ராமர் கோவிலில் அர்ச்சகராக போட்டி; கடுமையான பயிற்சிகளை எடுத்து வரும் 21 இளைஞர்கள்

Maulshree Seth

ராமர் கோவிலில் இருந்து 700 மீட்டர் தொலைவில் உள்ள மண்டபத்தில், அயோத்தி தெருக்களின் இரைச்சல் இல்லாமல், 30 வயதுக்குட்பட்ட 21 இளைஞர்கள், ராம ஜென்மபூமியில் உள்ள ராமர் கோவிலின் அர்ச்சகர்களாக ஆவதற்கு கடுமையாகப் பயிற்சி பெற்று போட்டியிட்டு வருகின்றனர்.

ஆங்கிலத்தில் படிக்க: Near Ram temple, 21 youths train and compete to become its priests

நாட்டின் பல்வேறு பகுதிகளில் இருந்து சுமார் 2,700 விண்ணப்பங்களைச் சேகரித்து கடுமையான தேர்வு செயல்முறைக்குப் பிறகு தேர்ந்தெடுக்கப்பட்ட இந்த இளம் அர்ச்சகர்கள், விடியற்காலைக்கு முன் அதாவது, அதிகாலை 3.30 முதல் 4 மணிக்குள் எழுந்து, அன்றைய பயிற்சிக்குத் தயாராகிறார்கள், மணிக்கணக்கில் மந்திரங்களை உச்சரிக்கிறார்கள், வைஷ்ணவர்களின் ராமநந்தி பிரிவின் மரபுகளின்படி ராமரை வழிபடுவதில் உள்ள நுணுக்கங்களைக் கற்றுக்கொள்கிறார்கள்.

கடும் குளிரில், 21 இளைஞர்கள் ஒரு பெரிய மண்டபத்தின் தரையில் விரிக்கப்பட்ட விரிப்பில் சில பெட்ஷீட்கள் மற்றும் போர்வைகளுடன் தூங்குகிறார்கள்.

இது ஒரு கண்டிப்பான அட்டவணை, மந்திரங்கள் உச்சரிப்பு, சாஸ்திர அறிவு, குணநலன் கட்டமைப்பு, யோகா ஆசனங்கள் போன்றவற்றில் அவர்களுக்கு பயிற்சி அளிக்கப்படுகிறது.

“இந்த மாணவர்கள் பயிற்சிக்குத் தயாராக இருக்க வேண்டியிருப்பதால், நாங்கள் அதிகாலை 4 மணிக்கு எழுந்து அவர்களுக்கு உணவு தயார் செய்கிறோம். அவர்கள் யோகா மற்றும் உடற்பயிற்சிகளுடன் தங்கள் நாளைத் தொடங்குகிறார்கள், அதன் பிறகு பயிற்சி காலை 7 மணியளவில் தொடங்கி மதியம் வரை தொடர்கிறது. ஒரு இடைவேளைக்குப் பிறகு, வகுப்புகள் மீண்டும் தொடங்குகின்றன,” என்று இந்த அர்ச்சக்களுக்காக பணிபுரியும் ஒரு ஊழியர் கூறினார், இடைவேளையின் போது மாணவர்கள் சிறிது நேரம் உறங்குகின்றனர்.

ஊழியர்களின் கூற்றுப்படி, இந்த பயிற்சியாளர்களில் பலர் உத்தரபிரதேசத்தின் பல்வேறு பகுதிகளைச் சேர்ந்தவர்கள் மற்றும் சிலர் பீகாரைச் சேர்ந்தவர்கள்.

இந்தியன் எக்ஸ்பிரஸிடம் பேசுகையில், பயிற்சி அர்ச்சகர்களின் ஆசிரியர்களில் ஒருவரும் தேர்வு செயல்முறையின் ஒரு பகுதியாக இருந்தவருமான ஆச்சார்யா மிதிலேஷ் நந்தினி ஷரன், அவர்கள் நாட்டின் பல்வேறு பகுதிகளில் இருந்து சுமார் 2,700 விண்ணப்பங்களைப் பெற்றதாகவும், சுமார் 300 விண்ணப்பதாரர்கள் நேர்காணலுக்காக இறுதிப் பட்டியலிடப்பட்டதாகவும் கூறினார்.

அவர்களின் "நடத்தை", "அர்ப்பணிப்பு" மற்றும் பின்னணியின் அடிப்படையில், 23 பேர் தேர்ந்தெடுக்கப்பட்டனர். பின்னர், தற்போதுள்ள ராம் லல்லா சிலைக்காக ஏற்கனவே பணியாற்றிய குடும்பங்களைச் சேர்ந்த இருவர் தேர்வாகி இருப்பது கண்டறியப்பட்டது, எனவே அவர்கள் கைவிடப்பட்டனர், தற்போது 21 பேர் எஞ்சியுள்ளனர்.

"இந்த அர்ச்சகர்கள் ஒரு கடினமான வழக்கத்தைப் பின்பற்ற வேண்டும். அவர்கள் அதிகாலை 3 மணிக்கு எழுந்து சடங்குகளுக்குத் தயாராக வேண்டும், இது சிருங்காரத்திற்கான தொடர்ச்சியான தயாரிப்புகளுடன் தொடர்ச்சியாக இரண்டரை மணி நேரத்திற்கும் மேலாக நிற்க வேண்டும். அவர்கள் மூத்த அர்ச்சகர்களின் கீழ் பணிபுரியும் போது, ​​தினசரி சடங்குகளை செய்ய அவர்கள் உடல் மற்றும் மனரீதியாக தயாராக இருப்பது முக்கியம். இந்த காரணத்திற்காகவே வயது வரம்பு 30 வயதுக்குக் குறைவாக இருந்தது… இது மிகவும் கடினமான வேலை, இளைஞர்கள் சிறப்பாக செயல்பட முடியும்" என்று ஆச்சார்யா கூறினார்.

அனைத்து மாணவர்களும் ஏற்கனவே வெவ்வேறு குருகுலங்களில் பயிற்சி எடுத்துள்ளனர் ஆனால் அவர்களின் "உச்சரன்" (பாராயணம்) வித்தியாசமாக இருப்பதால், அது சரி செய்யப்படுகிறது.

ஆச்சார்யா கேசவ் மாணவர்களுக்கு வேதங்களைப் பயிற்றுவிக்கும் போது, ​​ஆச்சார்யா சத்யநாராயண தாஸ் அவர்களுக்கு “பிரக்ரியா” (பின்பற்ற வேண்டிய செயல்முறை) குறித்து அறிவுறுத்துகிறார் என்று ஆச்சார்யா சரண் கூறினார். ஆச்சார்யா ஜெய காந்த், சரியான “பாராயணம்” பற்றிய விரிவுரைகளை வழங்கி, பல்வேறு செயல்முறைகள் மற்றும் அவற்றின் அர்த்தத்தைப் பற்றி அவர்களுக்குத் தெரியப்படுத்துகிறார்.

மாலையில், இந்த மாணவர்கள் வால்மீகி ராமாயணம் மற்றும் ராம்சரித்திரமனாஸில் இருந்து கதைகளை விவரிக்கும் மஹந்த் கமல் நயன் தாஸ் மற்றும் சுவாமி ராமானந்த் தாஸ் உட்பட அயோத்தியின் முக்கிய மகான்களின் உரைகளைக் கேட்கிறார்கள்.

இந்த ஆண்டு மே மாதம் முடிவடையும் ஆறு மாத பயிற்சி வகுப்புக்கு மாணவர்களுக்கு ஒவ்வொரு மாதமும் ரூ.2,000 உதவித்தொகை வழங்கப்படுகிறது. அனைத்து செலவுகள் மற்றும் இதர ஏற்பாடுகளை கோவில் அறக்கட்டளை செய்துள்ளது.

பயிற்சியின் முடிவில் மாணவர்களுக்கு சான்றிதழ் வழங்கப்படும் என்றும் அவர்களில் சிலர் மட்டுமே ராமர் கோவிலில் அர்ச்சகராக வருவார்கள் என்றும் கூறப்பட்டுள்ளதாக ஆச்சார்யா சரண் கூறினார். மீதமுள்ளவர்கள் வளாகத்தில் வரும் மீதமுள்ள கோவில்களுக்கு தேர்வு செய்யப்பட வாய்ப்புள்ளது. இப்போதைக்கு, இது கடினமான வேலை.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“