‘சுதந்திரத்திற்காக ஆர்.எஸ்.எஸ் தலைவர்கள் சிறைக்குச் சென்றார்கள்: ஆர்.எஸ்.எஸ் நூற்றாண்டு விழாவில் மோடி பேச்சு

டெல்லியில் நடந்த ஆர்.எஸ்.எஸ் நூற்றாண்டு விழாவில் பேசிய பிரதமர் நரேந்திர மோடி, ராஷ்டிரிய ஸ்வயம் சேவக் சங் (ஆர்.எஸ்.எஸ்) 'நாடே முதலில்' என்ற அதன் நம்பிக்கையின் காரணமாக ஆங்கிலேயர்கள் மற்றும் நிஜாம்களால் பெரிதும் பாதிக்கப்பட்டது என்றார். நிறுவனர் கே.பி. ஹெட்கேவர் உட்பட பல ஆர்.எஸ்.எஸ் உறுப்பினர்கள் சுதந்திரப் போராட்டத்தின்போது சிறையில் அடைக்கப்பட்டனர் என்றும் அவர் கூறினார்.

ஆங்கிலத்தில் படிக்க:

ஆர்.எஸ்.எஸ்-ன் நூற்றாண்டைக் குறிக்கும் வகையில் சிறப்பாக வடிவமைக்கப்பட்ட நினைவு தபால் தலை மற்றும் ஒரு நாணயத்தை மோடி வெளியிட்டார். இந்த நாணயம் மற்றும் தபால் தலை ஆகியவை நாட்டிற்கு ஆர்.எஸ்.எஸ்-ன் பங்களிப்பை எடுத்துக்காட்டுகின்றன என்று அவர் குறிப்பிட்டார்.

“இந்திய வரலாற்றில் பாரத மாதாவின் உருவம் ஒரு நாணயத்தில் பொறிக்கப்படுவது இதுவே முதல் முறையாகும்” என்று பிரதமர் மோடி கூறினார். இந்த நாணயத்தில் ஆர்.எஸ்.எஸ்-ன் முழக்கமான “ராஷ்ட்ராய ஸ்வாஹா, இதம் ராஷ்ட்ராய, இதம் ந மம” என்பதும் பொறிக்கப்பட்டுள்ளது. இதன் பொருள்:  “அனைத்தும் தேசத்திற்காக அர்ப்பணிக்கப்படுகிறது, அனைத்தும் தேசத்திற்கானது, எனக்கு என்று எதுவும் இல்லை” என்பதாகும்.

விஜயதசமியன்று ஆர்.எஸ்.எஸ் நூற்றாண்டு என்பது தற்செயல் நிகழ்வல்ல: மோடி

ஆர்.எஸ்.எஸ் நூற்றாண்டு விழாவில் பேசிய பிரதமர் மோடி, “நாளை விஜயதசமி, தீமைக்கு மேல் நன்மை, அநீதிக்கு மேல் நீதி, பொய்க்கு மேல் உண்மை, இருளுக்கு மேல் ஒளி ஆகியவற்றின் வெற்றியைக் குறிக்கும் பண்டிகை... 100 ஆண்டுகளுக்கு முன்பு தசரா அன்று ஆர்.எஸ்.எஸ் நிறுவப்பட்டது என்பது வெறும் தற்செயல் நிகழ்வு அல்ல. இது ஆயிரக்கணக்கான ஆண்டுகளாகத் தொடர்ந்து வந்த ஒரு பாரம்பரியத்தின் மறுமலர்ச்சி ஆகும். சங்கத்தின் நூற்றாண்டைக் காணும் பாக்கியம் எங்களுக்குக் கிடைத்துள்ளது.”

‘விடுதலைப் போராட்டத்தில் பங்கேற்றதற்காக ஹெட்கேவர் சிறையில் அடைக்கப்பட்டார்’

ஆர்.எஸ்.எஸ் உடன் இணைந்த பல்வேறு அமைப்புகள் சமூகத்தின் வெவ்வேறு பிரிவுகளின் தேவைகளைப் பூர்த்தி செய்கின்றன என்று மோடி கூறினார். ஆர்.எஸ்.எஸ்-ன் வெவ்வேறு பிரிவுகள் ஒருபோதும் மோதிக் கொண்டதில்லை, ஏனெனில் இந்த அமைப்பின் ஒவ்வொரு பகுதியும் ஒரே நோக்கத்திற்காக பாடுபடுகிறது: அது "நாடே முதலில்" என்பதாகும்.

