மதமாற்ற குற்றச்சாட்டு; குஜராத்தில் அன்னை தெரசாவின் மிஷனரிஸ் ஆஃப் சேரிட்டி மீது வழக்குப்பதிவு

Gujarat books Missionaries of Charity on charge of conversion: காப்பத்தில் உள்ள பெண்களை கிறிஸ்தவ மதமாற்றம் செய்ததாக குற்றச்சாட்டு; மிஷனரிஸ் ஆஃப் சேரிட்டி மீது குஜராத் காவல்துறை வழக்குப்பதிவு

மதர் தெரசாவால் நிறுவப்பட்ட மிஷனரிஸ் ஆஃப் சேரிட்டி என்ற அமைப்பின் மீது, “இந்து மத உணர்வுகளை புண்படுத்தியது” மற்றும் வதோதரா நகரில் நடத்தப்படும் காப்பகத்தில் உள்ள “இளம் பெண்களை கிறிஸ்தவ மதமாற்றம் செய்ய முயன்றது” ஆகியவற்றிற்காக குஜராத் மத சுதந்திர சட்டம், 2003 இன் கீழ் வழக்கு பதிவு செய்யப்பட்டுள்ளது. அமைப்பு இந்த குற்றச்சாட்டை நிராகரித்துள்ளது.

மாவட்ட சமூக பாதுகாப்பு அதிகாரி மயங்க் திரிவேதியின் புகாரின் அடிப்படையில், ஞாயிற்றுக்கிழமை மகர்புரா காவல் நிலையத்தில் எஃப்.ஐ.ஆர் பதிவு செய்யப்பட்டுள்ளது, அவர் டிசம்பர் 9 அன்று மாவட்டத்தின் குழந்தைகள் நலக் குழுவின் தலைவருடன், மகர்புரா பகுதியில் உள்ள மிஷனரிஸ் ஆஃப் சேரிட்டி நிறுவனத்தால் நடத்தப்படும் சிறுமிகளுக்கான இல்லத்திற்குச் சென்று பார்வையிட்டார்.

திரிவேதி காப்பகத்திற்கு சென்ற போது, ​​”கிறிஸ்தவ மதத்திற்குள் இளம் பெண்களை மாற்றும்” நோக்கத்துடன், காப்பகத்தில் உள்ள பெண்கள் கிறிஸ்தவ மத நூல்களைப் படிக்கவும், கிறிஸ்தவ நம்பிக்கையின் பிரார்த்தனைகளில் பங்கேற்கவும் “கட்டாயப்படுத்தப்படுவதை” கண்டறிந்தார் என்று எஃப்.ஐ.ஆரில் குறிப்பிடப்பட்டுள்ளது.

“பிப்ரவரி 10, 2021 முதல் டிசம்பர் 9, 2021 வரை, இந்துக்களின் மத உணர்வுகளை வேண்டுமென்றே மற்றும் கசப்புடன் புண்படுத்தும் நடவடிக்கைகளில் இந்த நிறுவனம் ஈடுபட்டுள்ளது… பெண் குழந்தைகள் இல்லத்தில் உள்ள சிறுமிகளை கழுத்தில் சிலுவை அணிய வைப்பதன் மூலம் கிறித்துவ மதத்தைத் தழுவும்படி வற்புறுத்துகிறார்கள். பைபிளைப் படிக்கும்படி கட்டாயப்படுத்துவதற்காக, பெண்கள் பயன்படுத்தும் ஸ்டோர்ரூம் மேஜையின் மீது பைபிளை வைப்பது… போன்றவை மூலம் சிறுமிகளை கட்டாய மதமாற்றம் செய்ய முயற்சிப்பது குற்றம்,” என்று எஃப்ஐஆர் கூறுகிறது.

மிஷனரிஸ் ஆஃப் சேரிட்டி நிர்வாகம் கட்டாய மதமாற்றம் செய்யவில்லை என மறுத்துள்ள நிலையில், புகாரைப் பெற்ற போலீஸார் விசாரணையைத் தொடங்கியுள்ளனர்.

மிஷனரிஸ் ஆஃப் சேரிட்டியின் செய்தித் தொடர்பாளர், “நாங்கள் எந்த மத மாற்ற நடவடிக்கையிலும் ஈடுபடவில்லை… எங்கள் காப்பகத்தில் 24 பெண்கள் உள்ளனர். இந்த பெண்கள் எங்களுடன் வாழ்கிறார்கள், நாங்கள் ஜெபித்து வாழும்போதும் அதை செய்வதைப் பார்க்கும்போது அவர்களும் எங்கள் நடைமுறையைப் பின்பற்றுகிறார்கள். நாங்கள் யாரையும் மதமாற்றம் செய்யவில்லை அல்லது யாரையும் கிறிஸ்தவ மதத்தில் திருமணம் செய்து கொள்ள வற்புறுத்தவில்லை என்று கூறினார்.

