எதிர்க்கட்சித் தலைவர்களை வரவேற்க ஐஏஎஸ் அதிகாரிகள், 6.5 கோடி கன்னடர்களுக்கு அவமானம்: குமாரசாமி சாடல்

மெகா எதிர்க்கட்சி கூட்டத்தில் பங்கேற்பதற்காக திங்கள்கிழமை பெங்களூரு வந்த பல்வேறு எதிர்க்கட்சிகளின் தலைவர்களை வரவேற்க மூத்த ஐஏஎஸ் அதிகாரிகளை நியமித்ததற்காக, கர்நாடகாவில் காங்கிரஸ் ஆட்சி மீது கடும் விமர்சனங்கள் எழுந்துள்ளன

தலைவர்களை வரவேற்க அனுப்பப்பட்ட அதிகாரிகளின் பட்டியலை ட்வீட் செய்த மதச்சார்பற்ற ஜனதா தளம் தலைவர் எச் டி குமாரசாமி, "கர்நாடகத்தின் பெருமை, பாரம்பரியம் மற்றும் சுயமரியாதைக்கு இறுதி சடங்குகளை நடத்துவதாக" அரசை கடுமையாக சாடியுள்ளார்.

பிற மாநிலங்களில் இருந்து வரும் அரசியல்வாதிகளை வரவேற்க ஐஏஎஸ் அதிகாரிகளை அனுப்பியது தவறானது.

இது அரசாங்கத்தின் வேலைத்திட்டமோ, புதிய அரசாங்கத்தின் பதவிப்பிரமாணமோ அல்ல. இது வெறும் அரசியல் சந்திப்பு. இந்த தலைவர்களை வரவேற்க பொறுப்பான அதிகாரிகளை அனுப்புவது 6.5 கோடி கன்னடர்களை அவமதிக்கும் செயலாகும்.

அரசியல் தலைவர்களை வரவேற்க அதிகாரிகளை நியமித்தது, ஆளும் காங்கிரஸ் அரசின் ஆணவத்தை பிரதிபலிக்கிறது என்று குமாரசாமி குற்றம் சாட்டினார்.

இது ஐஏஎஸ் சேவை விதிகளின் தெளிவான மீறல்.

தலைவர்களை வரவேற்க சம்மதித்தால் கவுரவம் கெடும் என்று தெரிந்த பிறகும் அதிகாரிகள் இதற்கு சம்மதித்தது எனக்கு அதிர்ச்சியாக உள்ளது, என்று கூறிய அவர், இந்த விவகாரத்தில் தலைமைச் செயலாளர் பதில் அளிக்க வேண்டும் என்று கோரிக்கை விடுத்தார்.

குமாரசாமி பகிர்ந்துள்ள உத்தேசிக்கப்பட்ட பட்டியலில், அன்புகுமார், கேபி மோகன் ராஜ், வி பொன்னுராஜ், சி ஷிகா, எம்டி ரெஜு, டாக்டர் த்ரிலோக் சந்திர கேவி மற்றும் விஷால் ஆர் உள்ளிட்ட பல முக்கிய ஐஏஎஸ் அதிகாரிகளின் பெயர்கள் இடம்பெற்றுள்ளன.

முதலாளித்துவத்தை நம்பும் காங்கிரஸ், மாநிலத்தில் "ஐஏஎஸ் கொத்தடிமைத் தொழிலாளர்களை" அறிமுகப்படுத்தியுள்ளது மற்றும் "அரசியல், நிர்வாக காலனித்துவத்தின்" புதிய வடிவத்தைத் தொடங்கியுள்ளது என்று கர்நாடக முன்னாள் முதல்வர் குற்றம் சாட்டினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“