இந்து – முஸ்லீம் பிரிவினை பேசும் நாளில் நான் பொது வாழ்க்கைக்கு தகுதியற்றவனாக ஆகிவிடுவேன் – மோடி

Vikas Pathak , Asad Rehman

“எனது நாட்டு மக்கள் எனக்கு வாக்களிப்பார்கள்” என்று நம்புவதாக, செவ்வாய்கிழமை தெரிவித்த பிரதமர் நரேந்திர மோடி, “நான் இந்து-முஸ்லிம் பிரிவினை செய்யும் நாளில், நான் பொது வாழ்க்கைக்கு தகுதியற்றவனாக இருப்பேன்” என்றும், “இந்து-முஸ்லிம் பிரிவினையை செய்ய மாட்டேன் என்பது எனது தீர்மானம்” என்றும் கூறினார். 

ஆங்கிலத்தில் படிக்க: Modi: The day I do Hindu-Muslim, I will be unworthy of public life… I will not do it

வாரணாசி லோக்சபா தொகுதியில் தொடர்ந்து மூன்றாவது முறையாக களமிறங்கும் வகையில், வேட்புமனு தாக்கல் செய்த நாளில், நியூஸ்18 இந்தியா தொலைக்காட்சிக்கு அளித்த பேட்டியில் மோடி இந்தக் கருத்துக்களை தெரிவித்தார், மேலும் பேட்டியின் கிளிப்களை எக்ஸ் பக்கத்தில் வெளியிட்டார்.

ஏப்ரல் 21 அன்று ராஜஸ்தானில் உள்ள பன்ஸ்வாராவில் நடந்த தேர்தல் பேரணியில், காங்கிரஸைத் தாக்கும் போது, “முன்பு, அவர்கள் ஆட்சியில் இருந்தபோது, தேசத்தின் செல்வத்தில் முஸ்லீம்களுக்கு முதல் உரிமை உண்டு என்று சொன்னார்கள். அதாவது, இந்தச் செல்வத்தை யாருக்கு பகிர்ந்தளிப்பார்கள்? அதிக குழந்தைகளைப் பெற்றவர்களுக்கு, ஊடுருவல்காரர்களுக்கு கொடுப்பார்கள். நீங்கள் கஷ்டப்பட்டு சம்பாதித்த பணம் ஊடுருவல்காரர்களுக்கு கொடுக்கப்பட வேண்டுமா?” என்று மோடி கூறியதற்கு விமர்சனங்கள் எழுந்த நிலையில் தற்போதைய கருத்துக்கள் வந்துள்ளன.

அந்த உரையில், “காங்கிரஸ் தேர்தல் அறிக்கை, தாய், மகள்களின் தங்கத்தை கணக்கிட்டு, அதன் பிறகு அந்தச் செல்வத்தை பங்கீடு செய்வோம் என்று கூறுகிறது. மேலும் மன்மோகன் சிங்கின் அரசாங்கம் சொன்னதுபோல் அதை விநியோகிப்பார்கள்: முஸ்லிம்களுக்கு செல்வத்தில் முதல் உரிமை உண்டு. சகோதர சகோதரிகளே, இந்த நகர்ப்புற நக்சல் சிந்தனை என் தாய் மற்றும் சகோதரிகளின் மங்களசூத்திரங்களைக் கூட விட்டுவைக்காது,” என்று மோடி கூறினார்.

அவரது பன்ஸ்வாரா உரையை காங்கிரஸ், சி.பி.ஐ மற்றும் சி.பி.ஐ (எம்-எல்) கட்சிகள் சுட்டிக்காட்டி தேர்தல் ஆணையத்திடம் அளித்த புகார்கள் அடிப்படையில் பா.ஜ.க தலைவருக்கு நோட்டீஸ் அனுப்பப்பட்டது.

செவ்வாய்கிழமை அளித்த பேட்டியில், பிரதமர், “நான் இந்து அல்லது முஸ்லிம் என்று சொல்லவில்லை. உங்களால் எவ்வளவு குழந்தைகளை ஆதரிக்க முடியுமோ அவ்வளவு குழந்தைகளை பெற்றுக்கொள்ள வேண்டும் என்று கூறியுள்ளேன். அரசாங்கம் (ஆதரவு) செய்ய வேண்டிய சூழ்நிலையை உருவாக்க வேண்டாம்,” என்று கூறினார்.

முஸ்லிம்கள் அவருக்கு வாக்களிப்பார்களா, அவர்களின் வாக்குகள் அவருக்குத் தேவையா என்று கேட்டதற்கு, “எனது நாட்டு மக்கள் எனக்கு வாக்களிப்பார்கள் என்று நான் நம்புகிறேன். நான் இந்து-முஸ்லிம் பிரிவினை செய்யும் நாளில், நான் பொது வாழ்க்கைக்கு தகுதியற்றவனாக இருப்பேன். மேலும் நான் இந்து-முஸ்லிம் பிரிவினையை செய்ய மாட்டேன். அது எனது தீர்மானம்,” என்று கூறினார்.

"நான் வீடுகளைக் கொடுத்தால், நான் வளர்ச்சி பற்றி பேசுகிறேன். 100 சதவீத விநியோகம். அதாவது, ஒரு கிராமத்தில் 200 வீடுகள் இருந்தால், எந்த சமூகம், எந்த சாதி, எந்த மதம் என்று இல்லை. அந்த 200 வீடுகளில் 60 பயனாளிகள் இருந்தால், 60 பேருக்கும் அது கிடைக்க வேண்டும். மேலும் 100 சதவீத செறிவு என்பது சமூக நீதி மற்றும் உண்மையான மதச்சார்பின்மை. மேலும் இதில் ஊழல் நடக்க வாய்ப்பில்லை. இந்த திங்கட்கிழமை வேறொருவருக்கு கிடைத்தால், அடுத்த திங்கட்கிழமை நீங்கள் பெறுவீர்கள் என்பது உங்களுக்குத் தெரியும்,” என்று மோடி கூறினார்.

வாரணாசி தொகுதியில் போட்டியிடும் மோடி செவ்வாய்க்கிழமை மாவட்ட ஆட்சியர் அலுவலகத்தில் வேட்புமனு தாக்கல் செய்தார். அவருடன் பண்டிட் கணேஷ்வர் சாஸ்திரி டிராவிட் உடன் இருந்தார். இவர் அயோத்தியில் ராமர் கோவில் கும்பாபிஷேகத்திற்கான தேதி மற்றும் நேரத்தை முடிவு செய்தவர்.

மாவட்ட மாஜிஸ்திரேட் எஸ்.ராஜலிங்கம் மோடியிடமிருந்து ஆவணங்களைச் சேகரித்தார், பின்னர் எக்ஸ் பக்கத்தில், “வாரணாசி மக்களவைத் தொகுதிக்கான வேட்பாளராக நான் வேட்புமனு தாக்கல் செய்தேன். இந்த வரலாற்று சிறப்பு மிக்க இடத்தின் மக்களுக்கு சேவை செய்வது பெருமையாக உள்ளது. மக்களின் ஆசியுடன் கடந்த பத்தாண்டுகளில் குறிப்பிடத்தக்க சாதனைகள் நிகழ்த்தப்பட்டுள்ளன. இந்த வேகம் வரும் காலங்களில் இன்னும் வேகமாக இருக்கும்” என்று பதிவிட்டுள்ளார்.

மோடி வேட்புமனு தாக்கல் செய்யும்போது கலெக்டர் அலுவலக வளாகத்தில் பா.ஜ.க தலைவர் ஜே.பி நட்டா, பாதுகாப்புத்துறை அமைச்சர் ராஜ்நாத் சிங், மத்திய உள்துறை அமைச்சர் அமித் ஷா, உ.பி முதல்வர் யோகி ஆதித்யநாத், அக்கட்சியின் மாநில தலைவர் பூபேந்திர சவுத்ரி, உத்தரகாண்ட் முதல்வர் புஷ்கர் சிங் தாமி, மத்திய பிரதேச முதல்வர் மோகன் யாதவ் மற்றும் மகாராஷ்டிரா முதல்வர் ஏக்நாத் ஷிண்டே, தெலுங்கு தேசம் கட்சியின் தலைவரும் ஆந்திரப் பிரதேசத்தின் முன்னாள் முதல்வருமான சந்திரபாபு நாயுடு, ஜன சேனா கட்சித் தலைவர் பவன் கல்யாண் உள்ளிட்ட ஏராளமான என்.டி.ஏ தலைவர்கள் இருந்தனர்.

மோடியை முன்மொழிந்தவர்கள் பண்டிட் கணேஷ்வர் சாஸ்திரி டிராவிட், கட்சித் தொண்டர்கள் மற்றும் தலைவர்கள் சஞ்சய் சோன்கர், லால்சந்த் குஷ்வாஹா மற்றும் பைஜ்நாத் படேல். சோன்கர் ஒரு தலித், பைஜ்நாத் படேல் மற்றும் லால்சந்த் குஷ்வாஹா ஓ.பி.சி, கணேஷ்வர் சாஸ்திரி டிராவிட் ஒரு பிராமணர்.

முன்னதாக, தசாஸ்வமேத் காட்டில் பிரார்த்தனை செய்து தனது நாளைத் தொடங்கிய மோடி, பின்னர் கால பைரவர் கோயிலுக்குச் சென்றார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“