குழந்தைகள் நலக் குழுவின் புகாரின்படி, இந்த அமைப்பு ஒரு இந்து பெண்ணை கிறிஸ்தவ பாரம்பரியத்தின்படி கிறிஸ்தவ குடும்பத்தில் திருமணம் செய்து கொள்ள வற்புறுத்தியதாக அதிகாரிகள் தெரிவித்தனர். மேலும், இந்துக்களாக இருந்தாலும், தங்குமிடங்களில் வசிக்கும் சிறுமிகளுக்கு அசைவ உணவு வழங்கப்படுவதாகவும் புகாரில் கூறப்பட்டுள்ளது.

திரிவேதியின் குற்றச்சாட்டுகளை ஒரு குழு ஆய்வு செய்த பின்னர், அந்த அமைப்பின் மீது வழக்கு பதிவு செய்ய மாவட்ட ஆட்சியர் உத்தரவு பிறப்பித்துள்ளதாக காவல்துறை உதவி ஆணையர் எஸ்பி குமாவத் தெரிவித்தார்.

குழந்தைகள் நலக் குழுவின் புகாரின் பேரில் மாவட்ட ஆட்சியர் குழு ஒன்றை அமைத்தார். இந்த குற்றச்சாட்டை பல துறைகளின் உறுப்பினர்கள் குழு விசாரித்து, அதைத் தொடர்ந்து புகார் அளிக்கப்பட்டது. குற்றச்சாட்டுகள் உண்மையா என்பதை அறிய போலீசார் விசாரணை நடத்தி ஆதாரங்களை சேகரிப்பார்கள்” என்று குமாவத் கூறினார்.

வதோதரா காவல்துறை ஆணையர் ஷம்ஷேர் சிங் தி இந்தியன் எக்ஸ்பிரஸ்ஸிடம் கூறுகையில், பஞ்சாபைச் சேர்ந்த பெண் ஒருவர் மதமாற்றம் செய்யப்பட்டதாகக் கூறப்படும் விசாரணையை போலீஸார் தொடங்கியுள்ளனர் என்றார்.

“புகாரின் அடிப்படையில் இன்று விசாரணையைத் தொடங்கியுள்ளோம். பஞ்சாபைச் சேர்ந்த ஒரு பெண், காப்பகத்தில் வசித்த போது, மிஷனரிஸ் ஆஃப் சேரிட்டியால் மதமாற்றம் செய்யப்பட்டதாக குழு அளித்துள்ள அறிக்கையின்படி வழக்குப்பதிவு செய்யப்பட்டுள்ளது… தங்குமிடங்களுக்கு முழுமையான வழிகாட்டுதல்கள் உள்ளன, அதை அவர்கள் பின்பற்ற வேண்டும். அடிப்படை எஃப்ஐஆர் மீதான வழக்கை நாங்கள் ஆராய்வோம், ”என்று ஷம்ஷேர் சிங் கூறினார்.

எந்தவொரு வகுப்பினரின் மத நம்பிக்கைகளையும் அவமதிப்பதன் மூலம் அவர்களின் உணர்வுகளை சீற்றம் செய்யும் வகையில் திட்டமிட்ட மற்றும் தீங்கிழைக்கும் செயல்கள் (295 ஏ), ஒரு நபரின் மத உணர்வுகளை புண்படுத்தும் வார்த்தைகளை வேண்டுமென்றே கூறியது (298) மற்றும் குஜராத் மதச் சுதந்திரம் சட்டம், 2003, ஆகிய ஐபிசி பிரிவுகளின் கீழ் இந்த அமைப்பு மீது வழக்கு பதிவு செய்யப்பட்டுள்ளது. குஜராத் மதச் சுதந்திரம் சட்டம், 2003 என்பது வலுக்கட்டாயமாக மதமாற்றம் செய்வதைத் தடைசெய்யும் (பிரிவு 3) மற்றும் வலுக்கட்டாயமாக மதமாற்றத்திற்கு மூன்று ஆண்டுகள் சிறைத்தண்டனை மற்றும் ரூ. 50,000 அபராதம் விதிக்கக்கூடியது. ஒருவேளை மைனர் ‘பலவந்தமாக மதமாற்றம் செய்யப்பட்டால்’ நான்கு ஆண்டுகள் சிறைத்தண்டனை மற்றும் ரூ.1 லட்சம் வரை அபராதம் (பிரிவு 4) விதிக்கக்கூடியது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil

Get the latest Tamil news and India news here. You can also read all the India news by following us on Twitter, Facebook and Telegram.

Web Title: Missionaries of charity conversion fir

The moderation of comments is automated and not cleared manually by tamil.indianexpress.com
Best of Express