ஜெகதீப் தன்கர் அசாதாரண மௌனம்: அவர் பேசுவதைக் கேட்க நாடு காத்திருக்கிறது: காங்கிரஸ்

முன்னாள் குடியரசுத் துணைத் தலைவர் ஜெகதீப் தன்கர் கடந்த 50 நாட்களாக அசாதாரண மௌனத்தைக் கடைப்பிடித்து வருவதாக காங்கிரஸ் செவ்வாய்க்கிழமை கூறியது.

ஆங்கிலத்தில் படிக்க:

ஜெகதீப் தன்கரின் திடீர் ராஜினாமாவால் ஏற்பட்டுள்ள குடியரசுத் துணைத் தலைவர் தேர்தலில், தேசிய ஜனநாயகக் கூட்டணியின் சி.பி. ராதாகிருஷ்ணன் மற்றும் எதிர்க்கட்சிகளின் பி. சுதர்சன் ரெட்டி இடையே நேரடிப் போட்டி நடைபெறுகிறது. இதில், பா.ஜ.க தலைமையிலான கூட்டணிக்கு வெற்றி வாய்ப்பு அதிகம் உள்ளது.

காங்கிரஸ் பொதுச் செயலாளர் ஜெய்ராம் ரமேஷ், ஜெகதீப் தன்கர் 50 நாட்களாக "அசாதாரண மௌனத்தைக்" கடைப்பிடித்து வருவதாகக் கூறினார்.

“விவசாயிகள் மோடி அரசால் புறக்கணிக்கப்படுவது குறித்தும், அதிகாரத்தில் இருப்பவர்களின் ‘அகங்காரத்தால்’ ஏற்படும் ஆபத்துகள் குறித்தும் அவர் கவலை தெரிவித்த பிறகு, குடியரசுத் துணைத் தலைவர் பதவியிலிருந்து அவர் எதிர்பாராத விதமாக ராஜினாமா செய்த நிலையில், அவருக்கு அடுத்த குடியரசுத் துணைத் தலைவருக்கான தேர்தல் நடைபெறும் இன்று, அவர் பேசுவதற்காக நாடு தொடர்ந்து காத்திருக்கிறது” என்று ஜெய்ராம் ரமேஷ் கூறினார்.

ஆளும் தேசிய ஜனநாயகக் கூட்டணி மற்றும் எதிர்க்கட்சியான இந்தியா கூட்டணி ஆகிய இரண்டும் திங்கட்கிழமை நாடாளுமன்ற வளாகத்தில் தனித்தனி கூட்டங்களை நடத்தி, தங்கள் பலத்தை வெளிப்படுத்தின. அப்போது, தங்கள் நாடாளுமன்ற உறுப்பினர்களுக்கு தேர்தல் செயல்முறை குறித்து விளக்கமளித்ததுடன், மாதிரி வாக்கெடுப்புகளையும் நடத்தி, சரியான முறையில் வாக்களிக்குமாறு வலியுறுத்தின.

குடியரசுத் துணைத் தலைவர் தேர்தல் ரகசிய வாக்கெடுப்பு முறையில் நடைபெறுவதால், நாடாளுமன்ற உறுப்பினர்கள் கட்சியின் உத்தரவுக்கு கட்டுப்பட வேண்டியதில்லை.