“ஆர்.எஸ்.எஸ் தொடங்கப்பட்டதிலிருந்தே, தேசத்தைக் கட்டியெழுப்பப் பாடுபடுகிறது... சுதந்திரப் போராட்டத்தின் போது, ஆர்.எஸ்.எஸ் நிறுவனர்டாக்டர் கே.பி.ஹெட்கேவர் சிறைக்குச் சென்றார், அவருடன் அமைப்பின் பல உறுப்பினர்களும் சிறை சென்றனர்” என்று மோடி கூறினார். ஆர்.எஸ்.எஸ் சுதந்திர இயக்கத்தில் பங்கேற்றது மற்றும் பல சுதந்திரப் போராட்ட வீரர்களுக்கு அடைக்கலம் கொடுத்தது என்றும் அவர் தெரிவித்தார்.

1942-ம் ஆண்டு சிமூர் (மகாராஷ்டிரா) கிளர்ச்சியின் போது, ஆர்.எஸ்.எஸ் ஸ்வயம் சேவகர்கள் ஆங்கிலேயர்களால் பாதிக்கப்பட்டனர் என்று அவர் கூறினார்.  “சுதந்திரத்திற்குப் பிறகு, ஹைதராபாத் நிஜாம்களாலும் ஆர்.எஸ்.எஸ் பாதிக்கப்பட்டது. கோவா மற்றும் தாத்ரா மற்றும் நாகர் ஹவேலி சுதந்திரத்தின் போதும் ஆர்.எஸ்.எஸ் தியாகம் செய்தது. ஆனாலும் ஆர்.எஸ்.எஸ் அதன் நம்பிக்கையில் உறுதியாக இருந்தது: 'நாடே முதலில்' மற்றும் 'ஒரே பாரதம், சிறந்த பாரதம்' என்ற இலக்கு இருந்தது.

“ஜனநாயகம் மற்றும் அரசியலமைப்பு அமைப்புகள் மீது ஆர்.எஸ்.எஸ் தொண்டர்கள் வைத்திருக்கும் அசைக்க முடியாத நம்பிக்கை ஒருபோதும் கசப்புணர்வுக்கு வழிவகுக்கவில்லை. அது அவசரநிலையை எதிர்க்கும் பலத்தை மட்டுமே அவர்களுக்குக் கொடுத்தது” என்று மோடி கூறினார்.

“சுதந்திரத்திற்குப் பிறகும், ஆர்.எஸ்.எஸ்-ஐ நசுக்க முயற்சிகள் மேற்கொள்ளப்பட்டன. ஆர்.எஸ்.எஸ் பொது நீரோட்டத்தில் வருவதைத் தடுக்க எண்ணற்ற சதித்திட்டங்கள் நடந்தன... சில சமயங்களில் நாம் எதிர்பாராத விதமாக நம் நாக்கை நம் பற்களால் கடித்து விடுகிறோம், ஆனால், அதனால் நாம் பற்களை உடைத்து விட மாட்டோம்... அமைப்புக்கு எதிரான அனைத்து தடைகள் மற்றும் சதித்திட்டங்கள் இருந்தபோதிலும், ஆர்.எஸ்.எஸ் ஒருபோதும் யாருக்கும் எதிராகக் கசப்புடன் இருக்கவில்லை, ஏனெனில் நாங்கள் சமுதாயத்திலிருந்து வேறுபட்டவர்கள் அல்ல, அதன் ஒரு பகுதி என்பதை அறிவோம்... நாட்டின் அரசியலமைப்பு நிறுவனங்கள் மீது ஆர்.எஸ்.எஸ் ஸ்வயம் சேவகர்கள் அசைக்க முடியாத நம்பிக்கை வைத்துள்ளனர்” என்று மோடி கூறினார்.