![Rajya Sabha member Sudha Murty life journey in tamil](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/lSHQ2sFhyRXUhsqFmR9v.jpg)
'ஒவ்வொரு ஆணின் வெற்றிக்குப் பின்னும் ஒரு இருப்பார்' என்கிற முதுமொழிக்கேற்ப நாராயண மூர்த்தி பின்னால் இருக்கும் பெண்ணாக சுதா மூர்த்தி உள்ளார்.
Infosys | Sudha Murty: 1981 ஆம் ஆண்டில், தனது கணவரிடம் 10,250 ரூபாயை கடனாகக் கொடுத்தார் சுதா மூர்த்தி. இதன் விளைவாக 80 பில்லியன் (அமெரிக்க டாலர்) மதிப்பு கொண்ட இந்தியாவின் மிகப்பெரிய ஐ.டி நிறுவனமான 'இன்ஃபோசிஸ் லிமிடெட்' உருவானது. இதனை உருவாக்கியவர் இன்ஃபோசிஸின் நிறுவனத் தலைவரும், தலைமை நிர்வாக அதிகாரியுமான நாராயண மூர்த்தி ஆவார்.
'ஒவ்வொரு ஆணின் வெற்றிக்குப் பின்னும் ஒரு இருப்பார்' என்கிற முதுமொழிக்கேற்ப நாராயண மூர்த்தி பின்னால் இருக்கும் பெண்ணாக சுதா மூர்த்தி உள்ளார். 2014 இல் அவரது கணவர் நிறுவனத்தின் நிர்வாகப் பொறுப்பில் இருந்து ஓய்வு பெற்றாலும், அவரின் உற்ற துணைவியாராக சுதா மூர்த்தி எப்பொழுதும் இருக்கிறார்.
1960 -களில் கர்நாடகாவின் ஹுப்பள்ளியில் உள்ள பொறியியல் கல்லூரியில் பொறியியல் படித்த ஒரே பெண், புனேவின் டாடா இன்ஜினியரிங் மற்றும் லோகோமோட்டிவ் நிறுவனத்தில் (டெல்கோ, இப்போது டாடா மோட்டார்ஸ்) முதல் பெண் பொறியாளர் சுதா மூர்த்தி ஆவார். அவர் பத்மஸ்ரீ (2006) மற்றும் பத்ம பூஷன் (2023) விருதுகளையும் வென்றார். பரோபகாரர், குழந்தைகளுக்கான புத்தகங்களை எழுதியவர் மற்றும் இங்கிலாந்து பிரதமர் ரிஷி சுனக்கின் மாமியாரும் ஆவார்.
நேற்று வெள்ளிக்கிழமை (மார்ச் 8), சுதா மூர்த்தி மாநிலங்களவையின் (ராஜ்யசபா) நியமன உறுப்பினராக நியமிக்கப்பட்டார். மேல் சபைக்கு ஜனாதிபதி திரௌபதி முர்முவால் பரிந்துரைக்கப்பட்ட 12 உறுப்பினர்களில் இவரும் ஒருவர் ஆவார்.
தாய்லாந்தில் இருந்து தி இந்தியன் எக்ஸ்பிரஸிடம் பேசிய சுதா மூர்த்தி, நியமனம் குறித்த செய்தி தன்னை ஆச்சரியத்தில் ஆழ்த்தியது என்றார். “நான் இதை எதிர்பார்க்கவில்லை. மகளிர் தினத்தன்று இந்த அறிவிப்பு வெளியானது மகிழ்ச்சியான தருணம். இது எனக்கு ஒரு பெரிய மேடை என்று நம்புகிறேன். நான் நிச்சயமாக என்னால் முடிந்ததைச் செய்ய முயற்சிப்பேன், ”என்று அவர் கூறினார்.
கடந்த இரண்டு ஆண்டுகளாக, சுதா மூர்த்தி பல பொதுத் தளங்களில் தோன்றியிருக்கிறார். அவர் ஒரு "சுத்த சைவம்" மற்றும் "எளிய" ரசனை கொண்ட பெண். அவர் சமூக ஊடகங்களின் மூலம் தனக்கென ஒரு பாதையை அமைத்து அரசியல் அறிமுகத்திற்கு தயாராகி இருக்கலாம் என்ற ஊகங்களைத் தூண்டினார்.
