ஒடிசா ரயில் விபத்து; சிக்னல் கோளாறு காரணமாக இருக்கலாம்

Avishek G Dastidar

ஒடிசாவில் குறைந்தது 261 பேர் மரணமடைந்த ரயில் தடம் புரண்டு 12 மணி நேரத்திற்கும் மேலான நிலையில், சிக்னல் கோளாறின் சாத்தியக்கூறுகளை முதன்மைக் காரணமாக ரயில்வே ஆராய்ந்து வருவதாக வட்டாரங்கள் இந்தியன் எக்ஸ்பிரஸ்ஸிடம் சனிக்கிழமை தெரிவித்தன.

ஷாலிமார்-சென்னை சென்ட்ரல் கோரமண்டல் எக்ஸ்பிரஸ் மற்றும் பெங்களூரு-ஹவுரா சூப்பர்பாஸ்ட் எக்ஸ்பிரஸ் ஆகிய இரண்டு பயணிகள் ரயில்களும் ஒடிசாவின் பாலசோரில் வெள்ளிக்கிழமை மாலை தடம் புரண்டதில் 900க்கும் மேற்பட்டோர் காயமடைந்தனர். இந்த விபத்தில் இரு ரயில்களுடன் ஒரு சரக்கு ரயிலும் மோதி விபத்துக்குள்ளானது.

இதையும் படியுங்கள்: ‘மகள் காயம் அடைந்தாலும் உயிருடன் இருக்கிறாள்’: உறைந்து நிற்கும் உறவினர்கள்

மேற்பார்வையாளர்களால் வெளியிடப்பட்ட பல ஒழுங்குமுறை கூட்டு-ஆய்வுக் குறிப்பில், கோரமண்டல் எக்ஸ்பிரஸ் நியமிக்கப்பட்ட பிரதான பாதை வழியாக செல்ல கிரீன் சிக்னல் கொடுக்கப்பட்டது, பின்னர் சிக்னல் மாற்றப்பட்டது. ஆனால் அந்த ரயில் லூப் லைனுக்குள் நுழைந்து நின்று கொண்டிருந்த சரக்கு ரயிலின் மீது மோதி தடம் புரண்டது. இதற்கிடையில், கீழ்ப்பாதையில், யஷ்வந்த்பூரில் இருந்து சூப்பர் பாஸ்ட் எக்ஸ்பிரஸ் ரயில் வந்ததால், அதன் இரண்டு பெட்டிகளும் தடம் புரண்டன.

"நாங்கள்... கவனமாகக் கவனித்த பிறகு, 12841-க்கான அப் மெயின் லைனுக்கான சிக்னல் கொடுக்கப்பட்டு, புறப்பட்டுச் செல்லப்பட்டது என்ற முடிவுக்கு வந்தோம், ஆனால் இந்த ரயில் அப் லூப் லைனுக்குள் நுழைந்து அப் லூப் லைனில் இருந்த சரக்கு ரயிலுடன் மோதி தடம் புரண்டது" குறிப்பு கூறுகிறது.

ரயில்வே பாதுகாப்பு ஆணையர் விவரங்களை ஆய்வு செய்யும் போது, ​​ரயில்வேயில் உள்ள அதிகாரிகள் சிக்னல் பிழை/தோல்வி மற்றும் லோகோ பைலட்டுடன் செய்ய வேண்டிய தகவல் பரிமாற்றங்கள் ஆகியவற்றை ஆய்வு செய்து வருகிறார்கள் என்று ஒரு உயர்மட்ட வட்டாரம் தெரிவித்துள்ளது. ரயில் தடம் புரண்டதற்கான எந்த காரணத்தையும் ரயில்வே இன்னும் அதிகாரப்பூர்வமாக வெளியிடவில்லை.

பிரதமர் நரேந்திர மோடி, கேபினட் செயலாளர் ராஜீவ் கௌபா, உள்துறை அமைச்சர் அமித் ஷா மற்றும் பிரதமர் அலுவலகம் மற்றும் தேசிய பேரிடர் மீட்புப் படையின் (NDRF) மூத்த உறுப்பினர்களுடன் ரயில்வே வாரிய உறுப்பினர் (செயல்பாடுகள் மற்றும் வணிக மேம்பாடு) ஜெய வர்ம சின்ஹா காலையில் விபத்து குறித்து விளக்கமளித்தார்.

மாநிலம் மற்றும் மத்திய அரசிற்கு கிடைக்கக்கூடிய அனைத்து வளங்களையும் சுமார் 10 மணிநேர தீவிரமான அணிதிரட்டலுக்குப் பிறகு, ஒடிசாவில் உள்ள பஹனாகா பஜார் ரயில் நிலையத்தில் இரட்டை ரயில் தடம் புரண்ட இடத்தில் மீட்பு நடவடிக்கை சனிக்கிழமை காலை முடிந்தது. மீட்புப் பணிகள் முடிந்துவிட்டன, தற்போது சீரமைப்புப் பணிகளைத் தொடங்குகிறோம் என்று ரயில்வே அமைச்சகத்தின் செய்தித் தொடர்பாளர் அமிதாப் சர்மா தெரிவித்தார்.

ரயில்வே அமைச்சர் அஷ்வினி வைஷ்ணவ் மற்றும் உறுப்பினர் (செயல்பாடுகள்) மற்றும் உறுப்பினர் (நிதி) தவிர அனைத்து ரயில்வே வாரிய உறுப்பினர்களும் விபத்து நடந்த இடத்தில் உள்ளனர்.

விபத்தில் சிக்கிய கோரமண்டல் எக்ஸ்பிரஸ் மற்றும் யஷ்வந்த்பூர்-ஹவுரா சூப்பர்பாஸ்ட் எக்ஸ்பிரஸ் ஆகியவற்றில் சிக்கித் தவித்த 1,200 பயணிகளை ஏற்றிக்கொண்டு இரண்டு சிறப்பு ரயில்கள் விபத்து நடந்த இடத்தில் இருந்து புறப்பட்டன.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil