்கும் எட்டாவது தொகுதியில் கவனம் செலுத்துகின்றன. பல எம்.பி.க்கள் அந்தந்த தொகுதிகளில் தங்களின் அந்தஸ்துக்கு நேரடி ஒளிபரப்பில் தெரிவது முக்கியம் என்று கூறுகிறார்கள்.

முந்தைய மக்களவையின் ஏற்பாட்டில், தி.மு.க தலைவர்கள் கனிமொழி மற்றும் தயாநிதி மாறன் மற்றும் என்.சி.பி (எஸ்.பி) கட்சியின் சுப்ரியா சுலே ஆகியோர் காங்கிரஸ் மூத்த தலைவர்களுடன் கடைசி தொகுதியில் அமர்ந்திருந்தனர். தற்போது மூவரும் ஏழாவது தொகுதிக்கு தள்ளப்பட்டுள்ளனர். புதிய இருக்கை அமைப்பில் சுப்ரியா சுலே அதிருப்தி அடைந்துள்ளதாகவும் கூறப்படுகிறது.

புதிய இடங்கள் ஒதுக்கப்படுவதற்கு முன்பு, சமாஜ்வாதி கட்சி (SP) தலைவர் அகிலேஷ் யாதவ் மற்றும் மூத்த தலைவர்கள் அவதேஷ் பிரசாத் மற்றும் டிம்பிள் யாதவ் ஆகியோரும் எட்டாவது தொகுதியில் மூத்த காங்கிரஸ் தலைவர்களுடன் முதல் மற்றும் இரண்டாவது வரிசைகளில் இருக்கைகளில் அமர்ந்தனர். புதிய இருக்கை ஒதுக்கீட்டில், அகிலேஷ் யாதவுக்கு காங்கிரஸ் தலைவர்களிடம் இருந்து விலகி, ஆறாவது தொகுதியின் முதல் வரிசையில் இடம் ஒதுக்கப்பட்டுள்ளது. திரிணாமுல் காங்கிரஸ் தலைவர் சுதிப் பந்தோபாத்யாயும் ஆறாவது தொகுதியின் முதல் வரிசையில் உள்ளார்.

இருக்கை பங்கீடு தொடர்பாக சமாஜ்வாதி கட்சியும் குற்றம் சாட்டுவதாக காங்கிரஸ் வட்டாரங்கள் ஒப்புக் கொண்டன. செவ்வாய்க்கிழமை காலை லோக்சபாவில் இருந்த ஒரு எம்.பி.,யின் கூற்றுப்படி, அகிலேஷ் சபைக்குள் நுழைந்தவுடன், "நன்றி, காங்கிரஸ்" என்று கருத்து தெரிவித்தார். காங்கிரஸின் வேணுகோபால் அகிலேஷின் இருக்கைக்குச் சென்று, ராகுல் காந்திக்கு அருகில் உள்ள இருக்கையில் அமரலாம் என்று சைகை செய்த நிலையில், அகிலேஷ் மறுத்துவிட்டார்.

எதிர்க்கட்சிகளுக்கான நாடாளுமன்ற விவகார அமைச்சகத்தின் இருக்கை ஒதுக்கீட்டில் காங்கிரஸ் தலையீடு முக்கியமானது என்று சபாநாயகர் அலுவலக வட்டாரங்கள் தெரிவித்தன. “எதிர்க்கட்சிக்கு தொகுதிகளை ஒதுக்குகிறோம். எதிர்க்கட்சித் தலைவரும் கட்சியும் இருக்கைப் பங்கீட்டிற்கான ஆலோசனைகளை வழங்குகின்றன” என்று அந்த வட்டாரம் தெரிவித்தது.