ஒரு கட்டத்தில் அவரது கணவர் இந்த உயர் பதவிக்கான சாத்தியமானவர் என்று பேசப்பட்ட நிலையில், ஆர்.எஸ்.எஸ் மற்றும் பா.ஜ.க ஆதிக்கம் செலுத்தும் பெங்களூரு தெற்கு மக்களவைத் தொகுதியில் சுதா மூர்த்தியின் பெயர் ஒரு சாத்தியமான தேர்வாகக் கூறப்பட்டது.
“மாண்புமிகு பிரதமர் நரேந்திர மோடிக்கு நன்றி. நமது மாண்புமிகு குடியரசுத் தலைவர் திரௌபதி முர்முஜி அவர்களால் ராஜ்யசபாவுக்கு பரிந்துரைக்கப்பட்டது எனது பாக்கியம் மற்றும் மரியாதை. நமது தேசத்திற்கு சேவை செய்வதற்கான வாய்ப்புக்கு நான் மிகவும் நன்றியுள்ளவனாக இருக்கிறேன், ”என்று சுதா மூர்த்தி தனது சமூக ஊடகங்களில் பிரதமர் நரேந்திர மோடியின் வாழ்த்துச் செய்திக்கு பதிலளித்தார்.
ஆகஸ்ட் 19, 1950 இல், வட கர்நாடகாவின் ஹவேரி மாவட்டத்தில் உள்ள ஷிகாவ்னில் பிறந்த சுதா மூர்த்தி, தனது வாழ்க்கையில் ஹுப்பள்ளி மற்றும் மாநிலத்தின் பிற பகுதிகளில் உள்ள அரசு மருத்துவமனையில் அறுவை சிகிச்சை செய்து வந்த தனது தந்தை டாக்டர் ஆர்.எச் குல்கர்னி மற்றும் தாயார் விமலா குல்கர்னியைப் பற்றி அடிக்கடி பேசியுள்ளார்.
ஹூப்பள்ளியில் உள்ள பி.வி. பூமரட்டி பொறியியல் மற்றும் தொழில்நுட்பக் கல்லூரியில் (பி.வி.பி) மின் பொறியியலில் பட்டம் பெற்ற பிறகு, சுதா மூர்த்தி பெங்களூருவில் உள்ள இந்திய அறிவியல் கழகத்தில் (IISc) முதுகலைப் பட்டம் பெற்றார், அங்கு அவர் 1974 இல் தங்கப் பதக்கம் பெற்றார்.
புனேவின் டாடா இன்ஜினியரிங் மற்றும் லோகோமோட்டிவ் நிறுவனத்தில் (டெல்கோ) பணியமர்த்தப்பட்ட முதல் பெண் பொறியாளர் இவர் ஆவார். பெண் பொறியாளர்களுக்கு இந்த ஆட்சேர்ப்பு முக்கியமான தருணமாக கருதப்படுகிறது. ஏனெனில் இது ஜே.ஆர்.டி டாடா நிறுவனத்தின் 'ஒரே ஆண் பணியாளர்கள்' கொள்கையை ஆட்சேபித்து இறுதியில் அவரது ஆட்சேர்ப்புக்கு வழிவகுத்தது.
பி.வி.பி கல்லூரியின் முன்னாள் மாணவரான பா.ஜ.க தலைவரும், முன்னாள் முதல்வருமான பசவராஜ் பொம்மை, தனது இளங்கலைப் பொறியியலுக்குச் சேர்ந்தபோது, சுதா மூர்த்தி பட்டம் பெற்றதை நினைவு கூர்ந்தார். “அப்போது எனக்குத் தெரிந்ததெல்லாம் அவர் பெயர் மட்டுமே. ஏனென்றால், அவர் எங்கள் கல்லூரியின் முதல் பெண் மாணவி. பொதுவாழ்க்கையில் நுழைந்த பிறகுதான் அவரைச் சந்திக்கும் வாய்ப்பும் கிடைத்தது. தற்செயலாக, அவரது முதல் பணியமர்வு டெல்கோ நிறுவனத்தில் இருந்தது. நானும் கூட அங்குதான் முதலில் வேலைக்குச் சேர்ந்தேன்.” என்று அவர் கூறுகிறார்.
