முதல்வராக மாயாவதி, 46% தள்ளுபடி மோசடியில் 261 வீடுகளைப் பெற்ற சகோதரர், அவரது மனைவி; தணிக்கை அறிக்கை

Dheeraj Mishra

ரியல் எஸ்டேட் நிறுவனமான லாஜிக்ஸ் இன்ப்ராடெக் பிரைவேட் லிமிடெட் (Logix Infratech Private Ltd) உருவாக்கிய நொய்டா அடுக்குமாடி குடியிருப்பில் உள்ள 261 அடுக்குமாடி குடியிருப்புகள் பகுஜன் சமாஜ் கட்சியின் (BSP) தலைவரும், உத்தரபிரதேச முன்னாள் முதல்வருமான மாயாவதியின் சகோதரர் மற்றும் அவரது மனைவிக்கு "ஏமாற்றுதல்" மற்றும் "குறைவாக மதிப்பிடுதல்" ஆகியவற்றின் மூலம் "மோசடி" முறையில் ஒதுக்கப்பட்டுள்ளன என்று தி இந்தியன் எக்ஸ்பிரஸ் ஆய்வு செய்த அதிகாரப்பூர்வ பதிவுகள் வெளிப்படுத்தியுள்ளன.

கடந்த 12 ஆண்டுகளில், நிறுவனம் இணைக்கப்பட்டதில் இருந்து அதன் திவால் நடவடிக்கைகள் மற்றும் மே 2023 இல் நடந்த தடயவியல் தணிக்கை வரையிலான நிகழ்வுகளின் வரிசையானது, கூறப்படும் முறைகேடுகளை வரிசையாக வெளிப்படுத்துகிறது.

இதையும் படியுங்கள்: பொது சிவில் சட்டம்: 30 நாட்களுக்குள் கருத்து தெரிவிக்கலாம்; சட்ட ஆணையம் அறிவிப்பு

தி இந்தியன் எக்ஸ்பிரஸ் ஆய்வு செய்த அதிகாரப்பூர்வ பதிவுகள் மற்றும் அறிக்கைகளின்படி, இந்த வரிசையைக் கவனியுங்கள்:

மே 2010: லாஜிக்ஸ் இன்ப்ராடெக் பிரைவேட் லிமிடெட் இணைக்கப்பட்டது; 2007 மே மாதம் வெற்றி பெற்று முதல்வராக பொறுப்பேற்றார் மாயாவதி.

ஜூலை 2010: இரண்டு மாதங்களுக்குள், லாஜிக்ஸ் நிறுவனம் மாயாவதியின் சகோதரர் ஆனந்த் குமார் மற்றும் அவரது மனைவி விசித்தர் லதாவுடன், நொய்டா திட்டமான ப்ளாசம் கிரீன்ஸில் தலா 2 லட்சம் சதுர அடி இடத்தை, ஒன்றை சதுர அடி ரூ.2,300க்கும், மற்றொன்றை சதுர அடி ரூ.2,350க்கும் விற்க ஒப்பந்தத்தில் கையெழுத்திட்டது. ஆக, ஆனந்த் குமாரின் மொத்த கொள்முதல் விலை ரூ.46.02 கோடியாகவும், விசித்தர் லதாவின் மொத்த கொள்முதல் விலை ரூ.46.93 கோடியாகவும் இருந்தது.

செப்டம்பர் 2010: இந்த ஒப்பந்தங்கள் முடிந்த மூன்று மாதங்களுக்குள், உத்தரபிரதேச அரசாங்கத்தின் கீழ் உள்ள நொய்டா ஆணையம், ப்ளாசம் கிரீன்ஸில் 22 டவர்களை உருவாக்க லாஜிக்ஸ் இன்ஃப்ராடெக் நிறுவனத்திற்கு 1,00,112.19 சதுர மீட்டர் அல்லது 24.74 ஏக்கரை குத்தகைக்கு விட்டது.

செப்டம்பர் 2010 முதல் 2022-23 வரை: இந்த ஆண்டுகளில், ப்ளாசம் கிரீன்ஸில் உள்ள மொத்த 2,538 குடியிருப்புகளில் 2,329 வீடுகளை லாஜிக்ஸ் நிறுவனம் விற்றது. இதுவரை, லாஜிக்ஸ் நிறுவனம் 944 அடுக்குமாடி குடியிருப்புகளை உள்ளடக்கிய எட்டு டவர்களை உடைமையாக்க முன்வந்துள்ளது, அவற்றில் 848 குடியிருப்புகள் ஒப்படைக்கப்பட்டுள்ளன. மீதமுள்ள 14 கோபுரங்களின் சிவில் கட்டமைப்பு முடிந்துவிட்டாலும், கோபுரங்கள் இன்னும் ஒப்படைக்கப்படவில்லை.

