‘ஒரே நாடு, ஒரே தேர்தல்’ மசோதாக்கள்: பிப்ரவரி 25-ம் தேதி கூடுகிறது நாடாளுமன்றக் குழு

ஒரே நேரத்தில் தேர்தல் நடத்துவதற்கான இரண்டு மசோதாக்களையும் ஆராயும் நாடாளுமன்றக் குழுவின் மூன்றாவது கூட்டம் பிப்ரவரி 25-ம் தேதி நடைபெறும், முன்னாள் இந்திய தலைமை நீதிபதி யு.யு. லலித் மற்றும் சட்டத்துறையைச் சேர்ந்த மற்றவர்கள் குழுவின் முன் ஆலோசனைகளை வழங்க அழைக்கப்படுவார்கள்.

ஆங்கிலத்தில் படிக்க: ‘One Nation, One Election’ bills: Parliamentary panel to meet on February 25

இந்தியாவில் ஒரே நேரத்தில் தேர்தல்கள் நடத்துவதற்கான உயர்மட்டக் குழுவின் செயலாளர் நித்தன் சந்திரா; 22வது இந்திய சட்ட ஆணையத்தின் தலைவர் நீதிபதி ரிது ராஜ் அவஸ்தி; முன்னாள் இந்திய தலைமை நீதிபதி யு.யு. லலித்; மற்றும் முன்னாள் எம்.பி.யும் உச்ச நீதிமன்றத்தின் மூத்த வழக்கறிஞருமான இ.எம். சுதர்சன நாச்சியப்பன் ஆகியோரின் கருத்துக்களை இந்தக் குழு கேட்கும் என்று இந்தியன் எக்ஸ்பிரஸ் செய்தி வெளியிட்டுள்ளது.

இந்த குழுவின் கடைசி கூட்டம் ஜனவரி 31-ம் தேதி நடைபெற்றது. அங்கு "திருத்த மசோதாக்களை ஆய்வு செய்வதற்கான நடைமுறை மற்றும் முறைகள்" குறித்து விவாதங்கள் நடத்தப்பட்டன. பள்ளி மற்றும் கல்லூரி மாணவர்களுக்கான கட்டுரை எழுதுதல் மற்றும் விவாதப் போட்டிகள் போன்ற முயற்சிகள் உட்பட விரிவான பொது ஆலோசனை மற்றும் விழிப்புணர்வு பிரச்சாரத்தை நடத்துவதற்கான திட்டங்களையும் குழு விவாதித்தது.

காங்கிரஸ் மற்றும் திரிணாமுல் காங்கிரஸ் தலைவர்கள் உட்பட எதிர்க்கட்சி உறுப்பினர்கள் இந்த யோசனையை எதிர்த்தனர். இந்த மசோதாக்கள் இன்னும் நாடாளுமன்றத்தால் நிறைவேற்றப்படவில்லை என்று சுட்டிக்காட்டினர்.

அரசியல் கட்சிகள், ஓய்வு பெற்ற நீதிபதிகள், தேர்தல் ஆணையம் (தற்போதைய மற்றும் முன்னாள்), தொழில்துறை அமைப்புகள், தொழிற்சங்கங்கள், விவசாயிகள் சங்கங்கள், மேலாண்மை நிறுவனங்கள், சிந்தனையாளர்கள், அரசியல் ஆய்வாளர்கள் மற்றும் தேர்தல் வியூகவாதிகள் மற்றும் பொதுத்துறை நிறுவனங்கள் உள்ளிட்ட 23 வெவ்வேறு வகை பங்கேற்பாளர்கள் இந்த  குழுவின் முன் வாக்குமூலம் அளிக்க அழைக்கப்படுவார்கள்.

பொதுமக்களின் கருத்துக்களைப் பெற, இந்தக் குழு சமர்ப்பிப்புகளுக்காக ஒரு வலைத்தளத்தை உருவாக்கும் என்று எதிர்பார்க்கப்படுகிறது.

அரசியலமைப்பு (நூற்று இருபத்தி ஒன்பதாவது திருத்தம்) மசோதா 2024 என்றும், யூனியன் பிரதேச சட்டங்கள் (திருத்தம்) மசோதா 2024 என்றும் அழைக்கப்படும் இரண்டு மசோதாக்கள், டிசம்பர் 17, 2024-ல் சட்ட அமைச்சர் அர்ஜுன் ராம் மேக்வாலால் மக்களவையில் அறிமுகப்படுத்தப்பட்டு கூட்டுக் குழுவிற்கு பரிந்துரைக்கப்பட்டன.

இரண்டு மசோதாக்களும் மக்களவை மற்றும் மாநில/யூனியன் பிரதேச சட்டமன்றங்களுக்கு அவற்றின் விதிமுறைகளை ஒத்திசைவாக திருத்துவதன் மூலம் ஒரே நேரத்தில் தேர்தல்களை நடத்த உதவுகின்றன.