ஐ.ஏ.எஸ். ஆவதே லட்சியம்: புதுச்சேரியில் +2 தேர்வில் முதலிடம் பிடித்த மாணவி பேட்டி!

கடந்த மார்ச் மாதம் பிளஸ்-2 பொதுதேர்வுகள் நடந்தது. இதில் புதுச்சேரி, காரைக்காலில் 101 தனியார் பள்ளிகளை சேர்ந்த 3 ஆயிரத்து 881 மாணவர்கள், 3 ஆயிரத்து 683 மாணவிகள் என மொத்தம் 7 ஆயிரத்து 564 பேர் தேர்வு எழுதினர். இந்த தேர்வு முடிவுகள் இன்று வெளியிடப்பட்டது. இதில் புதுச்சேரி, காரைக்காலில் 3 ஆயிரத்து 794 மாணவர்கள், 3 ஆயிரத்து 659 மாணவிகள் என மொத்தம் 7 ஆயிரத்து 453 மாணவர்கள் தேர்ச்சி பெற்றுள்ளனர். இதன் மொத்த தேர்ச்சி 98.53% ஆகும். புதுச்சேரி செயின்ட் ஜோசப் ஆஃப் க்ளூனி பெண்கள் மேல்நிலைப்பள்ளி மாணவிகள் மாநிலத்தில் முதல் 3 இடங்களை பிடித்து சாதனை படைத்து உள்ளனர்

புதுச்சேரி செயின்ட் ஜோசப் ஆஃப் க்ளூனி பெண்கள் மேல்நிலைப்பள்ளி மாணவி பூஜா, 600-க்கு 597 மதிப்பெண் எடுத்து  முதலிடம் பிடித்துள்ளார். பிரெஞ்சு, கம்ஃப்யூட்டர், வணிக கணக்கு, பொருளாதாரம் ஆகிய 5 பாடங்களில் 100-க்கு 100 மதிப்பெண் எடுத்துள்ள பூஜா, பி.காம் படித்து எதிர்காலத்தில் ஐ.ஏ.எஸ். பணியில் சேருவதே லட்சியம் என்றார். கடந்த ஆண்டு, 11-ம் வகுப்பில் இதே மாணவிதான் முதலிடம் பிடித்தார் என்பது குறிப்பிடத்தக்கது. தேர்வு நேரத்தில் செல்போனை படிப்பிற்கு மட்டுமே பார்க்க வேண்டும் என மாணவர்களுக்கு ஆலோசனை கூறினார்.

இவரது தந்தை முத்துகுமரன், ஓட்டுநரான இவர் கடந்த 6 மாதங்களுக்கு முன்பு மாரடைப்பால் இறந்து விட்டார். இவரது தாயார்
சரஸ்வதி, தனியார் பள்ளி ஒன்றில் ஆசிரியையாக பணிபுரிந்து வருகிறார்.