ஏப்ரல் 4, 2016: முறையே ரூ.28.24 கோடி மற்றும் ரூ.28.19 கோடி “முன்பணம்” செலுத்திய பிறகு ஆனந்த் குமாருக்கு 135 குடியிருப்புகளும், விசித்தர் லதாவுக்கு மீதி 126 அடுக்குமாடி குடியிருப்புகளும் ஒதுக்கப்பட்டன.

பிப்ரவரி 15, 2020: ரூ.259.80 கோடி மதிப்பிலான ப்ளாசம் கிரீன்ஸ் நிறுவனத்திற்கு சிவில் மற்றும் கட்டமைப்புப் பணிகளை வழங்கிய கட்டுமான நிறுவனமான அலுவாலியா கான்ட்ராக்ட்ஸ் (இந்தியா) லிமிடெட் நிறுவனத்திடம் இருந்து ரூ.7.72 கோடி செலுத்தப்படாத நிலுவைத் தொகையைக் கோரும் முதல் நோட்டீஸை லாஜிக்ஸ் இன்ஃப்ராடெக் பெற்றது.

அக்டோபர் 2020: கோவிட்-19, 2019-இறுதியில் என்.சி.ஆரில் கட்டுமானப் பணிகளுக்குத் தடை விதிக்கப்பட்டது மற்றும் திறமையான பணியாளர்கள் கிடைக்காதது ஆகியவற்றை அலுவாலியா ஒப்பந்தங்களுக்கான நிலுவைத் தொகையை செலுத்த முடியாமல் போனதற்கு முக்கியக் காரணங்களாக லாஜிக்ஸ் நிறுவனம் பதிலளித்தது.

செப்டம்பர் 29, 2022: லாஜிக்ஸ் இன்ஃப்ராடெக் பணம் செலுத்த வேண்டிய அனைவரையும் மீட்டெடுக்கும் பொறிமுறையான கார்ப்பரேட் இன்சல்வென்சி ரெசல்யூஷன் பிராசஸ் (சி.ஐ.ஆர்.பி) இயக்கத்தில் லாஜிக்ஸ் அமைப்பிற்கு எதிராக திவால் நடவடிக்கைக்கு NCLT உத்தரவிட்டது.

திவால் விதிமுறைகளின்படி, NCLT ஒரு இடைக்கால தீர்மான நிபுணரை நியமித்தது, அவர் லாஜிக்ஸ் நிறுவனத்தின் கணக்குப் புத்தகங்களை தணிக்கை செய்ய உத்தரவிட்டார். மே 2023 இல் IRP க்கு சமர்ப்பிக்கப்பட்ட இந்த பரிவர்த்தனை தணிக்கை அறிக்கையின் சமீபத்திய வரைவின் படி, ஆனந்த் குமார் மற்றும் விசித்தர் லதா இருவருக்கும் விற்கப்பட்ட குடியிருப்புகள் "குறைவாக மதிப்பிடப்பட்டன" மற்றும் பரிவர்த்தனைகள் "மோசடியானவை" என இந்தியன் எக்ஸ்பிரஸ் மதிப்பாய்வு செய்ததில் கண்டுபிடிக்கப்பட்டது.

திவால் நடவடிக்கையின் கீழ் இருவரும் 96.64 கோடி ரூபாய்க்கு உரிமை கோரியுள்ளனர் என்று பதிவு செய்து, தணிக்கையில் முறைகேடுகள் நடந்ததாகக் கூறப்படுகிறது.

ஒன்று, 2016-17 நிதியாண்டில் மற்ற வீடு வாங்குபவர்களுக்கு குடியிருப்புகள் மாற்றப்பட்ட சராசரி நிகர விகிதம் சதுர அடிக்கு ரூ.4,350.85 ஆக இருக்கும் போது, ​​ஆனந்த் குமாருக்கு சதுர அடிக்கு ரூ.2,300 பில் விதிக்கப்பட்டது. "எனவே, திவால் சட்டம் 2016 இன் பிரிவு 45 இன் கீழ் பரிவர்த்தனைகள் குறைவாக மதிப்பிடப்பட்டுள்ளன" என்று தணிக்கை அறிக்கை கூறுகிறது.

