![Prajwal Revanna Farm house](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/PprjKjA3Uk8vFiCvFrzY.jpg)
Prajwal Revanna assault case
ஜேடி(எஸ்) எம்பி பிரஜ்வல் ரேவண்ணாவால் பாலியல் பலாத்காரம் செய்யப்பட்டதாகக் கூறப்படும் பல பெண்களின் வீடியோ கிளிப்புகள் பரப்பப்பட்டு வரும் நிலையில், கடந்த 10 நாட்களாக கர்நாடகாவின் ஹாசன் மாவட்டத்தில் பாதிக்கப்பட்ட பல பெண்கள் தங்கள் வீடுகளை விட்டு வெளியேறியுள்ளனர்.
ஜேடி(எஸ்) தலைவரும், முன்னாள் பிரதமருமான எச் டி தேவகவுடாவின் கோட்டை ஹாசன் தொகுதி. இந்த தொகுதியின் எம்.பி.யாக உள்ள தேவகவுடாவின் பேரன் பிரஜ்வால், மீண்டும் தேர்தலில் போட்டியிடுகிறார்.
ஏப்ரல் 26-ம் தேதி ஹாசனில் வாக்குப்பதிவு முடிந்தவுடன் பிரஜ்வல் நாட்டை விட்டு வெளியேறிய நிலையில், சிறப்புப் புலனாய்வுக் குழுவை (எஸ்ஐடி) அணுகுவதைத் தடுக்கும் வகையில், ஒரு பெண் கடத்தப்பட்டதாகக் கூறப்படும் வழக்கில், அவரது தந்தை, ஹோலேநரசிபூர் எம்எல்ஏ, எச் டி ரேவண்ணா சனிக்கிழமை கைது செய்யப்பட்டார்.
“முழு மாவட்டமும் எச்.டி ரேவண்ணாவின் கட்டுப்பாட்டில் உள்ளது. நீங்கள் அவர்களைப் பற்றி தவறாகப் பேசுகிறீர்கள் என்றால், அது அவர்களைச் சென்றடைவதற்கான வாய்ப்புகள் அதிகம். ஏனென்றால் குடும்பம் மற்றும் கட்சிக்கு ஏராளமான விசுவாசிகள் உள்ளனர், ”என்று ஹாசன் நகரத்திலிருந்து 20 கிமீ தொலைவில் உள்ள ஹகரே கிராமத்தில் உள்ள ஒரு கடைக்காரர் கூறினார்.
இந்தியன் எக்ஸ்பிரஸ் மாவட்டத்தில் உள்ள மூன்று நகரங்கள் மற்றும் ஐந்து கிராமங்களுக்குச் சென்று, பல மக்களிடம் பேசியது. அவர்களில் யாரும் பெயரை வெளியிட விரும்பவில்லை.
ரேவண்ணாவின் வீட்டில் வேலை பார்த்த ஒரு பெண்ணின் புகாரின் அடிப்படையில் ஏப்ரல் 28 அன்று பிரஜ்வலுக்கு எதிரான முதல் எஃப்ஐஆர் பதிவு செய்யப்பட்டது. “அவரது சில வீடியோக்கள் பரவத் தொடங்கின, அதன் பிறகு, அவரது வீடு பூட்டியிருந்தது. அவள் எப்போது சென்றாள் என்பது எங்களுக்குத் தெரியாது,” என்று பக்கத்து வீட்டுக்காரர் கூறினார்.
அருகிலுள்ள கிராமத்தில், பிரஜ்வல் மீது பலாத்கார வழக்கு பதிவு செய்த முன்னாள் ஜில்லா பஞ்சாயத்து உறுப்பினர் வசித்து வந்த இடத்தில், உள்ளூர் ஜே.டி.(எஸ்) தலைவர் ஒருவர், முன்பு கட்சிக்காக உழைத்த பல பெண்கள் இப்போது வெளியில் தெரியாமல் உள்ளனர், என்றார்.
