அமெரிக்க வர்த்தக ஒப்பந்தத்தில் திடீர் திருப்பம்: டிரம்ப்- மோடி நேரடித் தலையீடு கை கொடுக்குமா?

வைத்யநாதன் ஐயர்

இந்தியா - அமெரிக்கா இடையேயான நீண்டகால வர்த்தக பேச்சுவார்த்தை தற்போது ஒருவித தேக்கநிலையில் உள்ளது. இந்தத் தேக்கநிலையை உடைத்து, ஒப்பந்தத்தை வெற்றிகரமாக முடிவுக்குக் கொண்டுவர, பிரதமர் நரேந்திர மோடி மற்றும் அமெரிக்க அதிபர் டொனால்ட் டிரம்ப் ஆகியோரின் "உயர்மட்ட ஈடுபாடு" உதவக்கூடும் என வாஷிங்டன் டி.சி.யிலிருந்து புதுடெல்லிக்கு புதிய சமிக்ஞைகள் வந்துள்ளதாக மூத்த அரசு அதிகாரி ஒருவர் 'தி இந்தியன் எக்ஸ்பிரஸ்' நாளிதழிடம் தெரிவித்துள்ளார்.

டிரம்பின் அணுகுமுறை: புதிய சவால்கள்

இரு தலைவர்களுக்கும் இடையேயான இத்தகைய சந்திப்புக்கு ஏற்பாடு செய்வது எளிதல்ல. குறிப்பாக, டிரம்பின் வெளிப்படையான, கணிக்க முடியாத ராஜதந்திர நடைமுறை காரணமாக அதிகாரிகள் மிகுந்த எச்சரிக்கையுடன் உள்ளனர். டிரம்ப் பொதுவாக, ஒப்பந்தம் அறிவிக்கப்படுவதற்கு முன் மோடியைச் சந்திக்க விரும்புவார், ஆனால் இந்திய அரசின் பாரம்பரிய நடைமுறை இதற்கு நேர்மாறானது. "ஒப்பந்தம் முடிந்த பின்னரே இரு தலைவர்களும் பேசுவார்கள் என்பதே வழக்கம்," என்று அந்த அதிகாரி கூறினார்.

ஆனாலும், காலச் சூழ்நிலைகள் மாறுகின்றன. வாஷிங்டனில் டிரம்ப் பாரம்பரிய நெறிமுறைகளைத் தலைகீழாக மாற்றி வருகிறார் என்பதை டெல்லி உணர்ந்துள்ளது. புதிய அமெரிக்கத் தூதராகப் பரிந்துரைக்கப்பட்டுள்ள செர்ஜியோ கோர் இந்த உயர்மட்ட சந்திப்பை "ஏற்படுத்தித் தருவதில்" முக்கியப் பங்காற்றலாம் என இந்திய அதிகாரிகள் நம்புகின்றனர்.

குழப்பத்தில் கோலாலம்பூர்: ஒரு வாய்ப்பு சாளரம்

அக்டோபர் 26 முதல் 28 வரை கோலாலம்பூரில் நடைபெறவுள்ள ஆசியான் மற்றும் கிழக்காசிய தலைவர்கள் உச்சி மாநாட்டுக்கு முன்னதாக எஞ்சியுள்ள கருத்து வேறுபாடுகளைக் களையலாம் என மிகுந்த எச்சரிக்கையுடன் கூடிய நம்பிக்கை பிறந்துள்ளது.

மாநாட்டில் பிரதமர் மோடியும், அதிபர் டிரம்பும் கலந்துகொண்டால், அங்கு இருவருக்கும் இடையே ஒரு சந்திப்பு நிகழ வாய்ப்புள்ளது. இருப்பினும், பிரதமரின் வருகை இன்னும் உறுதி செய்யப்படவில்லை. "இது இன்னும் விவாதிக்கப்பட்டு வருகிறது," என்று ஓர் அதிகாரி தெரிவித்தார்.

கடந்த ஏழு மாதப் பேச்சுவார்த்தைகள் ரஷ்ய அபராதங்கள் மற்றும் இந்தியாவின் வர்த்தகத் தடைகள் குறித்த டிரம்பின் கடுமையான கருத்துகள் காரணமாக உராய்வு நிறைந்ததாகவே இருந்துள்ளன. எனவே, "ஒப்பந்தத்தில் கையெழுத்திடுவதற்கு முன் பிரதமர், அமெரிக்க அதிபரைச் சந்திப்பது கேள்விக்கே இடமில்லை," என்று ஓர் அதிகாரி திட்டவட்டமாகக் கூறுகிறார். ஏனென்றால், டிரம்பின் ராஜதந்திர அணுகுமுறையானது, பேச்சுவார்த்தையில் உள்ளவர்களை எதிர்பாராத விதமாகப் பொதுவெளியில் சிக்கலில் மாட்டிவிடும் அபாயம் உள்ளது.

