மாநில பேரிடர் மேலாண்மை ஆணையம் எச்சரிக்கை:
கடலோரப் பகுதிக்கு அடித்துவரக்கூடிய எந்தவொரு பொருட்களிலிருந்தும் விலகி இருக்க பொதுமக்களுக்கு கேரள மாநில பேரிடர் மேலாண்மை ஆணையம் எச்சரிக்கை விடுத்துள்ளது. இந்திய கடலோர காவல்படையின் கூற்றுப்படி, ஞாயிறு அதிகாலை "கப்பலின் ஒரு பகுதியில் வெள்ளம் புகுந்ததால்" கப்பல் வேகமாக கவிழ்ந்தது. லிபியன் நாட்டுக் கொடியுடன் கூடிய MSC ELSA 3 என்ற சரக்குக் கப்பலில் இருந்த 24 பணியாளர்களும் பத்திரமாக மீட்கப்பட்டனர். இதில் 21 பேர் இந்திய கடலோர காவல்படையினராலும், 3 பேர் இந்திய கடற்படைக்கப்பல் Sujata மூலம் இன்று காலை கொச்சி அருகே கப்பல் மூழ்கிய பிறகு மீட்கப்பட்டனர். கப்பல் 640 கொள்கலன்களை ஏற்றிச்சென்றது. இதில் 13 அபாயகரமான சரக்குகளையும், 12 கால்சியம் கார்பைடையும் கொண்டிருந்தன. கூடுதலாக, கப்பலின் தொட்டிகளில் 84.44 மெட்ரிக் டன் டீசலும், 367.1 மெட்ரிக் டன் ஃபர்னஸ் ஆயிலும் இருந்தன என்று கடலோர காவல்படை எக்ஸ் (X) தளத்தில் பதிவிட்டுள்ளது.
எண்ணெய் கசிவு தடுப்பு நடவடிக்கைகள் தீவிரம்:
எண்ணெய் கசிவு உள்ளிட்ட அனைத்து சாத்தியமான சூழ்நிலைகளையும் எதிர்கொள்ள, கடலோர காவல்படை விரிவான மாசுக் கட்டுப்பாட்டு தயார்நிலையை செயல்படுத்தியுள்ளதுடன், மாநில நிர்வாகத்துடன் நெருங்கிய ஒருங்கிணைப்பில் செயல்பட்டு வருவதாக தெரிவித்துள்ளது. கொச்சியில் உள்ள பாதுகாப்பு செய்தித் தொடர்பாளர் ஒருவர், எண்ணெய் கசிவைத் தடுக்க கடற்படையும் கடலோர காவல்படையும் போராடி வருவதாகக் கூறினார். "சனிக்கிழமை 24 ஊழியர்களில் 21 பேர் மீட்கப்பட்டனர், மீதமுள்ள மூவரும் ஞாயிற்றுக்கிழமை மீட்கப்பட்டனர்," என்று செய்தித் தொடர்பாளர் தெரிவித்தார்.
இந்த செய்தியை ஆங்கிலத்தில் படிக்க: Oil spill risk after container ship carrying ‘hazardous cargo’ capsizes off Kerala
அறிவியல் அமைச்சகத்தின் கீழ் உள்ள இந்திய கடல்சார் தகவல் சேவைகளுக்கான தேசிய மையம் (INCOIS) ஞாயிற்றுக்கிழமை வெளியிட்ட அறிக்கையில், "கசிந்த எண்ணெய் மாசு 36-48 மணி நேரத்திற்குள் ஆலப்புழா, அம்பலப்புழா மற்றும் கருநாகப்பள்ளி ஆகிய கடலோர பகுதிகளை அடையக்கூடும். இந்த கடலோரப் பகுதிகள் மாசுபடும் அபாயத்தில் உள்ளன, மேலும் சுற்றுச்சூழல் பாதிப்பைக் குறைக்க உடனடி கவனம் செலுத்தப்பட வேண்டும்" என்று தெரிவித்துள்ளது.
கேரள மாநில பேரிடர் மேலாண்மை ஆணையத்தின் உறுப்பினர் செயலர் சேகர் குரியகோஸ் கூறுகையில், நிலைமை மறுபரிசீலனை செய்ய தலைமைச் செயலாளர் ஞாயிற்றுக்கிழமை கூட்டத்திற்கு ஏற்பாடு செய்துள்ளதாக தெரிவித்தார். "மூழ்கிய கப்பலிருந்து கரை ஒதுங்கியதாக சந்தேகிக்கப்படும் பொருட்களுக்கு அருகில் செல்ல வேண்டாம் என்று மக்களுக்கு அறிவுறுத்தப்பட்டுள்ளது. அபாயகரமான பொருட்களிலிருந்து குறைந்தது 200 மீட்டர் தூரம் விலகி இருக்க வேண்டும். கொள்கலன்கள் மணிக்கு ஒரு கி.மீ. என்ற தோராயமான வேகத்தில் மிதந்து வரும் என்று கடற்படை தெரிவித்துள்ளது. எர்ணாகுளம் மற்றும் ஆலப்புழா கடலோரப் பகுதிகளில் கொள்கலன்கள் கரை ஒதுங்க அதிக வாய்ப்பு உள்ளது என்றார்.
இந்திய கடல்சார் தகவல் சேவைகளுக்கான தேசிய மையம் (INCOIS) நிலைமையை உன்னிப்பாகக் கண்காணித்து வருவதாகவும், சம்பந்தப்பட்ட அதிகாரிகளுடன் ஒருங்கிணைந்து செயல்பட்டு வருவதாகவும், தற்போதைய தேடல், மீட்பு மற்றும் சுற்றுச்சூழல் மறுமொழி நடவடிக்கைகளுக்கு ஆதரவாக அத்தியாவசிய கடல் முன்னறிவிப்பு தகவல்களையும் ஆலோசனை சேவைகளையும் வழங்கி வருவதாகவும் தெரிவித்துள்ளது.
சரக்குக் கப்பல் சாய்ந்தது குறித்த தகவல் வெளியானவுடன், கொள்கலன்கள், மிதந்து வரும் பொருட்களை கண்டறிய உதவும் வகையில், இந்திய கடல்சார் தகவல் சேவைகளுக்கான தேசிய மையம்(INCOIS) தனது தேடல் மற்றும் மீட்பு உதவி கருவியை செயல்படுத்தியதாகத் தெரிவித்துள்ளது. மேலும், எந்தவொரு எண்ணெய் கசிவின் பரவல் மற்றும் இயக்கத்தை முன்னறிவிப்பதற்காக 'எண்ணெய் கசிவு பாதை ஆலோசனை' உருவகப்படுத்துதல்களும் மேற்கொள்ளப்பட்டன.
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/2025/05/25/mvwciPHlruHbDcmJW6Hi.jpg)