“பல கட்சிப் பெண்கள் சமூக ஊடகங்களில் பிரஜ்வலுடன் தாங்கள் இருந்த புகைப்படங்களை நீக்குவதை நாங்கள் கவனித்தோம். சில சமயங்களில், எம்.பி.யுடன் உள்ள தொடர்பு குறித்து, ஆண்கள் தங்கள் மனைவிகளிடம் கேள்வி கேட்கின்றனர். இந்த சம்பவம் மாவட்டத்தில் பல பெண்களின் வாழ்க்கையை சிதைத்து வருகிறது,'' என்றார்.
தனது புகாரில், ஜில்லா பஞ்சாயத்து உறுப்பினர், தன்னை மூன்று ஆண்டுகளாக பாலியல் பலாத்காரம் செய்ததாகவும், மேலும் வீடியோக்கள் பதிவு செய்யப்பட்டதாகவும் குற்றம் சாட்டினார். இதையடுத்து அவள் வீட்டை விட்டு வெளியேறினாள். “ஏப்ரல் 24 அன்று அவள் இங்கே இருந்தாள்… அடுத்த நாள் வீடியோக்கள் வெளிவந்தன…. அதன்பிறகு, நாங்கள் குடும்பத்தைப் பார்க்கவில்லை, ”என்று உள்ளூர் தலைவர் ஒருவர் கூறினார்.
பெண்களின் அடையாளங்களை வெளிப்படுத்தும் வீடியோ கிளிப்புகள் மூலம், பல குடும்பங்களும் ஹாசனை விட்டு வெளியேறியுள்ளனர்.
ரேவண்ணா இல்லத்துக்கு சிறப்பு புலனாய்வு குழு சென்றபோது, வெளியில் திரண்டிருந்த கட்சித் தொண்டர்கள் பெண்களைப் பற்றிப் பேசிக் கொண்டிருந்தனர்.
“எனக்கு இந்த பெண்ணை தெரியும், அவர் எங்கள் குடியிருப்புக்கு அருகில் வசித்து வந்தார் மேலும் ஜேடி(எஸ்) நடவடிக்கைகளில் மிகவும் தீவிரமாக இருந்தார். அவளது வீடு பூட்டப்பட்டுள்ளது... அவளுக்கு சிறு குழந்தைகள் உள்ளனர்,” என்றார் ஒருவர்.
"அவள் என் அண்டை வீட்டாரின் உறவினர், எங்கள் குடும்ப விழா ஒன்றில் கலந்து கொண்டாள்" என்று மற்றொருவர் கூறினார்.
“பெண்களின் முகத்தை வெளிப்படுத்துவது உண்மையில் தவறு. அவர்களில் சிலரை நான் அறிவேன், அவர்கள் தலைமறைவாகிவிட்டனர். அவர்கள் திரும்ப முடியுமா என்பது எங்களுக்குத் தெரியாது. ரேவண்ணாவின் குடும்பத்திற்கு எதிராக வழக்கு தொடர்ந்தால், ஹாசனில் உயிர் பிழைப்பது சாத்தியமில்லை என இந்த குடும்பங்கள் வழக்கு பதிவு செய்ய விரும்பவில்லை” என்று ஒரு கடைக்காரர் கூறினார்.
பல உள்ளூர் JD(S) தலைவர்கள் இந்த வீடியோக்களைப் பார்த்து அதிர்ச்சியை வெளிப்படுத்திய நிலையில், சிலர் தேவகவுடாவுக்கு அனுதாபமும் தெரிவித்தனர். “பிரஜ்வல் செய்தது மன்னிக்க முடியாத குற்றம். தேவகவுடா நான்கு தசாப்தங்களுக்கும் மேலாக தனது வாழ்நாளை தியாகம் செய்து தனது அரசியல் பாரம்பரியத்தை கட்டமைத்தார், அது பிரஜ்வாலின் குற்றச் செயல்களால் சரிந்தது, ”என்று ஒரு கட்சி ஊழியர் கூறினார்.
