துணை சபாநாயகர் பதவி; தேசிய ஜனநாயக கூட்டணிக்கா? எதிர்க்கட்சிக்கா? விரைவில் பேச்சுவார்த்தை

Liz Mathew

18வது மக்களவைக்கு துணை சபாநாயகர் இருப்பார் என்று அரசு வட்டாரம் வியாழக்கிழமை தெரிவித்துள்ளது.

ஆங்கிலத்தில் படிக்க:

“இந்த சபையில் ஒரு துணை சபாநாயகர் இருப்பார். ஆனால் இந்த பதவியை எதிர்க்கட்சிகள் அல்லது தேசிய ஜனநாயக கூட்டணி கட்சிகளுக்கு வழங்குவதா அல்லது அதை பா.ஜ.க தக்க வைத்துக் கொள்வதா என்பது குறித்து இன்னும் முடிவு செய்யப்படவில்லை. அதுபற்றி விவாதங்கள் நடைபெறும்” என்று அந்த வட்டாரம் தெரிவித்தது.

துணை சபாநாயகர் பதவியை எதிர்க்கட்சிக்கு வழங்க வேண்டும் என காங்கிரஸ் தொடர்ந்து வலியுறுத்தி வருகிறது.

17வது லோக்சபாவில், அந்த பதவி காலியாக இருந்தது, 2014ல், அ.தி.மு.க.,வின் எம்.தம்பிதுரை துணை சபாநாயகராக இருந்தார். காங்கிரஸ் தலைமையிலான ஐக்கிய முற்போக்குக் கூட்டணியின் இரண்டு பதவிக் காலத்தில், துணை சபாநாயகர் பதவி பா.ஜ.க.,வுக்கு வழங்கப்பட்டது மற்றும் அதன் எம்.பி.,க்கள் சரஞ்சித் சிங் அத்வால் மற்றும் கரியா முண்டா ஆகியோர் முறையே 2004 மற்றும் 2009 இல் துணை சபாநாயகர் ஆனார்கள்.

இந்த முறை, பா.ஜ.க.,வின் கூட்டணி கட்சிகளான தெலுங்கு தேசம் (TDP) மற்றும் ஐக்கிய ஜனதா தளம் (JD(U)) கட்சிகள் துணை சபாநாயகர் பதவியைக் கோரப் போவதில்லை என்று கூறி வருகின்றன.

புதன்கிழமை, தெலுங்கு தேசம் கட்சியின் தேசிய செய்தித் தொடர்பாளர் பட்டாபி ராம் கொம்மாரெட்டி தி இந்தியன் எக்ஸ்பிரஸ்ஸிடம் கூறினார்: “நாங்கள் பதவிக்கு ஆசைப்படவில்லை. நாங்கள் மிகத் தெளிவாக கூறியுள்ளோம்” என்றார். பா.ஜ.க.,வும், அந்தப் பதவியை நிரப்புவதற்கு தெலுங்கு தேசம் கட்சியை அணுகவில்லை என்றும் அவர் கூறினார்.

மற்றொரு மூத்த தெலுங்கு தேசம் தலைவர் கூறுகையில், “ஆரம்பத்தில் இருந்தே சபாநாயகர் பதவி அல்லது துணை சபாநாயகர் பதவிகளுக்கு தெலுங்கு தேசம் கட்சி தனது விருப்பத்தை வெளிப்படுத்தவில்லை. அவர்கள் ஆர்வமாக இருந்தால், மற்ற (தேசிய ஜனநாயக கூட்டணி) கட்சிகளுக்கு நாங்கள் அதைத் திறந்துவிட்டோம்,” என்றார்.

அரசாங்கம் இதுவரை தங்களுக்கு எதுவும் தெரிவிக்கவில்லை என எதிர்க்கட்சி வட்டாரங்கள் தெரிவிக்கின்றன.

எதிர்க்கட்சிக்கு துணை சபாநாயகர் பதவி வழங்கினால், காங்கிரஸ் எம்.பி.,யை நியமிக்க வேண்டும் என, காங்கிரசில் உள்ள ஒரு பிரிவினர் கருதுகின்றனர். ஆனால் மற்றொரு பிரிவினர் காங்கிரஸ் தனது கூட்டணி கட்சிகளுக்கு பதவியை வழங்க வேண்டும் என்றும், இந்திய கூட்டணியின் ஒற்றுமை குறித்து நேர்மறையான கருத்தை உருவாக்க வேண்டும் என்றும் நினைக்கிறார்கள்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“