பிரதமர் மோடி அமெரிக்கா பயணம்: ஜோ பைடனுடன் 3 சந்திப்புகள்; பாதுகாப்பு துறையில் நெருக்கமான உறவு

பிரதமர் மோடி 3 நாள் பயணமாக இன்று அமெரிக்கா புறப்பட்டுச் சென்றார். அரசுமுறைப் பயணமாக முதல்முறையாக அமெரிக்கா செல்லும் பிரதருக்கு சிவப்புக் கம்பள வரவேற்பு அளிக்க வெள்ளை மாளிகை தயாராகி வருகிறது.

இந்த 3 நாட்களில் பிரதமர் மோடி, அமெரிக்க அதிபர் ஜோ பைடனுடன் 3 முறை சந்தித்து பேச உள்ளார், தனிப்பட்ட சந்திப்பு, அரசு முறை இரவு உணவு, துணை ஜனாதிபதி கமலா ஹாரிஸ் மற்றும் வெளியுறவுத்துறை செயலாளர் ஆண்டனி பிளிங்கன் இணைந்து வழங்கும் மதிய உணவு, அமெரிக்க காங்கிரஸின் தலைவர்கள் வழங்கும் வரவேற்பு என பல்வேறு ஏற்பாடு செய்யப்பட்டுள்ளன.

பிரதமரின் பயணம் குறித்து வெளியுறவுச் செயலர் வினய் குவாத்ரா கூறுகையில், இந்தியாவுக்கும் அமெரிக்காவுக்கும் இடையிலான உறவில் இது ஒரு "மைல்கல்" என்று கூறினார். இது இரு நாட்டு உறவில் ஒரு மைல்கல். இது மிகவும் முக்கியமான பயணம் என்று அவர் கூறினார்.

2014-ம் ஆண்டு முதல் மோடி 6 முறை அமெரிக்கா சென்றுள்ளார். இந்த பயணத்தின் போது இரு தரப்பினரும் பாதுகாப்புத் துறை தொடர்பான ஒத்துழைப்புகளை மேற்கொள்வார்கள் என்று கூறப்பட்டுள்ளது. பாதுகாப்புத் துறை இணை வளர்ச்சி மற்றும் விநியோக மாற்றத்தை பராமரித்தல் ஆகியவற்றில் நெருக்கமான பங்காளிப்பை மேற்கொள்ள உள்ளனர்.

வர்த்தகம் மற்றும் முதலீட்டு உறவுகளை வலுப்படுத்துவது மற்றும் தொலைத்தொடர்பு, விண்வெளி மற்றும் உற்பத்தி உள்ளிட்ட தொழில்நுட்ப களத்தில் ஆழமான உறவுகளை வலுப்படுத்துவதில் இரு தரப்பும் கவனம் செலுத்தும்.

பிரதமர் மோடியின் அமெரிக்க பயணத்தின் முக்கிய முடிவுகளில் ஒன்றாக பாதுகாப்பு தொழில்துறை ஒத்துழைப்பு திட்ட வரைபடம் இருக்கும் என்று வெளியுறவு செயலாளர் குவாத்ரா கூறினார்.

குவாத்ரா மேலும் கூறுகையில், இது அடிப்படையில் பாதுகாப்பு இணை உற்பத்தி மற்றும் இணை வளர்ச்சியின் அனைத்து அம்சங்களிலும் கவனம் செலுத்துகிறது. இரு நாடுகளின் பாதுகாப்பு தொழில்துறை சுற்றுச்சூழல் அமைப்புகள் எவ்வாறு சிறப்பாக ஒத்துழைக்க முடியும், பாதுகாப்புத் துறையில் உள்ள விநியோகக் கோடுகள் எவ்வாறு ஒருவருக்கொருவர் மிகவும் சிறப்பாக தொடர்பு கொள்ள முடியும் என்பதையும் இந்த சந்திப்பு மேம்படுத்தும் என்றார்.

பாதுகாப்பு துறை ஒத்துழைப்பு அமெரிக்காவுடனான இந்தியாவின் உறவின் "முக்கிய தூண்" என்று குவாத்ரா கூறினார்.

இன்று அமெரிக்கா புறப்பட்டு சென்றுள்ள மோடி, நியூயார்க்கில் இருந்து தனது பயணத்தை தொடங்குகிறார். அங்கு அவர் ஐக்கிய நாடுகள் சபையின் தலைமையகத்தில் சர்வதேச யோகா தின கொண்டாட்டங்களுக்கு தலைமை தாங்குவார் மற்றும் ஜூன் 21 அன்று முக்கிய பிரமுகர்கள் மற்றும் பல்வேறு அமைப்பு தலைவர்களை சந்திக்கிறார்.

தே நாளில் வாஷிங்டன் DCக்கு புறப்பட்டு சென்று அதிபர் ஜோ பைடன் மற்றும் ஜில் பைடன் ஆகியோரைச் சந்திக்கிறார். ஜூன் 22 அன்று, பிரதமருக்கு வெள்ளை மாளிகையில் சம்பிரதாய வரவேற்பு அளிக்கப்படும், அதைத் தொடர்ந்து பைடனுடன் முறையான இருதரப்பு சந்திப்பு நடைபெறும். பைடன் மற்றும் ஜில் பைடன் ஆகியோர் மோடிக்கு வியாழன் மாலை அரசு முறை விருந்தளிக்கின்றனர்.

வெள்ளிக்கிழமை, பிரதமர், முன்னணி நிறுவனங்களின் பிரநிதிகளை சந்தித்து பேசுகிறார். பின்னர், அமெரிக்க துணை அதிபர் கமலா ஹாரிஸ் மற்றும் வெளியுறவுத்துறை செயலாளர் ஆண்டனி பிளிங்கன் ஆகியோர் அரசு மதிய விருந்து அளிக்க உள்ளனர்.

ரீகன் சென்டரில் இந்திய-அமெரிக்க மக்களுடன் பிரதமர் மோடி உரையாற்றுகிறார். மேலும் கென்னடி மையத்தில் சிந்தனையாளர்கள், இளம் தொழில்முனைவோர், தொழிலதிபர்கள் ஆகியோரைச் சந்திக்கிறார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“