1970 களில், சுதா மூர்த்தி ஒரு பொதுவான நண்பர் மூலம் நாராயண மூர்த்தியை சந்தித்ததாக கூறப்படுகிறது. 1978 ஆம் ஆண்டில், சுதாவின் குடும்பத்திற்கு மூர்த்தியைப் பற்றிய அச்சங்கள் இருந்தபோதிலும், இந்த ஜோடி திருமண பந்தத்தில் இணைந்தனர். பின்னர், வேலையில்லாத பொறியாளர் சோசலிச விழுமியங்களால் பெரிதும் பாதிக்கப்பட்டு தனது சொந்தத் தொழிலைத் தொடங்க முயன்றார்.
1981 இல் இன்ஃபோசிஸ் நிறுவப்பட்டபோது, பெங்களூருக்கு மாறுவதற்கு முன்பு சுதா மூர்த்தி தனது பெற்றோருடன் ஹுப்பாலியில் தங்கியிருந்தார்.
1996 ஆம் ஆண்டில், இன்ஃபோசிஸ் அறக்கட்டளை, இலாப நோக்கற்ற அமைப்பானது, சுதா மூர்த்தியை அதன் தலைவராகக் கொண்டு அமைக்கப்பட்டது. அடுத்த 25 ஆண்டுகளுக்கு அவர் அந்தப் பணியை ஆற்றினார். 1990 களின் பிற்பகுதியிலும் 2000 களின் முற்பகுதியிலும் வட கர்நாடகத்தில் தேவதாசிகளை ஒழித்து மறுவாழ்வு செய்ததற்காக இன்ஃபோசிஸ் அறக்கட்டளை அங்கீகரிக்கப்பட்டது.
தனது புத்தகத்தில், சுதா மூர்த்தி தேவதாசிகளிடையே தனது பணியைப் பற்றி எழுதுகிறார். மேலும் பாலியல் தொழிலில் ஈடுபட்ட பெண்களை அணுகியபோது, செருப்புகள் மற்றும் தக்காளியால் தான் தாக்கப்பட்டதாகவும் கூறுகிறார். 3,000க்கும் மேற்பட்ட தேவதாசிகள் இறுதியில் மறுவாழ்வு பெற்றனர். அறக்கட்டளை பள்ளிகள், கிராமங்கள் மற்றும் மருத்துவமனைகளுடன் இணைந்து செயல்படுகிறது மற்றும் இயற்கை பேரழிவுகளின் போது நிதி மற்றும் தன்னார்வலர்களுடன் அடியெடுத்து வைத்துள்ளது.
சுதா மூர்த்தியுடன் பணிபுரிந்த இன்ஃபோசிஸ் முன்னாள் சி.எஃப்.ஓ மற்றும் ஆரின் கேபிட்டலின் தலைவரான மோகன்தாஸ் பாய் இந்தியன் எக்ஸ்பிரஸ்ஸிடம் பேசுகையில், "அவர் தனது பணியில் உறுதியாக இருக்கிறார். ராஜஸ்தானில் அக்ஷய பத்ரா திறக்கப்பட்டபோது, அவர் அவர்களுக்காக சப்பாத்திகளை செய்து கொடுத்தது எனக்கு இன்னும் நினைவிருக்கிறது. அவர் ஒரு தாழ்மையான மனிதர், அவர் சமூகத்தின் அனைத்து அடுக்குகளுடனும் இணைக்க முடியும்." என்று கூறினார்.
2021 செப்டம்பரில், இன்ஃபோசிஸ் உருவாக்கிய வருமான வரி இ-ஃபைலிங் போர்ட்டலில் உள்ள குளறுபடிகளுக்கு மத்தியில், இன்ஃபோசிஸ் மற்றும் அவர் தலைமையிலான அறக்கட்டளை வேண்டுமென்றே இந்தியப் பொருளாதாரத்தை சீர்குலைக்க முயற்சிப்பதாகவும், நக்சல்கள், இடதுசாரிகள் மற்றும் "சிறிய சிறிய கும்பலுக்கு" உதவுவதாகவும், ஆர்.எஸ்.எஸ்-சின் இதழான பாஞ்சஜன்யா குற்றம் சாட்டியது.
இந்தக் கட்டுரை வெளியான மூன்று மாதங்களுக்குப் பிறகு, டிசம்பர் 31, 2021 அன்று இன்ஃபோசிஸ் அறக்கட்டளையின் தலைவராக சுதா மூர்த்தி ஓய்வு பெற்றார்.
நாவல்கள், புனைகதை அல்லாத, குழந்தைகள் புத்தகங்கள், பயணக் குறிப்புகள், தொழில்நுட்ப புத்தகங்கள் மற்றும் நினைவுக் குறிப்புகள் உட்பட 30-க்கும் மேற்பட்ட புத்தகங்களையும் 200 தலைப்புகளையும் சுதா மூர்த்தி பெற்றுள்ளார். அவர் இலக்கியத்திற்கான ஆர் கே நாராயண் விருதைப் பெற்றவர்.
சமீப வருடங்களில், பொது தளங்களில் அவரது அதிகரித்து வரும் இருப்பு, சமூக ஊடகங்களில் சுதா மூர்த்தி தீவிர ஆய்வுக்கு உட்படுத்தப்படுவதைக் கண்டது.
கடந்த ஆண்டு பிரபல உணவு நிகழ்ச்சியில் கலந்து கொண்ட சுதா மூர்த்தி, “எனக்கு மிகப்பெரிய பயம் என்னவென்றால், சைவ மற்றும் அசைவ உணவுகளுக்கு ஒரே கரண்டி பயன்படுத்தப்பட்டிருக்கலாம்” என்று கூறினார். அவர் "முட்டை கூட" சாப்பிடுவதில்லை என்றும், தன்னை ஒரு "சுத்த சைவ உணவு உண்பவர்" என்றும் கூறி, பிராமண ஆதிக்கம் என்றும் குற்றம் சாட்டி இருந்தார். இருப்பினும், பலர் அவரது உணவுத் தேர்வுகள் அவருடைய தனிப்பட்ட விஷயம் என்று கூறி அவருக்கு ஆதரவு கொடுத்தனர்.
முன்னதாக, கபில் ஷர்மாவின் நகைச்சுவை நிகழ்ச்சியில் தோன்றிய சுதா மூர்த்தி, லண்டனில் குடிவரவு அதிகாரி ஒருவரை சந்தித்ததை விவரித்தார். அவர் இங்கிலாந்தில் உள்ள தனது குடியிருப்பு முகவரியை 10, டவுனிங் ஸ்ட்ரீட் (அவரது மருமகன் மற்றும் இங்கிலாந்து பிரதமரின் அதிகாரப்பூர்வ இல்லம்) என்று கூறியபோது தான் கூறியதை அந்த அதிகாரி நம்ப மறுத்ததாகக் கூறினார். அந்த அதிகாரியின் பதில், சுதாவின் "சாதாரண புடவை" மற்றும் "எளிமையான தோற்றம்" காரணமாக இருந்தது.
இந்த முறையும், அவர் சமூக ஊடகங்களில் ட்ரோல் செய்யப்பட்டார். சமூக ஊடக பயனர்கள், அவர் நாட்டின் பணக்காரர்களில் ஒருவராக இருப்பதால் அவரது எளிய பெண் உருவம் கட்டமைக்கப்படுகிறது என்று கூறினர். சமூக ஊடக ட்ரோல் பற்றி சுதா மூர்த்திக்கு எப்போதும் கவலையில்லை. இப்போது, அவர் ராஜ்யசபா உறுப்பினராக பாராளுமன்றத்திற்கு வரும்போது, அவர் புதிய, தேசிய கவனத்தின் கீழ் இருப்பார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.