முந்தைய மக்களவையில் ராகுல் காந்திக்கு பின்னால் வரிசைகளில் அமர்ந்திருந்த ஒரு மூத்த இந்தியா கூட்டணி தலைவர், முந்தைய ஏற்பாட்டில், எதிர்க்கட்சித் தலைவர்கள் கலந்து இருக்கைகளை பகிர்ந்து கொண்டனர் என்று சுட்டிக்காட்டினார். “இப்போது காங்கிரஸ் தனது கூட்டணி தலைவர்களுக்கு முக்கிய தொகுதியில் ஒரு சில இடங்களை மட்டும் கொடுத்து, பெரும்பாலான இடங்களை தனக்கே வைத்துக்கொண்டுள்ளது. இது கூட்டணி யோசனைக்கு ஒத்து வராது. ஒவ்வொரு சிறிய கட்சியும் தங்கள் வழியில் ஒத்துழைக்க வேண்டும் என்று காங்கிரஸ் விரும்புகிறது, ஆனால் அவர்கள் எந்த அதிகாரப் பகிர்வையும் செய்ய விரும்பவில்லை,” என்று ஒரு கூட்டணிக் கட்சியைச் சேர்ந்த தலைவர் ஒருவர் கூறினார்.

ஆனால் காங்கிரஸ் தலைவர்களும் இருக்கையில் மகிழ்ச்சியடையவில்லை. காங்கிரஸ் மூத்த தலைவரும், முன்னாள் கேபினட் அமைச்சருமான மணீஷ் திவாரி இப்போது நான்காவது வரிசையில் உள்ள நிலையில், மற்றொரு மூத்த எம்.பி சசி தரூருக்கு மூன்றாவது வரிசையில் இடம் அளிக்கப்பட்டுள்ளது. "இடங்கள் ஒதுக்கப்பட்டதில் எந்த தர்க்கமும் இல்லை" என்று ஒரு மூத்த காங்கிரஸ் எம்.பி கூறினார்.

"சபையின் உள்ளே உங்கள் இருக்கை உங்கள் அனுபவத்தில் நீங்கள் பெற்ற மரியாதை, கௌரவம் மற்றும் அந்தஸ்தைப் பற்றி நிறைய கூறுகிறது. இந்த விஷயங்களைக் கணக்கிடாதபோது, அது ஈகோவையும் காயப்படுத்துகிறது,” என்று ஒரு எம்.பி மேலும் கூறினார்.

ரெட்டிக்கு மட்டும் அல்லாமல், கட்சிக்கு ஒதுக்கப்பட்ட இடங்களை மறுபரிசீலனை செய்யக் கோரி, மத்திய நாடாளுமன்ற விவகார அமைச்சகம் மற்றும் சபாநாயகரையும் தெலுங்கு தேசம் கட்சி அணுகியதாக கூறப்படுகிறது. மக்களவைத் தேர்தலுக்கு முன்பு தேவராயலு விலகிய ஒய்.எஸ்.ஆர் காங்கிரஸ் கட்சியின் (ஒய்.எஸ்.ஆர்.சி.பி) மிதுன் ரெட்டிக்கு அருகில் அவர் அமர்ந்திருப்பது குறித்து தெலுங்கு தேசம் கட்சியின் மக்களவைத் தலைவர் லவ் ஸ்ரீ கிருஷ்ண தேவராயலு அதிருப்தி அடைந்துள்ளதாக கூறப்படுகிறது. தேவராயலுவின் இருக்கை மாற்றப்பட்டாலும், மற்ற தெலுங்கு தேசம் கட்சி எம்.பி.க்களும் ஒய்.எஸ்.ஆர்.சி.பி.,யின் எம்.பி.க்களுடன் அமர்ந்திருப்பதில் மகிழ்ச்சியடையவில்லை.

பா.ஜ.க.,வும் சீட் மாற்றங்களைக் கண்டாலும் - ஆளுங்கட்சியின் மூத்த உறுப்பினர்களில் ஒருவரான மத்திய அமைச்சர் நிதின் கட்கரிக்கு ஒதுக்கப்பட்ட இருக்கை, இருக்கை பட்டியல் வெளிவந்த 24 மணி நேரத்தில் 58 லிருந்து 4 ஆக மாற்றியமைக்கப்பட்டது. இது எதிர்க்கட்சிகளில் அதிக சலசலப்புகளை ஏற்படுத்தியுள்ளது. 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“