மேலும், அவருக்கு ஒதுக்கப்பட்ட 36 குடியிருப்புகள் ஏற்கனவே மற்றவர்களின் வசம் இருந்தன. இது, தணிக்கை அறிக்கையின்படி, "ஒதுக்கீடு செயல்பாட்டில் சில தவறான விளக்கங்கள் அல்லது ஏமாற்றுதல்கள் உள்ளன" என்று பரிந்துரைக்கப்பட்டுள்ளது.

பணப் பரிவர்த்தனை குறித்து மேலும் கேள்விகளை எழுப்புவது என்னவென்றால், ஆனந்த் குமார் செலுத்திய ரூ.28.24 கோடிக்கான வவுச்சர்கள் முதலீடாகக் காட்டப்படாமல், “வாடிக்கையாளர்களிடமிருந்து முன்பணம்” என்ற தலைப்பின் கீழ் காட்டப்பட்டுள்ளது, என்று தணிக்கை அறிக்கை கூறுகிறது. வங்கி ரசீதுகள் மற்றும் வங்கி அறிக்கைகள் மூலம் தொகைக்கான ரசீது (ரூ. 27.60 கோடி) இருந்தாலும், எங்கள் பகுப்பாய்வில், பெறப்பட்ட நிதி தொடர்புடைய தரப்பினருக்கு மாற்றப்பட்டதைக் கண்டறிந்தோம்" என்று அறிக்கை கூறுகிறது.

ஏறக்குறைய இதேபோன்ற முறைகேடுகள் பற்றிய குற்றச்சாட்டுகள் ஆனந்த் குமாரின் மனைவி விசித்தர் லதா விஷயத்திலும் சுட்டிக்காட்டப்பட்டன: அவை குறைவான விலையில் இருந்து; அவரது 125 குடியிருப்புகளில் 24 மற்றவர்களுக்கு ஒதுக்கப்பட்டது, மேலும் அவரது கட்டணத்தில் ரூ.28.85 கோடி "விளக்கம் ஏதுமின்றி" தொடர்புடைய தரப்பினருக்கு லாஜிக்ஸ் நிறுவனம் மூலம் மாற்றப்பட்டது. “எனவே, மேலே உள்ள ரூ. 28.85 கோடி பரிவர்த்தனையை நாங்கள் மோசடி என்று வகைப்படுத்துகிறோம் என அதில் தெரிவிக்கப்பட்டுள்ளது.

இந்தியன் எக்ஸ்பிரஸ் ஆனந்த் குமார் மற்றும் விசித்தர் லதா இருவருக்கும் கேள்விகளின் பட்டியலை அனுப்பியது, மேலும் அவரது இல்லத்தில் உள்ள உதவியாளரிடம் கேள்விகளின் பட்டியலையும் கொடுத்தது. அவர் கருத்து தெரிவிக்க கிடைக்கவில்லை.

2016 ஆம் ஆண்டின் நடுப்பகுதி வரை தலைமைப் பொறுப்பில் இருந்த லாஜிக்ஸ் நிறுவனத்தின் இயக்குனர் விக்ரம் நாத்தை தொடர்பு கொண்டபோது, ​​அவர் "வெளியில்" இருப்பதால் பேச முடியாது என்றார். அவருக்கு குறுஞ்செய்தி வாயிலாக அனுப்பப்பட்ட கேள்விகளின் விரிவான பட்டியலுக்கு பதில் கிடைக்கவில்லை.

1997 ஆம் ஆண்டு அறிமுகப்படுத்தப்பட்ட லாஜிக்ஸ் குழுமம் பல நிறுவனங்களை அதன் கீழ் கொண்டுள்ளது, மேலும் 4 மில்லியன் சதுர அடி ஐ.டி இடங்களை நிறுவியுள்ளதாகக் கூறுகிறது. 2005-18 ஆம் ஆண்டில், நொய்டா ஆணையம் லாஜிக்ஸ் குழுமத்திற்கு 22 சதவீத வணிக நிலங்களை ஒதுக்கியது என்றும், மார்ச் 31, 2020 நிலவரப்படி, குழுமத்தின் நிலுவைத் தொகை ரூ. 5,839.96 கோடி என்றும் 2021 சி.ஏ.ஜி அறிக்கை வெளிப்படுத்தியது.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil