சுங்கச்சாவடிகளில் இனி நிற்க வேண்டாம்! புதிய 'மல்டி-லேன் ஃப்ரீ ஃப்ளோ' அறிமுகம்

தேசிய நெடுஞ்சாலைகளில் சுங்கக் கட்டணம் வசூலிக்கும் முறையை மேம்படுத்த, சாலைப் போக்குவரத்து மற்றும் நெடுஞ்சாலைகள் அமைச்சகம் (MoRTH) 'மல்டி-லேன் ஃப்ரீ ஃப்ளோ' (MLFF) எனப்படும் புதிய முறையை அறிமுகப்படுத்தத் திட்டமிட்டுள்ளது. இது நாடு முழுவதும் உள்ள 25 சுங்கச்சாவடிகளில் செயல்படுத்தப்படும். இந்த புதிய முறை, சுங்கக் கட்டண வசூலை அதிகரிப்பதோடு, ஸ்மார்ட், வேகமான மற்றும் திறமையான தேசிய நெடுஞ்சாலை வலையமைப்பை உருவாக்கும்.

மல்டி-லேன் ஃப்ரீ ஃப்ளோ சுங்கச்சாவடி முறை என்றால் என்ன?

இந்த 'மல்டி-லேன் ஃப்ரீ ஃப்ளோ' முறை என்பது, தடைகள் இல்லாத ஒரு சுங்கச்சாவடி முறையாகும். இதில், வாகனங்கள் சுங்கச்சாவடியில் நிற்காமல் செல்லும்போதே, அவற்றில் உள்ள ஃபாஸ்டேக் (FASTag) மற்றும் வாகனப் பதிவு எண் (VRN) ஆகியவை உயர் செயல்திறன் கொண்ட ஆர்.எஃப்.ஐ.டி (RFID) ரீடர்கள் மற்றும் (ஏ.என்.பி.ஆர்) ANPR கேமராக்கள் மூலம் படிக்கப்பட்டு, கட்டணம் தானாகவே வசூலிக்கப்படும்.

இந்தியாவில் புதிய முறை

இந்த புதிய முறை அறிமுகப்படுத்தப்பட்டால், வாகனங்கள் சுங்கச்சாவடிகளில் நிற்க வேண்டிய அவசியம் இருக்காது. இதனால், போக்குவரத்து நெரிசல் குறைந்து, பயண நேரம் மிச்சமாகும். மேலும், எரிபொருள் பயன்பாடு குறைந்து, சுற்றுச்சூழலுக்கு தீங்கு விளைவிக்கும் புகை வெளியீடும் குறையும்.

25 தேசிய நெடுஞ்சாலைகளில் புதிய முறையை அறிமுகப்படுத்த NHAI திட்டம்

இந்திய தேசிய நெடுஞ்சாலை ஆணையம் (NHAI) 2025-26 நிதியாண்டில் 25 தேசிய நெடுஞ்சாலை சுங்கச்சாவடிகளில் இந்த MLFF அடிப்படையிலான சுங்க வசூலை தொடங்க திட்டமிட்டுள்ளது. இந்த புதிய முறையை செயல்படுத்த பொருத்தமான சுங்கச்சாவடிகளை அடையாளம் காணும் பணி தற்போது நடைபெற்று வருவதாக சாலைப் போக்குவரத்து மற்றும் நெடுஞ்சாலைகள் அமைச்சகம் தெரிவித்துள்ளது.

குஜராத்தில் உள்ள சௌராசி இந்தியாவின் முதல் தடை இல்லாத சுங்கச்சாவடி

குஜராத்தில் உள்ள சௌராசி கட்டண மையம், நாட்டின் முதல் தடை இல்லாத சுங்கச்சாவடியாக மாற உள்ளது. இதற்காக, இந்திய நெடுஞ்சாலை மேலாண்மை நிறுவனம் (IHMCL) மற்றும் ஐசிஐசிஐ வங்கி இடையே ஒரு ஒப்பந்தம் கையெழுத்தாகியுள்ளது. இது இந்தியாவின் முதல் முழுமையான 'மல்டி-லேன் ஃப்ரீ ஃப்ளோ' சுங்கச்சாவடி முறையாக செயல்படும்.

இந்தியாவில் தேசிய நெடுஞ்சாலைகள்

தற்போது, இந்தியாவில் 63 லட்சம் கி.மீ.க்கும் அதிகமான சாலை வலையமைப்பு உள்ளது. இதில், தேசிய நெடுஞ்சாலைகளின் மொத்த நீளம் 1,46,342 கி.மீ. இது மார்ச் 2014-ல் இருந்த 91,287 கி.மீ.யை விட 55,055 கி.மீ. அதிகரித்துள்ளது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.