தேவகவுடா வாக்களித்த படுவாலஹிப்பே கிராமத்தில், ஜேடி(எஸ்) தலைவர் ஒருவர், வீடியோ கிளிப்புகள் பரவத் தொடங்கிய பிறகு, கட்சி பிரச்சாரம் செய்யவில்லை என்றார்.
“இந்த தொகுதியில் உள்ள இளைஞர்கள் தங்கள் மொபைல் போனில் வீடியோக்களை வைத்திருந்தனர். நாங்கள் எப்படி மக்களை எதிர்கொண்டு பிரஜ்வாலுக்கு வாக்களிக்கச் சொல்ல முடியும்?” என்று அவர் கேட்டார்.
கிராமத்தில் ஒரு பெரிய பண்ணை வீடு உள்ளது, அதை சிறப்பு புலனாய்வு குழுவும் பார்வையிட்டது.
ஒரு போலீஸ் அதிகாரியின் கூற்றுப்படி, பிரஜ்வால் அடிக்கடி பண்ணை வீட்டிற்குச் சென்றார், அங்கு சில வீடியோக்கள் பதிவு செய்யப்பட்டதாகக் கூறப்படுகிறது. அங்கு ஒரு போலீஸ் கான்ஸ்டபிள் வெளியே காவலுக்கு நிற்கிறார்.
"பிரஜ்வல் நண்பர்கள் மற்றும் விருந்துகளுடன் இங்கு வருவார், ஆனால் எங்களுக்கு அதைத் தவிர வேறு எதுவும் தெரியாது," என்று ஒரு ஊழியர் மேலும் பேச மறுத்துவிட்டார்.
பெயர் வெளியிட விரும்பாத நிலையில் பேசிய ஒரு போலீஸ் அதிகாரி, வீடியோ கிளிப்புகள் குறித்து மாவட்ட புலனாய்வு பிரிவுக்கு தெரியும், ஆனால் பிரச்சினையின் அளவு தெரியவில்லை. கேள்விக்குரிய பென் டிரைவ் 2023 ஆம் ஆண்டு கர்நாடகா சட்டமன்றத் தேர்தலுக்கு முன்பு சுற்றி வருகிறது, ஆனால் அந்த நேரத்தில் வீடியோக்கள் வெளிவரவில்லை, என்றார்.
இந்த வீடியோக்கள் தொடர்பாக 86 ஊடகங்கள் மற்றும் மூன்று தனி நபர்களுக்கு எதிராக 2023 ஜூன் 1ஆம் தேதி பெங்களூரு சிவில் நீதிமன்றத்தில் பிரஜ்வாலுக்கு ஒரு காக் ஆர்டர் கிடைத்தது.
இதில் ஒருவர் ஒருவர் வழக்கறிஞர் மற்றும் உள்ளூர் பாஜக தலைவர் ஜி தேவராஜே கவுடா. பிரஜ்வாலின் முன்னாள் டிரைவர் கார்த்திக், தேவராஜே கவுடாவுடன் பென் டிரைவை பகிர்ந்து கொண்டதாக கூறியுள்ளார்.
"இந்த ஆண்டு ஜனவரியில், தேவராஜே கவுடா ஒரு செய்தியாளர் சந்திப்பை ஏற்பாடு செய்தார், அங்கு அவர் வீடியோக்களை வெளியிடுவார் என்று ஊகிக்கப்பட்டது, ஆனால் பத்திரிகையாளர் சந்திப்பு திடீரென ரத்து செய்யப்பட்டது. வீடியோக்கள் வெளிவரத் தொடங்கும் வரை, பிரஜ்வல் ரேவண்ணாவின் செக்ஸ் வீடியோ இருக்கக்கூடும் என்பது மட்டுமே எங்களுக்குத் தெரியும், ஆனால் இந்த பென் டிரைவில் பல பெண்கள் சம்பந்தப்பட்ட 2,900 க்கும் மேற்பட்ட கோப்புகள் இருக்கும் என்று நினைத்துப் பார்க்கவில்லை என்று அந்த அதிகாரி கூறினார்.
Read in English: Identities out after Prajwal Revanna clips, many women leave home amid fear, stigma
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.