கேரளாவில் மட்டும் 18 நாட்கள்; ஆனால் உ.பி யில்..? ராகுல் யாத்திரையை தாக்கும் சி.பி.எம்

இடதுசாரிகள் ஆளும் கேரளாவில், பாஜக ஆளும் உத்திரபிரதேசத்தில் நடைபயணம் மேற்கொள்ளும் நாட்களை ஒப்பிடும் வகையில், திங்களன்று காங்கிரஸின் பாரத் ஜோடோ யாத்திரையை சிபிஐ(எம்) விமர்சித்தது. இது யாத்திரையின் நுண்ணிய விவரங்களை கவனத்திற்கு கொண்டு வந்துள்ளது.

காங்கிரஸ் முகாமில் இருந்து வெளிவரும் விவரங்களின்படி, யாத்திரை அதிகபட்ச நாட்களை ராஜஸ்தான் மற்றும் கர்நாடகாவில் செலவிடும்: 21 நாட்கள். இந்த இரு மாநிலங்களுக்கும் அடுத்த ஆண்டு தேர்தல் நடைபெற உள்ளது.

கர்நாடகாவில் 2023 மே மாதம் சட்டமன்றத் தேர்தல் நடைபெறவுள்ள நிலையில், மத்தியப் பிரதேசம், சத்தீஸ்கர், மிசோரம் மற்றும் தெலுங்கானா ஆகிய மாநிலங்களுடன், ராஜஸ்தானிலும் ஆறு மாதங்களுக்குப் பிறகு தேர்தல் நடைபெறவுள்ளது.

எவ்வாறாயினும், இந்த யாத்திரை குறிப்பிட்ட மாநில தேர்தல்களை இலக்காகக் கொண்டிருக்கவில்லை என்று காங்கிரஸ் தலைவர்கள் கூறுகின்றனர்,

உதாரணமாக, இந்த ஆண்டு இறுதியில் சட்டமன்றத் தேர்தல் நடைபெறவுள்ள குஜராத் வழியாக யாத்திரை செல்லவில்லை என்று அவர்கள் வாதிடுகின்றனர். அதேபோல், சத்தீஸ்கர் வழியாகவும் அது செல்லாது.

தனது பழைய கோட்டைகளான மேற்கு வங்கம் மற்றும் திரிபுராவை இழந்த பின்னர் இப்போது கேரளாவுக்குள் சுருங்கிவிட்ட சிபிஐ(எம்), யாத்திரை தொடர்பாக காங்கிரஸை சாடியது.

ராகுல் காந்தியின் கேலிச்சித்திரத்தை மார்க்சிஸ்ட் கட்சி ட்வீட் செய்து, இது பாரத் ஜோடோ அல்லது சீட் ஜோடோ பிரச்சாரமா என்று கேள்வி எழுப்பியது. “கேரளாவில் 18 நாட்கள்... உத்தர பிரதேசத்தில் 2 நாட்கள். பாஜக-ஆர்எஸ்எஸ்-ஐ எதிர்த்துப் போராடுவதற்கான வித்தியாசமான வழி” என்று அது விமர்சித்தது.

பாஜகவை எதிர்கொள்ள காங்கிரஸ் தயாராக இல்லை என்பதை பல்வேறு மாநிலங்களில், ராகுல் செலவழிக்கும் நேரம் காட்டுகிறது என்று கேரள சிபிஐ(எம்) மூத்த தலைவர் எம்.வி.ஜெயராஜன் கூறினார். ராகுல் இடதுசாரிகளை முக்கிய எதிரியாகக் கருதுகிறார். சங்பரிவார் சவாலை ஏற்காமல் அவரும் அவரது கட்சியினரும் ஓடுகின்றனர். பாஜகவை அவரால் முக்கிய எதிரியாக பார்க்க முடியாது. பாஜகவின் கொள்கைகளை காங்கிரஸால் எதிர்த்துப் போராட முடியாது என்று அவர் குற்றம் சாட்டினார்.

இதற்கு காங்கிரஸ் தலைவர் ஜெய்ராம் ரமேஷ் பதிலடி கொடுத்துள்ளார். யாத்திரை எப்படி, ஏன் அப்படி திட்டமிடப்பட்டது என்பதற்கான உங்கள் வீட்டுப்பாடத்தை இன்னும் சிறப்பாகச் செய்யுங்கள். முண்டுமோடியின் தேசத்தில், பாஜகவின் ஏ அணியாக இருக்கும் ஒரு கட்சியின் முட்டாள்தனமான விமர்சனம்.

ரமேஷின் “முண்டு மோடி” கேரள முதல்வரும் சிபிஐ(எம்) பிரமுகருமான பினராயி விஜயனை கேலி செய்தது. நரேந்திர மோடியின் கேரளப் பதிப்பு தான் பிணராயி விஜயன் என்று குற்றம் சாட்டியது.

சிபிஎம்மின் விமர்சனம் ஆதாரமற்றது என்று காங்கிரஸ் தலைவர்கள் கூறினர். “தர்க்கத்தின்படி, யாத்திரை கர்நாடகா மற்றும் ராஜஸ்தானில் தலா 21 நாட்கள் செலவிடும். இந்த இரு மாநிலங்களிலும் பாஜகவுடன் காங்கிரஸ் நேரடி மோதலில் ஈடுபட்டுள்ளது. இது மத்திய பிரதேசத்தில் 16 நாட்கள் கழிக்கும். அங்கும் காங்கிரஸும் பாஜகவை எதிர்த்துப் போராடுகிறது” என்று ஒரு தலைவர் கூறினார்.

முந்தைய இரண்டு நாட்களுக்குப் பதிலாக உத்தரப் பிரதேசத்தில் யாத்திரை 5 நாட்கள் நடைபெறும் என்று காங்கிரஸ் வட்டாரங்கள் தெரிவித்தன. சி.பி.ஐ.(எம்) அணிவகுப்பு நடத்துவதற்கு முன், ஓரிரு நாட்களுக்கு முன்பு இந்த முடிவு எடுக்கப்பட்டதாக அவர்கள் தெரிவித்தனர்.

கிட்டத்தட்ட 150 நாட்கள் நடைபெறும் இந்த யாத்திரை கேரளாவில் 18 நாட்களும், கர்நாடகாவில் 21 நாட்களும், தெலுங்கானாவில் 13 நாட்களும், மகாராஷ்டிரா மற்றும் மத்திய பிரதேசத்தில் தலா 16 நாட்களும், ராஜஸ்தானில் 21 நாட்களும், உத்தரபிரதேசத்தில் 5 நாட்களும், டெல்லியில் 2 நாட்களும், ஹரியானாவில் 12 நாட்களும், பஞ்சாபில் 11 நாட்களும் கடந்து ஜம்மு காஷ்மீர் சென்றடையும்.

கட்சித் தலைமை தினமும் ஒரு மறுஆய்வுக் கூட்டத்தை நடத்துவதாகவும், "சமீபத்திய உள்ளீடுகளை" பொறுத்து அதில் சிறிய மாற்றங்களைச் செய்வதாகவும் காங்கிரஸ் வட்டாரங்கள் தெரிவிக்கின்றன.

நாட்கள் கிட்டத்தட்ட தினமும் திருத்தப்படுகின்றன. ஒரு மாநிலத்திற்கான திட்டங்கள் சுமார் 3-4 வாரங்களுக்கு முன்பே திட்டமிடப்பட்டுள்ளன, யாத்திரை முன்னேறும்போது சிறிய மாற்றங்கள் இருக்கலாம் என்று ஒரு மூத்த தலைவர் கூறினார்.

நாட்கள், பாதையின் நீளத்தைப் பொறுத்தது என்று கட்சி வட்டாரங்கள் தெரிவித்தன. தமிழகத்தில் இருந்து தொடங்கினோம், கர்நாடகாவுக்குள் நுழைய கேரளாவைக் கடந்து செல்ல வேண்டும். ஒவ்வொரு நாளும் தோராயமாக 20-22 கிமீ நடக்கிறோம். எனவே கர்நாடகாவை அடைய 18-19 நாட்கள் ஆகும். பாதையைப் பொறுத்தவரை, நில அமைப்பும் பாதுகாப்பும் அதைத் தீர்மானிக்கும் காரணிகள் என்று கட்சித் தலைவர்கள் தெரிவித்தனர்.

கடந்த வாரம் ஒரு செய்தியாளர் சந்திப்பில், யாத்திரை ஒரு மாநிலத்தில் அதிக நேரத்தையும் மற்றொரு மாநிலத்தில் குறைவாகவும் செலவிடுவது குறித்த கேள்விக்கு பதிலளித்த ராகுல் காந்தி, "நாங்கள் எந்த மாநிலத்திலும் அதிக நேரத்தை செலவிடுகிறோம் என்று நான் நினைக்கவில்லை. நான் அதை உருவாக்கிவிட்டேன்....அதாவது, நாங்கள் அதைப் பற்றி விவாதித்தோம், எல்லா மாநிலங்களுக்கும் ஒரே மாதிரியான நேரத்தை வழங்குகிறோம் என்று நான் நினைக்கிறேன், ”என்று கூறினார்.

கேரளாவின் வயநாடு தொகுதியின் எம்.பி.யான ராகுலுக்கு தமிழ்நாடு-கேரள எல்லையில் ஞாயிற்றுக்கிழமை அமோக வரவேற்பு கிடைத்ததையும், அவரது நிகழ்வுகள் இதுவரை கேரளாவில் பெரும் கூட்டத்தை ஈர்த்ததையும் மார்க்சிஸ்ட் கம்யூனிஸ்ட் கட்சி கவனத்தில் கொண்டுள்ளது.

2019 லோக்சபா தேர்தலில், காங்கிரஸ் தலைமையிலான ஐக்கிய ஜனநாயக முன்னணி, கேரளாவில் 20 இடங்களில் 19 இடங்களை வென்றது.

வயநாட்டை தனது தொகுதியாக தேர்வு செய்யும், ராகுலின் முடிவை மார்க்சிஸ்ட் கம்யூனிஸ்ட் கட்சி விமர்சித்தது, இது "முக்கிய எதிரியான பாஜகவை எதிர்கொள்வதில் இருந்து தப்பிக்கதான்" என்று கூறியது. அவரது 18 நாள் கேரள அணிவகுப்பு காங்கிரஸின் வாய்ப்புகளை மீண்டும் உயர்த்தும் என்று கட்சியினர் அஞ்சுவதாக தெரிகிறது.

பாரத் ஜோடோ யாத்திரை: ஒரு மாநிலத்தில் உள்ள நாட்களின் எண்ணிக்கை

• தமிழ்நாடு: 4 நாட்கள்
• கேரளா: 18 நாட்கள்
• கர்நாடகா: 21 நாட்கள்
• தெலுங்கானா: 13 நாட்கள்
• மகாராஷ்டிரா: 16 நாட்கள்
• மத்திய பிரதேசம்: 16 நாட்கள்
• ராஜஸ்தான்: 21 நாட்கள்
• உத்தரபிரதேசம்: 5 நாட்கள்
• டெல்லி: 2 நாட்கள்
• ஹரியானா: 12 நாட்கள்
• பஞ்சாப்: 11 நாட்கள்
• ஜம்மு & காஷ்மீர்: இறுதி செய்யப்படவில்லை

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“