சிக்கலான அரசியல் மற்றும் பிடிவாதப் புள்ளிகள்

உள்நாட்டு அரசியலும் இந்தச் சிக்கலை மேலும் கூட்டுவதாக உள்ளது. வெற்றியை மட்டுமே தன் அரசியல் பிம்பமாகக் கொண்டிருக்கும் மோடிக்கு, ஒருவேளை பேச்சுவார்த்தை சரியாக அமையாத சந்திப்பு உள்நாட்டில் அபாயங்களை ஏற்படுத்தலாம்.

இந்தியா - அமெரிக்கா இடையேயான வர்த்தகப் பேச்சுவார்த்தைகள் பிப்ரவரியிலேயே தொடங்கினாலும், சில பிரச்சினைகள் ஒப்பந்தத்தை முடிவுக்குக் கொண்டுவருவதைத் தாமதப்படுத்தியுள்ளன. அவற்றில் சில:

'ஆபரேஷன் சிந்துர்' மூலம் இந்தியா - பாகிஸ்தான் மோதலை முடிவுக்குக் கொண்டு வந்ததாக டிரம்ப் மீண்டும் மீண்டும் கூறும் கூற்று.

ரஷ்யாவிடமிருந்து இந்தியா எண்ணெய் வாங்குவது, உக்ரைன் போருக்கு மாஸ்கோவுக்கு நிதியளிப்பதாக வாஷிங்டன் கூறுவது.

அமெரிக்க விவசாயப் பொருட்களுக்காக இந்தியச் சந்தையைத் திறக்க டெல்லி தயங்குவது.

இந்தியா சில துறைகளில் நெகிழ்வுத்தன்மையைக் காட்டியுள்ளது. எரிசக்தி வர்த்தகத்தை விரிவுபடுத்த இந்தியா எதிர்பார்ப்பதாகவும், அமெரிக்க அணுசக்தி ஒத்துழைப்பை ஆழப்படுத்தத் திட்டமிட்டுள்ளதாகவும் மத்திய வர்த்தகத் துறை அமைச்சர் பியூஷ் கோயல் அண்மையில் தெரிவித்தார்.

தனிப்பட்ட நட்பு VS தொழில்முறை அணுகுமுறை

சமீபகாலமாக, மோடிக்கும் டிரம்புக்கும் இடையேயான உறவில் ஏற்பட்டுள்ள பனிப்போர் விலகி, சுமுகமான நிலை உருவாகியுள்ளது. டிரம்பின் பிறந்தநாள் வாழ்த்துகள், காசா அமைதித் திட்டம் குறித்த டிரம்பின் பரிந்துரைகளை மோடி பகிரங்கமாகப் பாராட்டியது ஆகியவை இந்த மாற்றத்தை உணர்த்துகின்றன.

டிரம்புடன் நெருக்கமாகப் பணியாற்றியவர்கள், "அவர் சொல்வதை அப்படியே செய்வார்" எனக் கூறுகின்றனர். "இந்தியாவின் வரிகள் அல்லது ரஷ்யாவுடனான எண்ணெய் ஒப்பந்தங்கள் குறித்து அவர் கவலைப்படுவதாகக் கூறும்போது, அவர் அதையே அர்த்தப்படுத்துகிறார். அவர் பிரதமரை விரும்புவதாகவும், அவரைத் தனது நல்ல நண்பர் என்று அழைப்பதாகவும் கூறும்போது, அதையும் அவர் உண்மையிலேயே அர்த்தப்படுத்துகிறார். இரண்டும் உண்மையாக இருக்கலாம்," என்று ஒரு மூத்த அமெரிக்க அதிகாரி விளக்கினார்.

"தொழில்முறை வேறு, தனிப்பட்ட நட்பு வேறு" என்ற அமெரிக்கப் பார்வையை டெல்லி முழுமையாகப் புரிந்துகொள்வது கடினம் என்றும் அவர் மேலும் தெரிவித்தார். இந்த மாறுபட்ட கலாசார அணுகுமுறையே வர்த்தக ஒப்பந்தத்தின் இறுதி நகர்வில் முக்கியப் பங்காற்றுகிறது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்